🌹 “ഇന്നത്തെ ചിന്താവിഷയം” 🌹 – 2024 | ജൂലൈ 29 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

നിമിഷാർധ പ്രതികരണങ്ങൾ
——————————————–

മൂന്നു മത്സ്യങ്ങൾ, ഒരു തടാകത്തിൽ തങ്ങൾക്കു പ്രീയപ്പെട്ട ഭാഗത്ത് നീന്തിക്കളിക്കുകയായിരുന്നു. അപ്പോഴാണ് ഒരു മീൻ പിടുത്തക്കാരൻ വലയുമായി എത്തിയത്‌. അതു കണ്ട ആദ്യത്തെ മത്സ്യം ഉടൻ തന്നെ രക്ഷപെടാൻ തീരുമാനിച്ചു. കൂട്ടുകാരോടു പോലും പറയാതെ, അതു സ്ഥലം വിട്ടു. അപ്പോഴാണ് രണ്ടാമനു ബോധമുണ്ടായത്. പക്ഷെ, സമയം അതിക്രമിച്ചിരുന്നു. അതു ചത്തതു പോലെ കിടന്നു. മീൻ പിടുത്തക്കാരൻ വലയിൽ കുടുങ്ങിയ ‘ചത്ത മത്സ്യ’ത്തെ വെള്ളത്തിലേക്കു തന്നെ വലിച്ചെറിഞ്ഞു. പിടിക്കപ്പെട്ട മൂന്നാമത്തെ മത്സ്യം, വറ ചട്ടിയിൽക്കിടന്നു ചിന്തിച്ചു: “ഇനി ഇവിടെ നിന്നു രക്ഷപെട്ടാലും, തടാകം വരെ എത്തില്ല. അടുത്ത ജന്മത്തിൽ കടലിൽ ജനിക്കണം”.

നിരീക്ഷണ പാടവത്തേക്കാൾ, നിമിഷാർധങ്ങളിലെ പ്രതികരണ പാടവമാണ് ആപത്തുകളെ പ്രതിരോധിക്കുവാൻ സഹായിക്കുക. സ്വയരക്ഷാ മനോഭാവം എപ്പോഴും ഒരു തെറ്റല്ല. അപായങ്ങൾ മുൻകൂട്ടി കണ്ടിട്ടും, മാറാൻ തയ്യാറാകാത്തവരോടൊത്തുള്ള സഹവാസം, ബുദ്ധിശൂന്യതയാണ്. ഇഷ്ടപ്പെട്ട സ്ഥലങ്ങളോടും, ശീലിച്ച രീതികളോടും വിട പറയാത്തതിൻ്റെ കഥയാണ് കെണിയിൽ അകപ്പെട്ടു പോയ പലരുടേയും ചരിത്രം.

മരണശേഷം ജീവിതമുണ്ടോ എന്നതിനെപ്പറ്റി അഭിപ്രായ വ്യത്യാസങ്ങളുണ്ടാകാം. പക്ഷെ മരിക്കുന്നതിനു മുമ്പു ജീവിക്കാൻ മറക്കരുത് എന്നതിനു രണ്ടു പക്ഷമുണ്ടാകില്ല. ശ്വാസം അവസാനിക്കുന്നതിനു മുമ്പ് ജീവിതത്തോടു വിടപറയരുത്.

സ്വന്തം അനുഭവങ്ങളിൽ നിന്നു തന്നെ എല്ലാം പഠിക്കണമെന്നു വാശി പിടിക്കരുത്. അന്യൻ്റെ അനുഭവങ്ങളാകാം ആദ്യ പാo ശാല. മികവുള്ളവരുമായുള്ള സമ്പർക്കമാണ് ജീവിതത്തിൻ്റെ മാറ്റു കൂട്ടുന്നത്. ആശയറ്റവുടെ അന്ത്യം, ചിലപ്പോഴെങ്കിലും ആത്മാഹൂതി ആയിരിക്കും. വറചട്ടിയിൽ നിന്നും എടുത്തു ചാടിയ പലരും, പിന്നീടു വിസ്മയങ്ങൾ തീർത്തിട്ടുണ്ട്. രണ്ടും കല്പിച്ചുള്ള എടുത്തു ചാട്ടങ്ങളിലൂടെയാണ് പല പുതുവഴികളും രൂപപ്പെട്ടിട്ടുള്ളത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര