📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 03 | വെള്ളി ✍️ കപിൽ ശങ്കർ

🔹വിഴിഞ്ഞം തുറമുഖത്തെ അദാനി ഓഹരി, സര്‍ക്കാരിന്റെ അനുമതിയില്ലാതെ എം എസ് സി ക്ക് കൈമാറാനുള്ള തീരുമാനത്തില്‍ മുഖ്യമന്ത്രി വി ഡി സതീശന്‍ അദാനി ഗ്രൂപ്പിനെ അതൃപ്തി അറിയിച്ചു. വിദേശ നിക്ഷേപ തീരുമാനം കര്‍ശന പരിശോധനക്കു വിധേയമാക്കുമെന്നും മുഖ്യമന്ത്രിയുടെ ഓഫീസ് അറിയിച്ചു.

🔹വിഴിഞ്ഞം ഓഹരി കൈമാറ്റത്തില്‍ അദാനിയോടുള്ള നിലപാടില്‍ കോണ്‍ഗ്രസില്‍ ഭിന്നത. കടുത്ത നടപടി വേണമെന്നാണ് കെ സി പക്ഷത്തിന്‍റെ അഭിപ്രായം. കേരളം ഭരിക്കുന്നത് ബിജെപി സര്‍ക്കാരല്ലെന്ന് കെസി ഇന്നലെ മാധ്യമങ്ങളോട് പറഞ്ഞിരുന്നു. കെസി ശക്തമായ നിലപാട് എടുത്തതിന് പിന്നാലെയാണ് മുഖ്യമന്ത്രി ഇന്നലെ അദാനിക്ക് അതൃപ്തി അറിയിച്ച് കത്ത് നല്‍കിയത്.

🔹മദ്യ നയത്തിൽ ആഭ്യന്തരമന്ത്രി രമേശ് ചെന്നിത്തലയെ വേദിയിലിരുത്തി വിമർശനമുന്നയിച്ച് മാർത്തോമ സഭാധ്യക്ഷൻ ഡോ. തിയഡോഷ്യസ് മാർത്തോമ മെത്രോപ്പൊലീത്ത. വീര്യം കുറഞ്ഞ മദ്യത്തിന് നികുതി കുറച്ചത് അംഗീകരിക്കാൻ കഴിയില്ലെന്നും മദ്യം പൂർണമായി വർജിക്കുകയാണ് സഭയുടെ ലക്ഷ്യമെന്നും അദ്ദേഹം പറഞ്ഞു.

🔹ഓപ്പറേഷൻ തൂഫാൻ ദുരുപയോഗത്തിനെതിരെ ആഭ്യന്തര മന്ത്രി രമേശ് ചെന്നിത്തല. എറണാകുളത്തെ യോഗത്തിനെതിരെയാണ് ആഭ്യന്തര മന്ത്രിയുടെ വിമർശനം. ഗുണ്ടകൾ ചേർന്നാണോ തൂഫാൻ യോഗം കൂടുന്നതെന്ന് മന്ത്രി ചോദിച്ചു. പൊലീസ് അറിയാതെ ഒരു യോഗവും ആരും ചേരണ്ടെന്നും അദ്ദേഹം പറഞ്ഞു. കെ സുധാകരനെ ആരോ തെറ്റിദ്ധരിപ്പിച്ച് കൊണ്ടുപോയതാകാമെന്നും അദ്ദേഹത്തെ പോലൊരാൾ അറിഞ്ഞുകൊണ്ട് ഇങ്ങനെ ഒരു യോഗത്തിന് പോകുമെന്ന് കരുതുന്നില്ലെന്നും രമേശ് ചെന്നിത്തല കൂട്ടിച്ചേർത്തു.

🔹ലഹരി മാഫിയക്കെതിരെ ‘തൂഫാൻ ജാഗരൺ’ എന്ന പേരിൽ ജനകീയ പ്രതിരോധത്തിന് ഇന്ന് തുടക്കം കുറിക്കുന്നു. ബഹുജന റാലി, ലഹരിവിരുദ്ധ പ്രതിജ്ഞ, വിവിധ വിഭാഗങ്ങളുമായുള്ള സംവാദം എന്നിവ ഉൾപ്പെടുന്ന പരിപാടിയിൽ രാഷ്ട്രീയ-സാമൂഹിക നേതാക്കളും പോലീസ് ഉദ്യോഗസ്ഥരും പങ്കെടുക്കും.

🔹സംസ്ഥാനത്ത് മദ്യം വാങ്ങാന്‍ പ്രായപരിധി, തിരിച്ചറിയല്‍ കാര്‍ഡ് നിയന്ത്രണങ്ങള്‍ ഏര്‍പ്പെടുത്തിയേക്കും. മദ്യം വാങ്ങാന്‍ 23 വയസ് പൂര്‍ത്തിയാകണമെന്ന നിബന്ധന കര്‍ശനമാക്കാനാണ് ആലോചന.

🔹കെഎസ്ഇബി ഈ മാസം 15 മുതല്‍ ഒരു വര്‍ഷത്തേയ്ക്ക് 200 മെഗാവാട്ട് വൈദ്യുതി കൂടുതല്‍ വാങ്ങും. സെപ്റ്റംബറില്‍ കൂടുതല്‍ വൈദ്യതി വാങ്ങാന്‍ വീണ്ടും ടെന്‍ഡര്‍ വിളിക്കും. ആദ്യ ടെന്‍ഡറില്‍ യൂണിറ്റിന് 12 രൂപ കമ്പനികള്‍ ചോദിച്ചതിനാല്‍ കരാറുണ്ടാക്കിയില്ല.

🔹ശബരിമലയില്‍ മില്‍മ നല്‍കിയ നെയ്യ് മറിച്ചുവിറ്റ് പകരം തമിഴ്നാട്ടിലെ വില കുറഞ്ഞ നെയ്യ് ക്ഷേത്രത്തില്‍ എത്തിച്ചതില്‍ മില്‍മയുടെ അന്വേഷണം. ലിറ്ററിന് 720 രൂപ വിലയുള്ള 1,70,000 ലിറ്റര്‍ നെയ്യ് 540 രൂപ നിരക്കില്‍ ശബരിമലയിലും പമ്പയിലും ലഭ്യമാക്കാനായിരുന്നു തിരുവിതാംകൂര്‍ ദേവസ്വം ബോര്‍ഡും മില്‍മയും തമ്മിലുള്ള കരാര്‍. ഈ നെയ്യാണു മറിച്ചുവിറ്റത്. സംഭവം അന്വേഷിക്കാന്‍ മില്‍മ ഡയറക്ടര്‍ ബോര്‍ഡ് യോഗം പ്രത്യേക സമിതിയെ നിയോഗിച്ചു.

🔹താര സംഘടനയായ അമ്മയില്‍ നിന്ന് രാജി പ്രഖ്യാപിച്ച ശ്വേത മേനോന്‍ അടക്കമുള്ള ഭരണസമിതി അംഗങ്ങള്‍ രാജിക്കത്ത് നല്‍കിയിട്ടില്ലെന്ന് അഡ്ഹോക്ക് കമ്മിറ്റി അധ്യക്ഷന്‍ രമേഷ് പിഷാരടി എംഎല്‍എ. കൊച്ചിയില്‍ നടന്ന അമ്മ അഡ്ഹോക്ക് കമ്മിറ്റി യോഗത്തിനിടെ പ്രതികരിക്കുകയായിരുന്നു രമേഷ് പിഷാരടി.

🔹അമ്മയുടെ ബൈലോ പ്രകാരം രാജി വച്ച കമ്മിറ്റിക്കാണ് അടുത്ത തെരഞ്ഞെടുപ്പുവരെ ഭരണ ചുമതലയെന്നും അഡ്ഹോക്ക് കമ്മിറ്റിക്ക് സാധുതയില്ലെന്നും ശ്വേത മേനോന്‍. സോഷ്യല്‍ മീഡിയയില്‍ എഴുതിയ കുറിപ്പിലൂടെയാണ് ശ്വേതയുടെ പ്രതികരണം. കുറ്റാരോപിതരായ ചില സ്ഥാപിത താല്‍പര്യങ്ങള്‍ അമ്മയെ ഹൈജാക്ക് ചെയ്യാന്‍ ശ്രമിക്കുകയാണെന്നും കുറിപ്പിലുണ്ട്.

🔹500 ല്‍ അധികം അംഗങ്ങള്‍ക്ക് മുന്നില്‍ വാര്‍ഷിക പൊതുയോഗത്തില്‍ കമ്മിറ്റി രാജി പ്രഖ്യാപിച്ചതാണെന്നും കമ്മിറ്റിയില്‍ നിന്ന് ഒഴിയുകയാണെന്നും ജയന്‍ ചേര്‍ത്തലയും കൈലാഷും. സംഘടനയുടെ ഇ-മെയിലിലേക്കാണ് ഇരുവരും രാജിക്കത്ത് അയച്ചത്.

🔹തിരുവനന്തപുരം സെന്‍ട്രല്‍ റെയില്‍വെ സ്റ്റേഷനില്‍ ഒന്നാം നമ്പര്‍ പ്ലാറ്റ് ഫോമില്‍ പൈലിങ് നടത്തുന്ന യന്ത്രം റെയില്‍വേ ട്രാക്കിലേക്ക് ചെരിഞ്ഞു. ഇതോടെ ഒന്നാം നമ്പര്‍ പ്ലാറ്റ്ഫോമില്‍ ഗതാഗതം താല്‍ക്കാലികമായി നിര്‍ത്തിവച്ചു.

🔹കാസര്‍കോട് മദ്യപിച്ച് വാഹനമോടിച്ച ഇന്‍ഫ്ലുവന്‍സര്‍ ഹെലന്‍ ഓഫ് സ്പാര്‍ട്ട എന്നറിയപ്പെടുന്ന എസ്ആര്‍ ധന്യ പിടിയിലായി. വാഹന പരിശോധനയ്ക്കു പൊലീസ് കൈ കാണിച്ചപ്പോള്‍ കാര്‍ നിര്‍ത്താതെ അമിത വേഗത്തില്‍ ഓടിച്ചു പോയ ധന്യയെ പിന്തുടര്‍ന്ന് പിടികൂടുകയായിരുന്നു.

🔹മദ്യപിച്ച് വാഹനമോടിച്ച് പിടിയിലായെന്ന വാര്‍ത്തക്കു പിറകേ പുതിയ വീഡിയോയുമായി ഹെലന്‍ ഓഫ് സ്പാര്‍ട്ട എന്നറിയപ്പെടുന്ന എസ്ആര്‍ ധന്യ. താന്‍ ജയിലില്‍ അല്ല. ഞാനെന്റെ പഞ്ചില്‍ ഇരിക്കുകയാണ്. അച്ഛനേയും അമ്മയേയും വിളിച്ച് ബുദ്ധിമുട്ടിക്കരുത്. എന്ന കുറിപ്പോടെയാണു പുതിയ വീഡിയോ പ്രചരിപ്പിച്ചത്.

🔹പ്രായപൂര്‍ത്തിയാകാത്ത മകളെ പീഡിപ്പിക്കാന്‍ ശ്രമിച്ച അയല്‍വാസിയുടെ കാല്‍ അച്ഛന്‍ അടിച്ചൊടിച്ചു. കേസില്‍ അച്ഛനെ പോത്തന്‍കോട് പൊലീസ് റിമാന്‍ഡ് ചെയ്തു. 40 വയസുകാരനായ അയല്‍വാസി മെഡി. കൊളേജ് ആശുപത്രിയില്‍ ചികിത്സയിലാണ്. അച്ഛന്‍ ജയിലായ ശേഷമാണ് മകളെ പീഡിപ്പിക്കാന്‍ ശ്രമിച്ചകാര്യം പൊലീസ് അറിഞ്ഞത്.

🔹ബംഗാള്‍ ഉള്‍ക്കടലില്‍ ന്യൂനമര്‍ദ്ദം രൂപപ്പെട്ടതിനാല്‍ കേരളത്തില്‍ ഇന്ന് ഒറ്റപ്പെട്ട അതിശക്തമായ മഴയ്ക്കു സാധ്യത. കണ്ണൂര്‍, കാസര്‍കോട് ജില്ലകളില്‍ ഓറഞ്ച് അലര്‍ട്ട്. ജൂലൈ ആറു വരെ മഴ തുടരുമെന്നും ഇടിമിന്നലിനും ശക്തമായ കാറ്റിനും സാധ്യതയുണ്ടെന്നും കാലാവസ്ഥാ വകുപ്പ് അറിയിച്ചു.

🔹പശ്ചിമേഷ്യയിലേക്കുള്ള മുഴുവന്‍ വിമാന സര്‍വീസുകളും പുനരാരംഭിച്ച് എയര്‍ ഇന്ത്യ എക്സ്പ്രസ്. കോഴിക്കോട് വിമാനത്താവളത്തില്‍നിന്നും സര്‍വീസുകള്‍ ആരംഭിക്കും.

🔹ഡല്‍ഹിയിലെ കേരള ഹൗസില്‍ ജനറേറ്റര്‍ റൂമില്‍ പൊട്ടിത്തിറി. മണിക്കൂറുകളോളം വൈദ്യുതി മുടങ്ങി. നന്നാക്കാന്‍ ശ്രമിക്കുന്നതിനിടെ ഒരാള്‍ക്ക് വൈദ്യുതാഘാതമേറ്റു.

🔹അയോധ്യ ക്ഷേത്രക്കൊള്ള അന്വേഷണം സിബിഐക്കു വിട്ടേക്കും. സുപ്രീംകോടതിയുടെ മേല്‍നോട്ടത്തില്‍ അന്വേഷണം ആവശ്യപ്പെട്ട് കോണ്‍ഗ്രസ് പ്രധാനമന്ത്രിക്ക് കത്ത് നല്‍കി. ട്രസ്റ്റ് മുന്‍ ജനറല്‍ സെക്രട്ടറി ചമ്പത് റായിക്കെതിരെ കേസെടുക്കണമെന്ന് ആവശ്യപ്പെട്ട് അയോധ്യ ബാര്‍ അസോസിയേഷന്‍ പൊലീസില്‍ പരാതി നല്‍കി.

🔹കുംഭമേള വൈറല്‍ പെണ്‍കുട്ടിയുടെ ഭര്‍ത്താവ് മുഹമ്മദ് ഫര്‍ഹാന്റെ അറസ്റ്റിനുള്ള വിലക്ക് നീട്ടണമെന്ന ഹര്‍ജി കേരള ഹൈക്കോടതി തള്ളി. മധ്യപ്രദേശ് ഹൈക്കോടതിയിലാണ് പോകേണ്ടതെന്നും, അധികാര പരിധിക്ക് പുറത്തുള്ള കാര്യമെന്നും കോടതി വ്യക്തമാക്കി. ഫാര്‍ഹാന്‍ നല്‍കിയ ജാമ്യഹര്‍ജി മധ്യപ്രദേശ് കോടതി തള്ളിയിരുന്നു.

🔹12,000 കോടി രൂപ ചെലവിട്ട് നിര്‍മിച്ച് രണ്ടരമാസം മുന്‍പ് പ്രധാനമന്ത്രി നരേന്ദ്രമോദി ഉദ്ഘാടനംചെയ്ത ഡല്‍ഹി-ഡെറാഡൂണ്‍ എക്സ്പ്രസ് വേയില്‍ വന്‍ ഗര്‍ത്തങ്ങള്‍. റോഡ് നിര്‍മാണത്തിലെ അഴിമതിയെക്കുറിച്ച് അന്വേഷണം വേണമെന്ന് കോണ്‍ഗ്രസ്.

🔹പെട്രോള്‍, ഡീസല്‍ വില കുറച്ചേക്കില്ലെന്ന് കേന്ദ്ര പെട്രോളിയം പ്രകൃതി വാതക മന്ത്രി ഹര്‍ദീപ് സിങ് പുരി. വരും ആഴ്ചകളിലും ആഗോള വിപണിയില്‍ എണ്ണവില കുറഞ്ഞാല്‍ വില കുറയ്ക്കുന്ന കാര്യം പരിഗണിക്കുമെന്ന് അദ്ദേഹം പറഞ്ഞു.

🔹ഡല്‍ഹിയില്‍ ഭീകരാക്രമണത്തിന് പദ്ധതിയിട്ട നാലംഗ സംഘത്തെ പിടികൂടി. പാക് ഐഎസ്ഐ ബന്ധമുള്ള അന്തര്‍സംസ്ഥാന ഭീകര-ആയുധ കടത്ത് സംഘമാണ് വലയിലായിലായത്. പ്രതികളില്‍ മൂന്നു പേര്‍ പഞ്ചാബില്‍നിന്നും, ഒരാള്‍ ഡല്‍ഹിയിലുമാണ് പിടിയിലായത്. ഡ്രോണ്‍ വഴി പാകിസ്ഥാനില്‍ നിന്ന് ആയുധങ്ങളും മയക്കുമരുന്നും സംഘം കടത്തിയതായി കണ്ടെത്തി.

🔹തമിഴ്നാട്ടിൽ പൊങ്കലിനോടനുബന്ധിച്ച് സൗജന്യ വസ്ത്ര വിതരണത്തിനുള്ള ഒരുക്കങ്ങൾ ആരംഭിച്ച് ‍ടിവികെ സ‍ർക്കാർ. മുഴുവൻ റേഷൻ കാർഡ് ഉടമകൾക്കും സാരിയും മുണ്ടും സൗജന്യമായി വിതരണം ചെയ്യുന്ന പദ്ധതിക്കായി 300 കോടി രൂപ വകയിരുത്തി.

🔹അയോധ്യ രാമക്ഷേത്ര സംഭാവനക്കൊള്ള രാജ്യത്തെ ഏറ്റവും വലിയ അമ്പലക്കൊള്ളയാണെന്ന് എഐസിസി ജനറല്‍ സെക്രട്ടറി കെ.സി വേണുഗോപാല്‍ എം.പി.

🔹അയോധ്യ കൊള്ളയിൽ നിർണ്ണായക തെളിവുകൾ അന്വേഷണ സംഘത്തിന് ലഭിച്ചു. പ്രതികൾ സംഭാവന കടത്തുന്നതിന്റെ സിസിടിവി ദൃശ്യങ്ങളാണ് പൊലീസിന് ലഭിച്ചത്. അഞ്ച് പ്രതികളുടെ ദൃശ്യങ്ങൾ സിസിടിവിയിലുണ്ട്. കാണിക്ക എണ്ണുന്നതിന് ട്രസ്റ്റ് നിയോഗിച്ചത് അൻപത് പേരെയാണെന്നും എസ്ബിഐയാണ് റിക്രൂട്ട് ചെയ്യേണ്ടവരുടെ പട്ടിക നൽകിയതെന്ന് സ്വകാര്യ ഏജൻസി വ്യക്തമാക്കി

🔹തമിഴ്നാട്ടിലെ ഉപതെരഞ്ഞെടുപ്പ് പ്രഖ്യാപിക്കാതെ തെരഞ്ഞെടുപ്പ് കമ്മീഷന്‍. ഏഴ് മണ്ഡലങ്ങളിലെ ഒഴിവ് വിജ്ഞാപനം ഇറക്കിയെങ്കിലും ഉപതെരഞ്ഞെടുപ്പു പ്രഖ്യാപിച്ചില്ല. ബിഹാര്‍, മധ്യപ്രദേശ്, ഗുജറാത്ത് സംസ്ഥാനങ്ങളില്‍ ഓരോ മണ്ഡലത്തില്‍ വീതം ഉപതെരഞ്ഞെടുപ്പ് പ്രഖ്യാപിച്ചു. തമിഴ്നാട്ടില്‍ പ്രതിപക്ഷം ഗവര്‍ണറെ കണ്ട് കുതിരക്കച്ചവട ആരോപണം ഉയര്‍ത്തിയിരുന്നു.

🔹ബെംഗളൂരു ഐഎസ്ആര്‍ഓ ആസ്ഥാനത്ത് ബോംബ് ഭീഷണി. ഇമെയിലിലൂടെയാണ് ഭീഷണി സന്ദേശം എത്തിയത്. ജീവനക്കാരെ ഓഫീസുകളില്‍ നിന്ന് ഒഴിപ്പിച്ചു. പരിശോധന നടത്തി.

🔹ബിഹാറിലെ ബക്സര്‍ ജില്ലയില്‍ ചോദ്യപേപ്പറുകളുടെ കെട്ടുകള്‍ റോഡിലെ ചളിവെള്ളിത്തില്‍ കിടക്കുന്ന വീഡിയോ സാമൂഹിക മാധ്യമങ്ങളില്‍. പെട്ടെന്നുണ്ടായ കനത്ത മഴയെ തുടര്‍ന്ന് വിദ്യാലയങ്ങളിലേക്ക് ചോദ്യപേപ്പറുകള്‍ വിതരണം ചെയ്യുന്നതിനിടയിലാണ് ഈ ദൃശ്യങ്ങള്‍ ചിത്രീകരിക്കപ്പെട്ടതെന്നാണു വിശദീകരണം.

🔹ജപ്പാനില്‍നിന്ന് പത്ത് ലക്ഷം കോടി രൂപയുടെ നിക്ഷേം ഇന്ത്യയിലെത്താനുള്ള പദ്ധതികള്‍ക്കു ധാരണ. പ്രധാനമന്ത്രി നരേന്ദ്ര മോദിയും ജപ്പാന്‍ പ്രധാനമന്ത്രി സനയ് തകയ്ച്ചിയും നടത്തിയ ചര്‍ച്ചയിലാണു ധാരണയായത്. ഇന്ത്യ-ജപ്പാന്‍ ബന്ധം സവിശേഷ സാമ്പത്തിക സുരക്ഷ പങ്കാളിത്തമായി ഉയര്‍ത്തും. പ്രതിരോധം അടക്കം, സമുദ്ര സുരക്ഷ, ഊര്‍ജ്ജം എന്നീ മേഖലകളിലും സഹകരിക്കും. വ്യാപാരം, ഔഷധ നിര്‍മ്മാണം, മെഡിക്കല്‍ ഉപകരണങ്ങള്‍, തൊഴിലവസരം തുടങ്ങി നിരവധി മേഖലകളില്‍ രണ്ടു രാജ്യങ്ങളും കരാറില്‍ ഒപ്പുവച്ചു.

🔹ഖത്തര്‍ ഭരണകൂടം സമ്മാനമായി നല്‍കിയ അത്യാധുനിക ആഡംബര ബോയിംഗ് വിമാനത്തില്‍ യുഎസ് പ്രസിഡന്റ് ഡൊണാള്‍ഡ് ട്രംപ് കന്നി യാത്ര നടത്തി. ‘ഇതുപോലൊരു വിമാനം നിര്‍മിക്കാന്‍ അമേരിക്കയ്ക്ക് കഴിയില്ല’ എന്നായിരുന്നു ട്രംപ് പ്രസിഡന്‍ഷ്യല്‍ വിമാനമായ ‘എയര്‍ ഫോഴ്‌സ് വണ്‍’ നെക്കുറിച്ചു പ്രതികരിച്ചത്.

🔹മാര്‍പാപ്പയുടെ നിര്‍ദ്ദേശങ്ങള്‍ ലംഘിച്ച് നാലു പുതിയ ബിഷപ്പുമാരെ വാഴിച്ച ‘സൊസൈറ്റി ഓഫ് സെന്റ് പയസ് ടെന്‍ത്’ എന്ന വിമത വിഭാഗത്തിലെ ബിഷപ്പുമാരെയും വൈദികരെയും വത്തിക്കാന്‍ സഭയില്‍ നിന്ന് പുറത്താക്കി.

🔹ഇന്തോനേഷ്യയിലെ പാപ്പുവയില്‍ അമേരിക്കന്‍ പൈലറ്റ് നിക്കോളാസ് എഫ് ഗോസെലിനെ വെടിവെച്ചു കൊല്ലുകയും യാത്രാ വിമാനത്തിന് തീയിടുകയും ചെയ്തു. പ്രാദേശിക വിഘടനവാദ സംഘടനയായ വെസ്റ്റ് പാപ്പുവ നാഷണല്‍ ലിബറേഷന്‍ ആര്‍മി ആണ് ആക്രമണം നടത്തിയത്.

🔹സെയ്ഷെം ട്രോഫി അണ്ടര്‍ 19 അന്തര്‍ സംസ്ഥാന ക്രിക്കറ്റ് ടൂര്‍ണ്ണമെന്റില്‍ ഹിമാചല്‍പ്രദേശിനെതിരെ കേരളത്തിന് ഉജ്ജ്വല വിജയം. 110 റണ്‍സിനാണ് കേരളം ജയിച്ചത്. ദ്വിദിന മത്സരത്തില്‍ ആദ്യം ബാറ്റ് ചെയ്ത കേരളം 353 റണ്‍സിന് ഓള്‍ ഔട്ടായി. മറുപടി ബാറ്റിങ്ങിന് ഇറങ്ങിയ ഹിമാചല്‍ പ്രദേശിന്റെ ഇന്നിങ്സ് 243 റണ്‍സിന് അവസാനിച്ചു.

🔹ഓസ്ട്രിയയെ എതിരില്ലാത്ത മൂന്നു ഗോളുകള്‍ക്കു തോല്‍പ്പിച്ച് സ്പെയിന്‍ ഫിഫ ലോകകപ്പിന്റെ പ്രീക്വാര്‍ട്ടറില്‍. ഒയര്‍സബാലിന്റെ ഇരട്ട ഗോളുകളും പെഡ്രോ പൊറോയുടെ ഗോളും ചേര്‍ന്ന് ആധികാരിക വിജയമാണ് സ്പെയിന്‍ സ്വന്തമാക്കിയത്. സ്പാനിഷ് കുതിപ്പിനിടെ ഒന്നും ചെയ്യാനാവാതെ മൈതാനത്ത് ഓസ്ട്രിയ അക്ഷരാര്‍ത്ഥത്തില്‍ വിയര്‍ക്കുകയായിരുന്നു.

🔹ആശിര്‍വ്വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍ നിര്‍മ്മിച്ച് ജൂഡ് ആന്റണി ജോസഫ് സംവിധാനം ചെയ്യുന്ന ‘തുടക്കം’ എന്ന ചിത്രത്തിന്റെ പുതിയ പോസ്റ്റര്‍ എത്തി. ഇത്രയും അഭിനേതാക്കളെ അണിനിരത്തിയുള്ള ചിത്രത്തിന്റെ ആദ്യ പോസ്റ്റര്‍ കൂടിയാണിത്. ആഗസ്റ്റ് ഏഴിന് റിലീസ് ഡേറ്റ് അനൗണ്‍സ് ചെയ്തു കൊണ്ടാണ് ചിത്രത്തിന്റെ പോസ്റ്റര്‍ എത്തിയിരിക്കുന്നത്. വിസ്മയ മോഹന്‍ലാലിന്റെ അരങ്ങേറ്റം കുറിച്ചു കൊണ്ടുള്ള ഈ ചിത്രം ഇന്ത്യയ്ക്ക് അകത്തും പുറത്തും വലിയ ജനശ്രദ്ധ നേടിയിരുന്നു. ഒരു സാധാരണ കുടുംബ ജീവിതത്തിന്റെ പശ്ചാത്തലത്തിലാണ് ചിത്രത്തിന്റെ കഥ നടക്കുന്നതെന്ന് വ്യക്തമാക്കും വിധത്തിലാണ് പുതിയ പോസ്റ്റര്‍ എത്തിയിരിക്കുന്നത്. ഒരു മലയോര ഗ്രാമത്തിന്റെ പശ്ചാത്തലത്തിലൂടെയാണ് ചിത്രത്തിന്റെ കഥാപുരോഗതി. ഓണത്തിന് മുന്നോടിയായി പ്രദര്‍ശനത്തിനെത്തുന്ന ഈ ചിത്രത്തിന്റെ പോസ്റ്റ് പ്രൊഡക്ഷന്‍ ജോലികള്‍ പുരോഗമിച്ചു വരികയാണ്. ലിനീഷ് നെല്ലിക്കല്‍, അഖില്‍ കൃഷ്ണ, ജൂഡ് ആന്റണി ജോസഫ് എന്നിവരാണ് തിരക്കഥ രചിച്ചിരിക്കുന്നത്.

