🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 28 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

കരുത്തുറ്റ നേതൃത്വത്തിൻ്റെ ഗുണഗണങ്ങൾ
—————————————————————

ഒരു രാജ്യത്തു് കൊള്ളക്കാരുടെ ശല്യം ഏറി വന്നു. തൻ്റെ ധീരനായ പുത്രനെ കൊള്ളക്കാരെ അമർച്ച ചെയ്യാനുള്ള ദൗത്യവുമായി രാജാവയച്ചു. കുമാരൻ അവരെയെല്ലാം പിടിച്ചു കെട്ടി കൊട്ടാരത്തിലെത്തിച്ചു. “ഇവരുടെ തലവൻ ആരാണ്?” രാജാവു ചോദിച്ചു. കുമാരൻ പറഞ്ഞു: “അയാൾ മാത്രം രക്ഷപെട്ടു. സാരമില്ല, ഈർക്കിലി പോലുളള അയാൾക്ക് ഇവരില്ലാതെ ഒന്നും ചെയ്യാനാവില്ല”. “കുമാരനു തെറ്റിയെന്നു തോന്നുന്നു”, രാജാവു പ്രതിവചിച്ചു.

നാളുകൾക്കു ശേഷം വലിയൊരു കൊള്ള സംഘം, കൊട്ടാരം ആക്രമിച്ചു. സൈന്യം വളരെ പ്രയാസപ്പെട്ട് അവരെ തോൽപ്പിച്ച്, അവരുടെ സംഘത്തലവനെ പിടിച്ചുകെട്ടി രാജാവിൻ്റെ മുമ്പിലെത്തിച്ചു. അയാളെക്കണ്ട കുമാരൻ ഞെട്ടി: “ആ പഴയ ഈർക്കിൽ മനുഷ്യൻ!” രാജാവു പറഞ്ഞു: “അണികളെയല്ല, അവരെ സൃഷ്ടിക്കുന്നവരെ വേണം കീഴ്പ്പെടുത്തുവാൻ”.

ആടുകളെ ചിതറിക്കുവാനുള്ള എളുപ്പമാർഗം, ഇടയനെ ഇല്ലാതാക്കുകയാണ്. ആൾക്കൂട്ടത്തിൻ്റെ ബലം നിശ്ചയിക്കുന്നത് അവരുടെ എണ്ണമല്ല, അവരെ നയിക്കുന്നവൻ്റെ മനോധൈര്യമാണ്, നേതൃപാടവമാണ്. ആയിരം അണികളെ സൃഷ്ടിക്കുന്നതിനേക്കാൾ പ്രധാനമാണ്, ഒരു നല്ല നായകനെ രൂപപ്പെടുത്തിയെടുക്കുക എന്നത്. നാടു നന്നാകണമെങ്കിൽ നാട്ടുകാർ നന്നാകണം. നാട്ടുകാർ നന്നാകണമെങ്കിൽ, നയിക്കുന്നവർ നന്നാകണം.

“വിത്തു ഗുണം പത്തു ഗുണം”, എന്നാണല്ലോ പറയുക. അതുപോലെ, ‘നേതൃഗുണം, സർവ്വ ഗുണം’ എന്നും പറയാനാകും. നേതൃഗുണം നിശ്ചയിക്കപ്പെടുക, അയാൾ നിർവ്വഹിക്കുന്ന മുന്നൊരുക്കങ്ങളുടെ നന്മയും മേന്മയും അടിസ്ഥാനപ്പെടുത്തിയായിരിക്കും. നേതൃത്വത്തെ സംബന്ധിച്ച്, കാര്യങ്ങൾ ശരിയായി ചെയ്യുക എന്നതിനേക്കാൾ ഏറെ പ്രധാനപ്പെട്ടതാണ് ശരിയായ കാര്യങ്ങൾ തക്ക സമയത്തു ചെയ്യുക എന്നത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര