📱വാർത്തകൾ ഒറ്റനോട്ടത്തിൽ📱 – 2025 | മെയ് 26 | തിങ്കൾ ✍ കപിൽ ശങ്കർ

🔹സംസ്ഥാനത്ത് മഴക്കെടുതിയില്‍ ഏഴു മരണം. കോഴിക്കോട് സഹോദരങ്ങള്‍ ഷോക്കേറ്റ് മരിച്ചു. കോടഞ്ചേരി ചന്ദ്രന്‍കുന്നേല്‍ ബിജു- ഷീബ ദമ്പതികളുടെ മക്കളായ നിധിന്‍ (14), എബിന്‍ (10) എന്നിവരാണ് മരിച്ചത്. തേക്കിന്റെ കൊമ്പ് കാറ്റത്ത് ഒടിഞ്ഞ് വൈദ്യുതി ലൈനില്‍ പതിക്കുകയായിരുന്നു. പിന്നാലെ വൈദ്യുതി ലൈന്‍ പൊട്ടി തോട്ടില്‍ വീണാണ് അപകടം. ഈ സമയം രണ്ടുപേരും തോട്ടില്‍ മീന്‍ പിടിക്കാന്‍ ഇറങ്ങിയതായിരുന്നുവെന്നാണ് വിവരം. കോഴിക്കോട് ഓടുന്ന ബൈക്കിന് മുകളിലേക്ക് തെങ്ങ് വീണാണ് ഒരാള്‍ മരിച്ചത്. ഇടുക്കി പാമ്പാടുംപാറയില്‍ മരം വീണ് തൊഴിലാളി സ്ത്രീ മരിച്ചു. കൊടുങ്ങല്ലൂരില്‍ വഞ്ചി മറിഞ്ഞ് ഒരാള്‍ മരിച്ചു. പാലക്കാട് മഴക്കെടുതിയില്‍ രണ്ട് പേരാണ് മരിച്ചത്.

🔹സംസ്ഥാനത്ത് അതിതീവ്ര മഴയും കാറ്റും കൂടുതല്‍ ശക്തി പ്രാപിക്കുന്നു. പത്തനംതിട്ട, കോട്ടയം, എറണാകുളം, ഇടുക്കി, തൃശ്ശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് എന്നീ പതിനൊന്ന് ജില്ലകളില്‍ റെഡ് അലര്‍ട്ട് പ്രഖ്യാപിച്ചിരിക്കുകയാണ്. മറ്റ് എല്ലാ ജില്ലകളിലും ഓറഞ്ച് അലര്‍ട്ടാണ്. നാളെയോടെ ബംഗാള്‍ ഉള്‍ക്കടലില്‍ പുതിയ ന്യൂനമര്‍ദ്ദം രൂപപ്പെടും.

🔹സംസ്ഥാനത്ത് മഴ കനത്ത സാഹചര്യത്തില്‍ 10 ജില്ലകളിലെ വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ചു. പത്തനംതിട്ട, കോട്ടയം, ഇടുക്കി, എറണാകുളം, തൃശൂര്‍, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലെ വിദ്യാഭ്യാസ സ്ഥാപനങ്ങള്‍ക്കാണ് ഇന്ന് അവധി പ്രഖ്യാപിച്ചിട്ടുള്ളത്. സ്പെഷ്യല്‍ ക്ലാസുകളും ട്യൂഷന്‍ ക്ലാസുകളുമുള്‍പ്പെടെ ഇന്ന് വയ്ക്കരുതെന്നും വിവിധ ജില്ലകളിലെ കലക്ടര്‍മാര്‍ അറിയിച്ചിട്ടുണ്ട്.

🔹കോഴിക്കോട് ജില്ലയിലെ വിലങ്ങാട് മഞ്ഞച്ചീളിയില്‍ 16 കുടുംബങ്ങളില്‍ നിന്നായി 58 പേരെ ദുരിതാശ്വാസ ക്യാമ്പിലേക്ക് മാറ്റി. ഉരുള്‍പൊട്ടല്‍ ഭീതി നിലനില്‍ക്കുന്ന പ്രദേശത്തെ കുടുംബങ്ങളെയാണ് മാറ്റിയത്. വിലങ്ങാട് സെന്റ് ജോര്‍ജ്ജ് ഹൈസ്‌കൂളില്‍ സജ്ജീകരിച്ച ദുരിതാശ്വസ ക്യാമ്പിലേക്കാണ് ഇവരെ മാറ്റി താമസിപ്പിച്ചത്. മണ്ണിടിച്ചല്‍ , ഉരുള്‍ പൊട്ടല്‍ ഭീഷണി നിലനില്‍ക്കുന്ന പന്നിയേരി ഉന്നതിയില്‍ നിന്ന് കൂടുതല്‍ കുടുംബങ്ങള്‍ ബന്ധുവീടുകളിലേക്കും, സുരക്ഷിത സ്ഥാനങ്ങളിലേക്കും താമസം മാറി.

🔹കടലില്‍ വീണ കൂടുതല്‍ കണ്ടെയിനറുകള്‍ കരക്ക് അടിയാന്‍ സാധ്യതയുള്ളതിനാല്‍ അതീവ ജാഗ്രതയില്‍ തീരദേശം. കടലില്‍ വീണ 13 കണ്ടെയ്നറുകളില്‍ കാല്‍സ്യം കാര്‍ബൈഡ് ഉള്ളതിനാല്‍ വെള്ളവുമായി ചേര്‍ന്നാല്‍ സ്ഫോടനത്തിന് സാധ്യതയുണ്ടെന്നും പൊതുജനം ജാഗ്രത പാലിക്കണമെന്നും ദുരന്തനിവാരണ വകുപ്പ് ആവര്‍ത്തിച്ച് മുന്നറിയിപ്പ് നല്‍കി. കൊല്ലത്തും ആലപ്പുഴയിലും കണ്ടെയ്നറുകള്‍ കരക്കടിഞ്ഞിട്ടുണ്ട്. തറയില്‍ക്കടവ് ഭാഗത്ത് അടിഞ്ഞത് കണ്ടെയ്നറുകള്‍ തകര്‍ന്ന നിലയിലാണ്. വെള്ളത്തിന്റെ നിറം കറുപ്പ് നിറത്തിലാണ് കാണുന്നത്.

🔹ദേശീയപാത രാമനാട്ടുകര-വളാഞ്ചേരി റീച്ചില്‍ വീണ്ടും നിര്‍മ്മാണത്തില്‍ അപാകത. മലപ്പുറം കാക്കഞ്ചേരി ഭാഗത്ത് റോഡ് ഇരുപത്തഞ്ച് മീറ്ററോളം വിണ്ടു കീറി. ഇന്നലെ 12 മണിയോടെയാണ് സംഭവം നാട്ടുകാരുടെ ശ്രദ്ധയില്‍പ്പെട്ടത്. ഈ ഭാഗം വഴിയുള്ള ഗതാഗതം തല്‍ക്കാലത്തേക്ക് നിര്‍ത്തിവെച്ചു. സര്‍വീസ് റോഡ് വഴിയാണ് വാഹനങ്ങള്‍ പോകുന്നത്. ഇതേ റീച്ചിലെ കുരിയാട് , തലപ്പാറ, മമ്മാലിപ്പടി എന്നിവിടങ്ങളിലെ നിര്‍മ്മാണ അശാസത്രീയതകള്‍ കഴിഞ്ഞ ദിവസങ്ങളില്‍ പുറത്തുവന്നിരുന്നു.

🔹നിലമ്പൂര്‍ നിയോജക മണ്ഡലത്തില്‍ ജൂണ്‍ 19 ന് വോട്ടെടുപ്പ് നടത്തുമെന്ന് തെരഞ്ഞെടുപ്പ് കമ്മീഷന്‍ അറിയിച്ചു. വോട്ടെണ്ണല്‍ ജൂണ്‍ 23ന് നടക്കും. ഉപതെരഞ്ഞെടുപ്പ് വിജ്ഞാപനം ഇന്നുണ്ടാകും. പത്രിക സമര്‍പ്പിക്കാനുള്ള അവസാന തിയ്യതി ജൂണ്‍ 2 ആണ്. ജൂണ്‍ 3ന് സൂക്ഷ്മ പരിശോധന നടക്കും. പത്രിക പിന്‍വലിക്കാനുള്ള അവസാന തിയ്യതി ജൂണ്‍ 5 ആണ്.

🔹നിലമ്പൂര്‍ ഉപതിരഞ്ഞെടുപ്പില്‍ യുഡിഎഫ് സ്ഥാനാര്‍ഥി ചുരുങ്ങിയത് 27,000 വോട്ടിന്റെ ഭൂരിപക്ഷത്തില്‍ വിജയിക്കുമെന്ന് മുന്‍ എംഎല്‍എയും തൃണമൂല്‍ കോണ്‍ഗ്രസ് നേതാവുമായ പി.വി. അന്‍വര്‍. പിണറായിസവും പുതുതായി വന്ന മരുമോനിസവും യുഡിഎഫ് വിജയത്തിന് കാരണമാകുമെന്നും പിണറായിസത്തിന് ജനങ്ങള്‍ മറുപടി നല്‍കുമെന്നും അദ്ദേഹം പറഞ്ഞു. 2026 ലെ തെരഞ്ഞെടുപ്പ് എങ്ങനെ ആകുമെന്നതിന്റെ ഒരു ഡെമോ ആയിരിക്കും നിലമ്പൂരിലെ തെരഞ്ഞെടുപ്പെന്നും പിണറായിസത്തെ അവസാനിപ്പിക്കാനാണ് താന്‍ എല്ലാം ത്യജിച്ചതെന്നും അന്‍വര്‍ പറഞ്ഞു.

🔹നിലമ്പൂരില്‍ മത്സരിക്കണോ വേണ്ടയോ എന്നതില്‍ ബിജെപിയില്‍ രണ്ട് അഭിപ്രായം. നിലമ്പൂരിലേത് അടിച്ചേല്പിച്ച തെരഞ്ഞെടുപ്പ് എന്നാണ് പാര്‍ട്ടി വിലയിരുത്തല്‍. ആര്‍ക്കും ഗുണം ചെയ്യാത്ത തെരഞ്ഞെടുപ്പാണെന്നും തദ്ദേശ തെരഞ്ഞെടുപ്പിലാണ് ശ്രദ്ധ വേണ്ടതെന്നും യോഗത്തില്‍ അഭിപ്രായം ഉയര്‍ന്നു. ഉപതെരഞ്ഞെടുപ്പ് സംബന്ധിച്ച് ഓണ്‍ലൈന്‍ കോര്‍ കമ്മിറ്റിയിയില്‍ അന്തിമ തീരുമാനം ആയില്ല.

🔹കോഴിക്കോട് രൂപതയെ അതിരൂപതയായി ഉയര്‍ത്തി. ആദ്യ ആര്‍ച്ച് ബിഷപ്പായി ഡോ. വര്‍ഗീസ് ചക്കാലയ്ക്കല്‍ സ്ഥാനാരോഹണം ചെയ്തു. കോഴിക്കോട് സെന്റ് ജോസഫ് ദേവാലയത്തിലായിരുന്നു ചടങ്ങുകള്‍. വ്യത്യസ്ത രൂപതകളില്‍ നിന്നെത്തിയ മതമേലധ്യക്ഷന്‍മാരും രാഷ്ട്രീയ- സാമൂഹിക- സാംസ്‌കാരിക മേഖലയില്‍നിന്നുള്ളവരും ചടങ്ങില്‍ പങ്കെടുത്തു.

🔹മൂന്നാറില്‍ തെരുവുനായ ആക്രമണം. വിനോദ സഞ്ചാരികള്‍ ഉള്‍പ്പെടെ നിരവധി പേര്‍ക്ക് നായയുടെ കടിയേറ്റു. കടിയേറ്റ 12 പേരാണ് അടിമാലി താലൂക്ക് ആശുപത്രിയിലെത്തിയത്. വിനോദ സഞ്ചാരികള്‍ക്ക് പുറമെ പ്രദേശവാസികള്‍ക്കും കടിയേറ്റു.

🔹നിക്ഷേപകരെ കബളിപ്പിച്ച് മുന്നൂറ് കോടിയിലേറെ രൂപ തട്ടിച്ചെന്ന കേസില്‍ ദി ഫോര്‍ത്ത് ഓണ്‍ലൈന്‍ ചാനല്‍ ഉടമകള്‍ അറസ്റ്റില്‍. മാതൃകമ്പനിയായ ഫാം ഫെഡ് കമ്പനിയുടെ ചെയര്‍മാന്‍ രാജേഷ് പിള്ള, മാനേജിംഗ് ഡയറക്ടര്‍ അഖിന്‍ ഫ്രാന്‍സിസ് എന്നിവരെയാണ് തിരുവനന്തപുരം മ്യൂസിയം പൊലീസ് അറസ്റ്റ് ചെയ്തത്. ഫാം ഫെഡിന്റെ പേരില്‍ നടത്തിയ തട്ടിപ്പില്‍ ഇവരുടെ അടുത്ത ബന്ധുക്കള്‍ ഉള്‍പ്പെടെ നാല് ഡയറക്ടര്‍മാരും പ്രതികളാണ്.

🔹സംസ്ഥാന സര്‍ക്കാരിനെതിരെ ബിജെപിയുടെ ‘കേരളം വീണ പതിറ്റാണ്ട്’ എന്ന പ്രതിഷേധ പരിപാടിക്ക് സെക്രട്ടറിയേറ്റിനു മുന്നില്‍ തുടക്കമായി. വിലക്കയറ്റവും തൊഴില്‍ ഇല്ലായ്മയുമാണ് 9 വര്‍ഷത്തെ പിണറായി സര്‍ക്കാര്‍ ഭരണം കൊണ്ട് ഉണ്ടായതെന്ന് ബിജെപി സംസ്ഥാന പ്രസിഡണ്ട് രാജീവ് ചന്ദ്രശേഖര്‍ പറഞ്ഞു. മോഡി സര്‍ക്കാര്‍ പദ്ധതിയില്‍ പരസ്യം ഒട്ടിച്ച് സ്വന്തം എന്ന് പറയല്‍ ആണ് പിണറായി സര്‍ക്കാരിന്റെ ഏക പണിയെന്നും സര്‍ക്കാരാകട്ടെ റീല്‍സിനു കാശും കൊടുത്ത് ആഘോഷിക്കുന്നുവെന്നും അദ്ദേഹം പറഞ്ഞു.

🔹വെഞ്ഞാറമൂട് കൂട്ടകൊലക്കേസിലെ പ്രതി അഫാന്‍ പൂജപ്പുര സെന്‍ട്രല്‍ ജയിലില്‍ ആത്മഹത്യക്ക് ശ്രമിച്ച സംഭവത്തില്‍ ജയില്‍ ഉദ്യോഗസ്ഥരുടെ ഭാഗത്ത് വീഴ്ച വന്നിട്ടില്ലെന്ന് ജയില്‍ സൂപ്രണ്ടിന്റെ റിപ്പോര്‍ട്ട്. ഉദ്യോഗസ്ഥന്റെ സമയോചിതമായ ഇടപെടല്‍ കാരണമാണ് പ്രഥമശുശ്രൂഷ നല്‍കി ഉടന്‍ ആശുപത്രിയിലേക്ക് മാറ്റിയത്. സുരക്ഷ ബ്ലോക്കില്‍ ഇതേ സമയം മറ്റ് തടവുകാരുടെ മേല്‍നോട്ടവും അസി. പ്രിസണ്‍ ഓഫീസര്‍ക്കുണ്ടായിരുന്നുവെന്നും ജയില്‍ മേധാവിക്ക് ജയില്‍ സൂപ്രണ്ട് റിപ്പോര്‍ട്ട് നല്‍കി.തിരുവനന്തപുരം മെഡിക്കല്‍ കോളേജ് ആശുപത്രിയിലെ തീവ്രപരിചരണവിഭാഗത്തില്‍ അതീവ ഗുരുതരാവസ്ഥയില്‍ തുടരുകയാണ് അഫാന്‍.

🔹കൊച്ചിയില്‍ അപകടത്തില്‍പ്പെട്ട കപ്പല്‍ പൂര്‍ണ്ണമായും മുങ്ങിയതായി ചീഫ് സെക്രട്ടറി തല യോഗത്തിന് ശേഷം സര്‍ക്കാര്‍ വാര്‍ത്താക്കുറിപ്പില്‍ അറിയിച്ചു. അപകടത്തില്‍പ്പെട്ട കപ്പലില്‍ നിന്നും ഇന്ധന ചോര്‍ച്ചയുണ്ടാകുന്നുണ്ടെന്നും എണ്ണപ്പാട എവിടെയും എത്താമെന്നുമാണ് മുന്നറിയിപ്പ്. നിലവില്‍ കോസ്റ്റ് ഗാര്‍ഡ് രണ്ട് കപ്പലുകള്‍ ഉപയോഗിച്ച് എണ്ണ തടയാന്‍ നടപടി സ്വീകരിച്ച് വരുന്നു.

🔹കൊച്ചി പുറങ്കടലില്‍ മുങ്ങിയ കപ്പലിലെ ഒരു കണ്ടെയ്നര്‍ കൊല്ലം തീരത്തടിഞ്ഞു. കരുനാഗപ്പള്ളി ചെറിയഴീക്കലാണ് ഒഴിഞ്ഞ നിലയിലുള്ള കണ്ടെയ്നര്‍ തീരത്തടിഞ്ഞത്. കടല്‍ഭിത്തിയിലേക്ക് ഇടിച്ചുകയറിയനിലയിലായിരുന്നു കണ്ടെയ്നര്‍ കണ്ടെത്തിയത്. കളക്ടര്‍ എന്‍. ദേവിദാസ്, സിറ്റി പോലീസ് കമ്മിഷണര്‍ കിരണ്‍ നാരായണന്‍ എന്നിവരുടെ നേതൃത്വത്തില്‍ അധികൃതര്‍ സ്ഥലത്തെത്തി പരിശോധന നടത്തി. സമീപത്തെ വീട്ടുകാരെ മാറ്റിപ്പാര്‍പ്പിച്ചു.

🔹ഫെബ്രുവരി ആറിന് തുര്‍ക്കിയിലും സിറിയയിലും ഭൂകമ്പമുണ്ടായപ്പോള്‍ മോദി സര്‍ക്കാര്‍ പ്രഖ്യാപിച്ച ഓപ്പറേഷന്‍ ദോസ്തിന്റെ ഭാഗമായി കേരളം തുര്‍ക്കിക്ക് ധനസഹായം നല്‍കിയതിനെ എടുത്തുപറഞ്ഞു വിമര്‍ശിക്കാന്‍ ശശി തരൂര്‍ വ്യഗ്രത കാണിച്ചത് തന്നെ അമ്പരപ്പിക്കുകയാണെന്ന് ജോണ്‍ ബ്രിട്ടാസ്. മാനുഷികപ്രവര്‍ത്തനങ്ങളില്‍ ഇന്ത്യ ഉള്‍പ്പെടെയുള്ള രാജ്യങ്ങള്‍ രാഷ്ട്രീയ ശത്രുതയും അഭിപ്രായവ്യത്യാസങ്ങളും ഒരിക്കലും പ്രകടിപ്പിച്ചിട്ടില്ലെന്നും ബ്രിട്ടാസ് പറഞ്ഞു.

🔹എറണാകുളം പനമ്പള്ളി നഗറില്‍ ഫ്ലാറ്റിന്റെ പില്ലര്‍ തകര്‍ന്നു. പില്ലര്‍ തകര്‍ന്ന ഫ്ലാറ്റ് ടവറില്‍ 24 കുടുംബങ്ങളാണ് താമസിക്കുന്നത്. ഇവരെ ഇവിടെ നിന്നും മാറ്റി. പനമ്പള്ളി നഗറിലെ ആര്‍ഡിഎസ് അവന്യു വണ്‍ എന്ന ഫ്ലാറ്റിന്റെ ഒരു പില്ലറാണ് തകര്‍ന്നത്. സംഭവത്തില്‍ ആളപായമില്ല. സംഭവത്തെ തുടര്‍ന്ന് കോര്‍പ്പറേഷന്‍ എന്‍ജിനീയറിങ് വിഭാഗം എത്തി പരിശോധന നടത്തി.

🔹പെട്രോള്‍ പമ്പുകളിലെ ജീവനക്കാരില്‍ നിന്ന് പണം പിടിച്ചു പറിച്ച കേസിലെ രണ്ടുപേര്‍ തിരിവനന്തപുരത്ത് പോലീസ് പിടിയില്‍. മര്യാപുരം സ്വദേശി ബിബിജിത്ത്, കടകംപള്ളി സ്വദേശി ആനന്ദന്‍ എന്നിവരാണ് പിടിയിലായത്. മോഷ്ടിച്ച ബൈക്കിലെത്തിയ പ്രതികള്‍ ശനിയാഴ്ച്ച പുലര്‍ച്ചെ ഒരു മണിക്കായിരുന്നു നെയ്യാറ്റിന്‍കര ഗ്രാമം ജംഗ്ഷനിലെ പെട്രോള്‍ പമ്പിലെ ജീവനക്കാരനില്‍ നിന്ന് ഇരുപതിനായിരം രൂപ അടങ്ങുന്ന ബാഗ് പിടിച്ചു പറിച്ചത്. പിന്നാലെ വിഴിഞ്ഞം മുക്കോലയിലെ പമ്പിലെത്തിയ പ്രതികള്‍ ജീവനക്കാരനില്‍ നിന്ന് 7500 രൂപയടങ്ങുന്ന ബാഗ് പിടിച്ചു പറിച്ചു. സമാനമായ രീതിയില്‍ പ്രതികള്‍ വെള്ളിയാഴ്ച്ച പുലര്‍ച്ച മൂന്നു മണിയോടെ പൊഴിയൂര്‍ ഉച്ചക്കട പമ്പില്‍ നിന്ന് 8500 രൂപയും കവര്‍ന്നിരുന്നു.

🔹വയനാട് മാനന്തവാടി അപ്പപ്പാറയില്‍ യുവതിയുടെ കൊലപാതകത്തില്‍ പ്രതി പിടിയില്‍. യുവതിയുടെ കാണാതായ കുഞ്ഞിനെ പ്രതിക്കൊപ്പം പൊലീസ് കണ്ടെത്തി. കൊല നടത്തിയശേഷം പ്രതി ദിലീഷ് ഒമ്പതുവയസുകാരിയെ തട്ടിക്കൊണ്ടുപോവുകയായിരുന്നു. അപ്പാപ്പാറയിലെ എസ്റ്റേറ്റിലെ വീടിന് സമീപമുള്ള വനമേഖലയില്‍ നിന്നാണ് കുട്ടിയെയും പ്രതിയെയും കണ്ടെത്തിയത്..

🔹പത്തനംതിട്ടയില്‍ ഹോം നഴ്സിന്റെ മര്‍ദ്ദനമേറ്റ് ചികിത്സയില്‍ കഴിഞ്ഞ വിമുക്ത ഭടനായ 59കാരന്‍ മരിച്ച സംഭവത്തില്‍ കൂടുതല്‍ വിവരങ്ങള്‍ പുറത്ത്. അല്‍ഷിമേഴ്സ് രോഗബാധിതനായ ശശിധരന്‍പിള്ളയെ ഒരു മാസം മുന്‍പാണ് പരിചരിക്കാനെത്തിയ ഹോം നഴ്സ് വിഷ്ണു അതിക്രൂരമായി മര്‍ദ്ദിച്ചത്. ഗുരുതര പരിക്കേറ്റ് ചികിത്സയില്‍ കഴിഞ്ഞിരുന്ന ശശിധരന്‍ ഇന്നലെയാണ് മരിച്ചത്. ശശിധരനെ വിഷ്ണു വീടിനുള്ളിലൂടെ കാലില്‍ പിടിച്ച് വലിച്ചിഴച്ച് കൊണ്ടുപോകുന്ന സിസിടിവി ദൃശ്യങ്ങളടക്കം പുറത്ത് വന്നിട്ടുണ്ട്.

🔹നെടുമങ്ങാട് പഴകുറ്റിയില്‍ കാറും ട്രാവലറും കൂട്ടിയിടിച്ചുണ്ടായ അപകടത്തില്‍ ഒരു മരണം. വെമ്പായം തേക്കട സ്വദേശി അമീര്‍(35) ആണ് മരിച്ചത്. പഴകുറ്റി വെമ്പായം റോഡിലായിരുന്നു അപകടം. തേക്കട സ്വദേശികളായ ഷാഹിന (28), അസ്ജാന്‍ (10), ആലീഫ് (8) എന്നിവര്‍ക്കാണ് പരിക്കേറ്റത്.

🔹സൗദി ബാലന്‍ കൊല്ലപ്പെട്ട കേസില്‍ റിയാദിലെ ജയിലില്‍ കഴിയുന്ന കോഴിക്കോട് ഫറോക്ക് കോടമ്പുഴ സ്വദേശി മച്ചിലകത്ത് അബ്ദുല്‍ റഹീമിന് 20 വര്‍ഷം തടവ് ശിക്ഷ. റിയാദ് ക്രിമിനല്‍ കോടതിയില്‍ സൗദി സമയം ഇന്ന് രാവിലെ 9.30ന് നടന്ന സിറ്റിങ്ങിലാണ് തീര്‍പ്പുണ്ടായത്. ഇതുവരെ അനുഭവിച്ച തടവുകാലം കഴിഞ്ഞുള്ള ശിക്ഷ അനുഭവിച്ചാല്‍ മതി. അതിനുശേഷം ജയില്‍ മോചനമുണ്ടാവും. 2026 ഡിസംബറില്‍ കേസിന് 20 വര്‍ഷം തികയും.

🔹എറണാകുളം സിയാൽ കൺവെൻഷൻ സെൻ്ററിൽ നാളെ നടത്താനിരുന്ന മുഖ്യമന്ത്രിയുടെ വനിതകളുമായുള്ള മുഖാമുഖം പരിപാടി താൽക്കാലികമായി മാറ്റിവച്ചു. ജനപ്രതിനിധികൾക്കും ഉദ്യോഗസ്ഥർക്കും ശക്തമായ മഴയെ തുടർന്ന് അവരവരുടെ പ്രദേശങ്ങളിൽ കാലവർഷ കെടുതിയെ തുടർന്നുള്ള ഉത്തരവാദിത്തങ്ങൾ നിർവഹിക്കാനുള്ളത് കൊണ്ടാണ് മുഖാമുഖം പരിപാടി താൽക്കാലികമായി മാറ്റിവയ്ക്കുന്നത്.

🔹കേരളത്തിൽ സർവീസ് നടത്തുന്ന ചില ട്രെയിനുകൾ റദ്ദാക്കുകയും മറ്റു ചിലത് വൈകിയും ഓടുന്നു. ഇന്ന് രാവിലെ 6.15-ന് തിരുവനന്തപുരം നോര്‍ത്തില്‍ നിന്ന് പുറപ്പെടേണ്ട കോട്ടയം വഴിയുള്ള കോര്‍ബ സൂപ്പര്‍ ഫാസ്റ്റ് റദ്ദാക്കി. മലബാര്‍ എക്സ്‌പ്രസ്സ് രണ്ട് മണിക്കൂര്‍ വൈകി ഓടുകയാണ്. രാജ്യറാണി എക്സ്‌പ്രസ്സ് 5.35 മണിക്കൂര്‍ വൈകിയാണ് ഓടുന്നത്. ലോകമാന്യതിലക്- തിരുവനന്തപുരം നേത്രാവതി എക്‌സ്പ്രസ്സ് (16345) 3.30 മണിക്കൂര്‍ വൈകി ഓടിക്കൊണ്ടിരിക്കുകയാണ്. അതേസമയം, നിലമ്പൂരില്‍ നിന്ന് രാവിലെ 9:55ന് പുറപ്പെടുന്ന നിലമ്പൂര്‍- ഷൊര്‍ണൂര്‍ പാസഞ്ചര്‍ (56610) ഇന്ന് റദ്ദാക്കി. കോട്ടയം- നിലമ്പൂര്‍, നിലമ്പൂര്‍- കോട്ടയം എക്‌സ്പ്രസ്സ് ഇന്ന് നിലമ്പൂരിനും ഷൊര്‍ണൂറിനും ഇടയ്ക്ക് റദ്ദാക്കി.

🔹ജയ്പൂരിലെ നിരവധി മധുരപലഹാര കടകള്‍ മൈസൂര്‍ പാക്കിലെ പാക് എടുത്തുകളഞ്ഞത് കഴിഞ്ഞ ദിവസമായിരുന്നു. മൈസൂര്‍ ശ്രീ എന്നാണ് പേരുമാറ്റിയത്. ഇപ്പോഴിതാ, മൈസൂര്‍ രാജാവ് കൃഷ്ണരാജ വാഡിയാര്‍ നാലാമന്റെ ഭരണകാലത്ത് മൈസൂര്‍ പാക്ക് കണ്ടുപിടിച്ച പാചകക്കാരന്റെ ചെറുമകൻ ഈ നീക്കത്തോട് പ്രതികരിച്ചരിക്കുകയാണ്. കൊട്ടാര പാചകക്കാരനായ കാകാസുര മടപ്പയുടെ പിന്‍ഗാമിയായ എസ് നടരാജ് ആണ് പ്രതികരിച്ചത്. മൈസൂരില്‍ ഇപ്പോഴും ഇദ്ദേഹം മൈസൂര്‍ പാക്ക് ഉണ്ടാക്കി വില്‍ക്കുന്നുണ്ട്. ഇതിനെ മൈസൂര്‍ പാക്ക് എന്ന് വിളിക്കണമെന്നും പൂര്‍വികരുടെ ഈ കണ്ടുപിടുത്തത്തിന് മറ്റൊരു പേരില്ലെന്നും അദ്ദേഹം പറഞ്ഞു. എല്ലാ സ്മാരകങ്ങള്‍ക്കും പാരമ്പര്യത്തിനും അതിന്റേതായ പേരുള്ളതുപോലെ, മൈസൂര്‍ പാക്കിനും അതിന്റേതായ പേരുണ്ട്. അതില്‍ മാറ്റം വരുത്തുകയോ തെറ്റായി പ്രതിനിധീകരിക്കുകയോ ചെയ്യരുതെന്നും നടരാജ് പറഞ്ഞു.

🔹അമേരിക്കയിലെ പെന്‍സില്‍വേനിയയില്‍ കയാക്കിങ് അപകടത്തില്‍ പെട്ട സുഹൃത്തുക്കളെ രക്ഷിക്കാന്‍ ശ്രമിക്കുന്നതിനിടെ മലയാളി മരിച്ചു. ആലപ്പുഴ സ്വദേശിയായ ബിപിന്‍ മൈക്കിള്‍ (40) ആണ് മുങ്ങി മരിച്ചത്. അപകടത്തില്‍ പെട്ടവര്‍ ലൈഫ് ജാക്കറ്റ് ധരിച്ചിരുന്നതിനാല്‍ അവര്‍ രക്ഷപ്പെട്ടു. എന്നാല്‍ ലൈഫ് ജാക്കറ്റ് ഇല്ലാതിരുന്ന ബിപിന്റെ മൃതദേഹം പിന്നീട് ഫയര്‍ ഫോഴ്സ് എത്തിയാണ് കരക്കെടുത്തത്.

🔹ഓപ്പറേഷന്‍ സിന്ദൂര്‍ രാജ്യത്തെ ഓരോ കുടുംബങ്ങളിലുമെത്തിയെന്ന് മന്‍കി ബാതില്‍ പ്രധാനമന്ത്രി നരേന്ദ്ര മോദി. മാതാപിതാക്കള്‍ നിരവധി പെണ്‍കുട്ടികള്‍ക്ക് സിന്ദൂര്‍ എന്ന് പേര് നല്‍കുന്നുവെന്നും അഭിമാനാര്‍ഹമായ നിമിഷമാണിതെന്നും അദ്ദേഹം കൂട്ടിച്ചേര്‍ത്തു.

🔹മധ്യപ്രദേശില്‍ ആദിവാസി സ്ത്രീ ക്രൂര ബലാത്സംഗത്തിനിരയായി കൊല്ലപ്പെട്ടു. ഖല്‍വയ്ക്ക് സമീപത്തെ റോഷ്ണി ചൌക്കിലാണ് ക്രൂരമായ കൊലപാതകം നടന്നത്. രണ്ട് കുട്ടികളുടെ അമ്മയായ ആദിവാസി സ്ത്രീയാണ് അതിക്രൂരമായി ആക്രമിക്കപ്പെട്ടത്. പീഢനത്തിനു ശേഷം അക്രമികള്‍ സ്ത്രീയുടെ സ്വകാര്യ ഭാഗങ്ങളില്‍ ഇരുമ്പ് വടി തിരുകുകയും ഗര്‍ഭാശയം പുറത്തെടുക്കുകയും ചെയ്തതായാണ് പൊലീസ് വിശദമാക്കുന്നത്. രക്തം വാര്‍ന്ന നിലയില്‍ തറയില്‍ കിടക്കുകയായിരുന്ന സ്ത്രീയെ മകന്‍ അയല്‍ വീട്ടില്‍ നിന്നാണ് കണ്ടെത്തിയത്. സ്ത്രീയുടെ മൃതദേഹം കണ്ടെത്തിയ വീട്ടിലെ താമസക്കാരായ ഹരി പാല്‍വി, സുനില്‍ ധ്രുവെ എന്നീ യുവാക്കളെ പോലിസ് അറസ്റ്റ് ചെയ്തു്.

🔹അന്‍പതിനായിരം രൂപയ്ക്ക് ബെറ്റ് വച്ച് രണ്ടു കുപ്പി മദ്യം ഒന്നിച്ച് അകത്താക്കിയ വീഡിയോ ഇന്‍ഫ്ലുവന്‍സര്‍ക്ക് ദാരുണാന്ത്യം. രണ്ട് ബോട്ടില്‍ വിസ്‌കിയാണ് അന്‍പതിനായിരം രൂപയ്ക്ക് ബെറ്റ് വച്ച് തായ്ലാന്‍ഡ് സ്വദേശിയയായ വീഡിയോ ഇന്‍ഫ്ലുവന്‍സര്‍ തനകരന്‍ കാന്തീ അകത്താക്കിയത്.മദ്യം കഴിച്ച് തീര്‍ത്തതിന് പിന്നാലെ കുഴഞ്ഞുവീണ ഇയാളെ ആശുപത്രിയിലെത്തിച്ചെങ്കിലും മരിച്ചതായി ഡോക്ടര്‍മാര്‍ വിശദമാക്കുകയായിരുന്നു.

