📱വാർത്തകൾ ഒറ്റനോട്ടത്തിൽ📱 – 2026 | സെപ്റ്റംബർ 03 | വ്യാഴം ✍️ കപിൽ ശങ്കർ

🔹പിണറായി വിജയന്റെ പയ്യന്നൂര്‍, തളിപ്പറമ്പ് പ്രസംഗങ്ങള്‍ ജനങ്ങളോടുള്ള വെല്ലുവിളിയെന്ന് ടി കെ ഗോവിന്ദന്‍ എംഎല്‍എ. തളിപ്പറമ്പിലെ സ്ഥാനാര്‍ഥി നിര്‍ണയം പാളിയെന്ന് കേന്ദ്ര കമ്മിറ്റി പരസ്യമായി പറഞ്ഞതാണ്. കേന്ദ്ര കമ്മിറ്റിയുടെ കണ്ടെത്തലിനു വിരുദ്ധമായാണ് പിണറായി ജനങ്ങളെ വെല്ലുവിളിച്ചത്. പാര്‍ട്ടി തെറ്റുതിരുത്താന്‍ പോകുന്നില്ല എന്നതിന്റെ ദൃഷ്ടാന്തമാണ് ഇതെന്നും അദ്ദേഹം പറഞ്ഞു.

🔹ജനങ്ങള്‍ നല്‍കിയ ഷോക്ക് ട്രീറ്റ്മെന്റാണ് തെരഞ്ഞെടുപ്പ് പരാജയമെന്ന് പാര്‍ട്ടി വേദിയില്‍ തുറന്നു സമ്മതിച്ച് സിപിഎം കേന്ദ്ര കമ്മിറ്റി അംഗം തോമസ് ഐസക്ക്. പത്തുവര്‍ഷം ഭരിച്ചപ്പോള്‍ പാര്‍ട്ടി പ്രവര്‍ത്തകര്‍ക്ക് അഹങ്കാരം കൂടിയെന്നും ആലപ്പുഴ വള്ളികുന്നത്തെ സിപിഎം പൊതുയോഗത്തില്‍ ഐസക്ക് തുറന്നടിച്ചു.

🔹പോലീസിനെതിരേ വടികളെറിഞ്ഞും ഭീഷണി മുഴക്കിയുമുള്ള എസ്എഫ്ഐ സമരത്തെ അടിച്ചൊതുക്കി പോലീസ്. സെക്രട്ടറിയേറ്റിലേക്ക് എസ്എഫ്ഐ നടത്തിയ മാര്‍ച്ചിലാണ് സംഘര്‍ഷമുണ്ടായത്. ഉപരാഷ്ട്രപതി പങ്കെടുത്ത പരിപാടിയില്‍ വന്ദേമാതരം ആലപിച്ചതില്‍ പ്രതിഷേധിച്ചായിരുന്നു മാര്‍ച്ച്. ലാത്തിച്ചാര്‍ജ്ജില്‍ എസ്എഫ്ഐ സംസ്ഥാന സെക്രട്ടറി പി.എസ്. സഞ്ജീവ്, കേന്ദ്ര കമ്മിറ്റി അംഗം ആര്യ പ്രസാദ്, സംസ്ഥാന സെക്രട്ടറിയേറ്റ് അംഗം വൈഷ്ണവി ഷാജി തുടങ്ങിയവര്‍ക്കു പരിക്കേറ്റു.

🔹ഇന്നലെ നടന്ന എസ്എഫ്ഐയുടെ സെക്രട്ടേറിയേറ്റ് അതിക്രമത്തില്‍ ഒരു എസ്എഫ്ഐ പ്രവര്‍ത്തകന്‍ അറസ്റ്റില്‍. തിരുവനന്തപുരം എസ്എഫ്ഐ ജില്ലാ സെക്രട്ടറിയേറ്റ് അംഗം മനേഷിനെയാണ് അറസ്റ്റു ചെയ്തത്.

🔹എസ്എഫ്ഐ സമരത്തില്‍ പങ്കെടുത്തവരെ പൊലീസ് ലാത്തികൊണ്ടു പ്രധാന സ്ഥാനങ്ങളില്‍ നോക്കി മര്‍ദിച്ചെന്ന് പ്രതിപക്ഷ നേതാവ് പിണറായി വിജയന്‍. യുഡിഎഫ് സര്‍ക്കാര്‍ ആര്‍എസ്എസ് അനുകൂല നിലപാട് തുടരുന്നുവെന്നും പ്രതിപക്ഷ നേതാവ് ആരോപിച്ചു. വന്ദേമാതരത്തിന്റെ രണ്ടു ചരണം പാടിയാല്‍ മതിയെന്ന നിലപാടു മാറ്റി സര്‍വകലാശാലയില്‍ മുഴുവനായും പാടി. പൊലീസിനെ ഉപയോഗിച്ച് പ്രതിഷേധങ്ങളെ അടിച്ചമര്‍ത്താനാവില്ലെന്നും പിണറായി പറഞ്ഞു.

🔹പ്രതിപക്ഷ ഉപനേതാവ് പദവിയില്‍ വിട്ട് വീഴ്ച ഇല്ലെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. പ്രതിപക്ഷ ഉപ നേതാവ് പദവി ഒഴിച്ചിടുന്നു എന്ന വാര്‍ത്ത മാധ്യമങ്ങളില്‍ കണ്ടു. ഇത് സംബന്ധിച്ച് കൂടുതല്‍ അറിവില്ലെന്നും അദ്ദേഹം വ്യക്തമാക്കി. സിപിഐ – സിപിഐഎം ചര്‍ച്ച സംസ്ഥാന സെക്രട്ടറിമാര്‍ ദേശിയ സെക്രട്ടറിമാര്‍ തമ്മില്‍ ആകാമെന്നും അദ്ദേഹം പറഞ്ഞു

🔹പ്രതിപക്ഷ ഉപനേതാവ് പദവി തര്‍ക്കം മുന്നണി കെട്ടുറപ്പിനെ ബാധിക്കുന്നുണ്ടെന്ന് കേരളാ കോണ്‍ഗ്രസ്. തൊലിപ്പുറത്തെ ചികിത്സ കൊണ്ട് പ്രശ്നം പരിഹരിക്കാനാകില്ലെന്ന് ജോസ് കെ മാണി പ്രതികരിച്ചു. അതേസമയം പ്രശ്ന പരിഹാര ചര്‍ച്ചയാകാമെന്ന് പറയുന്ന ബിനോയ് വിശ്വം, ത്യാഗം ചെയ്യുന്നത് കൊണ്ടാണ് ഇടതുമുന്നണിയില്‍ സിപിഐ തുടരുന്നതെന്നും ഓര്‍മ്മിപ്പിച്ചു.

🔹മാസപ്പടി കേസുമായി ബന്ധപ്പെട്ട് മുന്‍ മുഖ്യമന്ത്രി പിണറായി വിജയന്റെ വസതിയില്‍ പരിശോധനക്കെത്തിയ എന്‍ഫോഴ്സ്മെന്റ് ഉദ്യോഗസ്ഥരെ അക്രമിച്ച കേസില്‍ 15 പ്രതികളുടെ വിരലടയാളം തിരിച്ചറിഞ്ഞു. ആക്രമിച്ച വാഹനം, ആക്രമിക്കാന്‍ ഉപയോഗിച്ച ആയുധങ്ങള്‍ എന്നിവയില്‍ പ്രതികളുടെ വിരല്‍ അടയാളം കണ്ടെത്തിയിട്ടുണ്ട്.

🔹അര്‍ജന്റീന ടീമിനെയും മെസ്സിയെയും കേരളത്തില്‍ എത്തിക്കുമെന്നു പ്രചരിപ്പിച്ച് എല്‍ഡിഎഫ് സര്‍ക്കാരിന്റെ കാലത്തു നടത്തിയ തട്ടിപ്പ് അന്വേഷിക്കാന്‍ എഡിജിപി പി വിജയന്റെ നേതൃത്വത്തില്‍ പ്രത്യേക അന്വേഷണ സംഘത്തെ രൂപീകരിച്ചു. രണ്ട് എസ്പിമാര്‍ സംഘത്തിലുണ്ടാകും. ക്രൈംബ്രാഞ്ച്, വിജിലന്‍സ്, ലോക്കല്‍ എന്നിവിടങ്ങളിലെ ഉദ്യോഗസ്ഥരെയും ഉള്‍പ്പെടുത്തും. തട്ടിപ്പില്‍ അഴിമതി നിരോധന നിയമപ്രകാരം കേസെടുക്കാമെന്ന് നിയമോപദേശമുണ്ട്. മുന്‍ കായിക മന്ത്രി അബ്ദുറഹ്‌മാന്റെ വിദേശയാത്രയും അന്വേഷിക്കും.

🔹ശബരിമലയില്‍ മൂവായിരം പേര്‍ക്ക് ഓണസദ്യ നല്‍കിയെന്നും ദേവസ്വം മന്ത്രി കെ മുരളീധരനെ ആരോ തെറ്റിദ്ധരിപ്പിച്ചതാകുമെന്നും ദേവസ്വം ബോര്‍ഡ് പ്രസിഡന്റ് കെ ജയകുമാര്‍. തിരുവോണ സദ്യ നല്‍കിയതില്‍ ഒരു വീഴ്ചയും ഉണ്ടായിട്ടില്ല. എല്ലാ മുന്നൊരുക്കങ്ങളും നടത്തിയതാണ്. ഓണസദ്യ നല്‍കാത്തതിനെക്കുറിച്ച് മന്ത്രി ദേവസ്വത്തോടു വിശദീകരണം തേടിയിരുന്നു

🔹വ്യാജരേഖ ചമച്ച് ലൈഫ് ഗുണഭോക്താക്കളുടെ അരക്കോടിയിലധികം രൂപയുടെ ഫണ്ട് തട്ടിയ വില്ലേജ് എക്സ്റ്റന്‍ഷന്‍ ഓഫീസര്‍ കസ്റ്റഡിയില്‍. പത്തനംതിട്ട തണ്ണിത്തോട് പഞ്ചായത്ത് ജീവനക്കാരി റാണി ലക്ഷ്മിയാണു പിടിയിലായത്. ഇവര്‍ ജോലി ചെയ്ത മൂന്നു പഞ്ചായത്തുകളിലും ക്രമക്കേട് നടത്തിയിട്ടുണ്ടെന്നാണ് പോലീസിനു ലഭിച്ച വിവരം.

🔹കൊട്ടാരക്കര താലൂക്ക് ആശുപത്രിയില്‍ ചികിത്സ തേടിയെത്തിയ രോഗിയോട് മോശമായി പെരുമാറിയ സംഭവത്തില്‍ അസിസ്റ്റന്റ് സര്‍ജന്‍ ഡോ. രേഖ കെ. കൃഷ്ണനെ തെന്മല പ്രാഥമിക ആരോഗ്യ കേന്ദ്രത്തിലേക്ക് സ്ഥലം മാറ്റി. ജില്ലാ മെഡിക്കല്‍ ഓഫീസറുടെ അന്വേഷണ റിപ്പോര്‍ട്ടിന്റെ അടിസ്ഥാനത്തിലാണ് ആരോഗ്യ വകുപ്പ് ഡയറക്ടറുടെ നടപടി.

🔹കാന്തപുരം എ.പി. അബൂബക്കര്‍ മുസ്ലിയാരുടെ നിലപാടിനെ വിമര്‍ശിച്ച മുഖ്യമന്ത്രി വി.ഡി. സതീശനെ കാന്തപുരം വിഭാഗം നേതാക്കള്‍ സന്ദര്‍ശിച്ചു. സ്ത്രീകള്‍ അടങ്ങിയൊതുങ്ങി വീടുകളില്‍ ഇരിക്കണമെന്ന കാന്തപുരത്തിന്റെ പരാമര്‍ശം സംബന്ധിച്ചു വിശദീകരിച്ച അവര്‍ മുഖ്യമന്ത്രി നിലപാടു തിരുത്തണമെന്ന് ആവശ്യപ്പെട്ടു.

🔹കാന്തപുരം എപി അബൂബക്കര്‍ മുസ്ലിയാരുടെ സ്ത്രീവിരുദ്ധ പരാമര്‍ശങ്ങളെ തള്ളി മുതിര്‍ന്ന സിപിഎം നേതാവ് പാലോളി മുഹമ്മദ് കുട്ടി. മതപണ്ഡിതര്‍ ഉപദേശിക്കേണ്ടത് സ്ത്രീകളെയല്ല പുരുഷന്മാരെയാണ്. യുദ്ധത്തിനിറങ്ങിയ ചരിത്രമാണ് മുസ്ലിം സ്ത്രീകള്‍ക്കുള്ളത്. ഇന്ന് ഏറ്റവും അടിമത്തം അനുഭവിക്കുന്നത് മുസ്ലിം സ്ത്രീകള്‍ ആണെന്നും പാലോളി പറഞ്ഞു.

🔹ശബരിമല സ്വര്‍ണക്കൊള്ള കേസില്‍ തിരുവിതാംകൂര്‍ ദേവസ്വം ബോര്‍ഡ് മുന്‍ പ്രസിഡന്റ് പി എസ് പ്രശാന്തിന് കൊല്ലം വിജിലന്‍സ് കോടതി ജാമ്യം അനുവദിച്ചു. ആരോഗ്യ പ്രശ്നങ്ങള്‍ പരിഗണിച്ചാണ് ജാമ്യം അനുവദിച്ചത്. ജൂലൈ 23 നാണ് പി എസ് പ്രശാന്തിനെ പ്രത്യേക അന്വേഷണ സംഘം അറസ്റ്റ് ചെയ്തത്.

🔹പട്ടയം കിട്ടാന്‍ കൈക്കൂലി ആവശ്യപ്പെട്ടെന്ന പരാതിയില്‍ ചാലക്കുടി എംഎല്‍എ സനീഷ്‌കുമാര്‍ ജോസഫ്, കെപിസിസി സെക്രട്ടറി രാജേന്ദ്രന്‍ അരങ്ങത്ത്, തൃശൂര്‍ താലൂക്ക് ഓഫീസിലെ ആറ് ഉദ്യോഗസ്ഥര്‍ എന്നിവരടക്കം എട്ടു പേര്‍ക്കെതിരേ കേസെടുക്കാന്‍ തൃശൂര്‍ വിജിലന്‍സ് കോടതി ഉത്തരവ്. താണിക്കുടം സ്വദേശി ദേവേന്ദ്രന്റെ പരാതിയിലാണു നടപടി.

🔹മുഖ്യമന്ത്രി വിഡി സതീശന്‍ കേരളത്തിന്റെ സ്പന്ദനമാണെന്നു പുകഴ്ത്തി സിപിഐ നേതാവ് സി ദിവാകരന്‍. സതീശന്റെ കൈകളില്‍ കേരളത്തിന്റെ ഭാവി ഭദ്രമാണെന്നും അദ്ദേഹം പറഞ്ഞു. തിരുവനന്തപുരത്ത് മുഖ്യമന്ത്രി പങ്കെടുത്ത മഹാത്മ അയ്യങ്കാളി ശ്രീനാരായണഗുരു പുരസ്‌കാര ചടങ്ങിലാണ് പുകഴ്ത്തിയത്.

🔹മുഖ്യമന്ത്രിയെ വഴിയില്‍ തടഞ്ഞ കേസില്‍ ചേന്തി അനിലിന് തിരുവനന്തപുരം ഒന്നാം ക്ലാസ് മജിസ്ട്രേറ്റ് കോടതി ജാമ്യം അനുവദിച്ചു. കേസുകളില്‍ പ്രതിയായത് പാര്‍ട്ടിക്കു വേണ്ടിയാണെന്ന് ജാമ്യത്തിലിറങ്ങിയ ചേന്തി അനില്‍. ഗുണ്ട എന്നു പറഞ്ഞപ്പോള്‍ വിഷമം തോന്നി. മുഖ്യമന്ത്രിയോട് ക്ഷമ ചോദിക്കുന്നുവെന്നും ചേന്തി അനില്‍ പറഞ്ഞു.

🔹യൂട്യൂബര്‍ ഖാദര്‍ കരിപ്പൊടിക്കു പോക്സോ കേസില്‍ ലഭിച്ച ജാമ്യം ഹോസ്ദുര്‍ഗ് ഫാസ്ട്രാക്ക് കോടതി റദ്ദാക്കി. ജാമ്യമില്ല വാറന്റും പുറപ്പെടുവിച്ചിട്ടുണ്ട്. പോക്‌സോ കേസിലെ അതിജീവിതയെ തിരിച്ചറിയുന്ന തരത്തില്‍ യൂട്യൂബില്‍ വീഡിയോ പോസ്റ്റ് ചെയ്ത കേസാണിത്. പ്രവാസിയായ അബ്ദുല്‍ അഹദിനെ വധിക്കാന്‍ ശ്രമിച്ച കേസില്‍ രണ്ടു മാസത്തിലേറെയായി ഖാദര്‍ കരിപ്പൊടി ഒളിവിലാണ്.

🔹അശ്ലീല ചിത്രം വാട്സ്ആപ്പില്‍ സ്റ്റാറ്റസായി പങ്കുവച്ച പൊലീസ് അസോസിയേഷന്‍ നേതാവിന് സസ്പെന്‍ഷന്‍. കെഎപി അടൂര്‍ മൂന്നാം ബെറ്റാലിയനിലെ ഉദ്യോഗസ്ഥന്‍ സഞ്ജു കൃഷ്ണനെ ആണ് സസ്പെന്‍ഡ് ചെയ്തത്.

🔹രാജസ്ഥാനിലെ ജയ്പൂരില്‍ നഹര്‍ഗഡ് ബയോളജിക്കല്‍ പാര്‍ക്കില്‍ കടുവയുടെ ആക്രമണത്തില്‍ ശുചീകരണ തൊഴിലാളിയായ സ്ത്രീ കൊല്ലപ്പെട്ടു. സുഗ്ന ദേവി എന്ന ജീവനക്കാരിയാണ് കടുവയുടെ ആക്രമണത്തിനിരയായി മരിച്ചത്.

🔹നേപ്പാള്‍ ദുരന്തത്തില്‍ മരിച്ചവരുടെ എണ്ണം 1130 ആയി. കാണാതായ ആറ് മലയാളികള്‍ക്കായുള്ള തിരച്ചില്‍ തുടരുകയാണ്. ദുരിതാശ്വാസ സാമഗ്രികളുമായി ഒരു വിമാനം കൂടി ഇന്ത്യ നേപ്പാളിലേക്ക് അയച്ചു. ഓസ്ട്രേലിയന്‍ പൗരത്വമുള്ള നാല് മലയാളികളെക്കുറിച്ച് എന്തെങ്കിലും വിവരം ഇതുവരെ കിട്ടിയിട്ടില്ല. മറ്റ് രണ്ട് മലയാളികള്‍ക്കായും തിരച്ചില്‍ തുടരുകയാണ്.

🔹ആഗോള ഓണ്‍ലൈന്‍ ടാക്സി ഭീമനായ ഊബറില്‍ 10 ശതമാനത്തോളം വരുന്ന 3,300 പേരെ പിരിച്ചുവിടുന്നു. മാനേജര്‍മാരെ 20 ശതമാനം കുറയ്ക്കുമെന്നും കമ്പനി സി.ഇ.ഒ ദാരാ ഖോസ്‌റോവ്ഷാഹി പ്രഖ്യാപിച്ചു.

🔹ഇറാനും അമേരിക്കയും തമ്മിലുള്ള സൈനിക ഏറ്റുമുട്ടല്‍ രൂക്ഷമാകുന്നു. പുലര്‍ച്ചെ കുവൈറ്റിനു നേരെ ഇറാന്‍ നടത്തിയ മിസൈല്‍-ഡ്രോണ്‍ ആക്രമണങ്ങളെ കുവൈറ്റ് വ്യോമപ്രതിരോധ സേന വിജയകരമായി തടഞ്ഞു. അതേസമയം കുവൈറ്റിലുള്ള അമേരിക്കന്‍ പൗരന്മാര്‍ അതീവ ജാഗ്രത പാലിക്കണമെന്ന് യുഎസ് എംബസി സുരക്ഷാ മുന്നറിയിപ്പ് നല്‍കി. മേഖലയില്‍ നിലവിലുള്ള സാഹചര്യം അപ്രതീക്ഷിതമായി കൂടുതല്‍ രൂക്ഷമാകാനുള്ള സാധ്യതയുണ്ടെന്നും എംബസി മുന്നറിയിപ്പില്‍ പറയുന്നു. എന്നാല്‍ ഇറാനെ ആക്രമിക്കാന്‍ സജ്ജമെന്നും ഇപ്പോഴത്തെ യുദ്ധം അധികകാലം നീണ്ടു നില്‍ക്കില്ലെന്നും അമേരിക്കന്‍ പ്രസിഡന്റ് ഡോണള്‍ഡ് ട്രംപ് വ്യക്തമാക്കി.

🔹കളിമതിയാക്കാന്‍ താന്‍ ഇപ്പോള്‍ ഉദ്ദേശിക്കുന്നില്ലെന്ന ശക്തമായ സൂചനകളുമായി 41-കാരനായ പോര്‍ച്ചുഗീസ് സൂപ്പര്‍ താരം ക്രിസ്റ്റ്യാനോ റൊണാള്‍ഡോ. സൗദി ക്ലബ്ബ് അല്‍ നസ്റിന്റെ പരിശീലന ചിത്രങ്ങള്‍ സോഷ്യല്‍ മീഡിയയില്‍ പങ്കുവെച്ച് ‘കീപ് പുഷിങ്’ എന്ന അടിക്കുറിപ്പെഴുതിയാണ് റൊണാള്‍ഡോ തന്റെ നിലപാട് വ്യക്തമാക്കിയത്.

🔹കെസിഎല്ലില്‍ കാലിക്കറ്റ് ഗ്ലോബ്സ്റ്റാര്‍സിനെ 6 വിക്കറ്റിന് തോല്പിച്ച് ഏരീസ് കൊല്ലം സെയിലേഴ്സ് സെമി പ്രതീക്ഷകള്‍ നിലനിര്‍ത്തി. കാലിക്കറ്റ് ഉയര്‍ത്തിയ 176 റണ്‍സിന്റെ വിജയലക്ഷ്യം 16 പന്തുകള്‍ ബാക്കിനില്‍ക്കെ 4 വിക്കറ്റ് നഷ്ടത്തില്‍ കൊല്ലം മറികടന്നു. ഇതോടെ ഇന്നു നടക്കുന്ന കാലിക്കറ്റ് – ട്രിവാണ്‍ഡ്രം പോരാട്ടം നിര്‍ണ്ണായക മത്സരമായി മാറി. നിലവില്‍ കൊല്ലത്തിന് ഒന്‍പതും കാലിക്കറ്റിന് എട്ടും പോയിന്റ് വീതമാണുള്ളത്. ട്രിവാണ്‍ഡ്രത്തിനെതിരെ കാലിക്കറ്റ് ജയിച്ചാല്‍ കൊല്ലത്തെ പിന്തള്ളി അവര്‍ സെമിയിലേക്ക് മുന്നേറും. കാലിക്കറ്റ് തോറ്റാല്‍ കൊല്ലത്തിന് സെമിയിലേക്ക് വഴിതുറക്കും.

🔹കെസിഎലില്‍ കൊച്ചി ബ്ലൂ ടൈഗേഴ്സിനെതിരെ തകര്‍പ്പന്‍ വിജയവുമായി പോയിന്റ് പട്ടികയില്‍ ഒന്നാം സ്ഥാനത്തേക്ക് മുന്നേറി ട്രിവാന്‍ഡ്രം റോയല്‍സ്. കൊച്ചി പടുത്തുയര്‍ത്തിയ 197 റണ്‍സിന്റെ കൂറ്റന്‍ വിജയലക്ഷ്യം പത്ത് പന്തുകള്‍ ബാക്കിനില്‍ക്കെ ട്രിവാന്‍ഡ്രം മറികടന്നു. ക്യാപ്റ്റന്‍ കൃഷ്ണപ്രസാദും സെഞ്ചുറി നേടിയ ഗോവിന്ദ് പൈയും ചേര്‍ന്ന റെക്കോര്‍ഡ് കൂട്ടുകെട്ടാണ് ടീമിന് അനായാസ വിജയം ഒരുക്കിയത്.

🔹രണ്ടാം ഇന്നിംഗ്സില്‍ അര്‍ധസെഞ്ചുറിയുമായി തിളങ്ങിയ ക്യാപ്റ്റന്‍ തിലക് വര്‍മ്മയുടെ ബാറ്റിംഗ് മികവില്‍ നോര്‍ത്ത് സോണിനെ ഏഴ് വിക്കറ്റിന് തകര്‍ത്ത് സൗത്ത് സോണ്‍ ദുലീപ് ട്രോഫി ഫൈനലില്‍. ബെംഗളൂരു സെന്റര്‍ ഓഫ് എക്സലന്‍സ് ഗ്രൗണ്ടില്‍ നടന്ന രണ്ടാം സെമിഫൈനലിന്റെ അവസാന ദിനത്തിലെ രണ്ടാം സെഷനിലാണ് സൗത്ത് സോണ്‍ വിജയം ഉറപ്പാക്കിയത്. നോര്‍ത്ത് സോണ്‍ രണ്ടാം ഇന്നിങ്സില്‍ സൗത്ത് സോണിന് 181 റണ്‍സിന്റെ വിജയലക്ഷ്യമാണു മുന്നോട്ടുവച്ചത്. ഞായറാഴ്ച മുതല്‍ ചെന്നൈ എം.എ ചിദംബരം സ്റ്റേഡിയത്തിലാണ് സൗത്ത് സോണും ഈസ്റ്റ് സോണും തമ്മിലുള്ള കലാശപ്പോരാട്ടം. അഞ്ച്ുദിവസം നീളുന്ന ഫൈനല്‍ മത്സരം സമനിലയില്‍ കലാശിച്ചാല്‍ ഒന്നാം ഇന്നിങ്സ് ലീഡിന്റെ അടിസ്ഥാനത്തിലാകും വിജയികളെ പ്രഖ്യാപിക്കുക.

🔹സ്‌പെയിന്‍ വനിതാ ഫുട്‌ബോള്‍ ടീമിലെ താരങ്ങളുടെ അണ്ഡം ശീതീകരിച്ച് സൂക്ഷിക്കാന്‍ സ്പാനിഷ് ഫുട്‌ബോള്‍ ഫെഡറേഷന്‍ സൗകര്യമൊരുക്കുന്നു. ഇതുമായി ബന്ധപ്പെട്ട് ഫെഡറേഷന്‍ ഒരു ഫെര്‍ട്ടിലിറ്റി ക്ലിനിക്കുമായി കരാറില്‍ ഒപ്പുവച്ചു.

🔹ദിലീഷ് പോത്തന്‍ നായകനായെത്തിയ ഏറ്റവും പുതിയ ചിത്രം ‘ചെവിട്ടോര്‍മ്മ’ ബുസാന്‍ ചലച്ചിത്ര മേളയിലേക്ക്. എഴുത്തുകാരനും സംവിധായകനുമായ ലിയോ തദ്ദേവൂസ് ഒരുക്കിയിരിക്കുന്ന ‘ചെവിട്ടോര്‍മ്മ’ ഒക്ടോബറില്‍ നടക്കുന്ന കൊറിയയിലെ ബുസാന്‍ ഇന്റര്‍നാഷണല്‍ ഫിലിം ഫെസ്റ്റിവലില്‍ ഔദ്യോഗി എന്‍ട്രിയായാണ് തിരഞ്ഞെടുക്കപ്പെട്ടിരിക്കുന്നത്. വിന്‍ഡോ റ്റു ഏഷ്യന്‍ സിനിമ എന്ന വിഭാഗത്തിലാണ് ചിത്രം അവിടെ പ്രദര്‍ശിപ്പിക്കുന്നത്. ദിലീഷ് പോത്തനും പൗളി വത്സനും പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. ജീവിതത്തിന്റെ അവസാന നിമിഷങ്ങളില്‍ മരണകിടക്കയില്‍ കിടക്കുന്നവര്‍ക്ക് അന്ത്യപ്രാര്‍ഥനകള്‍ ചൊല്ലി അവരെ എല്ലാ കെട്ടുപാടുകളില്‍നിന്നും വിടുവിച്ച് ഒരു സമാധാന മരണത്തിന് സഹായിക്കുന്ന ത്രേസ്യയും പ്രമാണിയായ പായമ്മല്‍ വര്‍ക്കിച്ചനും തമ്മിലുള്ള കൂടിക്കാഴ്ചയാണ് സിനിമയുടെ ഇതിവൃത്തം.

🔹റിമ കല്ലിങ്കലിനെ നായികയാക്കി സജിന്‍ ബാബു രചനയും സംവിധാനവും നിര്‍വഹിച്ച ‘തിയേറ്റര്‍-ദ മിത്ത് ഓഫ് റിയാലിറ്റി’ക്ക് അന്താരാഷ്ട്ര ചലച്ചിത്രമേളകളില്‍ പുരസ്‌കാരത്തിളക്കം. വിദേശത്തും രാജ്യത്തുമായി ഒരേസമയം നടന്ന രണ്ട് പ്രമുഖ മേളകളില്‍നിന്നായി നാല് സുപ്രധാന പുരസ്‌കാരങ്ങളാണ് ഈ മലയാളചിത്രം സ്വന്തമാക്കി. അന്തരിച്ച പ്രമുഖ ബംഗാളി സംവിധായകന്‍ ഋതുപര്‍ണ ഘോഷിന്റെ സ്മരണാര്‍ഥം കല്‍ക്കത്തയില്‍ സംഘടിപ്പിച്ച ഒന്‍പതാമത് ഋതുരംഗം ഫിലിം ഫെസ്റ്റിവലില്‍ മികച്ച ഇന്ത്യന്‍ ചിത്രമായി ‘തിയേറ്റര്‍’ തിരഞ്ഞെടുക്കപ്പെട്ടു. ചിത്രത്തിലെ അഭിനയത്തിന് റിമ കല്ലിങ്കല്‍ മികച്ച നടിക്കുള്ള പുരസ്‌കാരം നേടിയപ്പോള്‍, ശ്യാമപ്രകാശ് എം.എസ്. മികച്ച ഛായാഗ്രാഹകനുള്ള അവാര്‍ഡിനും അര്‍ഹനായി. റഷ്യയിലെ സെന്റ് പീറ്റേഴ്സ്ബര്‍ഗില്‍ നടന്ന ബിഗ് സിറ്റി ലൈറ്റ് ഇന്റര്‍നാഷണല്‍ ഫിലിം ഫെസ്റ്റിവലിലെ മികച്ച സംവിധായകനുള്ള പുരസ്‌കാരം സജിന്‍ ബാബുവിനാണ്. കഴിഞ്ഞമാസം റഷ്യയില്‍ നടന്ന വെസ്റ്റേണ്‍ ഗേറ്റ് ഫിലിം ഫെസ്റ്റിവലിലും ചിത്രം പുരസ്‌കാരം നേടിയിരുന്നു.

🔹സൈജു കുറുപ്പ് നായകനായി എത്തുന്ന ഏറ്റവും പുതിയ ചിത്രം ‘ആര’ത്തിന്റെ റിലീസ് തിയതി പുറത്തുവിട്ടു. ചിത്രം സെപ്റ്റംബര്‍ 25ന് തിയറ്ററുകളില്‍ എത്തും. റിലീസ് തിയതി അറിയിച്ചു കൊണ്ടുള്ള പുതിയ പോസ്റ്ററും അണിയറപ്രവര്‍ത്തകര്‍ പുറത്തുവിട്ടിട്ടുണ്ട്. ‘ഓരോ കോണിലും ഒരു രഹസ്യം ഒളിഞ്ഞിരിപ്പുണ്ട്. ഓരോ ചുവടും സത്യത്തിലേക്ക് കൂടുതല്‍ അടുപ്പിക്കുന്നു’, എന്ന ടാഗ് ലൈനോടെയാണ് ആരം തിയറ്ററിലെത്തുക. രാജേഷ് പരമേശ്വരന്‍ സംവിധാനം ചെയ്യുന്ന ചിത്രമത്തിന്റെ തിരക്കഥ ഒരുക്കുന്നത് വിഷ്ണു രാമചന്ദ്രനാണ്. ചിത്രം ഒരു സൈക്കോളജിക്കല്‍ ഇന്‍വെസ്റ്റിഗേഷന്‍ ത്രില്ലര്‍ ആയാണ് ഒരുങ്ങുന്നത്. സത്യസന്ധനായ ഒരു പോലീസ് ഉദ്യോഗസ്ഥന്റെ ജീവിതത്തില്‍ അരങ്ങേറുന്ന അപ്രതീക്ഷിത സംഭവങ്ങളും അതിനെ തുടര്‍ന്നുണ്ടാകുന്ന ആത്മസംഘര്‍ഷങ്ങളും തുടര്‍ന്ന് ഉണ്ടാകുന്ന ഉദ്വേഗജനകമായ അന്വേഷണവുമാണ് ചിത്രത്തിന്റെ പ്രമേയം.

💦 ഗുരുജിയുടെ വാക്കുകൾ
*****************************

പല കെണികളിലും വീഴാൻ കാരണം വാ തുറക്കുന്നതാണ്!ചില കാര്യങ്ങൾ പറയാതിരിക്കുന്നതാണ് ചിലപ്പോൾ ബുദ്ധി…
കാരണം, നമ്മൾ പറയുന്ന ഓരോ വാക്കിനും ഒരു വിലയുണ്ട്. ഒരു നിമിഷത്തെ ആവേശത്തിൽ പറഞ്ഞ വാക്കുകൾ പിന്നീട് തിരുത്താൻ കഴിയില്ല.
അതുകൊണ്ട് സംസാരിക്കുന്നതിന് മുമ്പ് ഒരു നിമിഷം ചിന്തിക്കുക; മൗനം അജ്ഞതയല്ല, ചിലപ്പോൾ അതൊരു വലിയ തിരിച്ചറിവാണ്.
ആവശ്യമില്ലാത്ത ഇടങ്ങളിൽ വായടച്ചിരിക്കുന്നത് തന്നെയാണ് ഏറ്റവും നല്ലത്.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

സെപ്റ്റംബർ 3

•ലോക ലൈംഗികാരോഗ്യ ദിനം (World Sexual Health Day): ലൈംഗികാരോഗ്യത്തെക്കുറിച്ചുള്ള അവബോധം വളർത്തുന്നതിനും മനുഷ്യാവകാശങ്ങളുടെ ഭാഗമായി ലൈംഗിക അവകാശങ്ങൾ സംരക്ഷിക്കുന്നതിനും വേണ്ടി World Association for Sexual Health-ന്റെ നേതൃത്വത്തിൽ ഈ ദിനം ആചരിക്കുന്നു.

•ദേശീയ വന്യജീവി ദിനം (National Wildlife Day): വംശനാശഭീഷണി നേരിടുന്ന ജീവികളെക്കുറിച്ചും പരിസ്ഥിതി സംരക്ഷണത്തിന്റെ പ്രാധാന്യത്തെക്കുറിച്ചും ജനങ്ങളിൽ അവബോധം സൃഷ്ടിക്കാൻ ഈ ദിനം ഉപയോഗിക്കുന്നു.

•നാഷണൽ ഫുഡ് ബാങ്ക് ഡേ (National Food Bank Day): പട്ടിണി നിർമാർജനത്തിനായി പ്രവർത്തിക്കുന്ന ഫുഡ് ബാങ്കുകളെ സഹായിക്കാനും സംഭാവനകൾ നൽകാനും ഈ ദിവസം പ്രോത്സാഹിപ്പിക്കുന്നു.

തയ്യാറാക്കിയത്: കപിൽ ശങ്കർ

4 Likes

📱വാർത്തകൾ ഒറ്റനോട്ടത്തിൽ📱 – 2026 | സെപ്റ്റംബർ 03 | വ്യാഴം ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

സെപ്റ്റംബർ 3

തയ്യാറാക്കിയത്: കപിൽ ശങ്കർ

നിയുക്ത ഫോമാ നാഷനൽ കമ്മിറ്റി നിയുക്ത പ്രസിഡന്റ് ബിജു തോണിക്കടവിലിന് സ്വീകരണം നൽകി

ബാൾട്ടിമോറിൽ വാരാന്ത്യത്തിൽ നടന്ന വെടിവെയ്പ്പുകളിൽ രണ്ട് കൗമാരക്കാർ ഉൾപ്പെടെ 11 പേർക്ക് പരിക്ക്

LEAVE A REPLY Cancel reply

Most Popular

മാസപ്പടി കേസ്: പിണറായി വിജയനും മുഹമ്മദ് റിയാസിനും എതിരെ കേസെടുക്കുമോ? സർക്കാരിന്റെ തീരുമാനം ഇന്ന്

കാടാമ്പുഴയില്‍ മുറിച്ചുകടത്താന്‍ ശ്രമിച്ച 100 കിലോയോളം വരുന്ന ചന്ദനത്തടി പിടികൂടി

ചിക്കൻ ഉണ്ടാക്കുന്നതിനിടെ യുവദമ്പതികൾക്ക് പൊള്ളലേറ്റ സംഭവത്തിൽ പൊലീസ് നാലു പേർ അറസ്റ്റിൽ

Recent Comments

EDITOR PICKS

മാസപ്പടി കേസ്: പിണറായി വിജയനും മുഹമ്മദ് റിയാസിനും എതിരെ കേസെടുക്കുമോ? സർക്കാരിന്റെ തീരുമാനം ഇന്ന്

കാടാമ്പുഴയില്‍ മുറിച്ചുകടത്താന്‍ ശ്രമിച്ച 100 കിലോയോളം വരുന്ന ചന്ദനത്തടി പിടികൂടി

POPULAR POSTS

ചിക്കൻ ഉണ്ടാക്കുന്നതിനിടെ യുവദമ്പതികൾക്ക് പൊള്ളലേറ്റ സംഭവത്തിൽ പൊലീസ് നാലു പേർ അറസ്റ്റിൽ

കേന്ദ്ര ആഭ്യന്തരമന്ത്രി അമിത് ഷായ്ക്ക് ഛർദിയും തളർച്ചയും; കർണാടകയിലെ പരിപാടികളിൽ പങ്കെടുത്തില്ല

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | സെപ്റ്റംബർ 03 | വ്യാഴം ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

സെപ്റ്റംബർ 3

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************