🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 20 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

നമുക്കുള്ളവയെല്ലാം പങ്കു വയ്ക്കാം
———————————————————

ഒരു ഗുരുവും അയാളുടെ ഭാര്യയും കാട്ടിൽ ഒരു കുടിൽ കെട്ടി താമസിച്ചിരുന്നു. നല്ല മഴയുള്ള ഒരു രാത്രി ഒരാൾ അവരോടോപ്പം താമസിക്കാൻ അനുവാദം ചോദിച്ചു. ഭാര്യ എതിർത്തെങ്കിലും ഗുരു അനുവാദം നൽകി. കുറച്ചു കഴിഞ്ഞപ്പോൾ മറ്റൊരാളെത്തി. അപ്പോഴും ഭാര്യ എതിർത്തുവെങ്കിലും, ഗുരു പറഞ്ഞു: “എല്ലാവർക്കും കൂടി ഇവിടെ കിടക്കാനേ ബുദ്ധിമുട്ടുള്ളു. ഇരിക്കുകയാണെങ്കിൽ അയാളേക്കൂടി ഉൾപ്പെടുത്താം ” അങ്ങനെ ആയാൾകൂടി കുടിലിൻ്റെ അകത്തായി. അൽപം കഴിഞ്ഞു നോക്കുമ്പോൾ, ഒരു കഴുത മഴ നനഞ്ഞു പുറത്തു നിൽക്കുന്നു. കഴുതയെ അകത്തു കയറ്റാനൊരുങ്ങിയ ഗുരുവിനെ മറ്റെല്ലാവരും കൂടി എതിർത്തു. ഗുരു പറഞ്ഞു: “നിങ്ങളുടെ കാര്യം കഴിഞ്ഞപ്പോൾ മറ്റെല്ലാം മറക്കുന്നു. എല്ലാവരും നിൽക്കാൻ തീരുമാനിച്ചാൽ, അതിനേയും അകത്തു കയറ്റാം ” അങ്ങനെ കഴുതയും കുടിലിനുള്ളിലായി!

സ്വന്തം സംരക്ഷണവലയം ഭേദിക്കുന്ന ഒരൊത്തു തീർപ്പിനും, നമുക്കു താൽപര്യം കാണുകയില്ല. അവരവരുടെ സുഖാനുഭവങ്ങൾക്കുള്ളിൽ നിന്നു കൊണ്ടുള്ള കാരുണ്യ പ്രവർത്തികളിൽ നാം സന്തോഷം കണ്ടെത്തും. അവരവർക്കുള്ളതൊന്നും, ഒരു പിടി പോലും നഷ്ടപ്പെടില്ലെന്ന് ഉറപ്പു വരുത്തിയതിനു ശേഷമുള്ള സൽക്കർമ്മങ്ങൾ! വയറു നിറഞ്ഞ ശേഷം, വിശപ്പുരഹിത ലോകം സൃഷ്ടിക്കുന്നതിന് നിരാഹാരം അനുഷ്ഠിക്കുന്നതു പോലെ.

സമ്പന്നൻ്റെ സാദ്ധ്യതയല്ല, ബലഹീനൻ്റെ നിസ്സഹായതയാകണം പരോപകാരത്തിൻ്റെ മാനദണ്ഡം. ശേഷിയുള്ളവന് പ്രത്യുപകാരത്തിന് സാദ്ധ്യതയും സന്നദ്ധതയും കണ്ടേക്കാം. തിരിച്ചടവിനു കഴിവില്ലാത്തവർക്കു ചെയ്യുന്ന സഹായമാണ് ഒരാളിൻ്റെ സന്മനസ്സിൻ്റെ നേർ സാക്ഷ്യം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര