🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 23 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

പ്രതിസന്ധികളെ മന:സാന്നിദ്ധ്യത്തോടെ നേരിടാൻ ആകട്ടെ
——————————————————————————————-

ഒരു വ്യാപാരി, ഒരു ധനീകൻ്റെ കടക്കാരനായി. കടം വളരെ വർദ്ധിച്ചപ്പോൾ ധനീകൻ ഒരുപാധി വച്ചു: വ്യാപാരിയുടെ സുന്ദരിയായ മകളേ തനിക്കു വിവാഹം കഴിച്ചു തന്നാൽ കടം ഇളവു ചെയ്യാം. സമ്മതമില്ലാതെ നിന്ന അച്ഛനോടും മകളോടും, ധനീകൻ വിട്ടുവീഴ്ചയ്ക്കു തയ്യാറായി. അദ്ദേഹം ഒരു സഞ്ചിയിൽ ഒരു കറുത്ത കല്ലും, ഒരു വെളുത്ത കല്ലും നിക്ഷേപിക്കും. മകൾ കറുത്ത കല്ലെടുത്താൽ, പണം തരേണ്ട; കല്യാണം കഴിക്കണം. വെളുത്ത കല്ലെടുത്താൽ, പണവും കല്യാണവും വേണ്ട.

സൂത്രശാലിയായ ധനീകൻ, രണ്ടു കറുത്ത കല്ലുകൾ സഞ്ചിലിടുന്നത് മകൾ കണ്ടു. തന്ത്രശാലിയായ അവൾ, ഒരു കല്ലെടുത്ത് മന: പൂർവ്വം പെട്ടന്ന് താഴേക്കിട്ടു. മറ്റു കല്ലുകളുടെ കൂടെ വീണതുകൊണ്ട് അതു തിരിച്ചറിയാനായില്ല. അവർ പറഞ്ഞു: “സഞ്ചിയിൽ മിച്ചമുള്ള കല്ലിൻ്റെ നിറം നോക്കായാൽ, ഞാനെടുത്ത കല്ല് ഏതാണന്നറിയാമല്ലോ?” സഞ്ചിയിൽ അവശേഷിച്ച കറുത്ത കല്ലിൻ്റെ പിൻബലത്തിൽ അവൾ രക്ഷപെട്ടു.

പ്രതിവിധികളില്ലാത്ത പ്രതിസന്ധികളില്ല. മന:സാന്നിദ്ധ്യത്തോടെ നേരിടാൻ കഴിയണമെന്നു മാത്രം. പല പ്രശ്നങ്ങളും, അതിൽ തന്നെ ആപത്കരങ്ങളല്ല. ആലോചനയില്ലാത്തതുകൊണ്ടും, അജ്ഞത കൊണ്ടുമാണവ, അപപരിഹാര്യമായി തോന്നുന്നത്. പ്രശ്നബാധിതർക്ക് , ആദ്യമേ നഷ്ടമാകുന്നതു്ത് മന:സാന്നിദ്ധ്യവും, ബുദ്ധിപൂർവ്വം ചിന്തിക്കാനുള്ള കഴിവുമാണ്. സംഘർഷങ്ങൾക്കടിപ്പെട്ടുകഴിഞ്ഞാൽ, പക്വമായ ചിന്തകളോ, പ്രശ്ന പരിഹാരത്തിനുതകുന്ന തീരുമാനങ്ങളോ, നമ്മിൽ ഉണ്ടാകില്ല. പ്രശ്നങ്ങളെ പ്രതിരോധിക്കാനാകണമെങ്കിൽ, അവയെ നമുക്കു സമചിത്തതയോടെ, അഭിമുഖീകരിക്കാനാകണം

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര