അവസാന വണ്ടിയും നഷ്ടപ്പെട്ട്, ആരുമില്ലാത്ത പ്ലാറ്റ്ഫോമിൽ തനിച്ചായിപ്പോയ ഒരു രാത്രിയുടെ ശൂന്യത അനുഭവിച്ചിട്ടുണ്ടോ?
എല്ലാം തകർന്നു, ഇനി മുന്നോട്ട് ഒരടിപോലും വെക്കാനില്ലെന്ന് തോന്നി ഇരുട്ടിലേക്ക് നോക്കി കരഞ്ഞിട്ടുണ്ടോ? ഉണ്ടെങ്കിൽ, ഒന്ന് ചുറ്റും നോക്കുക. ആരും കാണാനുണ്ടാകില്ല. നിങ്ങളുടെ വിറയ്ക്കുന്ന കൈകൾക്ക് ചൂടുപകരാനോ, ആരും കാണാതെ തുടച്ചുമാറ്റിയ കണ്ണീരൊപ്പാനോ ഈ ലോകം വറ്റിവരണ്ട ഒരു മരുഭൂമിപോലെ നിശബ്ദമായിരിക്കും. കാരണം ലളിതമാണ്: ഈ ലോകത്തിന് നിങ്ങളുടെ സങ്കടങ്ങളിലോ struggle-കളിലോ ഒട്ടും താല്പര്യമില്ല. അതിന് നിങ്ങളുടെ വിജയം (Success) മാത്രമാണു കാണേണ്ടത്.
വേദിയിലെ തിളക്കവും അണിയറയിലെ ഇരുട്ടും
നാം കാണുന്ന ഓരോ തിളങ്ങുന്ന മുഖത്തിന് പിന്നിലും ഒരുപാട് ഇരുണ്ട രാത്രികളുടെ കഥയുണ്ട്. വലിയൊരു തുകയുടെ ലോട്ടറിയടിച്ചവനെ കാണുമ്പോൾ നമ്മൾ അസൂയപ്പെടും. എന്നാൽ അയാൾ ആ ടിക്കറ്റെടുക്കാൻ എത്രവർഷം വിയർപ്പൊഴുക്കി എന്ന് നമ്മൾ തിരക്കാറില്ല. ഒരു ബിസിനസ്സ് സാമ്രാജ്യം കെട്ടിപ്പടുത്തവന്റെ ആഡംബര കാറുകൾ കാണുമ്പോൾ നാം കൈയടിക്കും; എന്നാൽ അതിനായി അയാൾ ബാങ്കുകളുടെ പടിവാതിലിൽ അപമാനിതനായി നിന്ന നിമിഷങ്ങൾ ആരും ഓർക്കാറില്ല.
“നിങ്ങൾ തളർന്നു വീഴുമ്പോൾ തിരിഞ്ഞുനോക്കാൻ പോലും നിൽക്കാത്ത ഇതേ ലോകമാണ്, നിങ്ങൾ ജയിച്ചുകയറുമ്പോൾ സെൽഫിയെടുക്കാൻ നിങ്ങളുടെ മുന്നിൽ ക്യൂ നിൽക്കുന്നത്.”
ഇതാണ് ഈ ലോകത്തിന്റെ പച്ചയായ നിയമം. ഇവിടെ സഹതാപത്തിന് ആയുസ്സ് കുറവാണ്. നിങ്ങളുടെ പരാജയങ്ങൾ മറ്റുള്ളവർക്ക് വെറുമൊരു ചായക്കടയിലെ ചർച്ചാവിഷയം മാത്രമാണ്.
എന്തിനാണ് നമ്മൾ എഴുന്നേറ്റു നിൽക്കേണ്ടത്?
ലോകം ശ്രദ്ധിക്കുന്നില്ല എന്നതുകൊണ്ട് നിങ്ങളുടെ പോരാട്ടം അവസാനിക്കുന്നില്ല. മറിച്ച്, അവിടെയാണ് അത് തുടങ്ങേണ്ടത്.
അവഗണനകളെ ഇന്ധനമാക്കുക..
മറ്റുള്ളവരുടെ പരിഹാസങ്ങളും അവഗണനകളും നിങ്ങളെ തളർത്തരുത്. അത് നിങ്ങളുടെ ഉള്ളിലെ തീക്കനലിനെ ആളിപ്പടർത്താനുള്ള ഇന്ധനമാക്കുക.
നിശബ്ദതയുടെ ശക്തി.
നിങ്ങളുടെ കഠിനാധ്വാനം അത്രമേൽ നിശബ്ദമായിരിക്കട്ടെ. അത് പുറത്തുപറഞ്ഞ് നടക്കേണ്ടതില്ല.
വിജയത്തിന്റെ മറുപടി.
നിങ്ങളെ തള്ളിക്കളഞ്ഞവർക്ക് നൽകാൻ കഴിയുന്ന ഏറ്റവും വലിയ പ്രതികാരം നിങ്ങളുടെ ‘വിജയം’ മാത്രമാണ്.
ചരിത്രം ജയിച്ചവരുടേതാണ്.
ചരിത്രത്തിന്റെ താളുകളിലേക്ക് നോക്കൂ. തോറ്റ ചരിത്രങ്ങൾ ആരും ഓർത്തു വെക്കാറില്ല. അബ്രഹാം ലിങ്കൺ നേരിട്ട പരാജയങ്ങളല്ല, അദ്ദേഹം അമേരിക്കൻ പ്രസിഡന്റായതാണ് ലോകം ഓർത്തുവെക്കുന്നത്. തോൽവികളിൽ നിന്ന് തോൽവികളിലേക്ക് വീണിട്ടും, വീണ്ടുമൊരു വട്ടം കൂടി എഴുന്നേറ്റു നിൽക്കാൻ കാണിച്ച ആ ‘ക്രാഫ്റ്റാണ്’ ഒരാളെ ചരിത്രമാക്കുന്നത്.
അതുകൊണ്ട്, ആരും കാണുന്നില്ലെന്ന് കരുതി ആ ഇരുട്ടിൽ ഒളിച്ചിരിക്കരുത്.
തളർന്നുപോയ ഇടത്തുനിന്ന് പൊടിതട്ടിയൊന്ന് എഴുന്നേറ്റു നിൽക്കൂ. ഇന്ന് നിങ്ങളെ തിരിഞ്ഞുനോക്കാത്ത ഇതേ ലോകത്തെക്കൊണ്ട്, നാളെ നിങ്ങളുടെ വിജയത്തിന്റെ കഥകൾ പാടിക്കണം.
Stand up! കാരണം, നിങ്ങളുടെ നിഴൽവഴികളല്ല, നിങ്ങൾ എത്തിച്ചേരുന്ന വെളിച്ചമാണ് ഈ ലോകത്തെ പ്രകാശിപ്പിക്കേണ്ടത്.
സിജു ജേക്കബ്, ഓസ്ട്രേലിയ
(എഴുത്തുകാരൻ/സഞ്ചാരി)
