തിരുവനന്തപുരം: പൂവാർ കരിങ്കുളത്ത് 20 വയസുകാരനെ പെണ്‍സുഹൃത്തിന്റെ വീടിന് സമീപത്തെ പൊട്ടക്കിണറ്റില്‍ മരിച്ച നിലയില്‍ കണ്ടെത്തിയ സംഭവത്തില്‍ വിശദമായ അന്വേഷണം ശാസ്ത്രീയ പരിശോധനക്ക് ശേഷം.
കിണറ്റില്‍ നിന്ന് കണ്ടെത്തിയ മൊബൈല്‍ ഫോണ്‍, ഭക്ഷണ പൊതി എന്നിവ പരിശോധനക്ക് അയക്കും. സംഭവ ദിവസം മകളും മുത്തച്ഛനും മാത്രമാണ് വീട്ടില്‍ ഉണ്ടായിരുന്നത് എന്നാണ് പെണ്‍കുട്ടിയുടെ അമ്മയുടെ മൊഴി.കഴിഞ്ഞമാസം 23 നാണ് സാനോജിനെ പൊട്ടക്കിണറ്റില്‍ മരിച്ച നിലയില്‍ കണ്ടെത്തിയത്. സുഹൃത്തിന്റെ വീട്ടിലേക്ക് പോകുകയാണെന്നും, രാത്രി അവിടെ തങ്ങും എന്നും പറഞ്ഞാണ് യുവാവ് വീട്ടില്‍ നിന്ന് ഇറങ്ങിയത്. എന്നാല്‍ സുഹൃത്തുമായി ബന്ധപ്പെട്ടപ്പോഴാണ് യുവാവിനെ കാണാതായ വിവരം കുടുംബം അറിയുന്നത്.പിന്നീട് മൂന്ന് ദിവസത്തിന് ശേഷമായിരുന്നു പെണ്‍സുഹൃത്തിന്റെ വീട്ടിലെ പൊട്ടക്കിണറ്റില്‍ നിന്ന് സനോജിന്റെ മൃതദേഹം കണ്ടെത്തുന്നത്.
ആഴവും, വെള്ളവും കുറഞ്ഞ കിണറ്റില്‍ യുവാവിന്റെ മൃതദേഹം കണ്ടെത്തിയത് സംശയങ്ങള്‍ക്ക് കാരണമായി. സംഭവം കൊലപാതകം ആണെന്നും ദുരൂഹതയുണ്ടെന്നും കുടുംബം ആരോപിച്ചിരുന്നു.ഇതിനിടെയാണ് സാനോജിന്റെ മൊബൈല്‍ ഫോണ്‍ കിണറ്റില്‍ നിന്ന് കണ്ടെത്തിയത്. എന്നാല്‍ രണ്ട് തവണ പരിശോധന നടത്തിയിട്ടും ഫോണ്‍ ലഭിച്ചിരുന്നില്ലെന്നാണ് ബന്ധുക്കളുടെ ആരോപണം. സംഭവദിവസം സനോജ് പെണ്‍സുഹൃത്തിന്റെ നിർദേശപ്രകാരം ഷവർമ വാങ്ങിയിരുന്നതായുമുള്ള വിവരങ്ങള്‍ നേരത്തെ പുറത്തുവന്നിരുന്നു.
