ലാൽ വർഗീസ്
ഡാളസ്: B-1/B-2 വിസിറ്റർ വിസയുടെ ദുരുപയോഗം സംബന്ധിച്ച് ആശങ്ക അറിയിച്ചുകൊണ്ടും, ഇത്തരം പ്രവണതകൾ തടയുന്നതിനായി കൂടുതൽ ശക്തമായ പരിശോധനയും നിരീക്ഷണവും ഏർപ്പെടുത്തണമെന്ന് ആവശ്യപ്പെട്ടു കൊണ്ടും ഡാലസിലെ ഇമിഗ്രേഷൻ അറ്റോർണി ലാൽ വർഗീസ് യു.എസ്. ഡിപ്പാർട്ട്മെന്റ് ഓഫ് സ്റ്റേറ്റിന് കത്ത് നൽകി.
മൂന്ന് പതിറ്റാണ്ടിലേറെയായി യു.എസ്. ഇമിഗ്രേഷൻ നിയമരംഗത്ത് പ്രവർത്തിക്കുന്ന അറ്റോർണി ലാൽ വർഗീസ്, തന്റെ പ്രൊഫഷണൽ അനുഭവത്തിന്റെ അടിസ്ഥാനത്തിലാണ് ഈ ആശങ്ക ഉന്നയിച്ചതെന്ന് കത്തിൽ വ്യക്തമാക്കി. ടൂറിസം, ബന്ധുക്കളെ സന്ദർശിക്കൽ തുടങ്ങിയ ആവശ്യങ്ങൾക്കായി B-1/B-2 വിസയിൽ അമേരിക്കയിലെത്തുന്ന ചിലർ പിന്നീട് അനധികൃതമായി ജോലി ചെയ്യുകയും പണമായി പ്രതിഫലം സ്വീകരിക്കുകയും ചെയ്യുന്ന സംഭവങ്ങൾ ശ്രദ്ധയിൽപ്പെട്ടിട്ടുണ്ടെന്ന് അദ്ദേഹം ഹോട്ടലുകൾ, റെസ്റ്റോറന്റുകൾ, തുടങ്ങിയ സ്ഥലങ്ങളിൽ ജോലി ചെയ്യുന്നതും, തുടങ്ങിയ മറ്റൂ ജോലികളിൽ ഏർപ്പെടുന്നതും ഉൾപ്പെടെ ഇത്തരം സംഭവങ്ങൾ ഉണ്ടാകുന്നതായി അദ്ദേഹം പറയുന്നു.
പ്രത്യേകിച്ച്, ഓരോ വർഷവും അമേരിക്കയിലെത്തി അഞ്ച്–ആറ് മാസം വരെ താമസിക്കുകയും, ഏതാനും മാസങ്ങൾ സ്വന്തം രാജ്യത്ത് കഴിഞ്ഞ ശേഷം വീണ്ടും അമേരിക്കയിൽ പ്രവേശിക്കുകയും ചെയ്യുന്ന ആവർത്തിച്ചുള്ള യാത്രാ രീതികൾ കൂടുതൽ ശ്രദ്ധാപൂർവം പരിശോധിക്കണമെന്ന് അദ്ദേഹം നിർദേശിക്കുന്നു. ഇത്തരത്തിലുള്ള യാത്രാ ചരിത്രം വ്യക്തിയുടെ യഥാർത്ഥ സന്ദർശന ഉദ്ദേശ്യത്തെക്കുറിച്ച് കൂടുതൽ പരിശോധന ആവശ്യമായ സാഹചര്യമാകാമെന്നും അദ്ദേഹം ചൂണ്ടിക്കാട്ടുന്നു.
ഇന്ത്യൻ പൗരന്മാർക്ക് B-1/B-2 വിസകൾക്ക് 10 വർഷം വരെ സാധുതയും multiple-entry സൗകര്യവും ലഭിക്കാമെന്ന് കത്തിൽ പരാമർശിക്കുന്ന അദ്ദേഹം, വിസയുടെ ദീർഘകാല സാധുത അമേരിക്കയിൽ ദീർഘകാലം താമസിക്കാനുള്ള അവകാശമല്ലെന്നും, ഓരോ പ്രവേശനത്തിലും അനുവദിക്കുന്ന താമസകാലാവധി CBP ആണ് നിർണ്ണയിക്കുന്നതെന്നും വ്യക്തമാക്കുന്നു.
മുൻകാല യാത്രാ ചരിത്രത്തിൽ തുടർച്ചയായ ദീർഘകാല താമസം, ആവർത്തിച്ചുള്ള പ്രവേശനം, അനധികൃത തൊഴിൽ സംബന്ധിച്ച സൂചനകൾ, സാമ്പത്തിക വിവരങ്ങളിലെ പൊരുത്തക്കേടുകൾ തുടങ്ങിയവ കാണുന്ന സാഹചര്യങ്ങളിൽ കൂടുതൽ പരിശോധന നടത്തണമെന്നും അദ്ദേഹം നിർദേശിക്കുന്നു. ഇത്തരം കേസുകളിൽ കുറഞ്ഞ കാലാവധിയുള്ളതോ പരിമിതമായ എൻട്രികൾ അനുവദിക്കുന്നതോ ആയ വിസകൾ പരിഗണിക്കാനും, പുതിയ വിസ അനുവദിക്കുന്നതിന് മുമ്പ് അപേക്ഷകന്റെ മുൻകാല യു.എസ്. യാത്രാ-താമസ ചരിത്രം കൂടുതൽ വിശദമായി പരിശോധിക്കാനും സ്റ്റേറ്റ് ഡിപ്പാർട്ട്മെന്റ് പരിഗണിക്കണമെന്ന് അദ്ദേഹം ആവശ്യപ്പെട്ടു.
അനധികൃതമായി പണമായി ജോലി ചെയ്യുന്നത് ഇമിഗ്രേഷൻ നിയമങ്ങളുടെ ലംഘനത്തിന് പുറമെ, ലഭിക്കുന്ന വരുമാനം നികുതി ആവശ്യങ്ങൾക്കായി റിപ്പോർട്ട് ചെയ്യാത്ത സാഹചര്യം സൃഷ്ടിക്കാമെന്നും അദ്ദേഹം ചൂണ്ടിക്കാട്ടുന്നു. വ്യക്തികളെയോ ഏതെങ്കിലും പ്രത്യേക സമൂഹത്തെയോ ലക്ഷ്യമിട്ടുള്ള നടപടിയല്ല താൻ ആവശ്യപ്പെടുന്നതെന്നും,
വിസിറ്റർ വിസ ദുരുപയോഗത്തിന്റെ ആവർത്തിച്ചുള്ള മാതൃകകൾ നയതലത്തിൽ പരിശോധിക്കുകയും യു.എസ്. വിസാ സംവിധാനത്തിന്റെ സമഗ്രത സംരക്ഷിക്കുന്നതിനുള്ള നടപടികൾ സ്വീകരിക്കുകയും ചെയ്യണമെന്നാണ് തന്റെ അഭ്യർത്ഥനയെന്നും അറ്റോർണി ലാൽ വർഗീസ് വ്യക്തമാക്കി.
നിയമാനുസൃതമായ അന്താരാഷ്ട്ര യാത്ര സുഗമമാക്കുന്നതിനോടൊപ്പം, യഥാർത്ഥ സന്ദർശകരും വിസ ദുരുപയോഗം ചെയ്യുന്നവരും തമ്മിൽ ഫലപ്രദമായി തിരിച്ചറിയാൻ കഴിയുന്ന നടപടികൾ കൂടുതൽ ശക്തിപ്പെടുത്തേണ്ടതുണ്ടെന്നും അദ്ദേഹം കത്തിൽ ആവശ്യപ്പെട്ടു.
വാർത്ത : ലാൽ വർഗീസ് Esq., ഡാളാസ്