🔹ശ്രീനാഥ് ഭാസി നായകനായ ‘കറക്കം’ ജൂലൈ 3 മുതല്‍ സോണി ലിവില്‍ സ്ട്രീമിംഗ് ആരംഭിക്കും. മലയാള സിനിമയിലെ ആദ്യ മ്യൂസിക്കല്‍ ഹൊറര്‍-കോമഡി ചിത്രമായി വിശേഷിപ്പിക്കപ്പെടുന്ന ചിത്രം, ഹൊറര്‍-കോമഡി വിഭാഗത്തിന് പുതുമയാര്‍ന്ന അനുഭവമാണ് സമ്മാനിക്കുന്നത്. ധനുഷും ഖാജയും എന്ന രണ്ട് യുവാക്കളുടെ ജീവിതത്തിലേക്ക് അപ്രതീക്ഷിതമായി കടന്നുവരുന്ന അഞ്ച് ആത്മാക്കളെ ചുറ്റിപ്പറ്റിയാണ് കഥ പുരോഗമിക്കുന്നത്. പുതുവത്സരാഘോഷത്തിനിടെ നടത്തിയ ഒരു തമാശയാണ് ആത്മാക്കളെ ഉണര്‍ത്തുന്നത്. തുടര്‍ന്ന് അവരുടെ ജീവിതത്തില്‍ അരങ്ങേറുന്ന രസകരവും അപ്രതീക്ഷിതവുമായ സംഭവങ്ങളുമാണ് ചിത്രത്തെ മുന്നോട്ട് നയിക്കുന്നത്. ഫെമിന ജോര്‍ജ്, ഷോണ്‍ റോമി, സിദ്ധാര്‍ത്ഥ് ഭരതന്‍, ജീന്‍ പോള്‍ ലാല്‍, അഭിരാം രാധാകൃഷ്ണന്‍, പ്രവീണ്‍ ടിജെ, മണികണ്ഠന്‍ ആര്‍ ആചാരി, ബിജു കുട്ടന്‍, മിധുട്ടി, ഷാലു റഹീം, വിനീത് തട്ടില്‍ ഡേവിഡ് എന്നിവരും ചിത്രത്തിലുണ്ട്.

💦 ഗുരുജിയുടെ വാക്കുകൾ
*****************************

മനസ്സൊന്നു താളം തെറ്റിയാൽ നാം ഭ്രാന്തരാണ്..അത്പോലെ ശരീരം തളർന്നാലോ, നമ്മൾ രോഗിയും ആണ്, ശ്വാസം നിലച്ചാൽ വെറും നിർജീവമായ ജഡം മാത്രമാകും..അത് കൊണ്ട് തന്നെ ജീവിക്കാൻ കഴിയുന്ന സമയം നല്ലത് മാത്രം ചെയ്യുക , അത് ഒരു പക്ഷേ മറ്റാരും കാണുന്നില്ലങ്കിൽ കൂടി.
നമ്മുടെ ജീവിതം സന്തോഷമുള്ളതാകുന്നത് നമ്മളിലേക്ക് വന്നുചേരുന്ന കാര്യങ്ങൾ കൊണ്ടല്ല, മറിച്ച് നമുക്കുള്ളതിനെ നമ്മൾ എങ്ങനെ കാണുന്നു എന്നതിനെ ആശ്രയിച്ചാണ്.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂലൈ 3

•ദുക്റാന തിരുനാൾ (വിശുദ്ധ തോമാശ്ലീഹ ദിനം): കേരളത്തിലെ സുറിയാനി ക്രിസ്ത്യാനികളും ഇന്ത്യൻ ക്രൈസ്തവരും ജൂലൈ 3 ‘ദുക്റാന’ അഥവാ വിശുദ്ധ തോമാശ്ലീഹായുടെ ഓർമ്മദിവസമായി ആചരിക്കുന്നു. AD 52-ൽ ഇന്ത്യയിൽ എത്തി സുവിശേഷം പ്രസംഗിച്ച അദ്ദേഹം രക്തസാക്ഷിത്വം വരിച്ചതിന്റെ ഓർമ്മപ്പെടുത്തലാണിത്. മാർത്തോമ്മാ നസ്രാണികൾക്കിടയിൽ ഈ ദിനത്തിന് വളരെ വലിയ പ്രാധാന്യമുണ്ട്.

•അന്താരാഷ്ട്ര പ്ലാസ്റ്റിക് ബഹിഷ്കരണ ദിനം (International Plastic Bag Free Day): ഒറ്റത്തവണ ഉപയോഗിക്കുന്ന പ്ലാസ്റ്റിക് ബാഗുകൾ പരിസ്ഥിതിക്ക് വരുത്തുന്ന ദോഷങ്ങളെക്കുറിച്ച് അവബോധം സൃഷ്ടിക്കുന്നതിനായി ആഗോളതലത്തിൽ ഈ ദിനം ആചരിക്കുന്നു.

•ഇന്ത്യൻ സൈന്യത്തിന്റെ ജങ്കാർ ദിനം: അധിനിവേശ ശക്തികൾക്കെതിരെ പോരാടി 1948 ജൂലൈ 3-ന് വീരമൃത്യു വരിച്ച ‘നൗഷേരയുടെ സിംഹം’ എന്നറിയപ്പെടുന്ന ബ്രിഗേഡിയർ മുഹമ്മദ് ഉസ്മാന്റെ ത്യാഗത്തെ അനുസ്മരിക്കുന്ന ദിവസമാണിത്.

•അന്താരാഷ്ട്ര ഡ്രോപ്പ് എ റോക്ക് ദിനം (International Drop a Rock Day): ആളുകൾ പോസിറ്റീവ് സന്ദേശങ്ങൾ കല്ലുകളിൽ പെയിന്റ് ചെയ്ത് മറ്റുള്ളവർക്ക് കണ്ടെത്താനായി പ്രത്യേക സ്ഥലങ്ങളിൽ ഉപേക്ഷിക്കുന്ന ഒരു രസകരമായ ദിനമാണിത്.

തയ്യാറാക്കിയത്: കപിൽ ശങ്കർ

8 Likes

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 03 | വെള്ളി ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂലൈ 3

തയ്യാറാക്കിയത്: കപിൽ ശങ്കർ

രക്തബന്ധങ്ങളുടെ ഒടുങ്ങാത്ത വേരുകൾ: ഓർമ്മകളുടെ ജീവിക്കുന്ന പാലങ്ങൾ.. ✍️ സിജു ജേക്കബ്

സ സ സ ക്ലാസിക് വാരഫലം: (4) ‘കപടലാവണ്യവും ആന്തരമനുഷ്യന്റെ നിശ്ശബ്ദതയും’ ✍ അഷ്റഫ് കാളത്തോട്

കതിരും പതിരും പംക്തി : (101) ‘മഴക്കാലം…. ഒരു കുട്ടിക്കാലം!’. ✍ ജസിയഷാജഹാൻ

LEAVE A REPLY Cancel reply

Most Popular

സംസ്ഥാനത്ത് ആറ് പേര്‍ക്ക് കൂടി ഇന്ന് ഷിഗെല്ല രോഗബാധ സ്ഥിരീകരിച്ചു

കൊല്ലത്ത് ധ്യാനം കൂടാനെത്തിയ പെണ്‍കുട്ടിയെ പീഡിപ്പിച്ച പുരോഹിതന്‍ അറസ്റ്റില്‍

കാഫിർ സ്‌ക്രീൻഷോട്ട് കേസിൽ പ്രതി ജിതിൻ ഭാസ്കറിന് ജാമ്യം

Recent Comments

EDITOR PICKS

സംസ്ഥാനത്ത് ആറ് പേര്‍ക്ക് കൂടി ഇന്ന് ഷിഗെല്ല രോഗബാധ സ്ഥിരീകരിച്ചു

കൊല്ലത്ത് ധ്യാനം കൂടാനെത്തിയ പെണ്‍കുട്ടിയെ പീഡിപ്പിച്ച പുരോഹിതന്‍ അറസ്റ്റില്‍

POPULAR POSTS

ടെസ്റ്റ് ഡ്രൈവിങ്ങിനായി ഷോറൂമിലെത്തി ഒന്നര ലക്ഷത്തിന്റെ ബൈക്കുമായി യുവാവ് മുങ്ങി.

ആന്ധ്രയിൽ ട്രക്കുകൾ കൂട്ടിയിടിച്ച് തീപിടിത്തം; മൂന്ന് പേർ മരിച്ചു.

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 03 | വെള്ളി ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

ജൂലൈ 3

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************