🌹 “ഇന്നത്തെ ചിന്താവിഷയം” 🌹 – 2024 | ജൂലൈ 27 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

രഹസ്യങ്ങൾ കാത്തുസൂക്ഷിക്കാൻ ആകട്ടെ
…………………………………….

തൻ്റെ ഗുരവിൻ്റെ ആത്മീയ ശ്രേഷ്ഠതയുടെ രഹസ്യം എന്തെന്നറിയാൻ ശിഷ്യൻ അദ്ദേഹത്തെ സമീപിച്ചു. ഗുരൂ പറഞ്ഞു: “ഞാൻ മുപ്പതു വർഷമായി അതു രഹസ്യമായി സൂക്ഷിക്കുന്നു. നീ എത്ര നാൾ കൂടി കാത്തിരിക്കും? കുറഞ്ഞതു മുപ്പതു വർഷമെങ്കിലും വേണ്ടി വരും!”. മടിയോടെയാണെങ്കിലും ശിഷ്യൻ സമ്മതിച്ചു. ആ കാലഘട്ടം മുഴുവൻ ഗുരുവിനോടൊപ്പം ചെലവഴിച്ച അയാൾ, അവസാന ദിവസം ഗുരുവിൻ്റെ അടുത്തെത്തി രഹസ്യം ചോദിച്ചു. ഗുരു ഒരു നിബന്ധന വെച്ചു: ഈ രഹസ്യം ആരോടും പറയാൻ പാടില്ല. ശിഷ്യൻ നിരാശനായി ചോദിച്ചു: “പിന്നെന്തിനാണ് എനിക്കീ രഹസ്യം? മറ്റുള്ളവരോടു പറയുമ്പോഴുള്ള സുഖത്തിനു വേണ്ടി മാത്രമാണ് ഞാനതാവശ്യപ്പെട്ടതും, കാത്തിരുന്നതും”.

മറ്റുള്ളവരുടെ രഹസ്യങ്ങളറിയാനുള്ള ആകാംക്ഷ, മനുഷ്യരിലെല്ലാം അതിശക്തമാണ്. ഒരാളുടെ സ്വകാര്യത ആയാൾക്കു മാത്രം അവകാശപ്പെട്ടതല്ലെ? അവിടേക്കു കടന്നു ചെല്ലാൻ അവകാശം ചോദിക്കുന്നതു പോലും യഥാർത്ഥത്തിൽ അഭംഗിയല്ലേ? താൻ അറിഞ്ഞ കാര്യങ്ങൾ ആരോടും പറയാതെയും പറയാനാവാതെയും സൂക്ഷിക്കുക എന്നതാവും ഒരാൾ നേരിടുന്ന ഏറ്റവും വലിയ വെല്ലുവിളി. അന്യരുടെ സ്വകാര്യതകളിൽ നുഴഞ്ഞു കയറി, അവ പരസ്യമാക്കുമ്പോൾ ഒരാൾക്കു ലഭിക്കുന്ന സംതൃപ്തി, യഥാർത്ഥത്തിൽ വിനാശകാരിയാണ്.

ചില നേട്ടങ്ങളും അറിവുകളും, രഹസ്യങ്ങളായിത്തന്നെ അവശേഷിക്കട്ടെ. ഒരാൾ ആർജ്ജിച്ചെടുത്തതെല്ലാം പരസ്യ വില്പനയുടെ ഭാഗമാകാതിരിക്കുമ്പോൾ അവ അയാളുടെ മനസ്സിൽ, ശാന്തിയുടെയും വിശുദ്ധിയുടെയും . തെളിനീരുറവകൾ സൃഷ്ടിച്ചുവെന്നു വരാം. അത് ഒളിച്ചു വയ്ക്കലല്ല; സൂക്ഷിച്ചു വയ്ക്കലാണ് . അവ സ്വയപ്രചോദനത്തിനും പരിവർത്തനത്തിനും സഹായകമായേക്കാം. രഹസ്യങ്ങൾ കാത്തു സൂക്ഷിക്കാൻ ആകട്ടെ നമുക്ക്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര