🌹 “ഇന്നത്തെ ചിന്താവിഷയം” 🌹 – 2024 | ജൂലൈ 22 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

സുഗന്ധം വിതറുന്നവർ ആകാം നമുക്ക്
————————————————————

ഒരു ടാക്സി ഡ്രൈവർ, യാത്രക്കാരനുമായി കാറിൽ പോകുകയായിരുന്നു. പെട്ടന്ന് ഒരു ആഡംബര കാർ, സിഗ്നൽ ലംഘിച്ച് അയാളുടെ വാഹനത്തിനു കുറുകെ വന്നു നിന്നു. സുമുഖനായ ഒരാൾ അതിൽ നിന്നും ഇറങ്ങി. കുറ്റം അയാളുടേതായിരുന്നുവെങ്കിലും, മറ്റേ കാറിലെ ഡ്രൈവറേയും യാത്രക്കാരനേയും, അയാൾ കണക്കറ്റ് അസഭ്യം പറഞ്ഞു. ടാക്സി ഡ്രൈവർ തിരച്ചൊന്നും പറഞ്ഞില്ല എന്നു മാത്രമല്ല, രംഗം ശാന്തമാക്കാനാണ് അയാൾ ശ്രമിച്ചത്.

യാത്ര തുടർന്നപ്പോൾ, യാത്രക്കാരൻ ആ ടാക്സി ഡ്രൈവറോടു ചോദിച്ചു:
” അയാൾ കുറ്റം ചെയ്യുകയും അസഭ്യം പറയുക്കും ചെയ്തിട്ടും, താങ്കെളെന്താണ് ഒന്നും മിണ്ടാതിരുന്നത്?” ഡ്രൈവർ ശാന്തനായി മറുപടി പറഞ്ഞു: “മാലിന്യവുമായി പോകുന്ന ട്രക്കിൽ, മാലിന്യം അധികമാകുമ്പോൾ, ട്രക്ക് കടന്നു പോകുന്ന വഴികളിൽ അത് വീഴും. അയാളുടെ പക്കൽ അധിമുണ്ടായിരുന്നത് അയാൾ പുറത്തേക്കിട്ടു; എൻ്റെ പക്കലുങ്ങായിരുന്നതു ഞാനും”.

ഒരാളുടെ പ്രതികരണം അയാളുടെ സ്വഭാവത്തിൻ്റെ വെളിപ്പെടുത്തൽ ആയിരിക്കും. അയാളിലെ രോഷം, അയാളുടെ യഥാർത്ഥ സ്വഭാവം പുറത്തു കൊണ്ടു വരും. ഹൃദയം നിറഞ്ഞു കവിയുന്നത് നാവു പ്രസ്താവിക്കും എന്നാണ് വേദ പ്രമാണം.

മാലിന്യങ്ങളുടെ ഭാണ്ഡക്കെട്ടുമായി നാം യാത്ര ചെയ്യരുത്. മാലിന്യത്തിൻ്റെ ഭാണ്ഡക്കെട്ടിൽ നിന്ന് മാലിന്യം മാത്രമേ വഴിയിൽ വിതറപ്പെടൂ. മറിച്ച്, സുഗന്ധത്തിൻ്റെ ഭാണ്ഡക്കെട്ടുമായാണ് നാം യാത്ര ചെയ്യുന്നതെങ്കിൽ, നമ്മിൽ നിന്നും സുഗന്ധം മാത്രമേ,വഴിയിൽ വിതറപ്പെടൂ. സുഗന്ധം പേറുന്നവരും, ചുറ്റിലും സുഗന്ധം പരത്തു ന്നവരുമായിരിക്കാം നമുക്ക്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര