📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 01 | ബുധൻ ✍️ കപിൽ ശങ്കർ

🔹സംസ്ഥാനത്തിന്റെ കേരള എന്ന പേര് കേരളം എന്നാക്കാനുള്ള നടപടികളുടെ ഭാഗമായി രാഷ്ട്രപതിയുടെ റഫറന്‍സ് ഇന്നു നിയമസഭ അംഗീകരിക്കും. ഏകകണ്ഠമായി അംഗീകരിച്ച ശേഷം ലോക്സഭ കൂടി അംഗീകരിച്ചശേഷം കേന്ദ്രം വിജ്ഞാപനം ഇറക്കും. ഇതോടെ സംസ്ഥാനത്തിന്റെ പേര് കേരളം എന്നാകും.

🔹‎സംസ്ഥാനത്ത് ഇന്നലത്തെ വൈദ്യുതി ഉപയോഗത്തിൽ 400 മെഗാവാട്ട് മുതൽ 600 മെഗാവാട്ട് വരെ കുറവുണ്ടായതായി കെഎസ്ഇബി അറിയിച്ചു. സംസ്ഥാന വ്യാപകമായി മഴ ലഭ്യമായതുമൂലമാണ് വൈദ്യുതി ഉപയോഗത്തിൽ കുറവുണ്ടായത്.

🔹കേന്ദ്ര സര്‍ക്കാറിന്റെ വിദേശ സംഭാവന നിയന്ത്രണ നിയമ (എഫ്സിആര്‍എ) ഭേദഗതിക്കെതിരെ നിയമസഭയില്‍ പ്രമേയം അവതരിപ്പിക്കാന്‍ സംസ്ഥാന സര്‍ക്കാര്‍. മുഖ്യമന്ത്രി വി.ഡി. സതീശന്‍ പ്രമേയം അവതരിപ്പിക്കും. പ്രതിപക്ഷവും പ്രമേയത്തെ അനുകൂലിക്കും.

🔹കെ എസ് ആര്‍ ടി സി ജീവനക്കാര്‍ക്ക് മാസത്തിലെ അവസാന ദിവസം ശമ്പളം വിതരണം ചെയ്തു. ഒന്നാം തീയതിക്കു മുന്‍പായി ശമ്പളം നല്‍കാന്‍ സര്‍ക്കാര്‍ 100 കോടി രൂപയാണ് കെ എസ് ആര്‍ ടി സിക്കു നല്‍കിയത്. സ്ത്രീകള്‍ക്കായി പ്രിയദര്‍ശിനി സൗജന്യ യാത്ര പദ്ധതി നടപ്പാക്കിയത് വഴി കെ എസ് ആര്‍ ടി സിക്ക് പ്രതിമാസം 55 കോടി രൂപയോളം വരുമാന നഷ്ടമുണ്ടായിരിക്കേയാണ് സര്‍ക്കാര്‍ നൂറു കോടി രൂപ നല്‍കിയത്.

🔹ദി ടെലഗ്രാഫ് മുന്‍ എഡിറ്ററും മലയാളിയുമായ ആര്‍ രാജഗോപാലിന് പാസ്പോര്‍ട്ട് പുതുക്കി നല്‍കാന്‍ തീരുമാനമായി. ബംഗാളില്‍ താമസിച്ചിരുന്ന അദ്ദേഹത്തിന്റെ പേര് എസ്ഐആറില്‍ വെട്ടിയതിനു പിറകേ, പാസ്പോര്‍ട്ട് വെരിഫിക്കേഷന്‍ നടന്നിരുന്നില്ല. സംഭവത്തില്‍ വലിയ പ്രതിഷേധമുയര്‍ന്നതോടെയാണ് തീരുമാനം.

‎🔹വാണിജ്യ എൽപിജി സിലിണ്ടർ വില കുറച്ചു. 19 കിലോഗ്രാം എൽപിജി സിലിണ്ടർ വില 183 രൂപയാണ് കുറച്ചത്. പുതിയ നിരക്കുകൾ ഇന്ന് മുതൽ പ്രാബല്യത്തിൽ വരും.

🔹കേന്ദ്രത്തിന്റെ നിയമങ്ങള്‍ക്കു വിധേയമായേ വാഹനങ്ങള്‍ മോഡിഫിക്കേഷന്‍ ചെയ്യാനാവൂവെന്ന് ഗതാഗത വകുപ്പ് മന്ത്രി സി.പി. ജോണ്‍. അമിതമായ വെളിച്ചവും ശബ്ദവും പുറത്തുവരുന്ന തരം മാറ്റങ്ങള്‍ അംഗീകരിക്കാനാവില്ല. അതേസമയം കളര്‍ കോഡ് പോലുള്ള ചില മാറ്റങ്ങളെക്കുറിച്ചു ചര്‍ച്ച നടക്കുന്നുണ്ടെന്നും അദ്ദേഹം പറഞ്ഞു.

🔹നെല്ലു സംഭരണതിന് മികച്ച സംവിധാനമുണ്ടാക്കുമെന്ന് ഭക്ഷ്യ- സിവില്‍ സപ്ലൈസ് മന്ത്രി അനൂപ് ജേക്കബ്. കര്‍ഷകര്‍ക്ക് കൃത്യമായ തുക ലഭ്യമാക്കും. ഇ-പോസ് മെഷീനെ അളവുതൂക്ക സംവിധാനമാക്കും. മുന്‍ഗണന കാര്‍ഡുകാരുടെ മാനദണ്ഡത്തില്‍ മാറ്റം വരും. മുന്‍ഗണന കാര്‍ഡുകള്‍ക്ക് തലയെണ്ണി വിഹിതം നല്‍കുന്നതും പരിഗണയിലുണ്ട്. 24 മണിക്കൂര്‍ പ്രവര്‍ത്തിക്കുന്ന സപ്ലൈകോ കോണ്‍വെയിങ് സ്റ്റോറുകള്‍ കൊണ്ടുവരും. സപ്ലൈകോ കൂടുതല്‍ മെഡിക്കല്‍ ഷോപ്പുകള്‍ ആരംഭിക്കുമെന്നും അദ്ദേഹം പറഞ്ഞു.

