കൊച്ചി.ഇലന്തൂർ ഇരട്ടനരബലിക്കേസിൽ അന്വേഷണഉദ്യോഗസ്ഥൻ്റെ പോഡ്കാസ്റ്റ് എപ്പിസോഡ് നീക്കം ചെയ്യാൻ കോടതി ഉത്തരവ്. കോടതിയുടെ പരിഗണനയിലിരിക്കുന്ന കേസുകളിൽ സമാന്തരമായ മാധ്യമ വിചാരണ അനുവദിക്കാനാവില്ലെന്നും കോടതി. ഉത്തരവിന് പിന്നാലെ വീഡിയോ സമൂഹമാധ്യമങ്ങളിൽ നിന്ന് നീക്കം ചെയ്തു.
സഫാരി ടി.വി.യുടെ യൂട്യൂബ് ചാനലിൽ സംപ്രേഷണം ചെയ്ത ‘ചരിത്രം എന്നിലൂടെ’ എന്ന പരിപാടിയുടെ പന്ത്രണ്ടാം എപ്പിസോഡ് നീക്കം ചെയ്യാനാണ് എറണാകുളം അഡീഷണൽ സെഷൻസ് കോടതിയുടെ ഉത്തരവ്.
പ്രതികളുടെ ഹർജിയിൽ ദൃശ്യങ്ങൾ അടിയന്തരമായി നീക്കം ചെയ്യാൻ കൊച്ചി സിറ്റി പോലീസ് കമ്മിഷണർക്ക് കോടതി നിർദ്ദേശം നൽകി. റിട്ട എസ്സിപി സി. ജയകുമാറാണ് കേസുമായി ബന്ധപ്പെട്ട വിവരങ്ങൾ ഉൾപ്പെടുത്തി പോഡ്കാസ്റ്റ് ചെയ്തത്. ഇതിനെതിരെ വിചാരണ കോടതിയെ സമീപിക്കുകയായിരുന്നു.