🔹ഇന്ത്യയും പാകിസ്താനും വെടിനിര്‍ത്തല്‍ ധാരണയിലെത്തിച്ചേര്‍ന്നത് ഉഭയസമ്മത പ്രകാരമാണെന്നും മൂന്നാംകക്ഷിയുടെ ഇടപെടലുണ്ടായിട്ടില്ലെന്നും ആവര്‍ത്തിച്ച് പ്രധാനമന്ത്രി നരേന്ദ്ര മോദി. ഡല്‍ഹിയില്‍ ഞായറാഴ്ച ചേര്‍ന്ന എന്‍ഡിഎ നേതാക്കളുടെ യോഗത്തില്‍ പ്രധാനമന്ത്രി ഇക്കാര്യം പറഞ്ഞതായി ഉന്നതവൃത്തങ്ങളെ ഉദ്ധരിച്ച് ദേശീയമാധ്യമങ്ങള്‍ റിപ്പോര്‍ട്ട് ചെയ്തു.

🔹പഞ്ചാബില്‍ ശിരോമണി അകാലിദള്‍ നേതാവിനെ അജ്ഞാതര്‍ വെടിവെച്ച് കൊന്നു. അമൃത്സറിലെ ജണ്ഡ്യാല ഗുരുവിലെ അകാലിദള്‍ കൗണ്‍സിലറായ ഹര്‍ജീന്ദര്‍ സിങ് ആണ് കൊല്ലപ്പെട്ടത്. ഞായറാഴ്ച ടൗണിലെ ഒരു ഗുരുദ്വാരയ്ക്ക് സമീപത്തായിരുന്നു സംഭവം.

🔹ഐപിഎല്ലില്‍ ഇന്നലെ നടന്ന ആദ്യ മത്സരത്തില്‍ ഈ സീസണിലെ നിലവിലെ ഒന്നാം സ്ഥാനക്കാരായ ഗുജറാത്ത് ടൈറ്റന്‍സിനെതിരെ പത്താം സ്ഥാനക്കാരായ ചെന്നൈ സൂപ്പര്‍ കിംഗ്സിന് 83 റണ്‍സിന്റെ തകര്‍പ്പന്‍ ജയം. ടോസ് നേടി ബാറ്റിംഗ് തിരഞ്ഞെടുത്ത ചെന്നൈ 57 റണ്‍സെടുത്ത ഡെവാള്‍ഡ് ബ്രെവിസിന്റേയും 52 റണ്‍സെടുത്ത ഡെവോണ്‍ കോണ്‍വേയുടേയും മികവില്‍ 5 വിക്കറ്റ് നഷ്ടത്തില്‍ 230 റണ്‍സെടുത്തു. എന്നാല്‍ മറുപടി ബാറ്റിംഗിനിറങ്ങിയ ഗുജറാത്തിന് 147 റണ്‍സ് നേടാനെ സാധിച്ചുള്ളൂ.

🔹ഐപിഎല്ലില്‍ ഇന്നലെ നടന്ന രണ്ടാമത്തെ മത്സരത്തില്‍ കൊല്‍ക്കത്ത നൈറ്റ് റൈഡേഴ്സിനെതിരെ സണ്‍റൈസേഴ്സ് ഹൈദരാബാദിന് 110 റണ്‍സിന്റെ തകര്‍പ്പന്‍ ജയം. ടോസ് നേടി ബാറ്റിംഗ് തിരഞ്ഞെടുത്ത ഹൈദരാബാദ് 39 പന്തില്‍ പുറത്താവാതെ 105 റണ്‍സ് നേടിയ ഹെന്റിച്ച് ക്ലാസന്റേയും 40 പന്തില്‍ 76 റണ്‍സെടുത്ത ട്രാവിസ് ഹെഡിന്റേയും മികവില്‍3 വിക്കറ്റ് നഷ്ടത്തില്‍ 278 റണ്‍സെടുത്തു. എന്നാല്‍ കൂറ്റന്‍ വിജയലക്ഷ്യം പിന്തുടര്‍ന്ന് ബാറ്റിംഗിനംത്തിയ കൊല്‍ക്കത്ത 168 റണ്‍സ് നേടിയപ്പോഴേയ്ക്കും എല്ലാവരും പുറത്തായി.

🔹എ ആര്‍ മുരുഗദോസ് രചനയും സംവിധാനവും നിര്‍വ്വഹിച്ച സല്‍മാന്‍ഖാന്‍ ചിത്രം സിക്കന്ദര്‍ ഒടിടിയില്‍ എത്തി. നെറ്റ്ഫ്ലിക്സിലൂടെയാണ് ചിത്രം സ്ട്രീമിംഗ് ആരംഭിച്ചിരിക്കുന്നത്. 200 കോടി ബജറ്റില്‍ ഒരുങ്ങിയ ചിത്രമാണിത്. പ്രമുഖ ട്രാക്കര്‍മാരായ സാക്നില്‍കിന്റെ കണക്ക് പ്രകാരം 33 ദിവസം കൊണ്ട് ചിത്രം ഇന്ത്യന്‍ ബോക്സ് ഓഫീസില്‍ നിന്ന് നേടിയ കളക്ഷന്‍ 130.89 കോടി ആയിരുന്നു ഗ്രോസ് കളക്ഷനാണ് ഇത്. ഇന്ത്യയില്‍ നിന്നുള്ള നെറ്റ് കളക്ഷന്‍ 110.36 കോടിയും ആയിരുന്നു. വിദേശത്തുനിന്ന് നേടിയ 54 കോടി ഉള്‍പ്പെടെ ചിത്രത്തിന്റെ ആഗോള ഗ്രോസ് 184.89 കോടി ആയിരുന്നു. അതായത് ബജറ്റ് മറികടക്കാന്‍ പോലും ചിത്രത്തിന് സാധിച്ചില്ല. അതേസമയം ചിത്രത്തിന്റെ മറ്റ് റൈറ്റ്സുകള്‍ കാരണം ചിത്രം റിലീസിന് മുന്‍പ് തന്നെ നിര്‍മ്മാതാവിനെ സേഫ് ആക്കിയതായി റിപ്പോര്‍ട്ടുകള്‍ എത്തിയിരുന്നു. ചിത്രത്തിന്റെ ഒടിടി റൈറ്റ്സിന് നെറ്റ്ഫ്ലിക്സ് നല്‍കിയത് 85 കോടിയാണെന്നാണ് റിപ്പോര്‍ട്ടുകള്‍.

💦 ഗുരുജിയുടെ വാക്കുകൾ (21)

വിനയമെന്നത് നമ്മളിലെ അഹംഭാവത്തിന് കടിഞ്ഞാണിടാനും ഒപ്പം നന്മകളെ വളർത്താനുമുള്ള മാർഗമാണ്. വിനയമുള്ളിടത്തേ വിദ്യയും കൃപയും ഒഴുകിയെത്തുകയുള്ളൂ. . വിനയമുള്ളവൻ ഒന്നിനെയും ഭയക്കുന്നില്ല. അവന് സമ്പത്തോ സ്ഥാനമാനങ്ങളോ നഷ്ടപ്പെടുമെന്ന വേവലാതിയില്ല. എളിമയുള്ളവൻ എല്ലായിടത്തും ബഹുമാനിക്കപ്പെടുന്നു. എന്നാൽ, അഹങ്കാരിയായ ഒരാൾ സർവരാലും ഉള്ളാലെ നിന്ദിക്കപ്പെടുന്നു. മറ്റേതെല്ലാം ഉത്തമഗുണങ്ങളുണ്ടെങ്കിലും ഒരാൾക്ക് വിനയമില്ലെങ്കിൽ മറ്റുള്ളവരുടെ പ്രീതിക്കും സ്നേഹത്തിനും അവൻ പാത്രമാവില്ല. അങ്ങനെയുള്ളവർ ജീവിതത്തിൽ പരാജയപ്പെടാനുള്ള സാധ്യത വലുതാണ്. മറിച്ച് ഒരുവന് ഏതെല്ലാം പേരായ്മയുണ്ടെങ്കിലും വിനയമുണ്ടെങ്കിൽ അവൻ എല്ലാവരുടെയും പ്രീതിക്കും ആനുകൂല്യങ്ങൾക്കും പാത്രമാകും. അവന് എളുപ്പം എവിടെയും വിജയമുണ്ടാകും.

തയ്യാറാക്കിയത്:
കപിൽ ശങ്കർ

3 Likes

📱വാർത്തകൾ ഒറ്റനോട്ടത്തിൽ📱 – 2025 | മെയ് 26 | തിങ്കൾ ✍ കപിൽ ശങ്കർ

💦 ഗുരുജിയുടെ വാക്കുകൾ (21)

തയ്യാറാക്കിയത്:
കപിൽ ശങ്കർ

സൗദി എണ്ണപ്പാടത്തിന് നേരെ ഹൂതി ആക്രമണം; രണ്ട് പേര്‍ക്ക് ദാരുണാന്ത്യം, ഇന്ത്യന്‍ പൗരനുള്‍പ്പെടെ പരിക്ക്.

റിലീഫ് കോർണറിന്റെ ഏഴാമത് വാർഷികയോഗം ഞായറാഴ്‌ച ഒക്ടോബർ 25

ബിഗ് ടെക് കമ്പനികൾക്കെതിരെ രൂക്ഷ വിമർശനവുമായി യു.എസ് കോൺഗ്രസ് അംഗം രാജ കൃഷ്ണമൂർത്തി

LEAVE A REPLY Cancel reply

Most Popular

അനർഹമായ മുൻഗണനാ റേഷൻ കാർഡുകൾ സറണ്ടർ ചെയ്യാം

രണ്ടാനമ്മയെ യുവാവ് തീകൊളുത്തി കൊന്നു

വഖഫ് ബോർഡ്‌ പുനഃസംഘടനയുമായി ബന്ധപ്പെട്ട് സിംഗിൾ ബെഞ്ച് ഉത്തരവിന് സ്റ്റേ ഇല്ല

കണ്ണൂരില്‍ മുഖ്യമന്ത്രി വി ഡി സതീശനെതിരെ ഫേസ്ബുക്കില്‍ പോസ്റ്റിട്ട രണ്ട്‌പേര്‍ക്കെതിരെ പൊലീസ് കേസെടുത്തു

Recent Comments

EDITOR PICKS

അനർഹമായ മുൻഗണനാ റേഷൻ കാർഡുകൾ സറണ്ടർ ചെയ്യാം

രണ്ടാനമ്മയെ യുവാവ് തീകൊളുത്തി കൊന്നു

വഖഫ് ബോർഡ്‌ പുനഃസംഘടനയുമായി ബന്ധപ്പെട്ട് സിംഗിൾ ബെഞ്ച് ഉത്തരവിന് സ്റ്റേ ഇല്ല

POPULAR POSTS

രണ്ടാനമ്മയെ യുവാവ് തീകൊളുത്തി കൊന്നു

സൗദി എണ്ണപ്പാടത്തിന് നേരെ ഹൂതി ആക്രമണം; രണ്ട് പേര്‍ക്ക് ദാരുണാന്ത്യം, ഇന്ത്യന്‍ പൗരനുള്‍പ്പെടെ പരിക്ക്.

ഇന്ത്യയിൽ വൈദ്യുത നിലയങ്ങളിൽ കൽക്കരി ക്ഷാമം രൂക്ഷം; വൈദ്യുതി പ്രതിസന്ധിക്ക് സാധ്യത.

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2025 | മെയ് 26 | തിങ്കൾ ✍ കപിൽ ശങ്കർ

💦 ഗുരുജിയുടെ വാക്കുകൾ (21)

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

തയ്യാറാക്കിയത്:
കപിൽ ശങ്കർ