ഫ്‌ളോറിഡ: ഫോമായുടെ 2026-’28 ഭരണ സമിതിയിലേയ്ക്ക് പ്രസിഡന്റ് സ്ഥാനാര്‍ത്ഥിയായി മല്‍സരിക്കുന്ന മാത്യു വര്‍ഗീസിനെയും (ജോസ് ഫ്‌ളോറിഡ) ആര്‍.വി.പി കാന്‍ഡിഡേറ്റായി ജനവിധി തേടുന്ന സുശീല്‍ നാലകത്തിനെയും ഫ്‌ളോറിഡയിലെ പ്രമുഖ മലയാളി സംഘടനയായ നവകേരള അസോസിയേഷന്‍ എന്‍ഡോഴ്‌സ് ചെയ്തു. നവകേരള അസോസിയേഷന്റെ സ്ഥാപക നേതാവും മുന്‍ പ്രസിഡന്റും നിലവിലെ അഡൈ്വസറി ബോര്‍ഡ് ചെയര്‍മാനുമായി മാത്യു വര്‍ഗീസ് ഫോമായുടെ പ്രസിഡന്റായി വരുന്നത് നമ്മുടെ അസോസിയേഷനും സൗത്ത് ഫ്‌ളോറിഡയിലെ മലയാളികള്‍ക്കും തികച്ചും അഭിമാനകരമാണെന്നും അദ്ദേഹത്തെ സവകേരള അസോസിയേഷന്‍ ഏകകണ്ഠമായി നാമനിര്‍ദേശം ചെയ്യുന്നുവെന്നും പ്രസിഡന്റ് ലിജോ പണിക്കര്‍ പറഞ്ഞു.
അതോടൊപ്പം നവകേരള അസോസിയേഷന്റെ മുന്‍ പ്രസിഡന്റും ഇപ്പോഴത്തെ ട്രഷററുമായ സുശീല്‍ നാലകത്ത് ആര്‍.വി.പിയായി എത്തിയാല്‍ അത് നവകേരളയുടെ ചരിത്രത്തിലെ നാഴികക്കല്ലായിരിക്കുമെന്നും അദ്ദേഹം വ്യക്തമാക്കി. അസോസിയേഷന്റെ മുന്‍ പ്രസിഡന്റുമാരുള്‍പ്പെടെയുള്ളവരും നിലവിലെ ഭരണസമിതി അംഗങ്ങളും ഒരേ മനസോടെ ഇരുവരെയും വിജയിപ്പിക്കുന്നതിനുള്ള സജീവ പ്രവര്‍ത്തനങ്ങളുമായി മുന്നോട്ടു പോകാന്‍ യോഗം തീരുമാനിച്ചു.
അസോസിയേഷന്‍ പ്രസിഡന്റ് അധ്യക്ഷത വഹിച്ച യോഗത്തില്‍, സെക്രട്ടറി ലക്ഷ്മി സൂരജ്, വൈസ് പ്രസിഡന്റ് ദീപു സെബാസ്റ്റ്യന്‍, വുമണ്‍സ് ഫോറം ചെയര്‍ സഞ്ജു അബി ആനന്ദ്, കമ്മിറ്റി അംഗങ്ങളായ ജിന്‍സ് തോമസ്, അഞ്ജു മോഹന്‍, മുന്‍ പ്രസിഡന്റുമാരായ ഷീല ജോസ്, അബി ആനന്ദ്, ബാബു ചക്കിയത്ത്, ജോണ്‍ ഉണ്ണൂണി, ജോസ് പാണിക്കുളങ്ങര, ബിജോയ് എബ്രഹാം, ജെയിസ് പുളിക്കല്‍, മുന്‍ സെക്രട്ടറി അന്തോണി തോട്ടം തുടങ്ങിയവരും സംഘടനയുടെ അഭ്യുദയകാംക്ഷികളും സ്ഥാനാര്‍ത്ഥികള്‍ക്ക് ആശംസകള്‍ നേര്‍ന്നു.
തന്റെ സംഘടനാ പ്രവര്‍ത്തനങ്ങള്‍ക്ക് ചവിട്ടുപടിയായ നവകേരള അസോസിയേനോടുള്ള കടപ്പാട് അറിയിച്ച മാത്യു വര്‍ഗീസ് കമ്മിറ്റി അംഗങ്ങള്‍ക്കും നവകേരള കുടുംബാംഗഹങ്ങള്‍ക്കും ഹൃദയപൂര്‍വം നന്ദി പറഞ്ഞു. ‘ടീം പ്രോമീസ് ഫോമാ’ പാനലിലാണ് ഫോമായുടെ സ്ഥാപക നേതാവു കൂടിയായ മാത്യു വര്‍ഗീസ് മല്‍സരിക്കുന്നത്. തന്നില്‍ വിശ്വാസമര്‍പ്പിച്ച ഈ മാതൃസംഘടനയുടെ ഓരോ വ്യക്തികള്‍ക്കും സുശീല്‍ നാലകത്തും കൃതജ്ഞത പ്രകാശിപ്പിച്ചു.
