ബോഹും: ജർമനിയിലെ പടിഞ്ഞാറൻ നഗരമായ ബോഹുമിലെ റസിഡൻഷ്യൽ അപ്പാർട്ട്‌മെൻ്റ് സമുച്ചയത്തിലുണ്ടായ തീപിടിത്തത്തിൽ 3 മലയാളികൾക്ക് ദാരുണാന്ത്യം. പാർപ്പിട സമുച്ചയത്തിൽ ചൊവ്വാഴ്ച പുലർച്ചെയുണ്ടായ തീപിടുത്തത്തിലാണ് മലയാളികൾ മരിച്ചത്.
25 ഉം 27 ഉം വയസ്സുള്ള രണ്ട് യുവതികളും 26 വയസ്സുള്ള ഒരു യുവാവുമാണ് മരിച്ചത്. അഞ്ജലി ഷീല ജോയ് (ചാമക്കാട് കൊല്ലം), സ്വിൻ ജോണി (കാലടി), നോവ സാബു (ഇടുക്കി കട്ടപ്പന) വിഷപ്പുകയും തീയും ശ്വസിച്ച് ദാരുണമായി മരണപ്പെട്ടത്.
ഇടുക്കി ശാന്തിഗ്രാം സ്വദേശി സാബുവിൻ്റെ മകൾ നോവ സാബു (25) ജോലിക്കായി ആറുമാസം മുൻപാണ് ജർമനിക്ക് പോയത്. സംഭവവുമായി ബന്ധപ്പെട്ട് ഇതേ കെട്ടിടത്തിൽ താമസിക്കുന്ന 41 വയസ്സുകാരനായ അയൽവാസിയെ പൊലീസ് അറസ്‌റ്റ് ചെയ്തു.അപകടത്തിൽ അഞ്ചോളം ആളുകൾക്ക് ഗുരുതരമായി പരിക്കേറ്റ് ആശുപത്രിയിൽ പ്രവേശിപ്പിച്ചു.
കൊല്ലം സ്വദേശിനിയായ അഞ്ജലി ബെർലിനിൽ ആയിരുന്നു മുൻപ് താമസിച്ചിരുന്നത്. ഈ അപ്പാർട്ട്മെൻ്റിലേക്ക് മാറിയിട്ട് രണ്ടാഴ്ചയെ ആയിട്ടുള്ളു. റെസ്റ്റോറൻ്റിലെ ജീവനക്കാരിയാണ്. ഇക്കഴിഞ്ഞ ജൂലൈയിലാണ് ജർമനിയിലേക്ക് പോയത്.
തീപിടുത്തത്തിന് കാരണം സാങ്കേതിക തകരാറല്ലെന്ന് അന്വേഷണ ഉദ്യോഗസ്ഥർ സ്ഥിരീകരിച്ചിട്ടുണ്ട്; ഇതൊരു അട്ടിമറിശ്രമമാണോ (തീവെപ്പാണോ) എന്നാണ് അവർ സംശയിക്കുന്നത്. എങ്കിലും, തീ മനപൂർവ്വം കത്തിച്ചതാണോ അതോ അബദ്ധവശാൽ ഉണ്ടായതാണോ എന്ന് സ്ഥിരീകരിക്കാനുള്ള ശ്രമങ്ങൾ അവർ തുടരുകയാണ്.
അതേസമയം, തീപിടിത്തത്തിൽ മരിച്ച മലയാളി യുവതി അഞ്ജലി ഷീ ജോയിയുടേത് മൂന്ന് മൃതദേഹങ്ങൾ നാട്ടിലെത്തിക്കുന്നതടക്കമുള്ള തുടർനടപടികൾക്ക് സഹായം ഉറപ്പുനൽകി ടൂറിസം, സാംസ്കാരിക, സിനിമ വകുപ്പ് മന്ത്രി പി. സി. വിഷ്ണുനാഥ്. അഞ്ജലിയുടെ അമ്മാവനുമായി മന്ത്രി ഫോണിൽ സംസാരിച്ച് കുടുംബത്തിൻ്റെ ദുഃഖത്തിൽ പങ്കുചേർന്നു.
മൃതദേഹം നാട്ടിലെത്തിക്കുന്നതിനും ആവശ്യമായ തുടർനടപടികൾ ഏകോപിപ്പിക്കുന്നതിനും എല്ലാ സഹായങ്ങളും നൽകുമെന്ന് അദ്ദേഹം ഉറപ്പു നൽകി. നോർക്ക എംബസിയുമായി ബന്ധപ്പെട്ട മൃതദേഹം നാട്ടിലെത്തിക്കാനുള്ള പ്രവർത്തനങ്ങൾ ആരംഭിച്ചതായും മന്ത്രി പറഞ്ഞു.
