ഓഫീസിൽ നിന്നു ഇറങ്ങിയപ്പോൾ ആണ് നെയിൽ സലൂണിൽ കയറണം എന്നു ഞാനോർത്തത് . സലൂണിൽ കയറി നഖങ്ങളിൽ എല്ലാം ഇഷ്ട നിറമായ ലൈറ്റ് ഗ്രീൻ ജെൽ അടിച്ചു കൊണ്ടിരിക്കുമ്പോൾ തന്നെ ഞാൻ വില്ല്യമിനെ വിളിച്ചു വീട്ടിലേയ്ക്കു വരാൻ അല്പം താമസിക്കും എന്നു പറഞ്ഞു
സലൂണിൽ നിന്നിറങ്ങി കാർ പാർക്കിങ്ങിലേയ്ക്ക് നടക്കുക ആണ് ഞാനിപ്പോൾ .
ചൂട് കുറഞ്ഞുവരുന്നു. സെപ്റ്റംബർ ആയല്ലോ ഇനി ഇവിടെ അമേരിക്കയിൽ എല്ലാം ഇലപൊഴിയുന്ന കാലം വരുന്നു .
കാറിൽ കയറി ഞാൻ എ സി ഓണാക്കി ,
“നിക്കി മിനാജിന്റെ ഗേൾ ഓൺ ഫയർ ” റാപ്പ് ഇട്ടു സീറ്റിൽ ഒന്നു ചാരി കിടക്കുമ്പോൾ ആണ് . സെൽഫോൺ അടിച്ചത് ,
നോക്കിയപ്പോൾ മമ്മി ആണ് വിളിക്കുന്നത് . രണ്ടു മിസ്ഡ് കാൾ കഴിഞ്ഞു മൂന്നാമത്തെ വിളി ആണ് ഇത് .
ഇനി ഇപ്പം എടുത്തില്ലെങ്കിൽ പിന്നേം വിളിക്കും.
മ്യൂസിക് ഒന്നു ലോ ചെയ്തു ഫോൺ എടുത്തു .
“മോളേ കല്ലു..വെള്ളിയാഴ്ച ആണ് ഓണം നീ വരുമോ ?
ഫോണിന്റെ പശ്ചാത്തല സംഗീതം പോലെ “ബേ ബേ ” എന്ന മുക്ര ഇടുന്ന ശബ്ദം കേൾക്കാം , കേശു ആണ് . ഇത് കേൾക്കുമ്പോൾ തന്നെ എന്തൊരു അറപ്പാണ് .
“മ്മ് ” ഞാൻ മൂളി .
എന്തിനു പോകണം . ആരെ കാണാൻ പോകണം .
ഡാനിഷ് റോഡിലുള്ള ഞാൻ വളർന്ന വീട് ഒരിക്കലും എന്റേതാണെന്നു തോന്നിയിട്ടില്ല . ആ വീടു മുഴുവനും കേശുവിന്റെ വളർച്ചയ്ക്കും തെറാപ്പിക്കും വേണ്ടി ഉള്ള സാധനങ്ങൾ കൊണ്ട് നിറച്ചിരിക്കുകയാണ്
എന്നെ ഒരിക്കലും മമ്മി സ്നേഹിച്ചിട്ടില്ല .ഡാഡിക്കു എന്നെ ഇഷ്ടം ആയിരുന്നു . നാലു വർഷം മുൻപ് ഡാഡിയും പോയി .
കേശു ജനിക്കുന്നതുവരെ ആ വീട്ടിൽ ഡാഡിയുടേം മമ്മിയുടേം കൂടെ എന്തു സന്തോഷത്തിൽ ആണ് ജീവിച്ചത് .
ഓർക്കാൻ വയ്യ, കേശുവിന്റെ ജനനം .
സെറിബ്രൽ പാലസി ആണ് അവന് . അന്നു തൊട്ട് എല്ലാവരുടെയും ശ്രദ്ധ അവനിൽ ആയി . മമ്മിയും ഡാഡിയും അവനുവേണ്ടി ജീവിക്കുന്നു .
എപ്പോഴും ആശുപത്രി വാസം . അല്ലെങ്കിൽ ഹോം നേഴ്സ് , തെറാപ്പികൾ . വീടുമുഴുവനും ഇഴഞ്ഞു നടക്കും . എത്ര തിന്നാൻ കൊടുത്താലും തികയില്ല. ഇരുപത്തിഎട്ടു വയസ്സുള്ള ഒരു ശല്യം .
എത്ര തവണ ഹെൽത്തു ഡിപ്പാർട്മെന്റിൽ നിന്നും അറിയിച്ചതാണ് അവനെ നഴ്സിംഗ് ഹോമിൽ ആക്കാം എന്ന് . മമ്മി ഒരിക്കലും സമ്മതിച്ചില്ല . മമ്മിയുടെ തന്നിഷ്ടം .
എന്റെ കാറിന്റെ മുൻപിൽ കിടന്ന ഒരു വണ്ടി പുറകോട്ടു എടുക്കുന്നു .
‘ഇവനൊക്കെ എന്തു നോക്കിയാണ് റിവേഴ്സ് എടുക്കുന്നത് . ‘
“പീ ….പീ ….” എന്നു നീട്ടി ഒന്ന് ഹോൺ അടിച്ചു കൊടുത്തു . നല്ല ദേഷ്യം വരുന്നുണ്ടായിരുന്നു .
സന്ധ്യ മയങ്ങിയിരിക്കുന്നു .എക്സിറ്റ് കടന്നു കാർ ‘എ ലൈൻ ‘ റോഡിലൂടെ ,ട്രാഫിക്കിലൂടെ ഒഴുകിക്കൊണ്ടിരുന്നു .
മമ്മിക്കു എന്റെ ജീവിതത്തിനോട് വലിയ താല്പര്യം ഇല്ലായിരുന്നു .
മമ്മിക്കു വയ്യാതായാൽ കേശുവിനെ നോക്കുവാൻ ഞാൻ എപ്പോഴും ആ വീട്ടിൽ ഉണ്ടാവും എന്നായിരിക്കും മമ്മി വിചാരിച്ചത് .
എനിക്ക് ആ ചിന്ത തന്നെ തമാശ ആയി തോന്നി .. മമ്മിയുടെ ജീവിതമോ പോയി, ഇനി ആ ജന്തുവിനെ നോക്കാൻ എന്റെ ജീവിതം കൂടി കളയണം .
അതുകൊണ്ടു തന്നെ ആണ് ഡാഡി മരിച്ചു കഴിഞ്ഞ് വില്ല്യം എന്നെ പ്രൊപ്പോസ് ചെയ്തപ്പോൾ അവന്റെ കൂടെ റിച്ചമോണ്ടിലുള്ള ഈ വീട്ടിലേയ്ക്ക് മാറിയത് .
എ ലൈൻ റോഡിൽ നിന്നും റിച്ചുമൊണ്ട് റോഡിലേയ്ക്ക് കാർ കയറി . എന്റെയും വില്ല്യമിന്റെയും വീടെത്തിയിരിക്കുന്നു .
ജനാലയിലൂടെ വെളിച്ചം ഡ്രൈവ് വേ യിലേക്ക് വീഴുന്നുണ്ട് . വില്ല്യം ജോലി കഴിഞ്ഞു വന്നെന്നു തോന്നുന്നു .
വില്ല്യം വെളുമ്പൻ ആണ് . വെളുത്തു നീളം ഉള്ള പുരുഷന്മാരെ എനിക്ക് ഇഷ്ടം ആണ് . അവന്റെ പിങ്ക് നിറമുള്ള ചുണ്ടുകൾ ആണ് എന്നെ ആകർഷിച്ചത് .
ഡിന്നറിനുള്ള ഇറ്റാലിയൻ ലസാനിയ ഓവനിലേയ്ക്ക് വെയ്ക്കുക ആണ് അവൻ .
എന്നെ കണ്ടപ്പോൾ തന്നെ അവൻ “ഓ മൈ സ്വീറ്റ് ഹാർട് ” എന്നു പറഞ്ഞുകൊണ്ട് അവന്റെ പിങ്കു ചുണ്ടുകൾ എന്റെ ചുണ്ടുമായി കൊരുത്തു .
പോയി ഫ്രഷ് ആയി വാ അപ്പോഴേയ്ക്കും നിന്റെ ഡിന്നർ റെഡിയാവും എന്നു പറഞ്ഞു കവിളത്തു തട്ടി .
ഞൻ വില്ല്യമിനെ ഒരിക്കൽ മാത്രമേ ഡാനിഷ് റോഡിലുള്ള മമ്മിയുടെ വീട്ടിലേയ്ക്കു കൊണ്ടുപോയിട്ടുള്ളൂ അതും വില്ല്യ മിന്റെ നിർബന്ധം കാരണം . വില്ല്യമിന്റെ മമ്മി അവന്റെ ചെറുപ്പത്തിലെ മരിച്ചതാണ്. ഡാഡി പിന്നീട് വേറേ വിവാഹം കഴിച്ചു . ഒത്തിരി കഷ്ടപ്പാടായിരുന്നു ചെറുപ്പകാലത്തു എന്നു പറഞ്ഞിട്ടുണ്ട് .
ഇഴഞ്ഞു നടന്നു അവിടത്തന്നെ ഒന്നിനും രണ്ടിനും പോകുന്ന കേശുവിനെ വില്ല്യം കാണുന്നതു പോലും ഓർക്കാൻ വയ്യാരുന്നു .
ഒരു വിരുന്നുകാർ പോലും വരാത്ത ആ വീട്ടിൽ കയറി ചെന്നു വില്ല്യമിനെ മമ്മിയുടെ മുൻപിൽ നിർത്തിയപ്പോൾ അഭിമാനം ആയിരുന്നു .
കാണ് …ഇതാണെന്റെ ബോയ് ഫ്രണ്ട് . നിങ്ങൾ ഒരിക്കൽ എങ്കിലും എനിക്ക് നന്മ വരണം എന്നു ഓർത്തിട്ടുണ്ടോ . കേശുജനിച്ചപ്പോൾ മുതൽ ഉള്ള കഷ്ടകാലം ആണ് എനിക്ക് . എപ്പോഴും അവനെ നോക്കണം .എങ്ങോട്ടും പോകാൻ പറ്റില്ല .ഈ വീട്ടിൽ ഉള്ളതെല്ലാം അവന്റെ സൗകര്യത്തിനാക്കി .എനിക്ക് വയസ് മുപ്പത്തി രണ്ടായി . ഞാൻ വളർന്നതോ ഒരു പെണ്ണായതോ മമ്മി അറിഞ്ഞിട്ടുണ്ടോ ,എനിക്ക് എന്റെ ജീവിതം ആണ് വലുത് . മമ്മിയുടെ മുഖത്തു നോക്കി അത്രയും പറഞ്ഞപ്പോൾ എനിക്ക് ശ്വാസം മുട്ടുന്നപോലെ തോന്നി .
നിന്റെ അനിയൻ കുഞ്ഞല്ലേ ..വയ്യാത്തവൻ അല്ലേ ? മമ്മിയുടെ കുഴിയിലായ കണ്ണുകളിൽ ഉരുകാൻ വെമ്പുന്ന മഞ്ഞുകണങ്ങൾ
അതേ എനിക്ക് ഉറപ്പാണ് , കേശുവിനുവേണ്ടി നിറയുന്ന ഈ കണ്ണുകൾ എന്നെ കണ്ടിട്ടില്ല .
വില്ല്യം കേശുവിന്റെ അടുത്ത് അൽപ നേരം ഇരുന്നു . ഒരു മുഷിഞ്ഞ കുപ്പായം ആണ് എപ്പോഴും കേശുവിന്റെ വേഷം . തിന്നാൻ എന്തെങ്കിലും കിട്ടുമോ എന്നു നോക്കുക ആണ് കേശു വില്ല്യമിന്റെ അടുത്ത് . ബേ ..ബേ .. എന്ന് ശബ്ദം വച്ചു അവൻ എന്തൊക്കൊയോ വില്ല്യമിനോട് പറയുന്നുണ്ടായിരുന്നു .
എന്നെ കണ്ടാൽ കേശു നിശബ്ദൻ ആകും . ബേ .. ബേ .. കേട്ടാൽ മൂക്കിന്റെ പാലം നോക്കി ചൂണ്ടുവിരൽ കൊണ്ടൊരു പ്രയോഗം ഉണ്ട് എനിക്ക് . നന്നായി വേദനിക്കും അവന് .പിന്നെ പേടിയാണ് , “ഇറ്റ്സ് ഗൂഡ് . ..”
കുളികഴിഞ്ഞു ഒരു ലാവെൻഡർ സ്പ്രേ അടിച്ചു കണ്ണാടിയിൽ നോക്കി . ഞാൻ സുന്ദരി ആണ് . ഇന്ന് രാത്രി വില്ല്യമിനു കൊടുക്കാൻ ഈ സുഗന്ധം എന്റെ നേർത്ത നൈറ്റ് ഗൗണിൽ ഉണ്ട് .
ഡിന്നർ കഴിച്ചു കൊണ്ടിരുന്നപ്പോൾ വില്ല്യം ചോദിച്ചു , നിന്റെ മമ്മി വിളിച്ചിട്ടു നീ എന്താ ഫോൺ എടുക്കാതിരുന്നത് . എന്നെ വിളിച്ചിരുന്നു .
വെള്ളിയാഴ്ച നിങ്ങളുടെ എന്തോ റീജിയണൽ ഫെസ്റ്റിവൽ ആണന്നു പറഞ്ഞു . മമ്മി വീട്ടിലോട്ടു ക്ഷണിച്ചിട്ടുണ്ട് . ഞാൻ ഗൂഗിളിൽ നോക്കുക ആയിരുന്നു .. പൂക്കളും പുതിയ ഡ്രസ്സുകളും , കളികളും , ട്രഡീഷണൽ ഫുഡും ഒക്കെ ആണല്ലേ ഈ ഓണം .
എനിക്ക് അതിശയം തോന്നിയില്ല വില്ല്യം ഇങ്ങനെ ആണ് . എല്ലാത്തിനെ പറ്റിയും അറിയാൻ അവനു വലിയ ഉത്സാഹം ആണ് .
.
ഞാൻ വെറുതെ മൂളി ക്കൊണ്ടിരുന്നു.
വെള്ളിയാഴ്ച ഞാൻ ഓഫീസിൽ ചെന്നുകഴിഞ്ഞു വില്ല്യം എന്നെ വിളിച്ചു . അവൻ ഉച്ചയ്ക്ക് ഡാനിഷ്റോഡിലെ മമ്മിയുടെ വീട്ടിലേയ്ക്കു പോവുകയാണെന്നും ,ഞാനും കൂടി ഹാഫ് ഡേ ലീവ് എടുത്തു അങ്ങോട്ടു വരുവാനും പറഞ്ഞു .
ഞാൻ നിസ്സംഗ ഭാവത്തിൽ മൂളി
“ഉം …”
വില്ല്യ മിനെ ഉപദേശിച്ചിട്ടു കാര്യം ഇല്ല എന്തെങ്കിലും തീരുമാനിച്ചാൽ അതിൽ നിന്നു മാറില്ല അവൻ .
.
ഞാൻ ആണ് ആദ്യം ഡാനിഷ് റോഡിലെ വീട്ടിലേയ്ക്കു ചെന്നത് . വില്ല്യമിനെ വിളിച്ചപ്പോൾ അവൻ ‘വന്നു കൊണ്ടിരിക്കുന്നു ‘എന്നു പറഞ്ഞു .
പരിപ്പിന്റെയും നെയ്യിന്റേം മണം അടുക്കളയിൽ നിന്നും വരുന്നുണ്ട് .
കുപ്പായവും ഇട്ടു അങ്ങോട്ടു നീന്തി വന്ന കേശുവിന്റെ വായിക്കിരുവശവും തുപ്പൽ പതഞ്ഞു നിൽക്കുന്നു .
കുറ്റി രോമങ്ങൾ എഴുന്നു നിൽക്കുന്ന മൊട്ടത്തലയും മുഖവും . മഞ്ഞപിടിച്ച പൊന്തിയ പല്ലുകാട്ടി എന്നെ നോക്കി അവൻ ഒന്നു ഇളിച്ചു കാണിച്ചു . പിന്നെ പേടിയോടെ തല ചെരിച്ചു മുറിയുടെ മൂലയിലേക്ക് മാറിയിരുന്നു . ഡയപ്പർ നിറഞ്ഞിരിക്കുന്നതു കാണാം .
അറപ്പോടെ ഞാൻ കണ്ണു വെട്ടിച്ചു .
ഈ ജന്തുവിനെ ഒന്നു കുളിപ്പിച്ചു കൂടേ ? മമ്മിയോടു ഞാൻ ഒച്ചയിട്ടു .
മമ്മി അടുക്കളയിൽ ഓണ സദ്യ ഒരുക്കുക ആണ് . എല്ലാം മേശപ്പുറത്തു എടുത്തു വെച്ചു കഴിഞ്ഞു .
പിന്നെ മമ്മി കേശുവിനെയും കൊണ്ടു കുളിമുറിയിലേക്ക് കയറി .
അപ്പോഴാണ് വില്ല്യം വന്നത് . കയ്യിൽ കുറേ കെട്ടുകൾ ഉണ്ട് . എനിക്ക് ആകാംഷ തോന്നി വില്ല്യം എന്താണ് ഈ കൊണ്ടുവന്നിരിക്കുന്നത് .
മമ്മിയും കേശുവും അപ്പോഴേയ്ക്കും കുളി കഴിഞ്ഞു ഇറങ്ങി വന്നു .
വില്ല്യം വന്നത് കണ്ട് മമ്മിയുടെ മുഖം വിടർന്നു . കേശു , ബേ .. ബേ .. എന്നു ഒച്ചയിട്ടു കൊണ്ട് വില്ല്യമിന് അടുത്തേയ്ക്കു വലിഞ്ഞു നീന്തി ചെന്നു . വില്ല്യം കേശുവിന്റെ മുഖത്തു വാത്സല്യത്തോടെ തലോടി .
മമ്മിയുടെ കൈയിലേയ്ക്കു,കൊണ്ടുവന്ന കെട്ടുകൾ കൊടുത്തിട്ടു വില്ല്യം പറഞ്ഞു ”
ഞാൻ ഇന്ത്യൻ കടയിൽ നിന്നും വാങ്ങിയതാണ് . മമ്മിയും കേശുവും ഇതൊന്നു മാറിയിട്ടു വാ .
അത്ഭുതത്തോടെ വില്ല്യമിന്റെ കൈകളിൽ നിന്നും ഓണക്കോടി വാങ്ങി മമ്മി ഉടുത്തു കൊണ്ടു വന്നു .
കേശുവിന്റെ ശുഷ്കിച്ച അരയിൽ ഒരു കസവുമുണ്ട് ,ഒരു ചന്ദന കളർ ജുബ്ബ . മമ്മിക്ക് ഒരു കസവു സാരി .
വില്ല്യമിന്റെ മുൻപിൽ ഇട്ട തൂശനിലയിലെ ചോറിലേയ്ക്ക് പരിപ്പു കറി ഒഴിക്കുമ്പോൾ മമ്മി യുടെ കുഴിയിലായ കണ്ണുകളിൽ വീണ്ടും ഉരുകാൻ വെമ്പുന്ന മഞ്ഞുകണങ്ങൾ ഞാൻ കണ്ടു .
എനിക്കുറപ്പാണ് ഈ കണ്ണുനീർ കേശുവിനുവേണ്ടി അല്ല .
ജീവിതത്തിൽ ഒരിക്കലും ഒരു നല്ല ഉടുപ്പ് ഇട്ടിട്ടില്ലാത്ത കേശുവിന്റെ മുഖത്ത് അപ്പോൾ ഒരു ഓണനിലാവ് ഞാൻ ആദ്യമായി കണ്ടു .