🔹സംസ്ഥാനത്ത് നിപ ഭീതി ഒഴിഞ്ഞു. സമ്പര്‍ക്കത്തിലുള്ളവര്‍ ക്വാറന്റൈന്‍ പൂര്‍ത്തിയാക്കുകയും രോഗിയുടെ പരിശോധനാഫലം നെഗറ്റീവാകുകയും ചെയ്തെന്ന് ആരോഗ്യവകുപ്പ് അറിയിച്ചു. അതേസമയം, എട്ട് പേര്‍ക്ക് കൂടി ഷിഗെല്ല സ്ഥിരീകരിച്ചതോടെ സംസ്ഥാനത്ത് ആശങ്ക തുടരുകയാണ്.

🔹ഇടുക്കി ഏലപ്പാറക്ക് സമീപം ചെമ്മണ്ണില്‍ മരച്ചില്ല ഒടിഞ്ഞുവീണ് ഇരുചക്ര വാഹനമോടിച്ചിരുന്ന യുവാവ് മരിച്ചു. ചെമ്മണ്ണ് സ്വദേശി തടത്തില്‍ പ്രണവ് പ്രദീപ് ആണ് മരിച്ചത്.

🔹ലഹരിക്കു വേണ്ടി അണലിക്കുഞ്ഞുങ്ങളെക്കൊണ്ട് നാവില്‍ കൊത്തിക്കുന്ന പാര്‍ലറുകള്‍ ഉണ്ടെന്ന തന്റെ പരാമര്‍ശം വസ്തുതാപരമായി ശരിയല്ലെന്ന് സമ്മതിച്ച് ആഭ്യന്തര മന്ത്രി രമേശ് ചെന്നിത്തല. തെറ്റ് സംബന്ധിച്ച് ഡോ. ഷിംന അസീസിന്റെ തിരുത്ത് മാധ്യമങ്ങളിലൂടെ ശ്രദ്ധയില്‍പ്പെട്ടു. ഡോക്ടറുടെ തിരുത്ത് സ്വീകരിക്കുന്നു- രമേശ് ചെന്നിത്തല ഫേസ്ബുക്കില്‍ കുറിച്ചു.

🔹കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്റ്സ് അസോസിയേഷന്റെ നേതൃത്വത്തില്‍ സംഘടിപ്പിക്കുന്ന കേരള ജ്വല്ലറി ഇന്റര്‍നാഷനല്‍ പ്രദര്‍ശനമേള ജൂലൈ 3, 4, 5 തീയതികളില്‍ അങ്കമാലി അഡ്‌ലക്സ് ഇന്റര്‍നാഷനല്‍ കണ്‍വന്‍ഷന്‍ സെന്ററില്‍ നടക്കും.

🔹മുതിര്‍ന്ന കോണ്‍ഗ്രസ് നേതാവും മുന്‍ എംഎല്‍എയും തൃശൂര്‍ ഡിസിസി മുന്‍പ്രസിഡന്റുമായ പിഎ മാധവന്‍ അന്തരിച്ചു. 80 വയസ്സായിരുന്നു. വാഹനാപകടത്തില്‍ പരിക്കേറ്റതിനെത്തുടര്‍ന്ന് ചികിത്സയിലായിരുന്നു.

🔹തൃശൂരില്‍ ലോഡ്ജില്‍ മുറിയെടുത്ത് പ്രസവിച്ച യുവതിയും നവജാത ശിശുവും മരിച്ചു. തൃപ്രയാര്‍ എടമുട്ടം സ്വദേശിനി കൊല്ലാറ വീട്ടില്‍ ജ്യോതി (28) ആണ് മരിച്ചത്. തൃശൂര്‍ വെളിയന്നൂരിലുള്ള നിയറസ്റ്റ് ലോഡ്ജില്‍ രക്തംവാര്‍ന്നാണ് യുവതി മരിച്ചത്. കഴിഞ്ഞ 27ന് ഓട്ടോ ഡ്രൈവര്‍ക്കൊപ്പമാണ് യുവതി മുറിയെടുത്തത്. മുറിയുടെ വാതില്‍ തുറക്കാതായതോടെ ഹോട്ടല്‍ ജീവനക്കാര്‍ പോലീസിനെ വിവരം അറിയിക്കുകയായിരുന്നു. ഓട്ടോ ഡ്രൈവറെ പോലീസ് കസ്റ്റഡിയിലെടുത്തു ചോദ്യം ചെയ്തു.

🔹കാപ്പാ കേസില്‍ ജയില്‍ ശിക്ഷ അനുഭവിക്കുന്ന തിരുവനന്തപുരം കോര്‍പറേഷനിലെ ബി ജെ പി കൗണ്‍സിലര്‍ ആര്‍ സുഗതനെ വധശ്രമ കേസില്‍ നെടുമങ്ങാട് കോടതിയില്‍ ഹാജരാക്കാന്‍ വിയൂര്‍ ജയിലില്‍നിന്ന് തിരുവനന്തപുരത്ത് എത്തിച്ചു. സുഗതന്റെ രാജി ആവശ്യപ്പെട്ട് യുഡിഎഫ് കഴിഞ്ഞ ദിവസം പ്രതിഷേധ പരിപാടികള്‍ നടത്തിയിരുന്നു.

🔹കോഴിക്കോട് മുക്കത്ത് രണ്ടെമുക്കാല്‍ കിലോയോളം എംഡിഎംഎ പിടികൂടിയ കേസില്‍ ഒരു സ്ത്രീ കൂടി അറസ്റ്റില്‍. മുക്കം മാങ്ങാപൊയില്‍ സ്വദേശിയായ ഖദീജയാണ് പിടിയിലായത്. മുഖ്യ പ്രതി പുല്ലമ്പാടി പറമ്പില്‍ മുഹമ്മദ് ഹനീഫയുടെ സാമ്പത്തിക ഇടപാടുകള്‍ കൈകാര്യം ചെയ്തിരുന്നത് ഖദീജയാണ്.

🔹സര്‍ക്കാരിന്റെ നിയന്ത്രണത്തിലുള്ള ജുവനൈല്‍ ഹോമിലെ അന്തേവാസിയായ പന്ത്രണ്ടുകാരനെ പ്രകൃതിവിരുദ്ധ പീഡനത്തിനിരയാക്കിയ കെയര്‍ടേക്കര്‍ അറസ്റ്റില്‍. കോഴിക്കോട് ചെലവൂര്‍ സ്വദേശിയായ പാറങ്ങോട്ട് വീട്ടില്‍ അയൂബി(56)നെയാണ് ചേവായൂര്‍ പൊലീസ് അറസ്റ്റ് ചെയ്തത്.

🔹ട്രെയിനുകള്‍ കേന്ദ്രീകരിച്ച് മോഷണം നടത്തുന്ന കുപ്രസിദ്ധ മോഷ്ടാവ് ‘വേട്ട അഭിജിത്ത്’ കൊല്ലം റെയില്‍വേ പൊലീസിന്റെ പിടിയില്‍. മോഷണക്കേസില്‍ തമിഴ്നാട് പൊലീസിന്റെ കസ്റ്റഡിയില്‍ നിന്നും രക്ഷപെട്ട ശേഷം കവര്‍ച്ചാ പരമ്പരകള്‍ തുടരവേയാണ് പ്രതി കൊല്ലത്ത് പിടിയിലായത്.

🔹കാസര്‍കോട് മഞ്ചേശ്വരത്ത് വീട്ടില്‍ അതിക്രമിച്ച് കയറി യുവതിയുടെയും ആണ്‍സുഹൃത്തിന്റെയും വീഡിയോ പകര്‍ത്തുകയും ലൈംഗിക ചൂഷണ ശ്രമം നടത്തുകയും ചെയ്തതിന് രണ്ട് പേര്‍ പിടിയില്‍. ഉദ്യാവര സ്വദേശികളായ അന്‍വര്‍, സെനോഹര്‍ എന്നിവരാണ് അറസ്റ്റിലായത്.

🔹തോക്കുചൂണ്ടി പ്രവാസി വ്യവസായിയെ തട്ടികൊണ്ടുപോയി മോചിപ്പിക്കാന്‍ പണം ആവശ്യപ്പെട്ട കേസില്‍ ഒരാള്‍ കൂടി അറസ്റ്റില്‍. എറണാകുളം ആലുവ ഈസ്റ്റ് വെലുംകിടന്‍ വീട്ടില്‍ ബിലാല്‍ (30) എന്ന ബില്ലയെയാണ് പിടിയിലായത്. മലപ്പുറം വണ്ടൂര്‍ സ്വദേശിയായ പ്രവാസി വ്യവസായി മുഹമ്മദാലിയെ തട്ടികൊണ്ടുപോയ കേസിലാണ് അറസ്റ്റ്.

🔹പൈപ്പ് ലൈന്‍ സ്ഥാപിക്കാന്‍ എടുത്ത കുഴിയില്‍ വീണ് സ്‌കൂട്ടര്‍ യാത്രികരായ ദമ്പതിമാര്‍ക്ക് പരിക്കേറ്റു. കോഴിക്കോട് കറുത്തപറമ്പ് വേനപ്പറക്കല്‍ സ്വദേശികളായ കൊളോറാമ്മല്‍ സി.വി അബ്ദുല്‍ ഗഫൂര്‍, ഭാര്യ സലീജ ബീഗം എന്നിവര്‍ക്കാണ് അപകടത്തില്‍ പരിക്കേറ്റത്. കാരശ്ശേരി പഞ്ചായത്തിലെ ആനയാംകുന്ന് സ്‌കൂളിന് സമീപം പുലര്‍ച്ചെ അഞ്ചോടെയായിരുന്നു അപകടമുണ്ടായത്.

🔹കോഴിക്കോട് സുല്‍ത്താന്‍ബത്തേരിയില്‍ കെഎസ്ആര്‍ടിസി ബസില്‍ സൗജന്യയാത്രക്കാരായ സ്ത്രീകള്‍ തമ്മില്‍ തര്‍ക്കവും വാക്കേറ്റവും. സ്‌റ്റോപ്പില്ലാത്ത സ്ഥലത്ത് ബസ് നിര്‍ത്തണം എന്ന ആവശ്യപ്പെട്ടായിരുന്നു തര്‍ക്കം. സ്ത്രീകള്‍ ബസിന്റെ ബെല്‍ വലിച്ചു പൊട്ടിച്ചു. സംഭവത്തില്‍ യാത്രക്കാരായ മൂന്ന് സ്ത്രീകളെ പൊലീസ് കസ്റ്റഡിയിലെടുത്തു.

🔹ഓപ്പറേഷന്‍ തൂഫാന്റെ ഭാഗമായി കെ സുധാകരന്‍ എം പി വിളിച്ച യോഗത്തില്‍ പങ്കെടുത്തയാള്‍ കൊച്ചിയിലെ ബാറില്‍ മദ്യപിച്ച് സംഘര്‍ഷമുണ്ടാക്കിയതിന് അറസ്റ്റിലായി. വയോധികനെ ആക്രമിച്ച് കൊലപ്പെടുത്താന്‍ ശ്രമിച്ച മട്ടാഞ്ചേരി സ്വദേശി ഷിബുവാണ് കെ സുധാകരന്‍ വിളിച്ച് ചേര്‍ത്ത യോഗത്തില്‍ പങ്കെടുത്തത്. നിരവധി ക്രിമിനല്‍ കേസുകളില്‍ പ്രതിയാണ് ഷിബു.

🔹കൊല്ലം ഇടമുളക്കല്‍ പന്ത്രണ്ടാം വാര്‍ഡില്‍ അക്രമകാരിയായ തെരുവ് നായയെ പഞ്ചായത്ത് പ്രസിഡന്റിന്റെ നേതൃത്വത്തില്‍ വെടിവച്ചു കൊന്നു.

🔹മഴ ശക്തമാകുകയും ഓറഞ്ച് അലര്‍ട്ട് പ്രഖ്യാപിക്കുകയും ചെയ്ത സാഹചര്യത്തില്‍ കണ്ണൂര്‍, കാസര്‍കോട് ജില്ലകളില്‍ ഇന്നു പ്രൊഫഷണല്‍ കോളേജ് ഉള്‍പ്പടെ എല്ലാ വിദ്യാഭ്യാസ സ്ഥാപനങ്ങള്‍ക്കും അവധി.

🔹എല്‍നിനോ സാഹചര്യം തുടരുന്നതിനാല്‍ ജൂലൈ മാസത്തിലും സംസ്ഥാനത്ത് സാധാരണയേക്കാള്‍ കുറഞ്ഞ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ്. തുടര്‍ന്നുള്ള കാലവര്‍ഷ മാസങ്ങളിലും ഇത് കൂടുതല്‍ ശക്തി പ്രാപിക്കാന്‍ സാധ്യതയുണ്ടെന്നാണ് മുന്നറിയിപ്പ്. അതേസമയം അടുത്ത അഞ്ചു ദിവസത്തേക്ക് വിവിധ ജില്ലകളില്‍ ഓറഞ്ച്, യെല്ലോ അലര്‍ട്ടുകള്‍ പ്രഖ്യാപിച്ചിട്ടുണ്ട്.

‎🔹മോഷ്ടിച്ച പണം ശുചിമുറിയിൽ ഒളിപ്പിച്ച ശേഷം സൌകര്യം അനുസരിച്ച് പുറത്ത് എത്തിക്കുന്നതായിരുന്നു പതിവെന്ന് അയോധ്യ രാമക്ഷേത്രത്തിലെ സംഭാവന കൊള്ളയിലെ പ്രധാനപ്രതിയായ അവനാശ് ശുക്ള വ്യക്തമാക്കി.

🔹ഇന്ധന പ്രതിസന്ധി ഒഴിവാക്കാന്‍, ഒരു മാസത്തേക്ക് രാജ്യത്തിനാവശ്യമായ ക്രൂഡ് ഓയില്‍, എല്‍പിജി, എല്‍എന്‍ജി എന്നിവയുടെ വലിയ കരുതല്‍ ശേഖരം ഒരുക്കാന്‍ ഇന്ത്യയുടെ പദ്ധതി. നിലവിലെ ക്രൂഡ് ഓയില്‍ ശേഖരം 120 ദശലക്ഷം ബാരലായി ഉയര്‍ത്താനും, സുരക്ഷാ വെല്ലുവിളികളുള്ള എല്‍പിജി, എല്‍എന്‍ജി എന്നിവയുടെ സംഭരണം വര്‍ദ്ധിപ്പിക്കാനും സര്‍ക്കാര്‍ ലക്ഷ്യമിടുന്നു.

🔹പഞ്ചാബ് നാഷണല്‍ ബാങ്ക്, കനറ ബാങ്ക്, സ്റ്റേറ്റ് ബാങ്ക് ഓഫ് ഇന്ത്യ എന്നീ പൊതുമേഖലാ ബാങ്കുകള്‍ തമ്മില്‍ ലയിപ്പിക്കുമെന്ന രീതിയില്‍ സോഷ്യല്‍ മീഡിയയില്‍ പ്രചരിക്കുന്ന വാര്‍ത്തകള്‍ വ്യാജമാണെന്ന് കേന്ദ്ര സര്‍ക്കാര്‍ വ്യക്തമാക്കി.

🔹തമിഴ്‌നാട് രാഷ്ട്രീയത്തില്‍ ഡിഎംകെയ്ക്ക് വീണ്ടും കനത്ത തിരിച്ചടി. ഡി.എം.കെ സഖ്യം ഉപേക്ഷിച്ച് നടന്‍ വിജയ്യുടെ നേതൃത്വത്തിലുള്ള തമിഴക വെട്രി കഴകത്തിനൊപ്പം ചേരാന്‍ വിടുതലൈ ചിരുതൈകള്‍ കക്ഷി(വിസികെ) തീരുമാനിച്ചു. ചെറു പാര്‍ട്ടികളുടെ സഖ്യമുണ്ടാക്കാന്‍ ടിവികെ ശ്രമിക്കുന്നതിനിടെയാണ് വിസികെ നിര്‍ണ്ണായക തീരുമാനമെടുത്തത്.

🔹മുംബൈയിലെ ചെമ്പൂരില്‍ സ്‌കൂള്‍ ബസിന് മുകളില്‍ കൂറ്റന്‍ മരംവീണ് ഒരു വിദ്യാര്‍ത്ഥി മരിക്കുകയും നാലുകുട്ടികള്‍ക്ക് പരിക്കേല്‍ക്കുകയും ചെയ്തു.

🔹ഹോംസ്റ്റേയില്‍ 26 കാരിയായ ഫിസിയോ തെറാപ്പിസ്റ്റ് മരിച്ച സംഭവത്തില്‍ ലവ് ജിഹാദ് ആരോപണവുമായി യുവതിയുടെ ബന്ധുക്കള്‍. ബെംഗളൂരുവിലെ ജയാനഗര്‍ സ്വദേശിയായ സായ് സുരഭിയാണ് നന്ദി ഹില്‍സിലെ ഹോംസ്റ്റേയില്‍ മരിച്ചത്.

🔹അമേരിക്കന്‍ പൗരത്വം ജന്‍മാവകാശമല്ലെന്ന പ്രസിഡന്റ് ഡോണള്‍ഡ് ട്രംപിന്റെ ഉത്തരവ് സുപ്രീംകോടതി റദ്ദാക്കി. അമേരിക്കയില്‍ ജനിക്കുന്നവര്‍ക്ക് പൗരത്വം ജന്മാവകാശമാണെന്നത് ഭരണഘടന ഉറപ്പുനല്‍കുന്നതാണെന്ന് വ്യക്തമാക്കിക്കൊണ്ടാണ് ട്രംപിന്റെ വിവാദ ഉത്തരവ് യു എസ് സുപ്രീംകോടതി റദ്ദാക്കിയത്.

🔹യുഎഇയുടെ അഭിമാന പദ്ധതിയായ ഇത്തിഹാദ് റെയിലിലെ ആദ്യ ഇന്ത്യന്‍ ട്രെയിന്‍ ക്യാപ്റ്റനായി ചരിത്രം കുറിച്ച് മലയാളിയായ നിഷാദ്. സാധാരണ ജോലികളില്‍ നിന്ന് പ്രവാസ ജീവിതം ആരംഭിച്ച്, കഠിനാധ്വാനത്തിലൂടെയും പ്രതിസന്ധികളെ അതിജീവിച്ചും നേടിയ ഈ വിജയം മലയാളികള്‍ക്ക് അഭിമാനമാണ്.

🔹ഫുട്ബോള്‍ ഇതിഹാസം ലയണല്‍ മെസിയെയും ന്യൂയോര്‍ക്ക് സിറ്റിയുടെ മേയര്‍ സൊഹ്‌റാന്‍ മംദാനിയേയും പൊന്നാനിയിലേക്ക് കൊണ്ട് വരാന്‍ ആലോചനയുണ്ടെന്ന് കെ പി നൗഷാദലി എംഎല്‍എ. പൊന്നാനിയില്‍ നടന്ന കുടുംബ സംഗമത്തിലാണ് കെ പി നൗഷാദലിയുടെ പ്രഖ്യാപനം.

🔹ഇംഗ്ലണ്ടിനെതിരായാ ടി20 പരമ്പരയ്ക്ക് ടീം ഇന്ത്യ ഇന്ന് ഇറങ്ങും. അഞ്ച് മത്സരങ്ങളടങ്ങിയ ടി20 പരമ്പരയിലെ ആദ്യ പോരാട്ടം ചെസ്റ്റര്‍ ലീ സ്ട്രീറ്റിലെ റിവര്‍സൈഡ് ഗ്രൗണ്ടില്‍ നടക്കും. ഹാരി ബ്രൂക്ക് നയിക്കുന്ന ഇംഗ്ലണ്ട് ടീമിനെതിരെ പുതിയ ക്യാപ്റ്റനായ ശ്രേയസ് അയ്യരുടെ നേതൃത്വത്തിലാണ് ഇന്ത്യ ഇറങ്ങുന്നത്.

🔹വനിതാ ടി20 ലോകകപ്പില്‍ വെസ്റ്റ് ഇന്‍ഡീസിനെ എട്ട് വിക്കറ്റിന് തോല്‍പ്പിച്ച് ഓസ്ട്രേലിയ ഫൈനലില്‍. 126 റണ്‍സ് വിജയലക്ഷ്യവുമായി ഇറങ്ങിയ ഓസ്ട്രേലിയ ഏഴ് ഓവര്‍ ബാക്കിനില്‍ക്കെ വിജയം സ്വന്തമാക്കി. ഓള്‍റൗണ്ട് മികവ് പുറത്തെടുത്ത ആഷ്ലി ഗാര്‍ഡ്നറാണ് ഓസ്ട്രേലിയയെ വിജയത്തിലേക്ക് നയിച്ചത്. ആദ്യം ബാറ്റ് ചെയ്ത വെസ്റ്റ് ഇന്‍ഡീസിന് നിശ്ചിത 20 ഓവറില്‍ 7 വിക്കറ്റ് നഷ്ടത്തില്‍ 125 റണ്‍സെടുക്കാനേ സാധിച്ചുള്ളൂ.

🔹ലോക കപ്പ് ഫുട്ബോളില്‍ സ്വീഡനെ എതിരില്ലാത്ത മൂന്നു ഗോളിനു തകര്‍ത്ത് ഫ്രാന്‍സ് പ്രീക്വാര്‍ട്ടറിലെത്തി. 45 ാം മിനിറ്റിലും 75 ാം മിനിറ്റിലും കിലിയന്‍ എംബപെയും 53 ാം മിനിറ്റില്‍ ബ്രാഡ്‌ലി ബാര്‍കോളയുമാണ് സ്വീഡിഷ് വല നിറച്ചത്. ഇതോടെ ഈ ലോകകപ്പില്‍ മെസ്സിക്കും എംബപെയ്ക്കും ആറു വീതം ഗോളുകളായി.

🔹ഐവറി കോസ്റ്റിനെ ഒന്നിനെതിരെ രണ്ട് ഗോളുകള്‍ക്കു തകര്‍ത്ത് നോര്‍വെ പ്രീ ക്വാര്‍ട്ടറിലേക്ക്. മത്സരത്തിന്റെ തുടക്കം മുതല്‍ ആക്രമിച്ച് കളിച്ച ഐവറി കോസ്റ്റിനെതിരെ പ്രതിരോധത്തിലൂന്നിയാണ് നോര്‍വെ കളിച്ചത്. മുപ്പത്തൊമ്പതാം മിനിറ്റില്‍ നോര്‍വെയ്ക്കുവേണ്ടി അന്റോണിയോ നുസയാണ് ആദ്യം സ്‌കോര്‍ ചെയ്തത്. ഐവറി കോസ്റ്റിനുവേണ്ടി അമാദ് ഡിയാലോ ഗോള്‍ മടക്കി. എണ്‍പത്തിനാലാം മിനിറ്റില്‍ നോര്‍വേയ്ക്ക് വേണ്ടി ഹാളണ്ട് പട്ടിക പൂര്‍ത്തിയാക്കി. 1998നു ശേഷം ആദ്യമായാണ് നോര്‍വേ പ്രീ ക്വാര്‍ട്ടറിലെത്തുന്നത്. ബ്രസീല്‍ ആണ് പ്രീ ക്വാര്‍ട്ടറില്‍ നോര്‍വെയുടെ എതിരാളികള്‍.

🔹എം എ നിഷാദ് രചനയും സംവിധാനവും നിര്‍വ്വഹിക്കുന്ന ‘ലര്‍ക്ക്’ എന്ന ചിത്രത്തിലെ ഗാനമെത്തി. ‘കാട്ടിലെ കൊമ്പന്റെ’ എന്ന ഗാനത്തിന് വരികള്‍ എഴുതിയിരിക്കുന്നത് മനു മഞ്ജിത്ത് ആണ്. മിനേഷ് തമ്പാന്‍ ആണ് സംഗീതം പകര്‍ന്നിരിക്കുന്നത്. സുദീപ് കുമാര്‍, നസീര്‍ മിന്നലെ, എം എ നിഷാദ് എന്നിവരാണ് ആലപിച്ചിരിക്കുന്നത്. മനുഷ്യനും മൃഗങ്ങളുമായുള്ള സംഘര്‍ഷത്തിന്റെ കഥ പറയുന്ന ചിത്രമാണ് ‘ലര്‍ക്ക്’. കേരളാ ടാക്കീസിന്റെ ബാനറില്‍ ആര്‍. ഹരികുമാര്‍ അവതരിപ്പിക്കുന്ന ചിത്രമാണിത്. ജൂലൈയില്‍ തിയേറ്ററുകളിലെത്തുന്ന ‘ലര്‍ക്ക്’ ഇതിനോടകം വിവിധ അന്താരാഷ്ട്ര ചലച്ചിത്രോത്സവങ്ങളില്‍ ഇടം നേടിക്കഴിഞ്ഞു. സൈജു കുറുപ്പ്, അജു വര്‍ഗീസ്, പ്രശാന്ത് അലക്സാണ്ടര്‍, ടി.ജി. രവി, അനുമോള്‍, മഞ്ജു പിള്ള, സരിതാ കുക്കു, ജാഫര്‍ ഇടുക്കി, സുധീര്‍ കരമന, പ്രശാന്ത് മുരളി, ബിജു സോപാനം, സോഹന്‍ സീനുലാല്‍ തുടങ്ങിയവര്‍ അണിനിരക്കുന്ന ചിത്രത്തില്‍ സംവിധായകന്‍ എം.എ നിഷാദും ഒരു പ്രധാന വേഷത്തിലെത്തുന്നു.

🔹യുവതാരങ്ങളില്‍ ശ്രദ്ധേയനായ നസ്ലെനെ കേന്ദ്ര കഥാപാത്രമാക്കി അഭിനവ് സുന്ദര്‍ നായക് ഒരുക്കിയ ‘മോളിവുഡ് ടൈംസ്’ ഒടിടിയിലേക്ക്. ജിയോ ഹോട്ട്സ്റ്റാറിലൂടെ ജൂലൈ 3 ന് ചിത്രം സ്ട്രീമിംഗ് ആരംഭിക്കും. ഇതിന് മുന്നോടിയായി ചിത്രത്തിന്റെ പുതിയ ട്രെയ്ലര്‍ ജിയോ ഹോട്ട്സ്റ്റാര്‍ പുറത്തുവിട്ടിട്ടുണ്ട്. ഒരു സിനിമാ മോഹിയുടെ യാത്രകളിലൂടെ ആരും പറയാത്ത കഥ പറഞ്ഞ ചിത്രം ഒരു മികച്ച തിയറ്റര്‍ എക്സ്പീരിയന്‍സ് സമ്മാനിച്ചുവെന്നായിരുന്നു മോളിവുഡ് ടൈംസിനെക്കുറിച്ചുള്ള പ്രേക്ഷകാഭിപ്രായം. സംവിധായകനായ അഭിനവ് സുന്ദര്‍ നായകിന്റെ ആത്മകഥാംശമുള്ള സിനിമ കൂടിയാണ് മോളിവുഡ് ടൈംസ്. ഒപ്പം, ചിത്രത്തില്‍ നസ്ലനെ കൂടാതെ സംഗീത് പ്രതാപ്, ഷറഫുദ്ദീന്‍, റോഷന്‍ ഷാനവാസ്, ജഗദീഷ്, അപ്പുണ്ണി ശശി, പ്രശാന്ത് അലക്സാണ്ടര്‍, ബാലചന്ദ്രന്‍ ചുള്ളിക്കാട്, അല്‍ത്താഫ് സലിം, ഗോപിക രമേശ്, രാജേഷ് മാധവന്‍ എന്നിവരാണ് മറ്റ് അഭിനേതാക്കള്‍. കൂടാതെ രണ്ട് പ്രമുഖ താരങ്ങളും അതിഥി വേഷത്തില്‍ എത്തുന്നുണ്ട്.

💦 ഗുരുജിയുടെ വാക്കുകൾ
*****************************

ഒരുകാലത്ത്ഏതൊരു മനുഷ്യരെയും അസൂയപ്പെടുത്തും വിധം ഒരു മനസ്സോടെ ഒന്നിച്ചുനടന്ന സൗഹൃദങ്ങളോ, ഇണപ്രാവുകളെപ്പോലെ ചേർന്നു നടന്ന പ്രണയമോ
കുറച്ചുകാലത്തിനപ്പുറം നമ്മൾ കാണുമ്പോൾ അതിലൊരാൾ മാത്രം ഏകാകിയായി മൗനിയായി മാറിപ്പോയിരിക്കുന്നത് ശ്രദ്ധിച്ചിട്ടുണ്ടോ ?
നമ്മൾ ജീവനെപ്പോലെ കരുതിയ ഒരാൾക്ക് നമ്മളേക്കാൾ പ്രിയപ്പെട്ടത്
മറ്റൊരാളാണെന്ന് അറിയുന്ന ആ നിമിഷം… ഉള്ളിൽ എന്തോ ഒന്ന്
തകർന്നുവീണതുപോലെ തോന്നും…. അവിടെനിന്ന് മനുഷ്യർ പതുക്കെ
തനിച്ചാകാൻ തുടങ്ങും. അത് മറ്റാരോടുമുള്ള ദേഷ്യം കൊണ്ടാവില്ല … ആ അവസ്ഥയെ എങ്ങനെ നേരിടണമെന്ന് അവർക്കുപോലും തീരുമാനിക്കാനാവാതെ
കുഴങ്ങിപ്പോവുന്നതുകൊണ്ടാണ് !!
അത്രയും നാൾ തൻ്റെ സ്വന്തമെന്നു കരുതിയ ഒരാളുടെ ജീവിതത്തിൽ ഇന്ന് താൻ അധികപ്പറ്റാണെന്ന തോന്നലുണ്ടാകുമ്പോൾ അവർക്കു മുന്നിൽ പിന്നെ ഒരേയൊരു വഴിയേ ഉള്ളൂ… ആ മനുഷ്യരിൽ നിന്നും അവരുടെ ലോകത്തുനിന്നും പതുക്കെ പടിയിറങ്ങുക… ആ പടിയിറക്കം മറ്റാരിലേക്കും കടന്നുകയറാനാവില്ല …
എല്ലാത്തിൽ നിന്നും ഒഴിഞ്ഞ് സ്വയം തീർത്തെടുക്കുന്ന ഏകാന്തതയുടെ ലോകത്തേക്കാവും .. അതങ്ങനെ അത്ര വേഗത്തിലുമാവില്ല …സാവധാനത്തിൽ അവർ ആ അവസ്ഥയിലേക്ക് ചേക്കേറും .. വേനൽക്കാലത്ത് നമ്മുടെ കിണറുകൾ
വരണ്ടുണങ്ങിപ്പോവുന്നത് ശ്രദ്ധിച്ചിട്ടില്ലേ? അത് , പെട്ടെന്നൊരു ദിവസം കൊണ്ട്
വറ്റിവരളുന്നതല്ല, കുറച്ചുകുറച്ചായി വെള്ളം താഴ്ന്ന് ഒടുവിൽ അടിത്തട്ടിലെ മണ്ണ് മാത്രം അവിടെ ബാക്കിയാകും…. അതുപോലെയാണ് പടിയിറങ്ങേണ്ടിവന്ന
ഈ മനുഷ്യരും ! കടന്നുപോകുന്ന ഓരോ ദിവസവും അവർ അവരുടെ പ്രതീക്ഷകളെയും സ്നേഹത്തെയും അവരിൽനിന്ന് വറ്റിച്ചുകളയും. ഒടുവിൽ അവരുടെയുള്ളിൽ ഒരു വലിയ ശൂന്യത മാത്രം ബാക്കിയാകും. പിന്നീട് അവർ
ആൾക്കൂട്ടങ്ങളിൽ നിന്നും സൗഹൃദങ്ങളിൽ നിന്നും ഒഴിഞ്ഞുമാറാൻ ശ്രമിക്കും.
ആരുടെയും നോട്ടം അവരിലേക്കെത്താതിരിക്കാൻ അവർ പ്രത്യേകം ശ്രദ്ധിക്കും. “നിനക്ക് എന്താണ് പറ്റിയത്?” എന്ന ചോദ്യം കേൾക്കാൻ അവർക്ക് ഭയമാണ്.
കാരണം ആ ചോദ്യത്തിന് മുന്നിൽ ഒഴുക്കാൻ ഒരു തുള്ളി കണ്ണുനീരല്ലാതെ,
പറയാൻ വാക്കുകളുണ്ടാകില്ല… തങ്ങളുടെ സങ്കടം മറ്റുള്ളവരുടെ മുന്നിൽ
ഒരു തമാശയോ സഹതാപമോ ആയി മാറുമെന്ന് അവർക്കറിയാം …
നമുക്ക് ഏറ്റവും പ്രിയപ്പെട്ട മനുഷ്യരുടെ മനസ്സിൽ നമുക്ക് സ്ഥാനമില്ലെന്ന റിയുന്നത് ഒരു മനുഷ്യന് താങ്ങാൻ കഴിയുന്നതിലും അപ്പുറമാണ്. തകർന്ന മനസ്സുമായി വീണ്ടും
സ്നേഹത്തിനായി യാചിക്കുന്നതിനേക്കാൾ എത്രയോ അന്തസ്സുള്ളതാണ്
ഏകാന്തതയിലെ ആ നിശബ്ദതയെന്ന് അവർ മനസ്സിലാക്കിയിരിക്കും !!
ആരും ആരുടെയും സ്വന്തമല്ല, സ്വന്തമെന്ന് നമുക്ക് ഒരു ഭംഗിക്കുവേണ്ടി
പറയാമെന്നു മാത്രം !!

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂലൈ 1

•ഇന്ത്യയിൽ ജൂലൈ 1 ഏറ്റവും പ്രധാനമായി ദേശീയ ഡോക്ടേഴ്‌സ് ദിനം (National Doctor’s Day) ആയി ആചരിക്കുന്നു. പ്രശസ്ത ഭിഷഗ്വരനും സ്വാതന്ത്ര്യസമര സേനാനിയും പശ്ചിമ ബംഗാളിന്റെ രണ്ടാമത്തെ മുഖ്യമന്ത്രിയുമായിരുന്ന ⁠ഡോ. ബിധൻ ചന്ദ്ര റോയിയുടെ ഓർമ്മക്കായാണ് ഈ ദിനം ആചരിക്കുന്നത്. അദ്ദേഹത്തിന്റെ ജനനവും (1882 ജൂലൈ 1) മരണവും (1962 ജൂലൈ 1) ഇതേ ദിവസമായിരുന്നു.

•ചാർട്ടേഡ് അക്കൗണ്ടന്റ്‌സ് ദിനം (CA Day): ഇൻസ്റ്റിറ്റ്യൂട്ട് ഓഫ് ചാർട്ടേഡ് അക്കൗണ്ടന്റ്‌സ് ഓഫ് ഇന്ത്യ (⁠ICAI) നിലവിൽ വന്നതിന്റെ ഓർമ്മ പുതുക്കൽ.

•ദേശീയ തപാൽ ജീവനക്കാരുടെ ദിനം (National Postal Worker Day): തപാൽ ജീവനക്കാരുടെ സേവനങ്ങളെ മാനിക്കുന്നതിനായി ആചരിക്കുന്നു.

•വനമഹോത്സവ വാരം ആരംഭം: ഇന്ത്യയിൽ ഹരിതാഭ വർദ്ധിപ്പിക്കുന്നതിനായുള്ള വനമഹോത്സവ വാരത്തിന് ജൂലൈ 1-ന് തുടക്കമാകുന്നു.

•ജിഎസ്ടി ദിനം (GST Day): ഇന്ത്യയിൽ ചരക്ക് സേവന നികുതി (GST) നിലവിൽ വന്നത് 2017 ജൂലൈ 1-നായിരുന്നു.

•അന്താരാഷ്ട്ര തമാശ ദിനം (International Joke Day): ചിരിയും സന്തോഷവും പങ്കുവെക്കാനായി ഈ ദിനം ആഘോഷിക്കുന്നു.

•കാനഡ ദിനം (Canada Day): കാനഡയുടെ ദേശീയ ദിനമായി ആചരിക്കുന്നു.

•അന്താരാഷ്ട്ര റെഗ്ഗെ സംഗീത ദിനം (International Reggae Day): റെഗ്ഗെ സംഗീത ശാഖയെ ആദരിക്കുന്നതിനുള്ള ദിനം.

തയ്യാറാക്കിയത്: കപിൽ ശങ്കർ

95 Likes

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 01 | ബുധൻ ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂലൈ 1

തയ്യാറാക്കിയത്: കപിൽ ശങ്കർ

ഫൊക്കാന ന്യൂയോർക്ക് മെട്രോ റീജിയൻ വനിതാ ഫോറത്തിന്റെ വിന്റർ കോട്ട് ആൻഡ് ക്ലോത്തിംഗ് ഡ്രൈവ് വൻവിജയം

ചിക്കാഗോയിൽ കാറിനുള്ളിൽ യുവാവിനെയും യുവതിയെയും മരിച്ച നിലയിൽ കണ്ടെത്തി

LEAVE A REPLY Cancel reply

Most Popular

ഫൊക്കാന ന്യൂയോർക്ക് മെട്രോ റീജിയൻ വനിതാ ഫോറത്തിന്റെ വിന്റർ കോട്ട് ആൻഡ് ക്ലോത്തിംഗ് ഡ്രൈവ് വൻവിജയം

മമ്മൂട്ടിയെ ആക്രമിക്കുന്നത് സിപിഎമ്മിന്‍റെ പേരു പറഞ്ഞ് നടക്കുന്നവര്‍’; സൈബറാക്രമണത്തില്‍ ബി.ഗോപാലകൃഷ്ണന്‍.

ചിക്കാഗോയിൽ കാറിനുള്ളിൽ യുവാവിനെയും യുവതിയെയും മരിച്ച നിലയിൽ കണ്ടെത്തി

Recent Comments

EDITOR PICKS

ഫൊക്കാന ന്യൂയോർക്ക് മെട്രോ റീജിയൻ വനിതാ ഫോറത്തിന്റെ വിന്റർ കോട്ട് ആൻഡ് ക്ലോത്തിംഗ് ഡ്രൈവ് വൻവിജയം

മമ്മൂട്ടിയെ ആക്രമിക്കുന്നത് സിപിഎമ്മിന്‍റെ പേരു പറഞ്ഞ് നടക്കുന്നവര്‍’; സൈബറാക്രമണത്തില്‍ ബി.ഗോപാലകൃഷ്ണന്‍.

POPULAR POSTS

ദീപാവലി ആഘോഷങ്ങൾക്കിടെ രാജ്യത്തുടനീളമുണ്ടായ അപകടങ്ങളിൽ 5 മരണം: നിരവധി പേർക്ക് പരിക്ക്

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 01 | ബുധൻ ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

ജൂലൈ 1

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************