📱വാർത്തകൾ ഒറ്റനോട്ടത്തിൽ📱 – 2026 | മെയ് 08 | വെള്ളി ✍️ കപിൽ ശങ്കർ

🔹മേയ് 8 ലോക റെഡ് ക്രോസ് ദിനമായി (World Red Cross Day) ആചരിക്കുന്നു.റെഡ് ക്രോസ് പ്രസ്ഥാനത്തിന്റെ സ്ഥാപകനായ ജീൻ ഹെൻറി ഡുനാൻറിൻ്റെ (Jean Henry Dunant) ജന്മദിനമാണ് മെയ് 8.യുദ്ധസമയത്തും പ്രകൃതിദുരന്തങ്ങളിലും മറ്റും പെട്ടുപോകുന്ന ആളുകളെ സഹായിക്കുക, മാനുഷിക മൂല്യങ്ങൾ ഉയർത്തിപ്പിടിക്കുക എന്നിവയാണ് ഈ ദിനാചരണത്തിന്റെ ലക്ഷ്യം.1828 മെയ് 8-നായിരുന്നു ജീൻ ഹെൻറി ഡുനാൻറിൻ്റെ ജനനം.
•കൂടാതെ ലോക തലസീമിയ ദിനമായും മെയ് 8ആചരിയ്ക്കപ്പെടുന്നു. (World Thalassemia Day): ജനിതക രക്തരോഗമായ തലസീമിയയെക്കുറിച്ച് പൊതുജനങ്ങളിൽ അവബോധം സൃഷ്ടിക്കുന്നതിനും രോഗികൾക്ക് പിന്തുണ നൽകുന്നതിനുമായാണ് ഈ ദിനം ആചരിക്കുന്നത്.

🔹കേരളത്തിലെ മുഖ്യമന്ത്രി ചർച്ചകൾ ഇനി ഡൽഹിയിൽ. മുഖ്യമന്ത്രി സ്ഥാനത്തേക്ക് പേരുകളുയർന്ന വി.ഡി. സതീശൻ, രമേശ് ചെന്നിത്തല, കെ.സി. വേണുഗോപാൽ എന്നിവരെ എ ഐ സി സി നിരീക്ഷകരുടെ റിപ്പോർട്ട്‌ പരിശോധിച്ച ശേഷം രാഹുൽ ഗാന്ധിയും, മല്ലികാർജുൻ ഖാർഗയും ചർച്ചകൾക്കായി ഡൽഹിക്ക് വിളിപ്പിക്കും

‎🔹കോണ്‍ഗ്രസിലെ മുഖ്യമന്ത്രി ചര്‍ച്ച തുടരുന്നതിനിടെ എംഎല്‍എമാരുടെ പിന്തുണ രേഖപ്പെടുത്തിയ എഐസിസി നിരീക്ഷകരുടെ പട്ടിക പുറത്ത്. ‘ദി ന്യൂ ഇന്ത്യന്‍ എക്‌സ്പ്രസ്’ ദിനപത്രത്തിലാണ് ഫോട്ടോ സഹിതമുള്ള വാര്‍ത്ത വന്നത് കെസിസിസി പ്രസിഡന്റ് സണ്ണി ജോസഫ്, ടി സിദിഖ് ,സന്ദീപ് വാര്യര്‍ തുടങ്ങിയവര്‍ കെ സി വേണുഗോപാലിനെ ആണ് പിന്തുണയ്ക്കുന്നത്.

🔹കോണ്‍ഗ്രസിന്റെ മുഖ്യമന്ത്രി തര്‍ക്കങ്ങള്‍ വിജയത്തിന്റെ ശോഭ കെടുത്തുമെന്ന് മുസ്ലീലിഗിന്റെ വിലയിരുത്തല്‍. എത്രയും വേഗം മുഖ്യമന്ത്രിയെ തീരുമാനിക്കണമെന്ന് ലീഗ് നിലപാട്. മുഖ്യമന്ത്രി ചര്‍ച്ചകളില്‍ എഐസിസി നിരീക്ഷകരെ മുസ്ലീം ലീഗ് ഇന്നലെ നിലപാട് അറിയിച്ചിരുന്നു.

‎🔹കോണ്‍ഗ്രസിലെ മുഖ്യമന്ത്രി ചർച്ചയില്‍ നാട്ടുകാർക്ക് കുഴപ്പമില്ലെന്ന് കെ മുരളീധരൻ. നാട്ടുകാർ ഇതൊക്കെ കണ്ട് ആസ്വദിക്കുന്നുണ്ട് ഇതൊക്കെ ജനാധിപത്യ പ്രക്രിയയുടെ ഭാഗം മാത്രമാണ്, ഉദ്ദേശിച്ച ആളുടെ പേര് വന്നില്ല എങ്കിലും, പറഞ്ഞ പേര് ഹൈക്കമാൻഡ് തീരുമാനത്തിന് ശേഷം വെളിപ്പെടുത്തുമെന്നും അദ്ദേഹം പറഞ്ഞു.

🔹മുഖ്യമന്ത്രി സ്ഥാനത്തിനായി കോൺഗ്രസിൽ ചേരി തിരിഞ്ഞ് പ്രവർത്തകർ ഏറ്റുമുട്ടുന്നത് തുടരുന്നു. കെസി വേണുഗോപാലിനും വിഡി സതീശനും രമേശ് ചെന്നിത്തലയ്ക്കുമായി ഫ്ലെക്സ് ബോർഡുകൾ ഉയരുകയാണ്. അതിനിടെ, കടുത്തുരുത്തിയിൽ വി ഡി സതീശനെ മുഖ്യമന്ത്രി ആക്കണമെന്ന് ആവശ്യപ്പെട്ട് കോൺഗ്രസ്‌ പ്രവർത്തകൻ ദേഹത്തു പെട്രോൾ ഒഴിച്ചു.

🔹ഹൈക്കമാൻഡ് നിരീക്ഷകർക്ക് മുന്നിൽ 63 എംഎൽഎമാരിൽ 47 പേർ കെസി വേണുഗോപാലിന്റെ പേര് പറഞ്ഞെന്ന് കെസി പക്ഷത്തിന്‍റെ അവകാശവാദം. എന്നാൽ, 20ലേറെ പേരുടെ പിന്തുണ ഉണ്ടായെന്നാണ് വിഡി, ചെന്നിത്തല പക്ഷങ്ങൾ വിശ്വസിക്കുന്നത്. എഐസിസി നിരീക്ഷകർ ഇന്ന് ഹൈക്കമാൻഡിന് റിപ്പോർട്ട് നൽകും. രാഹുൽഗാന്ധിയും മല്ലികാർജുൻ ഖര്‍ഗെയുമായി നിരീക്ഷകർ കൂടിക്കാഴ്ച നടത്തി സാഹചര്യം ധരിപ്പിക്കും.

🔹സിറ്റിംഗ് എംഎല്‍എയെ മുഖ്യമന്ത്രിയാക്കണമെന്ന് കേരള കോണ്‍ഗ്രസ് ജോസഫ് വിഭാഗം എഐസിസി നിരീക്ഷകരെ അറിയിച്ചു. കേരളത്തിന്റെ പൊതുവികാരം കണക്കിലെടുത്തുള്ള തീരുമാനം വേണമെന്നും പി.ജെ ജോസഫ് ആവശ്യപ്പെട്ടു.

🔹പിണറായി വിജയനു പ്രതിപക്ഷ നേതാവാകാന്‍ പേടിയുണ്ടെങ്കില്‍ ഭാഷ ഇന്‍സ്റ്റിറ്റിറ്റിയൂട്ടില്‍ ജോലി നല്‍കാന്‍ ചിലപ്പോള്‍ യുഡിഎഫ് സര്‍ക്കാര്‍ തയ്യറായേക്കുമെന്നു പരിഹസിച്ച് നടന്‍ ജോയ് മാത്യൂ. പിണറായി മലയാള ഭാഷാപ്രയോഗത്തിലും ഭാഷാ ശൈലിക്കും നല്‍കിയ സംഭവനകളെയും മുന്‍നിര്‍ത്തിയാകും നിയമനമെന്നും ജോയ് മാത്യൂ ഫേസ്ബുക്കില്‍ കുറിച്ചു.

🔹കോണ്‍ഗ്രസ് നിയമസഭാ കക്ഷി യോഗത്തിന് ഇന്ദിരാഭവനിലെത്തിയ നിയുക്ത എംഎല്‍എ ബിന്ദു കൃഷ്ണയെ ചെറിയാന്‍ ഫിലിപ്പ് ആലിംഗനം ചെയ്യാന്‍ ശ്രമിക്കവേ ഒഴിഞ്ഞു മാറുകയും തള്ളിമാറ്റുകയുംചെയ്ത വീഡിയോ സാമൂഹ്യ മാധ്യമങ്ങളില്‍ വൈറലായി. ആദ്യം ഒഴിഞ്ഞുമാറിയിട്ടും വീണ്ടും ആലിംഗനത്തിനു ശ്രമിച്ചപ്പോള്‍ ബിന്ദു കൃഷ്ണ തള്ളി മാറ്റിയതും കൈകള്‍ കൂപ്പിയതുമായ ദൃശ്യങ്ങളാണ് വൈറലായത്.

🔹കനത്ത മഴ പെയ്തതോടെ വയനാട്ടിലെ ഉരുള്‍പൊട്ടല്‍ ദുരിതബാധിതര്‍ക്കു സര്‍ക്കാര്‍ നിര്‍മിച്ച ടൗണ്‍ഷിപ്പിലെ പത്തു വീടുകളിലേക്കു ചളി ഒലിച്ചുകയറി. ‘ലോഡുകണക്കിന് ചെളിയാണ് ഒറ്റമഴയില്‍ ഒലിച്ചുവന്നത്, മിനിറ്റുകള്‍ കൊണ്ടു വീട്ടുപരിസരം ചെളിക്കുണ്ടായി. വേനല്‍ മഴയില്‍ ഇതാണു സ്ഥിതിയെങ്കില്‍ മഴക്കാലത്ത് എന്തായിരിക്കും അവസ്ഥ’യെന്നു വീട്ടുടമകള്‍.

🔹ആണ്‍ സുഹൃത്തിനെ കത്തി കാണിച്ച് ഭീഷണിപ്പെടുത്തി യുവതിയെ ബലാത്സംഗം ചെയ്യാന്‍ ശ്രമിച്ച കേസില്‍ പ്രതികള്‍ പോലീസ് പിടിയില്‍. കൊല്ലം സ്വദേശി രാഹുല്‍, തിരുവനന്തപുരം ഇടവ സ്വദേശി ഡാനിഷ് എന്നിവരാണ് എറണാകുളം സെന്‍ട്രല്‍ പോലീസിന്റെ പിടിയിലായത്. പെണ്‍കുട്ടി ബഹളംവച്ച് പ്രതികളുടെ കൈയ്യില്‍ കടിച്ച് ഓടി രക്ഷപ്പെട്ട് പൊലീസ് കണ്‍ട്രോള്‍ റൂമില്‍ പരാതിപ്പെടുക
യായിരുന്നു.

🔹ജൂനിയറായ ഉദ്യോഗസ്ഥയെ അധിക്ഷേപിച്ച കെ.എസ്.ഇ.ബി കാസര്‍കോട് ഡിവിഷന്‍ ഓഫീസിലെ സബ് എഞ്ചിനീയര്‍ എ. ജയകൃഷ്ണനെതിരേ വിദ്യാനഗര്‍ പൊലീസ് കേസെടുത്തു. മാര്‍ച്ച് പത്തിനു നടന്ന പണിമുടക്കില്‍ പങ്കെടുക്കേണ്ടെന്ന് മറ്റൊരു ഉദ്യോഗസ്ഥനോട് പരാതിക്കാരി പറഞ്ഞതാണ് പ്രകോപന കാരണം.

🔹തിരുവനന്തപുരം തമ്പാനൂര്‍ റെയില്‍വേ സ്റ്റേഷനിലെ എസ്‌കലേറ്റര്‍ യന്ത്രത്തകരാര്‍മൂലം തിരിച്ചു കറങ്ങി. രാവിലെ പത്തോടെ വഞ്ചിനാട് എക്‌സ്പ്രസില്‍ വന്ന യാത്രക്കാര്‍ക്കു തെറിച്ചുവീണു പരിക്കേറ്റു. സംഭവത്തില്‍ റെയില്‍വേ അന്വേഷണം ആരംഭിച്ചു.

🔹നടനും ബിഗ്ബോസ് താരവുമായ ഷിയാസ് കരീമിന്റെ മുന്‍കൂര്‍ ജാമ്യാപേക്ഷ എറണാകുളം ജില്ല കോടതി തള്ളി. കോഴിക്കോട് കോടതിയില്‍ അപേക്ഷ നല്‍കാനാണ് നിര്‍ദ്ദേശം. പ്രണയം നടിച്ച് സാമ്പത്തികമായും ലൈംഗികമായും ചൂഷണം ചെയ്തതെന്നാണു കോഴിക്കോട് സ്വദേശിയായ യുവതിയുടെ പരാതി.

🔹കൊല്ലത്ത് ഭാര്യയെയും മകളെയും ആസിഡ് ഒഴിച്ചു കൊലപ്പെടുത്താന്‍ ശ്രമിച്ച കേസില്‍ ഭര്‍ത്താവിന് 31 വര്‍ഷം കഠിന തടവും ഒന്നര ലക്ഷം രൂപ പിഴയും ശിക്ഷ. ഇരവിപുരം വാളത്തുങ്കല്‍ സ്വദേശി ജയനെ ആണ് കൊല്ലം ജില്ലാ ഫസ്റ്റ് അഡീ. സെഷന്‍സ് കോടതി ശിക്ഷിച്ചത്. 2020 ലായിരുന്നു ഭാര്യയെ സംശയിച്ച് കൊലപ്പെടുത്തിയത്.

🔹യൂണിവേഴ്സിറ്റി കോളജിനു മുന്നിലുള്ള ഫുട്പാത്തിൽ കൂറ്റൻ മരക്കൊമ്പ് ഒടിഞ്ഞുവീണ് വിദ്യാർഥിനിക്ക് പരിക്ക്. കോച്ചിംഗ് സെന്‍ററിലേക്ക് പോകുകയായിരുന്ന ദൃശ്യ എന്ന വിദ്യാർഥിനിക്കാണ് തലയ്ക്ക് ഗുരുതര പരിക്കേറ്റത്.രാവിലെ 8:15നാണ് സംഭവം. ഫുട്പാത്തിലൂടെ നടന്നുവരികയായിരുന്ന ദൃശ്യയുടെ തലയിലേക്ക് വലിയ ശബ്ദത്തോടെ മരക്കൊമ്പ് പതിക്കുകയായിരുന്നു. തലയിൽ നിന്ന് രക്തം വാർന്ന് ബോധരഹിതയായി വിദ്യാർഥിനിയെ ഉടൻതന്നെ പോലീസും വഴിയാത്രക്കാരും ചേർന്ന് ജനറൽ ആശുപത്രിയിലെത്തിക്കുകയായിരുന്നു.

🔹സഹപാഠികൾക്കൊപ്പം പുഴയിൽ കുളിക്കാനിറങ്ങിയ കോളജ് വിദ്യാർഥി മുങ്ങി മരിച്ചു. പാലക്കാട് കൂടല്ലൂർ ക്വാർട്ടേഴ്സിൽ താമസിക്കുന്ന ആനക്കര മലമക്കാവ് മുതിരപ്പാറ വീട്ടിൽ എം.എ. അതുൽ (19) ആണ് മരിച്ചത്. പുതുപ്പാടി എൽദോ മാർ ബസേലിയോസ് കോളജ് ബിസിഎ രണ്ടാം സെമസ്റ്റർ വിദ്യാർഥിയാണ്.ബുധനാഴ്ച വൈകുന്നേരം 4.30ഓടെ കോതമംഗലത്തായായിരുന്നു സംഭവം. പുതുപ്പാടി മുളവർ കവലയ്ക്ക് സമീപം കോതമംഗലം പുഴയിലെ കുംഭപ്പിള്ളി കടവിൽ കുളിക്കാനെത്തിയ ആറംഗ സംഘത്തിലൊരാളായിരുന്നു അതുൽ. പുഴയിലെ പാറപ്പുറത്ത് നിൽക്കുന്നതിനിടെ കാൽ വഴുതി വെള്ളത്തിലേക്ക് വീഴുകയായിരുന്നുവെന്നാണ് വിവരം.

🔹വീടിനുള്ളിൽ ടിവി സ്റ്റാൻഡിന് കീഴിലുള്ള അലമാരയിൽനിന്ന് പുസ്തകമെടുക്കുന്നതിനിടയിൽ വിദ്യാർഥിനിക്ക് മൂർഖന്‍റെ കടിയേറ്റു.വൈക്കം തോട്ടുവക്കം കാവുമ്മേൽ ജിജോയുടെ മകൾ അഞ്ചാം ക്ലാസ് വിദ്യാർഥിനിയായ അന്ന ജിജോയ്ക്കാണ് കഴിഞ്ഞ ദിവസം രാത്രി എട്ടോടെ പാമ്പ് കടിയേറ്റത്.
ജിജോയുടെ സുഹൃത്ത് അനീഷും അയൽവാസകളും ചേർന്ന് വീടിനുള്ളിൽ നടത്തിയ പരിശോധനയിൽ മൂർഖൻപാമ്പിനെ പിടികൂടി.വലതുകാലിന്‍റെ പാദത്തിൽ കടിയേറ്റ അന്നയെ ഉടൻ വൈക്കം താലൂക്ക് ആശുപത്രിയിലെത്തിച്ച് പ്രഥമ ശുശ്രൂഷ നൽകി.
തുടർന്ന് വിദഗ്ധ ചികിൽസയ്ക്കായി കോട്ടയത്തെ സ്വകാര്യ ആശുപത്രിയിൽ പ്രവേശിപ്പിച്ചു. തീവ്രപരിചരണ വിഭാഗത്തിൽ കഴിയുന്ന കുട്ടി അപകടനില തരണം ചെയ്തു.

🔹സൗദി അറേബ്യയിലെ മക്കയില്‍ താമസസ്ഥലത്തുണ്ടായ തീപിടിത്തത്തില്‍ പുക ശ്വസിച്ച് കാസര്‍കോട് സ്വദേശിയായ മലയാളി മരിച്ചു. കെഎംസിസി സജീവ പ്രവര്‍ത്തകനായ പിപി മുഹമ്മദ് കുഞ്ഞി (58) ആണ് മരിച്ചത്. അപകടത്തില്‍ ഇദ്ദേഹത്തോടൊപ്പം താമസിച്ചിരുന്ന രണ്ട് ബംഗ്ലാദേശ് സ്വദേശികളും മരിച്ചതായി റിപ്പോര്‍ട്ടുണ്ട്.

🔹രൂപമാറ്റം വരുത്തിയ ബൈക്കുകൾ ഓടിക്കുന്നവരുടെപേരിൽ ശക്തമായ നിയമനടപടിയുമായി മോട്ടോർവാഹനവകുപ്പും പോലീസും. വാഹനനിർമാതാക്കൾ ഘടിപ്പിച്ച സൈലൻസറുകൾക്ക് പകരം പുതിയവ ഉപയോഗിച്ച് രൂപമാറ്റംവരുത്തുന്ന വാഹന ഉടമകൾക്കെതിരേയാണു നിയമനടപടി. രാത്രികാലങ്ങളിൽ ഇത്തരം ബൈക്കുകൾ ഓടിക്കുന്നത് പലയിടത്തും പതിവായിട്ടുണ്ടെന്ന് ട്രാഫിക് അധികൃതർ വ്യക്തമാക്കി.രണ്ടു മാസത്തിനിടെ ഇത്തരത്തിലുള്ള 165 കേസുകളെടുത്തു. ഇ-ചെലാൻ വഴി 8,80,000 രൂപ പിഴയീടാക്കി.

🔹തമിഴ്നാട്ടില്‍ സിപിഎം, സിപിഐ, വിസികെ എന്നീ പാര്‍ട്ടികള്‍ക്കു മന്ത്രിസ്ഥാനങ്ങള്‍ വാഗ്ദാനം ചെയ്ത് വിജയ്. 118 എംഎല്‍എ മാര്‍ ഒപ്പിട്ട കത്തില്ലാതെ സത്യപ്രതിജ്ഞ അനുവദിക്കില്ലെന്നു ഗവര്‍ണര്‍ രാജേന്ദ്ര അര്‍ലേക്കര്‍ കടുപ്പിച്ചതോടെ പിന്തുണ തേടി ടിവികെ നേതാക്കള്‍ രാഷ്ട്രീയ പാര്‍ട്ടികളുടെ ഓഫീസുകളില്‍ എത്തി.

🔹തമിഴ്‌നാട് നിയമസഭാ തെരഞ്ഞെടുപ്പില്‍ ഏറ്റവും വലിയ ഒറ്റകക്ഷിയായ വിജയിന്റെ ടിവികെയെ മന്ത്രിസഭ രൂപീകരിക്കാന്‍ അനുമതി നല്‍കാത്ത ഗവര്‍ണറുടെ നടപടി ജനാധിപത്യ വിരുദ്ധമാണെന്ന് ഡിഎംകെ ഉള്‍പ്പെടെയുള്ള പാര്‍ട്ടികള്‍. സര്‍ക്കാര്‍ രൂപീകരിക്കാന്‍ വിജയിനെ അനുവദിക്കണമെന്ന് ഡിഎംകെ, എംഎന്‍എം, വിസികെ, സിപിഐ എന്നീ പാര്‍ട്ടികള്‍ ആവശ്യപ്പെട്ടു. ടിവികെ നേതാവ് വിജയ്യെ സര്‍ക്കാര്‍ രൂപീകരിക്കാന്‍ ക്ഷണിക്കണമെന്ന് സിപിഎം തമിഴ്‌നാട് ഘടകം ആവശ്യപ്പെട്ടു.

🔹ഡിഎംകെ- കോണ്‍ഗ്രസ് സഖ്യം പിരിഞ്ഞെന്ന് ഡിഎംകെ. നടന്‍ വിജയ്യുടെ തമിഴക വെട്രി കഴകവുമായി (ടിവികെ) ചേര്‍ന്ന് സര്‍ക്കാര്‍ രൂപീകരിക്കാനുള്ള കോണ്‍ഗ്രസ് തീരുമാനത്തിനു പിറകേ, ദേശീയ തലത്തിലുള്ള ‘ഇന്ത്യ’ മുന്നണി തന്നെ ഇല്ലാതായെന്ന് ഡിഎംകെ പ്രഖ്യാപിച്ചു.

🔹ബംഗളൂരുവിലെ നെലമംഗലയിൽ ഭാര്യയെ കഴുത്തറത്ത് കൊലപ്പെടുത്താൻ ശ്രമിച്ച യുവാവ് പിടിയിൽ. ബിഹാർ സ്വദേശി സഞ്ജയാണ് ഭാര്യ സോണാലിയെ കൊല്ലാൻ ശ്രമിച്ചത്. തക്കസമയത്ത് നാട്ടുകാർ ഇടപെട്ടതിനെ തുടർന്നാണ് സോണാലി രക്ഷപ്പെട്ടത്.സോണാലി വീട്ടിൽ നിന്ന് പുറത്തിറങ്ങിയ സമയത്ത് ഹെൽമെറ്റ് ധരിച്ച് ബൈക്കിലെത്തിയ സഞ്ജയ് യുവതിയെ തടഞ്ഞുനിർത്തുകയായിരുന്നു. തുടർന്ന് ഇയാൾ കൈയിലുണ്ടായിരുന്ന കത്തി ഉപയോഗിച്ച് സോണാലിയുടെ കഴുത്തറക്കാൻ ശ്രമിച്ചു. സംഭവം കണ്ട് നിന്ന നാട്ടുകാർ ഇയാളെ തടഞ്ഞ് സോണാലിയെ രക്ഷിച്ചു.ദമ്പതികൾക്കിടയിലുള്ള കുടുംബ വഴക്കാണ് ആക്രമണത്തിന് കാരണമെന്ന് പ്രാഥമിക അന്വേഷണത്തിൽ നിന്ന് കണ്ടെത്തി. സഞ്ജയുടെയും സോണാലിയുടെയും രണ്ടാം വിവാഹമായിരുന്നു ഇത്.

🔹ഭോപ്പാലിൽ അഞ്ച് വയസുകാരിയെ ലൈംഗികമായി പീഡിപ്പിച്ച കേസിൽ 75 കാരനായ അഭിഭാഷകൻ അറസ്റ്റിൽ. അയൽവാസിയുടെ മകളെയാണ് പ്രതി പീഡിപ്പിച്ചത്. മേയ് മൂന്നിന് മധ്യപ്രദേശിലെ ഹബീബ്ഗഞ്ച് പോലീസ് സ്റ്റേഷൻ പരിധിയിലാണ് സംഭവം.
അഭിഭാഷകന്‍റെ പേരക്കുട്ടിയോടൊപ്പം കളിക്കുന്നതിനായി അവരുടെ വീട്ടിലേക്ക് പോയതായിരുന്നു പെൺകുട്ടി. കുട്ടികൾ കളിച്ചുകൊണ്ടിരിക്കെ പ്രതി പെൺകുട്ടിയെ റൂമിലേക്ക് കൊണ്ടുപോവുകയും ഉപദ്രവിക്കുകയുമായിരുന്നെന്നാണ് പരാതി. വീട്ടിലെത്തിയ പെൺകുട്ടി രക്ഷിതാക്കളോട് വിവരം പറയുകയായിരുന്നു. കുട്ടിയെ പരിശോധിച്ചപ്പോൾ സ്വകാര്യഭാഗത്ത് പോറലുകൾ കാണുകയും ചെയ്തു.ഉടൻ കുട്ടിയെ അമ്മ ആശുപത്രിയിലേക്ക് കൊണ്ടുപോവുകയും വൈദ്യപരിശോധനയിൽ ലൈംഗികാതിക്രമം നടന്നതായി തെളിയുകയും ചെയ്തു. തുടർന്ന് കുടുംബം ഹബീബ്ഗഞ്ച് പോലീസിൽ പരാതി നൽകുകയായിരുന്നു. കൗൺസിലിംഗിനിടെ താൻ ‘നാന’ എന്ന് വിളിക്കുന്ന അയൽവാസി തന്നെയാണ് ഉപദ്രവിച്ചതെന്ന് കുട്ടി വെളിപ്പെടുത്തി.വിവാഹിതയായ മകളോടും പേരക്കുട്ടിയോടുമൊപ്പമാണ് പ്രതി താമസിച്ചിരുന്നത്. ഇയാളുടെ കൊച്ചുമകൾ ‘നാന’ എന്ന് വിളിക്കുന്നത് കേട്ട് ഇരയായ പെൺകുട്ടിയും അഭിഭാഷകനെ ‘നാന’ എന്നാണ് വിളിച്ചിരുന്നതെന്ന് പോലീസ് പറഞ്ഞു.

🔹മഹാരാഷ്ട്ര നാസിക്കിലെ ടാറ്റ കണ്‍സള്‍ട്ടന്‍സി സര്‍വീസസിലെ ലൈംഗികാതിക്രമ, നിര്‍ബന്ധിത മതപരിവര്‍ത്തന കേസില്‍ പ്രതിയായ എച്ച് ആര്‍ മാനേജര്‍ നിദ ഖാന്‍ അറസ്റ്റില്‍. 25 ദിവസമായി ഒളിവിലായിരുന്ന ഇവരെ ഛത്രപതി സാംബാജി നഗറില്‍നിന്നാണ് പിടികൂടിയത്. ഗര്‍ഭിണിയായതിനാല്‍ മുന്‍കൂര്‍ ജാമ്യം വേണമെന്ന നിദ ഖാന്റെ ഹര്‍ജി കോടതി തള്ളിയിരുന്നു.

🔹ബംഗാളില്‍ തെരഞ്ഞെടുപ്പില്‍ തോറ്റിട്ടും രാജിവയ്ക്കാന്‍ വിസമ്മതിച്ച മമത ബാനര്‍ജി സര്‍ക്കാരിനെയും നിയമസഭയേയും ഗവര്‍ണര്‍ പിരിച്ചുവിട്ടു. നിയമസഭയുടെ കാലാവധി കഴിഞ്ഞതിനാലാണ് നടപടിയെന്ന് ഗവര്‍ണര്‍. ഇതേസമയം, സംസ്ഥാനത്ത് വ്യാപകമായ അക്രമങ്ങള്‍ റിപ്പോര്‍ട്ട് ചെയ്യപ്പെടുന്നു. ബിജെപി സര്‍ക്കാര്‍ നാളെ സത്യപ്രതിജ്ഞ ചെയ്യും.

🔹ഡല്‍ഹിയിലേക്കുള്ള ഇന്‍ഡിഗോ വിമാനത്തില്‍ ടിഎംസി എംപി മഹുവ മൊയിത്രയെ അഞ്ചു പുരുഷന്മാര്‍ മുദ്രാവാക്യം വിളിച്ച് ആക്രമിക്കാന്‍ ശ്രമിച്ചു. തനിക്കു നേരെ ‘ചോര്‍ ചോര്‍, ടിഎംസി ചോര്‍, ജയ് ശ്രീറാം’ തുടങ്ങിയ മുദ്രാവാക്യങ്ങള്‍ വിളിച്ച് ഉപദ്രവിച്ചെന്നാണ് പരാതി. പാര്‍ലമെന്ററി പ്രതിരോധ സ്റ്റാന്‍ഡിംഗ് കമ്മിറ്റി യോഗത്തില്‍ പങ്കെടുക്കാന്‍ കൊല്‍ക്കത്തയില്‍ നിന്ന് ഡല്‍ഹിയിലേക്കു പോകവെയാണ് സംഭവം.

🔹മധ്യപ്രദേശിലെ സത്‌നയിലെ ഒരു വനിതാ ജയില്‍ ഉദ്യോഗസ്ഥ, കൊലക്കേസില്‍ ജീവപര്യന്തം തടവ് അനുഭവിച്ച മുന്‍ തടവുകാരനെ വിവാഹം കഴിച്ചു. സത്‌ന സെന്‍ട്രല്‍ ജയിലിലെ അസിസ്റ്റന്റ് സൂപ്രണ്ടായ ഫിറോസ ഖാത്തൂണാണ് കൊലക്കേസില്‍ ശിക്ഷിക്കപ്പെട്ട ധര്‍മേന്ദ്ര സിങ്ങിനെ വിവാഹം കഴിച്ചത്. ജയിലില്‍ ആരംഭിച്ച ബന്ധം ഒടുവില്‍ വിവാഹത്തില്‍ കലാശിക്കുകയായിരുന്നു.

🔹മുംബൈയില്‍ ഒരു കുടുംബത്തിലെ നാലു പേരുടെ മരണത്തിനു കാരണമായത് തണ്ണിമത്തനോ ഭക്ഷ്യവിഷബാധയോ അല്ലന്നും മറിച്ച് തണ്ണിമത്തന്‍ അടക്കമുള്ള പഴങ്ങളിലൂടെ ശരീരത്തിലെത്തിയ എലിവിഷമാണെന്നും ഫോറന്‍സിക് റിപ്പോര്‍ട്ട്.

🔹ഹോര്‍മുസ് കടലിടുക്കില്‍ ഇറാന്‍ ടാങ്കറിനു നേരെ യുഎസ് സൈന്യം ആക്രമണം നടത്തി. ഇറാനിലെ ക്വേഷം തുറമുഖത്തും ബന്ദര്‍ അബ്ബാസ് തുറമുഖത്തുമായാണ് യുഎസ് സൈന്യത്തിന്റെ ആക്രമണം ഉണ്ടായത്. രണ്ട് ഡ്രോണുകളെ ഇറാന്‍ സൈന്യം വെടിവച്ചിട്ടു.

🔹ചൈനീസ് മുന്‍ പ്രതിരോധ മന്ത്രിമാരായ വേ ഫെംഗെയ്ക്കും ലി ഷാങ്ഫുവിനും അഴിമതിക്കേസില്‍ വധശിക്ഷ വിധിച്ചുകൊണ്ട് ഷി ജിന്‍പിങ് സര്‍ക്കാര്‍. ലി ഷാങ്ഫു വന്‍ തുകകളും വിലപിടിപ്പുള്ള വസ്തുക്കളും കൈക്കൂലിയായി വാങ്ങിയെന്ന് അന്വേഷണ ഏജന്‍സികള്‍ കണ്ടെത്തിയിരുന്നു.

🔹ചരിത്രത്തിലെ ഏറ്റവും ഉയര്‍ന്ന ലാഭം കൈവരിച്ച എമിറേറ്റ്‌സ് ഗ്രൂപ്പ് 1.3 ലക്ഷത്തിലധികം ജീവനക്കാര്‍ക്ക് 20 ആഴ്ചത്തെ ശമ്പളം ബോണസായി പ്രഖ്യാപിച്ചു.

🔹ഇന്ത്യന്‍ പ്രീമിയം സ്മാര്‍ട്ട്‌ഫോണ്‍ വിപണിയില്‍ മത്സരം കടുപ്പിക്കാന്‍ ചൈനീസ് ബ്രാന്‍ഡായ വിവോ പുതിയ രണ്ട് മോഡലുകള്‍ അവതരിപ്പിച്ചു. വിവോ എക്സ്300 അള്‍ട്രാ, എക്സ്300 എഫ്ഇ എന്നീ മോഡലുകളാണ് വിപണി പിടിക്കാനായി കമ്പനി അവതരിപ്പിച്ചിരിക്കുന്നത്. ക്യാമറയിലൂടെ ഉപയോക്താക്കളെ കൈയിലെടുക്കുക എന്നതാണ് വിവോ ഈ മോഡലുകളിലൂടെ ലക്ഷ്യം വയ്ക്കുന്നത്. എക്സ്300 എഫ്ഇ പ്രീമിയം വിഭാഗത്തിലേക്ക് കടക്കുന്നവരെ ഉദ്ദേശിച്ചുള്ള മോഡലാണ്. എക്സ്300 അള്‍ട്രയാകട്ടെ പ്രെഫഷണല്‍ ഫോട്ടോഗ്രാഫിയില്‍ കമ്പമുള്ള വിഭാഗത്തിനായും അവതരിപ്പിച്ചിരിക്കുന്നു. എക്സ്300 എഫ്ഇ 79,999 രൂപയില്‍ ആരംഭിക്കുന്നു. 12 ജിബി റാം, 256 ജിബി സ്റ്റോറേജും ഉള്‍ക്കൊള്ളുന്നതാണ് ഈ മോഡല്‍. 12 ജിബി+512ജിബി വേര്‍ഷന്റെ വില 89,999 രൂപയാണ്. വിവോ എക്സ്300 അള്‍ട്ര മോഡലിന്റെ വില ആരംഭിക്കുന്നത് 1,59,999 രൂപയിലാണ്. 16 ജിബി+512ജിബി മോഡലിനാണ് ഈ വില. 6500 എംഎഎച്ച് ബാറ്ററിയുമുണ്ട്. വില്പന മേയ് 14 മുതല്‍.

🔹നിലവിലെ ചാമ്പ്യന്‍മാരായ റോയല്‍ ചലഞ്ചേഴ്സ് ബെംഗളൂരുവിനെ ഒമ്പതു റണ്‍സിന് തകര്‍ത്ത് ലക്നൗ സൂപ്പര്‍ ജയന്റ്സ് പ്ലേ ഓഫിലെത്താനുള്ള നേരിയ സാധ്യത നിലനിര്‍ത്തി. മഴ പലവട്ടം വില്ലനായപ്പോള്‍ 19 ഓവര്‍ വീതമാക്കി കുറച്ച മത്സരത്തില്‍ 213 റണ്‍സ് വിജയലക്ഷ്യം പിന്തുടര്‍ന്ന ആര്‍സിബിക്ക് 19 ഓവറില്‍ 203 റണ്‍സെടുക്കാനേ കഴിഞ്ഞുള്ളു. 56 പന്തില്‍ 111 റണ്‍സെടുത്ത മിച്ചല്‍ മാര്‍ഷാണ് ലക്നൗവിന്റെ ടോപ് സ്‌കോറര്‍. 31 പന്തില്‍ 61 റണ്‍സെടുത്ത ക്യാപ്റ്റന്‍ രജത് പാട്ടീദാറാണ് ആര്‍സിബിയുടെ താരം. അവസാന ഓവറുകളില്‍ തകര്‍ത്തടിച്ചബെംഗളൂരുവിന്റെ ടിം ഡേവിഡും (17 പന്തില്‍ 40) ക്രുനാല്‍ പാണ്ഡ്യയും(16 പന്തില്‍ 28), റൊമാരിയോ ഷെപ്പേര്‍ഡും(15 പന്തില്‍ 23) പൊരുതി നോക്കിയെങ്കിലും 9 റണ്‍സകലെ അടിതെറ്റി വീണു.

🔹ഐപിഎല്‍ ഫൈനല്‍ വേദി ബിസിസിഐ ബെംഗളൂരുവില്‍നിന്ന് മാറ്റിയത് പതിനായിരം സൗജന്യ ടിക്കറ്റുകള്‍ അധികമായി ആവശ്യപ്പെട്ടതിനാലാണെന്ന് റിപ്പോര്‍ട്ട്. ചട്ടപ്രകാരം സീറ്റുകളുടെ 15 ശതമാനമാണ് ആതിഥേയ അസോസിയേഷന് സൗജന്യമായി നല്‍കുന്നത്. എന്നാല്‍ കര്‍ണാടകത്തിലെ രാഷ്ട്രീയക്കാര്‍ക്കും മറ്റുമായി പതിനായിരം സൗജന്യ ടിക്കറ്റുകള്‍കൂടി നല്‍കണമെന്നു കര്‍ണാടക സ്റ്റേറ്റ് ക്രിക്കറ്റ് അസോസിയേഷന്‍ ആവശ്യപ്പെട്ടതാണു വേദി മാറ്റാന്‍ കാരണമെന്നു ബിസിസിഐ വൃത്തങ്ങള്‍ വ്യക്തമാക്കി.

🔹ജോണ്‍ എബ്രഹാം സംവിധാനം ചെയ്ത മലയാളത്തിലെ ക്ലാസിക് ചിത്രം ‘അമ്മ അറിയാന്‍’ 4കെ പതിപ്പ് കാനില്‍ മെയ് 16 ന് പ്രദര്‍ശിപ്പിക്കും. ഫിലിം ഹെറിറ്റേജ് ഫൗണ്ടേഷന്റെ നേതൃത്വത്തിലാണ് ചിത്രം റീസ്റ്റോര്‍ ചെയ്തത്. ഈ വര്‍ഷം കാനിലെ ലോക ക്ലാസിക് വിഭാഗത്തില്‍ പ്രദര്‍ശിപ്പിക്കുന്ന ഏക ഇന്ത്യന്‍ ചിത്രം കൂടിയാണ് അമ്മ അറിയാന്‍. ഫിലിം ഹെറിറ്റേജ് ഫൗണ്ടേഷന്റെ നേതൃത്വത്തില്‍ റീസ്റ്റോര്‍ ചെയ്ത് കാനിലെ വേള്‍ഡ് ക്ലാസിക് വിഭാഗത്തില്‍ തുടര്‍ച്ചയായി പ്രദര്‍ശിക്കുന്ന ആറാം ചിത്രം കൂടിയാണ് അമ്മ അറിയാന്‍. നേരത്തെ ജി അരവിന്ദന്‍ സംവിധാനം ചെയ്ത തമ്പ്, അരിഭം ശ്യാം ശര്‍മ്മയുടെ ഇഷനൗ, ശ്യാം ബെനഗലിന്റെ മന്തന്‍, സത്യജിത് റേയുടെ അരണ്യര്‍ ദിന്‍ രാത്രി, സുമിത്ര പെരീസിന്റെ ഗെഹെനു ലാമായ് തുടങ്ങീ ചിത്രങ്ങള്‍ മുന്‍വര്‍ഷങ്ങളില്‍ പ്രദര്‍ശിപ്പിച്ചിരുന്നു. 1986 ല്‍ പുറത്തിറങ്ങിയ ചിത്രം വേണു ആണ് ഛായാഗ്രഹണം നിര്‍വഹിച്ചത്. ബീന പോള്‍ എഡിറ്റ് ചെയ്ത ചിത്രത്തില്‍ ജോയ് മാത്യു ആണ് പ്രധാന കഥാപാത്രമായെത്തിയത്.

🔹ഷെയ്ന്‍ നിഗത്തെ നായകനാക്കി മാര്‍ട്ടിന്‍ ജോസഫ് സംവിധാനം ചെയ്യുന്ന ‘ദൃഢം’ മേയ് എട്ടിന് തിയേറ്ററുകളിലെത്തും. ഷോബി തിലകന്‍, കോട്ടയം രമേശ്, ദിനേശ് പ്രഭാകര്‍, നന്ദന്‍ ഉണ്ണി, വിനോദ് ബോസ്, അഭിറാം രാധാകൃഷ്ണന്‍, പ്രശാന്ത് മുരളി, മാത്യു വര്‍ഗീസ്, ജോജി കെ. ജോണ്‍, ബ്രിട്ടോ ഡേവിഡ്, അഭിഷേക് രവീന്ദ്രന്‍, സാനിയ ഫാത്തിമ, കൃഷ്ണ പ്രഭ തുടങ്ങിയവരാണ് ചിത്രത്തിലെ മറ്റ് താരങ്ങള്‍. ഏറെ ആഗ്രഹത്തോടെയും അതിലേറെ ആത്മവിശ്വാസത്തോടെയും നാട്ടിന്‍പുറത്തെ പൊലീസ് സ്റ്റേഷനില്‍ വിജയ് രാധാകൃഷ്ണന്‍ ചാര്‍ജെടുക്കുന്നതും തുടര്‍ന്ന് ഒട്ടും പ്രതീക്ഷിക്കാതെ എത്തുന്ന ചില പ്രശ്നങ്ങളുടെ സംഭവ ബഹുലമായ മുഹൂര്‍ത്തങ്ങളാണ് ഈ ചിത്രത്തില്‍ ദൃശ്യവല്‍ക്കരിക്കുന്നത്. കൊറോണ പേപ്പേഴ്സ്, വേല എന്നീ ചിത്രങ്ങള്‍ക്കു ശേഷം വേറിട്ട പോലീസ് കഥാപാത്രമായ വിജയ് രാധാകൃഷ്ണനെ ഷെയ്ന്‍ നിഗം അവതരിപ്പിക്കുന്നു. ജോമോന്‍ ജോണ്‍, ലിന്റോ ദേവസ്യ എന്നിവര്‍ ചേര്‍ന്ന് കഥ, തിരക്കഥ, സംഭാഷണമെഴുതുന്നു.

💦 ഗുരുജിയുടെ വാക്കുകൾ

നമ്മുടെ ഉള്ളിലെ അനാവശ്യമായ ആഗ്രഹങ്ങളാണ് പലപ്പോഴും സമാധാനം കെടുത്തുന്നത്.
“ആഗ്രഹമില്ലായ്മയാണ് ഏറ്റവും വലിയ സന്തോഷം.”
കേൾക്കുമ്പോൾ ലളിതമെന്ന് തോന്നുമെങ്കിലും വലിയൊരു ജീവിതസത്യം ഇതിൽ ഒളിഞ്ഞു കിടപ്പുണ്ട്. നമ്മൾ പലപ്പോഴും സന്തോഷം കണ്ടെത്താൻ ശ്രമിക്കുന്നത് പുറത്തുള്ള വസ്തുക്കളിലോ, പദവികളിലോ, മറ്റുള്ളവരുടെ അംഗീകാരത്തിലോ ആണ്. എന്നാൽ ഇവയൊന്നും ശാശ്വതമായ സമാധാനം നൽകുന്നില്ല എന്നതാണ് വാസ്തവം. എന്തുകൊണ്ടാണ് ആഗ്രഹങ്ങളെ നിയന്ത്രിക്കണം എന്ന് പറയുന്നത്?
ഒന്നും നേടാനില്ല എന്ന അവസ്ഥ വരുമ്പോൾ മനസ്സ് ശാന്തമാകുന്നു. കിട്ടാത്ത ഒന്നോർത്ത് വേവലാതിപ്പെടേണ്ടി വരുന്നില്ല. കൈവശമുള്ള കാര്യങ്ങളിൽ സന്തോഷം കണ്ടെത്താൻ ആഗ്രഹമില്ലായ്മ നമ്മെ പഠിപ്പിക്കുന്നു. ആഗ്രഹങ്ങൾ നമ്മെ ബന്ധനസ്ഥരാക്കുന്നു. അവ ഇല്ലാതാകുമ്പോൾ നമ്മൾ യഥാർത്ഥത്തിൽ സ്വതന്ത്രരാകുന്നു.

തയ്യാറാക്കിയത്: കപിൽ ശങ്കർ

23 Likes

📱വാർത്തകൾ ഒറ്റനോട്ടത്തിൽ📱 – 2026 | മെയ് 08 | വെള്ളി ✍️ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

👨‍👨‍👦‍👦മലയാളി മനസ്സ് — ആരോഗ്യ വീഥി 👨‍👨‍👦‍👦 – 2026 | ഒക്ടോബർ 20 | ചൊവ്വ | ✍️തയ്യാറാക്കിയത്: ആസിഫ അഫ്രോസ്, ബാംഗ്ലൂർ

🌹 “ഇന്നത്തെ ചിന്താവിഷയം” 🌹 – 2026 | ഒക്ടോബർ 20 | ചൊവ്വ | ✍️ പ്രൊഫസ്സർ എ.വി. ഇട്ടി മാവേലിക്കര

🌹 ചിന്താ പ്രഭാതം 🌹 – 2026 | ഒക്ടോബർ 20 | ചൊവ്വ | ✍️ ബേബി മാത്യു അടിമാലി

LEAVE A REPLY Cancel reply

Most Popular

👨‍👨‍👦‍👦മലയാളി മനസ്സ് — ആരോഗ്യ വീഥി 👨‍👨‍👦‍👦 – 2026 | ഒക്ടോബർ 20 | ചൊവ്വ | ✍️തയ്യാറാക്കിയത്: ആസിഫ അഫ്രോസ്, ബാംഗ്ലൂർ

🌹 “ഇന്നത്തെ ചിന്താവിഷയം” 🌹 – 2026 | ഒക്ടോബർ 20 | ചൊവ്വ | ✍️ പ്രൊഫസ്സർ എ.വി. ഇട്ടി മാവേലിക്കര

🌹 ചിന്താ പ്രഭാതം 🌹 – 2026 | ഒക്ടോബർ 20 | ചൊവ്വ | ✍️ ബേബി മാത്യു അടിമാലി

പഞ്ചാബിലെ സംഗ്രൂരില്‍ അതിവേഗത്തിലെത്തിയ കാര്‍ ഇടിച്ചുകയറി എട്ട് തൊഴിലുറപ്പ് തൊഴിലാളികള്‍ക്ക് ദാരുണാന്ത്യം

Recent Comments

EDITOR PICKS

👨‍👨‍👦‍👦മലയാളി മനസ്സ് — ആരോഗ്യ വീഥി 👨‍👨‍👦‍👦 – 2026 | ഒക്ടോബർ 20 | ചൊവ്വ | ✍️തയ്യാറാക്കിയത്: ആസിഫ അഫ്രോസ്, ബാംഗ്ലൂർ

🌹 “ഇന്നത്തെ ചിന്താവിഷയം” 🌹 – 2026 | ഒക്ടോബർ 20 | ചൊവ്വ | ✍️ പ്രൊഫസ്സർ എ.വി. ഇട്ടി മാവേലിക്കര

🌹 ചിന്താ പ്രഭാതം 🌹 – 2026 | ഒക്ടോബർ 20 | ചൊവ്വ | ✍️ ബേബി മാത്യു അടിമാലി

POPULAR POSTS

നവംബർ ഒൻപത് മുതൽ രാജ്യത്ത് 137 ക്യാൻസർ മരുന്നുകളുടെ വില കുറയും.

POPULAR CATEGORY

ABOUT US

FOLLOW US