നൃത്തത്തോടുള്ള അടങ്ങാത്ത പ്രണയത്തിന് പ്രായം ഒരു തടസ്സമല്ലെന്ന് തെളിയിക്കുകയാണ് നടൻ നീരജ് മാധവിന്റെ അമ്മ ലത മാധവൻ. 61-ാം വയസ്സിലും അസാധാരണമായ ചാരുതയോടെയും ആത്മവിശ്വാസത്തോടെയും ഭരതനാട്യം അവതരിപ്പിക്കുന്ന അമ്മയുടെ വിഡിയോ പങ്കുവച്ച് വികാരനിർഭരമായ കുറിപ്പുമായി എത്തിയിരിക്കുകയാണ് നീരജ്. കോഴിക്കോട് തളി ക്ഷേത്രത്തിൽ നവരാത്രിക്കാലത്ത് നടന്ന നൃത്തപരിപാടിയിൽ നിന്നുള്ള ദൃശ്യങ്ങളാണ് താരം സമൂഹമാധ്യമങ്ങളിൽ പങ്കുവച്ചത്.
അമ്മയുടെ നൃത്തം നേരിട്ട് കണ്ടപ്പോൾ കണ്ണുനിറഞ്ഞുപോയെന്നാണ് നീരജ് കുറിച്ചത്. അമ്മയുടെ പ്രകടനങ്ങൾ മുമ്പ് വിഡിയോകളിലൂടെ കണ്ടിട്ടുണ്ടെങ്കിലും, ഇതാദ്യമായാണ് വേദിക്ക് മുന്നിലിരുന്ന് നേരിട്ട് കാണാൻ അവസരം ലഭിച്ചതെന്നും ആ കാഴ്ച മനസ്സിനെ ഇത്രയേറെ സ്പർശിക്കുമെന്ന് കരുതിയിരുന്നില്ലെന്നും താരം പറഞ്ഞു.
കുട്ടിക്കാലം മുതൽ ശാസ്ത്രീയനൃത്തത്തെ ജീവിതത്തിന്റെ ഭാഗമാക്കിയ വ്യക്തിയാണ് ലത മാധവൻ. സ്കൂൾ കലോത്സവങ്ങളിൽ സംസ്ഥാനതലത്തിൽ വിജയം നേടിയിരുന്ന അവർക്ക് നൃത്തത്തോട് വലിയ താൽപര്യമുണ്ടായിരുന്നു. എന്നാൽ പിന്നീട് അധ്യാപനവും കുടുംബജീവിതവും മറ്റ് ഉത്തരവാദിത്തങ്ങളുമായി മുന്നോട്ടുപോയപ്പോൾ നൃത്തത്തിന് കൂടുതൽ സമയം മാറ്റിവയ്ക്കാൻ സാധിച്ചില്ല. എങ്കിലും കലയോടുള്ള സ്നേഹം ഒരിക്കലും പൂർണമായി ഉപേക്ഷിച്ചില്ല.
അവസരം ലഭിക്കുമ്പോഴെല്ലാം പരിശീലനം തുടരുകയും വിവിധ വേദികളിൽ നൃത്തം അവതരിപ്പിക്കുകയും ചെയ്തിരുന്നു ലത മാധവൻ. അധ്യാപന ജീവിതത്തിൽനിന്ന് വിരമിച്ചതോടെ നൃത്തത്തിനായി കൂടുതൽ സമയം കണ്ടെത്തുകയാണ് ഇപ്പോൾ. സ്കൂൾ കാലത്തെ അതേ ആവേശത്തോടെ മണിക്കൂറുകളോളം, ചിലപ്പോൾ അർധരാത്രി വരെയും പരിശീലനം നടത്താറുണ്ടെന്നും നീരജ് കുറിച്ചു. ആരുടെയും നിർബന്ധമോ പ്രേരണയോ ഇല്ലാതെ കലയോടുള്ള ആത്മാർഥമായ പ്രണയംകൊണ്ടാണ് അമ്മ ഇതെല്ലാം ചെയ്യുന്നതെന്നും താരം വ്യക്തമാക്കി.
നിലവിൽ ദീപ്തി പരോൾ എന്ന ഗുരുവിന്റെ കീഴിലാണ് ലത മാധവൻ നൃത്തം അഭ്യസിക്കുന്നത്. അമ്മയുടെ നൃത്തത്തോടുള്ള സമർപ്പണത്തെക്കുറിച്ച് ഗുരുവും വിഡിയോയിൽ സംസാരിക്കുന്നുണ്ട്. ഒരു ക്ലാസ് പോലും മുടക്കാതെ, വിട്ടുവീഴ്ചകളില്ലാതെ പരിശീലനത്തിന് എത്തുന്ന റിട്ടയേർഡ് അധ്യാപികയാണ് ലത ടീച്ചറെന്ന് അവർ പറഞ്ഞു. നടൻ നീരജ് മാധവിന്റെ അമ്മ എന്നതിലുപരി, ലത ടീച്ചറിന്റെ മകനാണ് നീരജ് എന്ന് പറയാനാണ് തനിക്കിഷ്ടമെന്നും ഗുരു കൂട്ടിച്ചേർത്തു.
അമ്മയുടെ നൃത്തം കണ്ടപ്പോൾ കണ്ണുനിറഞ്ഞുപോയ അനുഭവവും നീരജ് കുറിപ്പിൽ പങ്കുവച്ചു. വർഷങ്ങളോളം മാറ്റിവയ്ക്കേണ്ടിവന്ന ഏറ്റവും പ്രിയപ്പെട്ട കലയിലേക്ക് അമ്മ പൂർണ സമർപണത്തോടെ തിരിച്ചെത്തിയതിലുള്ള സന്തോഷമാണ് ആ പ്രകടനത്തിൽ കണ്ടതെന്നും താരം പറഞ്ഞു. നൃത്തം ചെയ്യുമ്പോൾ അമ്മ അനുഭവിക്കുന്ന സന്തോഷമാണ് അവരുടെ പ്രകടനത്തെ ഇത്രമേൽ ഹൃദ്യമാക്കുന്നതെന്നും നീരജ് അഭിപ്രായപ്പെട്ടു. ഇനി തനിച്ച് ഒരു സമ്പൂർണ ഭരതനാട്യക്കച്ചേരി അവതരിപ്പിക്കണമെന്നതാണ് ലത മാധവന്റെ ഏറ്റവും വലിയ സ്വപ്നം. അമ്മയുടെ ആഗ്രഹം സാക്ഷാത്കരിക്കുമെന്നും ആ സുന്ദരമായ യാത്രയെ കുടുംബം ഹൃദയപൂർവം ആഘോഷിക്കുമെന്നും നീരജ് ഉറപ്പുനൽകി.
