ന്യൂയോർക്ക് : ജൂലൈ 30 മുതൽ ആഗസ്ത് 2-)0 തീയതി വരെ, ഹ്യൂസ്റ്റനിൽ അരങ്ങേറുന്ന ഫോമയുടെ ഒമ്പതാമത് അന്താരാഷ്ട്ര കൺവെൻഷനോടനുബന്ധിച്ചു നടക്കുന്ന പുതിയ ഭാരവാഹികളുടെ ഇലക്ഷൻറെ സുഗമമായ നടത്തിപ്പിനുവേണ്ടി, ഫോമ നാഷണൽ കമ്മിറ്റി ഇലക്ഷൻ കമ്മീഷനെ നിയമിച്ചു. മുതിർന്ന നേതാവ് മാത്യു ചെരുവിൽ (ഡിട്രോയിറ്റ് ) ആണ് ചീഫ് ഇലക്ഷൻ കമ്മീഷണർ. ജോർജ് മാത്യു സി.പി.എ (ഫിലാഡൽഫിയ), മാത്യു ജോഷ്വാ (ബോബി – ന്യൂയോർക്ക്) എന്നിവരെ ഇലക്ഷൻ കമ്മീഷണർമ്മാരായും തെരെഞ്ഞെടുത്തു.
ചീഫ് ഇലക്ഷൻ കമ്മീഷണറായി തെരഞ്ഞെടുക്കപ്പെട്ട മാത്യു ചെരുവിൽ ഫോമയുടെ പ്രഥമ അഡ്വൈസറി ബോർഡ് ചെയർമാനായിരുന്നു. 1984 മുതൽ ഡിട്രോയിറ്റ് മലയാളി അസ്സോസിയേറ്റിന്റെ ഭാഗമായി പ്രവർത്തിക്കുന്ന മാത്യു, ആ സംഘടനയുടെ സെക്രട്ടറിയായും, പ്രസിഡന്റായും നിരവധി തവണ സേവനം ചെയ്തിട്ടുണ്ട്. ഫോമയുടെ മുൻ ജുഡീഷ്യൽ കൗൺസിൽ ചെയർമാൻ കൂടിയായ മാത്യു ചെരുവിൽ, നിരവധി ജീവകാരുണ്യ പ്രവർത്തനങ്ങൾക്കും നേതൃത്വം നൽകുന്നു.
ഇലക്ഷൻ കമ്മീഷണർ ആയി തെരഞ്ഞെടുക്കപ്പെട്ട ജോർജ് മാത്യു സി.പി.എ, ഫോമയുടെ സ്ഥാപക നേതാക്കളിൽ പ്രമുഖനും, മുൻ പ്രസിഡന്റും ആണ്. ഫിലാഡൽഫിയ കേന്ദ്രമായി പ്രവർത്തിക്കുന്ന മലയാളി സംഘടനയായ “കല” യുടെ സ്ഥാപകനും മുൻ പ്രസിഡന്റുകൂടിയായ ജോർജ് മാത്യു, ഫോമയുടെ മുൻ ഇലക്ഷൻ കമ്മീഷണർ ആയും പ്രവർത്തിച്ചിട്ടുണ്ട്. ഫിലാഡൽഫിയിലെ സാമൂഹിക – സാംസ്കാരിക – രാഷ്ട്രീയ രംഗത്തെ നിറ സാന്നിധ്യമായ മാത്യു, ഫിലാഡൽഫിയ സിറ്റി ഹ്യൂമൻ റൈറ്സ് കമ്മീഷണർ, പെൻസിൽവാനിയ സ്റ്റേറ്റ് ഗവർണരുടെ ഉപദേശക സമിതി അംഗം, ചേംബർ ഓഫ് കോമേഴ്സ് അംഗം, ഫിലാഡൽഫിയ സിറ്റി ടാക്സ് റിവ്യൂ ബോർഡ് അംഗം തുടങ്ങി നിരവധിയായ പ്രവർത്തന രംഗങ്ങളിൽ തന്റെ വ്യക്തിമുദ്ര പതിപ്പിച്ചിട്ടുണ്ട്.
