🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 15 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

ഇഴയടുപ്പമുള്ള ബന്ധങ്ങൾ രൂപപ്പെടുത്താം
———————————————————————

പ്രായം ചെന്ന് അവശനായ വളർത്തു കുതിര, ഒരു ദിവസം കുഴഞ്ഞു വീണതു കണ്ട്, യജമാനൻ, “സിംഹത്തിൻ്റെ ശക്തിയുണ്ടാകുമ്പോൾ തിരികെ വന്നാൽ മതിയെന്നു പറഞ്ഞു”, അതിനെ പുറത്താക്കി. അലഞ്ഞു തിരിഞ്ഞ കുതിരയിൽ നിന്ന് കാര്യങ്ങൾ മനസ്സിലാക്കിയ കുറുക്കൻ ഒരുപായം പറഞ്ഞു കൊടുത്തു. “നീ ചത്തതുപോലെ അനങ്ങാതെ കിടക്കണം. ഞാൻ ദേഹത്തു തട്ടുമ്പോൾ, സർവ്വ ശക്തിയുമെടുത്ത് ഓടി യജമാനൻ്റെ അടുക്കൽ ചെല്ലണം”. കുതിര സമ്മതിച്ചു. കുറുക്കൻ സിംഹത്തിൻ്റെ അടുത്തെത്തിപ്പറഞ്ഞു: “ഒരു കുതിര, അവശനായി കിടപ്പുണ്ട് . നമുക്കതിനെ ഗുഹയിൽ കൊണ്ടുപോയി കഴിക്കാം?”
സിംഹത്തിനു സമ്മതമായി.

കുറുക്കൻ തന്ത്രപരമായി സിംഹത്തിൻ്റെ കാലുകൾ ബന്ധിച്ച്, കുതിരയുടെ വാലിൽ കൂട്ടിക്കെട്ടി. ദേഹത്തു തട്ടിയ ഉടൻ കുതിര സർവ്വ ശക്തിയുമെടുത്ത് സിംഹത്തേയും വലിച്ചിഴച്ച് യജമാനൻ്റെ അടുത്തെത്തി. സന്തുഷ്ടനായ യജമാനൻ കുതിരയെ തിരിച്ചെടുത്തു.

നാം ഒന്നു വീഴുമ്പോഴാണറിയുക; കൂടെ നിന്നവരുടെ തനിനിറം. ഉപയോഗിച്ചു തീർക്കേണ്ടതും, ഉപയോഗരഹിതം ആകുമ്പോൾ, ഒഴിവാക്കേണ്ടതുമല്ല, ബന്ധങ്ങൾ.
കൂടെ നിൽക്കുന്നവർ കുഴഞ്ഞു വീഴുമ്പോൾ, കൈ പിടിക്കാനാകണം; അവരെ കഴിയിൽ തളളരുത്. ബന്ധത്തിൻ്റെ ഇഴയടുപ്പമാണ് , നിലനിൽപിൻ്റെ ദൃഢത നിശ്ചയിക്കുന്നത്. ബന്ധങ്ങൾ ഉപേക്ഷിക്കാന്നുള്ള തിരക്കിൽ അവ ഇത്രയും നാൾ നിലനിന്നതിൻ്റെ കാരണങ്ങൾ വിസ്മരിക്കരുത്.

അപരിചതരുടെ അപ്രതീക്ഷിതമായ ഇടപെടൽ ആയിരിക്കും, ചിലപ്പോൾ ജീവിതത്തിൽ വഴിത്തിരിവുണ്ടാക്കുക. ജന്മം നൽകിയവരേക്കാൾ, പുനർജന്മം നൽകുന്നവരായിരിക്കും, ജീവിതത്തിന് അർത്ഥവും അന്തസ്സും സമ്മാനിക്കുക.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര