📱വാർത്തകൾ ഒറ്റനോട്ടത്തിൽ📱 – 2026 | ജൂൺ 11 | വ്യാഴം ✍️ കപിൽ ശങ്കർ

‎🔹കൊല്ലം ജില്ലയിൽ ഷിഗെല്ല സ്ഥിരീകരിച്ചു. രണ്ട് വിദ്യാർത്ഥികൾക്കാണ് രോഗം പിടിപെട്ടത്. ഇവർ പാരിപ്പള്ളി മെഡിക്കൽ കോളേജിൽ ചികിത്സയിലാണ്. നേരത്തെ വയനാട് ജില്ലയിലും ഷിഗെല്ല സ്ഥിരീകരിച്ചിട്ടുണ്ട്. കോളിയാടി മാർ ബസേലിയോസ് സ്കൂളിലെ 3 കുട്ടികൾക്കാണ് രോഗം പടർന്നത്. രോഗലക്ഷണങ്ങളുമായി ചികിത്സയില്‍ കഴിയുന്ന കുട്ടികളുടെ എണ്ണം 38 ആണ്.

🔹നിപ വൈറസ് ബാധിച്ച് കോഴിക്കോട് മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുന്ന രാമനാട്ടുകര സ്വദേശിയായ 43 കാരന്‍റെ ആരോഗ്യനില ഗുരുതരമായി തുടരുന്നു. ഇയാളുടെ സമ്പര്‍ക്ക പട്ടികയിലുള്ള അഞ്ച് പേരുടെ പരിശോധന ഫലങ്ങള്‍ ഇന്ന് വൈകീട്ടോടെ ലഭിക്കും. സ്ഥിതിഗതികള്‍ വിലയിരുത്താനായി ആരോഗ്യ മന്ത്രിയുടെ അധ്യക്ഷതയില്‍ തിരുവനന്തപുരത്ത് ഉന്നതതലയോഗം ചേര്‍ന്നു.

🔹ശബരില സ്വർണക്കൊള്ള ആരോപണത്തിൽ എ പത്മകുമാറിനെതിരെ ഒടുവിൽ നടപടിക്കൊരുങ്ങി സിപിഎം. നടപടി ചർച്ച ചെയ്യുന്നതിനായി പത്തനംതിട്ട ജില്ലാ കമ്മിറ്റിയെ ചുമതലപ്പെടുത്തി. 15ന് പത്തനംതിട്ട ജില്ലാ കമ്മിറ്റി ചേരും. അന്ന് നടപടിയെടുക്കാനാണ് സാധ്യത.

🔹മാസപ്പടി കേസിൽ എന്‍ഫോഴ്സ്മെന്‍റ് ഡയറക്ടറേറ്റിന് മുൻപാകെ പിണറായി വിജയന്‍റെ മകള്‍ വീണ നാളെ ഹാജരാകില്ല. ആരോഗ്യപ്രശ്നങ്ങൾ കാരണം മറ്റൊരു ദിവസം ഹാജരാകാമെന്ന് വീണ ഇഡിക്ക് ഇമെയിൽ അയച്ചു. ആവശ്യമായ രേഖകൾ ഇഡിക്ക് കൈമാറാൻ ഒരുക്കമാണെന്നും വീണയുടെ ഇ മെയിലില്‍ അറിയിച്ചു. വീണയ്ക്ക് മറ്റൊരു ദിവസം അനുവദിക്കുമെന്ന് ഇഡി അറിയിച്ചു.

🔹കോളിയാടി സ്‌കൂളിലെ വിദ്യാര്‍ത്ഥികള്‍ക്കു ഷിഗല്ല ബാധിച്ചതിനെത്തുടര്‍ന്ന് വിദ്യാഭ്യാസ സ്ഥാപനങ്ങള്‍ക്ക് അവധി പ്രഖ്യാപിച്ചു. നെന്‍മേനി, അമ്പലവയല്‍, നൂല്‍പ്പുഴ പഞ്ചായത്തുകളിലെയും സുല്‍ത്താന്‍ബത്തേരി മുനിസിപ്പാലിറ്റിയിലെയും എല്ലാ വിദ്യാഭ്യാസ സ്ഥാപനങ്ങള്‍ക്ക് ജൂണ്‍ 14 വരെയാണ് അവധി.

🔹നവകേരള യാത്രയ്ക്കിടെ മുൻ മുഖ്യമന്ത്രിയുടെ ഗൺമാൻമാർ യൂത്ത് കോൺഗ്രസ്‌ പ്രവർത്തകരെ തല്ലിച്ചതച്ച കേസിൽ പ്രതികൾ ചോദ്യം ചെയ്യലിനായി എസ്ഐടിക്ക് മുന്നിൽ ഹാജരായി. പിണറായി വിജയന്റെ ഗൺമാൻ അനിൽ കല്ലിയൂർ, സുരക്ഷാസേനയിലുണ്ടായിരുന്ന എസ് സന്ദീപ്, ആർ അരുണ്‍, വിവി വിപിൻ, വി കെ ഷൈജു എന്നിവരാണ് ഹാജരായത്.

🔹വീണാ ജോർജിനെതിരായ കരിങ്കൊടി പ്രതിഷേധവുമായി ബന്ധപ്പെട്ട കേസിൽ വധശ്രമം ഉൾപ്പെടെയുള്ള വകുപ്പുകൾ ഒഴിവാക്കി പൊലീസ് റിപ്പോർട്ട്. ഇന്നലെയാണ് അന്തിമ കുറ്റപത്രം കോടതിയിൽ സമർപ്പിച്ചത്. കുറ്റപത്രത്തിൽ വധശ്രമം ഉൾപ്പെടെയുള്ള വകുപ്പുകൾ ഇല്ല. കൊല്ലണമെന്ന ഉദ്ദേശത്തോടെയുള്ള വധശ്രമം, ആയുധം ഉപയോഗിച്ചുള്ള അക്രമം തുടങ്ങിയ ഗുരുതര വകുപ്പുകളാണ് ഒഴിവാക്കിയത്.

🔹വന്യജീവി ആക്രമണങ്ങളില്‍ സര്‍ക്കാരിന്റെ ഭാഗത്തുനിന്നും അങ്ങേയറ്റം ലാഘവത്തോടെയുള്ള സമീപനമാണെന്ന് പ്രതിപക്ഷ നേതാവ് പിണറായി വിജയന്‍. കഴിഞ്ഞ രണ്ടാഴ്ചയ്ക്കുള്ളില്‍ മാത്രം ആറ് പേരുടെ ജീവനാണ് വന്യജീവി ആക്രമണങ്ങളില്‍ നഷ്ടപ്പെട്ടത്. ദുരന്തം നടന്നിട്ടും സംഭവസ്ഥലത്ത് ഉത്തരവാദിത്തപ്പെട്ട ആരും എത്താതിരുന്നത് വളരെ ഗുരുതരമായ വീഴ്ചയാണെന്നും പിണറായി.

🔹തിരുവനന്തപുരത്തെ വധശ്രമക്കേസ് പ്രതി കൗണ്‍സിലര്‍ ആര്‍. സുഗതനെ ആകാശത്തേക്ക് വെടിവെച്ച് അറസ്റ്റ് ചെയ്ത സംഭവത്തില്‍ പൊലീസിനെതിരെ മന്ത്രി കെ. മുരളീധരന്‍. വെടിയുടെ ശബ്ദം നിര്‍ത്തേണ്ട സമയമായെന്നും ആവശ്യമില്ലാത്ത വെടിയൊച്ചയാണ് തന്റെ മണ്ഡലത്തില്‍ ഉണ്ടായതെന്നും മന്ത്രി പറഞ്ഞു.

🔹തമിഴ്‌നാട് സ്വദേശികളായ ബാലന്മാരെ ആലപ്പുഴയില്‍ പീഡിപ്പിച്ചു ഭിക്ഷാടനം നടത്തിച്ച പിതൃസഹോദരന്‍ അറസ്റ്റില്‍. തമിഴ്‌നാട് തൂത്തുക്കുടി കാമരാജ് നഗര്‍ സ്വദേശി അന്തോണി(31)യെയാണ് ഹരിപ്പാട് പൊലീസ് അറസ്റ്റ് ചെയ്തത്. അന്തോണിയുടെ സഹോദരന്റെ മക്കളായ മഹാരാജ (14), ചിലമ്പരശന്‍ (11) എന്നിവരെ തൂത്തുക്കുടിയില്‍നിന്നും ഹരിപ്പാട് എത്തിച്ചാണ് ഭിക്ഷാടനം നടത്തിച്ചിരുന്നത്.

🔹ബിജെപി സംസ്ഥാന കമ്മിറ്റി അംഗം എന്‍കെ സുധീര്‍ വീണ്ടും കോണ്‍ഗ്രസിലേക്ക്. ചേലക്കര ഉപതെരഞ്ഞെടുപ്പില്‍ സീറ്റ് നിഷേധിച്ചതോടെ സുധീര്‍ കോണ്‍ഗ്രസ് വിട്ട് പിവി അന്‍വറിന്റെ പിന്തുണയോടെ ചേലക്കരയില്‍ രമ്യ ഹരിദാസിനെതിരെ സ്വതന്ത്ര സ്ഥാനാര്‍ഥിയായി മത്സരിച്ചിരുന്നു. തെരഞ്ഞെടുപ്പിനുശേഷം അന്‍വറിനോട് ഉടക്കി ബിജെപിയില്‍ ചേരുകയായിരുന്നു.

🔹മുന്‍ മുഖ്യമന്ത്രി പിണറായി വിജയനൊപ്പം ജോലി ചെയ്ത ഉദ്യോഗസ്ഥനെ വേണ്ടെന്ന് വനം മന്ത്രി ഷിബു ബേബി ജോണ്‍. പിണറായി വിജയന്റെ ഓഫീസില്‍ പത്തുവര്‍ഷം പിആര്‍ വിഭാഗത്തില്‍ ഉണ്ടായിരുന്ന എ.സി. അഭിലാഷിനെ വേണ്ടെന്ന നിലപാടാണ് മന്ത്രിയെടുത്തത്. ഇതേത്തുടര്‍ന്ന് അഭിലാഷിന് അഞ്ചുദിവസത്തിനുള്ളില്‍ രണ്ടാമത്തെ സ്ഥലംമാറ്റം നല്‍കി.

🔹ശബരിമല സ്വര്‍ണക്കൊള്ള വിവാദവുമായി ബന്ധപ്പെട്ട് അന്നത്തെ പ്രതിപക്ഷ നേതാവായിരുന്ന വി ഡി സതീശനെതിരെ മുന്‍ മന്ത്രി കടകംപള്ളി സുരേന്ദ്രന്‍ നല്‍കിയ ഉപഹര്‍ജി തിരുവനന്തപുരം സബ് കോടതി തള്ളി. സ്വര്‍ണക്കൊള്ള സംബന്ധിച്ചു സതീശന്‍ തനിക്കെതിരെ നടത്തുന്ന പ്രസ്താവനകള്‍ വിലക്കണമെന്ന് ആവശ്യപ്പെട്ട് കടകംപള്ളി നല്‍കിയ ഉപഹര്‍ജിയാണ് തിരുവനന്തപുരം സബ് കോടതി തള്ളിയത്.

🔹ആഭ്യന്തര വകുപ്പ് കൈകാര്യം ചെയ്യാന്‍ എളുപ്പമല്ലെന്ന് മന്ത്രി രമേശ് ചെന്നിത്തല. രാത്രിയില്‍ ഫോണ്‍ ഓഫാക്കാതെ ജാഗ്രതയോടെ ഇരിക്കണം. ജോലി ചെയ്താല്‍ പൊലീസിന്റെ അതിക്രമം, ജോലി ചെയ്യാതിരുന്നാല്‍ പൊലീസിന്റെ അനാസ്ഥ എന്നും ആരോപണം ഉയരും. മുന്‍ ഡിജിപി എ. ഹേമചന്ദ്രന്‍ ഒരു രൂപപോലും വാങ്ങാതെയാണ് ഉപദേഷ്ടാവായി പ്രവര്‍ത്തിക്കുന്നതെന്നും ചെന്നിത്തല വ്യക്തമാക്കി. ഹേമചന്ദ്രന്റെ പുസ്തകം പ്രകാശനം ചെയ്തു സംസാരിക്കുകയായിരുന്നു മന്ത്രി.

🔹കെഎസ്ആര്‍ടിസി ബസുകളിലെ വിദ്യാര്‍ത്ഥി കണ്‍സഷന്‍ കാര്‍ഡ് പുതുക്കുന്നതിനുള്ള ഫീസ് വര്‍ധിപ്പിച്ചിട്ടില്ലെന്ന് കെഎസ്ആര്‍ടിസി. വിദ്യാര്‍ത്ഥികള്‍ക്ക് കണ്‍സഷന്‍ കാര്‍ഡിന് കുറേ വര്‍ഷമായി 110 രൂപയാണ് ഈടാക്കുന്നത്. 100 രൂപ സര്‍വീസ് ചാര്‍ജ്, സോഫ്‌റ്റ്വെയര്‍ പരിപാലന ചെലവ് എന്നിവ അടക്കമുള്ള പ്രോസസ്സിംഗ് ഫീസായും 10 രൂപ കാര്‍ഡിന്റെയും അനുബന്ധ സ്റ്റേഷനറി സാമഗ്രികളുടെയും ചെലവായുമാണ് ഈടാക്കുന്നത്.

🔹സ്വർണ ഖനിയിൽ നിന്ന് നേരിട്ട് എത്തിക്കുന്ന സ്വർണ കട്ടികൾ നൽകാമെന്ന് പറഞ്ഞ് വ്യാജ സ്വർണ കട്ടികൾ വിൽപ്പന നടത്തി ലക്ഷക്കണക്കിന് രൂപ തട്ടിപ്പ് നടത്തിയ കേസിൽ ഒരാള്‍ പിടിയില്‍. കെ ജി എഫ് സ്വാമി എന്ന് വിളിക്കുന്ന പത്തനംതിട്ട മാധവ മംഗലത്ത് മനാഴിയിൽ വീട്ടിൽ 61 വയസുള്ള ഷാജിയാണ് പിടിയിലായത്.

🔹മലപ്പുറം പുളിക്കലിൽ റോഡിൽ മുട്ടിലിഴഞ്ഞ കുഞ്ഞിന്‍റെ രക്ഷകരായ ബസ് ജീവനക്കാരെ അഭിനന്ദിച്ച് ഗതാഗത മന്ത്രി സി പി ജോൺ. ബസ് ജീവനക്കാരെ ഫോണിൽ വിളിച്ചാണ് ഗതാഗത മന്ത്രി അഭിനന്ദനം അറിയിച്ചത്.കൊണ്ടോട്ടി പുളിക്കൽ റോഡിൽ വലിയപറമ്പിലിൽ ഇന്നലെ രാവിലെ എട്ടരയോടെയായിരുന്നു സംഭവം

🔹തമിഴ്നാട് മുഖ്യമന്ത്രി വിജയ് ലോക്സഭാ പ്രതിപക്ഷ നേതാവ് രാഹുല്‍ ഗാന്ധി, കോണ്‍ഗ്രസ് പാര്‍ലമെന്ററി പാര്‍ട്ടി ചെയര്‍പേഴ്സണ്‍ സോണിയ ഗാന്ധി എന്നിവരുമായി കൂടിക്കാഴ്ച നടത്തി. സോണിയ ഗാന്ധിയുടെ 10 ജന്‍പഥിലെ വസതിയിലെത്തിയാണ് വിജയ് ഇരുവരെയും കണ്ടത്. സിപിഐ ആസ്ഥാനമായ അജോയ് ഭവനിലെത്തിയ വിജയ്യെ ജനറല്‍ സെക്രട്ടറി ഡി രാജ സ്വീകരിച്ചു. ഇന്നു നടക്കുന്ന നീതി ആയോഗ് യോഗത്തില്‍ പങ്കെടുക്കാനാണ് വിജയ് ഡല്‍ഹിയിലെത്തിയത്.

🔹തമിഴ്നാട് ബിജെപിയില്‍ വീണ്ടും രാജി. ബിജെപി സംസ്ഥാന സെക്രട്ടറി അമര്‍ പ്രസാദ് റെഡ്ഡി പാര്‍ട്ടിയില്‍നിന്ന് രാജിവെച്ചു. അണ്ണാമലൈയുടെ രാജിക്ക് പിന്നാലെയാണ് തീരുമാനം. അണ്ണാമലൈയ്ക്കൊപ്പം ചേരുമെന്നും അമര്‍ പ്രസാദ് റെഡ്ഡി സോഷ്യല്‍ മീഡിയയിലൂടെ അറിയിച്ചു.

🔹നീറ്റ് ചോദ്യപേപ്പര്‍ ചോര്‍ച്ചയടക്കമുള്ള വിഷയങ്ങളില്‍ കേന്ദ്ര വിദ്യാഭ്യാസ മന്ത്രി ധര്‍മ്മേന്ദ്ര പ്രധാന്റെ രാജി ആവശ്യപ്പെട്ട് ഇന്നു മുതല്‍ രാജ്യവ്യാപകമായി ശക്തമായ പ്രതിഷേധ പരിപാടികള്‍ നടത്തുമെന്ന് കോക്രോച്ച് ജനത പാര്‍ട്ടി. ഇന്നു പൂനെയിലാണ് സമരം. തുടര്‍ന്ന് ലക്നൗ, അമൃത്സര്‍, ബെംഗളൂരു, ജയ്പൂര്‍, ഹൈദരാബാദ് തുടങ്ങിയ പ്രമുഖ നഗരങ്ങളിലേക്ക് പ്രതിഷേധം വ്യാപിപ്പിക്കുമെന്നും സംഘടന വ്യക്തമാക്കി.

🔹മുംബൈയില്‍നിന്നു കണ്ണൂരിലേക്കുള്ള ഇന്‍ഡിഗോ വിമാനത്തില്‍ ബോംബ് ഭീഷണി. വിമാനത്തിനകത്ത് പേപ്പറില്‍ ഭീഷണി സന്ദേശം എഴുതിവച്ച നിലയിലായിരുന്നു. കണ്ണൂരില്‍ വിമാനം ലാന്‍ഡ് ചെയ്ത് ഐസോലേഷന്‍ റണ്‍വേയില്‍ നിര്‍ത്തിയിട്ട് യാത്രക്കാരെ പുറത്തിറക്കി പരിശോധന നടത്തി.

🔹പാകിസ്ഥാന്‍ സൈന്യത്തിന്റെ ഹെലികോപ്ടര്‍ തകര്‍ന്നുവീണ് അപകടം. പാക് അധീന കശ്മീരിലെ മുസാഫറാബാദിന് സമീപമാണ് അപകടമുണ്ടായത്. ഹെലികോപ്ടറില്‍ ഉണ്ടായിരുന്ന എല്ലാവരും മരിച്ചു. പാകിസ്ഥാന്‍ ആര്‍മി ഏവിയേഷന്റെ എംഐ-17 ഹെലികോപ്ടര്‍ ആണ് അപകടത്തില്‍പെട്ടത്.

🔹ഒമാന്‍ തീരത്ത് അമേരിക്ക ആക്രമിച്ച കപ്പലിലെ നാവികരായ മൂന്ന് ഇന്ത്യക്കാരെ കാണാനില്ല. കപ്പലില്‍നിന്ന് 21 ഇന്ത്യക്കാരെ രക്ഷിച്ചു. കപ്പല്‍ ആക്രമിച്ച അമേരിക്കന്‍ നടപടിക്കെതിരേ ഇന്ത്യ പ്രതിഷേധം അറിയിച്ചു. അമേരിക്കന്‍ എംബസിയിലെ സിഡിഎ ജെയ്സണ്‍ മീക്സിനെ വിളിച്ചു വരുത്തിയാണ് പ്രതിഷേധം അറിയിച്ചത്. ഹോര്‍മുസ് കടലിടുക്കിനടുത്തുള്ള എണ്ണ ടാങ്കര്‍ സെറ്റെബെല്ലോയുടെ എഞ്ചിന്‍ മുറിയില്‍ അമേരിക്കന്‍ മിസൈല്‍ പതിച്ച് കപ്പലിനു തീപിടിക്കുകയായിരുന്നു. പലാവു പതാകയുള്ള കപ്പലിലെ 28 ജീവനക്കാരില്‍ 24 പേര്‍ ഇന്ത്യക്കാരാണ്.

🔹ഇസ്രായേലിന് കനത്ത തിരിച്ചടി നല്‍കി അഞ്ച് രാജ്യങ്ങളുടെ കൂട്ടായ്മ. ബ്രിട്ടന്‍, ഓസ്ട്രേലിയ, കാനഡ, ഫ്രാന്‍സ്, നോര്‍വേ എന്നീ രാജ്യങ്ങളാണ് വെസ്റ്റ് ബാങ്കില്‍ ഇസ്രായേലി കുടിയേറ്റക്കാര്‍ പലസ്തീനികള്‍ക്കെതിരെ നടത്തുന്ന അക്രമണങ്ങള്‍ക്കെതിരെ കടുത്ത നടപടിയുമായി രംഗത്തുവന്നത്. യഹൂദ കുടിയേറ്റക്കാരുടെ ആക്രമണങ്ങള്‍ക്ക് ധനസഹായം നല്‍കുകയും അതിന് സൗകര്യമൊരുക്കുകയും ചെയ്യുന്ന സംഘടനകള്‍ക്കും വ്യക്തികള്‍ക്കുമെതിരെ ഈ രാജ്യങ്ങള്‍ ഉപരോധം ഏര്‍പ്പെടുത്തി.

🔹അഫ്ഗാനിസ്ഥാനില്‍ ഹിജാബിനെതിരേ സ്ത്രീകള്‍ നടത്തിയ പ്രതിഷേധ പ്രകടനത്തിലേക്കു പൊലീസ് നടത്തിയ വെടിവയ്പില്‍ രണ്ടു പേര്‍ കൊല്ലപ്പെട്ടു. നിരവധി പേര്‍ക്ക് പരിക്കേറ്റു. പലരും അറസ്റ്റിലായി. പടിഞ്ഞാറന്‍ നഗരമായ ഹെരാത്തിലാണ് പ്രതിഷേധത്തിനു നേര്‍ക്ക് വെടിവെപ്പുണ്ടായത്.

🔹പശ്ചിമേഷ്യന്‍ യുദ്ധത്തെ തുടര്‍ന്ന് ക്രൂഡ്ഓയില്‍ വിലയിലെ ചാഞ്ചാട്ടം രാജ്യത്തെ ഇന്ധനവിലയില്‍ ബാധിക്കാതിരിക്കാന്‍ കേന്ദ്രസര്‍ക്കാര്‍ ചെലവിട്ടത് 1.23 ലക്ഷം കോടി രൂപ. യുദ്ധം തുടങ്ങിയതു മുതല്‍ 78 ദിവസത്തോളം വില പിടിച്ചുനിര്‍ത്താന്‍ വേണ്ടി പൊതുമേഖല എണ്ണക്കമ്പനികള്‍ക്ക് നല്കിയ തുകയാണിത്. ഹോര്‍മൂസ് കടലിടുക്കിലെ പ്രതിസന്ധിയെ തുടര്‍ന്ന് എല്‍പിജി ഇറക്കുമതി ചാര്‍ജില്‍ 46 ശതമാനം വര്‍ധന ഫെബ്രുവരിക്ക് ശേഷം ഉണ്ടായി. ഇതോടെ സബ്‌സിഡി സിലിണ്ടറുകളുടെ എണ്ണം വെട്ടിച്ചുരുക്കി. പൊതുമേഖല എണ്ണക്കമ്പനികള്‍ക്ക് നിലവില്‍ ഒരു ലിറ്റര്‍ പെട്രോള്‍ വില്ക്കുമ്പോള്‍ 6 രൂപയും ഡീസലില്‍ 30 രൂപയും നഷ്ടം സംഭവിക്കുന്നുണ്ട്. 14.2 കിലോഗ്രാമിന്റെ എല്‍പിജി സിലിണ്ടര്‍ വില്ക്കുമ്പോള്‍ 700 രൂപയ്ക്ക് അടുത്താണ് നഷ്ടം. പ്രതിദിനം എല്ലാംകൂടി കൂട്ടുമ്പോള്‍ എണ്ണക്കമ്പനികളുടെ നഷ്ടം 600-700 കോടി രൂപയ്ക്കടുത്ത് വരും. ഇറാനും യുഎസും വീണ്ടും പോര്‍മുഖം തുറന്നതോടെ ക്രൂഡ് ഓയില്‍ വില വീണ്ടും ഉയര്‍ന്നു. ആക്രമണം വീണ്ടും കടുത്താല്‍ ക്രൂഡ് വില 100 ഡോളര്‍ കടക്കാന്‍ കാലതാമസമെടുക്കില്ല.

🔹ഫുട്ബോള്‍ ഉരുളുകയായി, വല നിറയുകയായി. ലോകം കാത്തിരിക്കുന്ന ലോകകപ്പ് ഫുട്ബോളിന് ഇന്ന് അര്‍ധരാത്രിയോടെ തുടക്കം. രാത്രി 12.30 ന് മെക്സിക്കോ സിറ്റിയിലെ അസ്ടെക സ്റ്റേഡിയത്തില്‍ മെക്സിക്കോയും സൗത്ത് ആഫ്രിക്കയും തമ്മിലാണ് ഉദ്ഘാടന മത്സരം. വടക്കേ അമേരിക്കന്‍ ഭൂഖണ്ഡത്തിലെ അമേരിക്ക, കാനഡ, മെക്സിക്കോ എന്നീ മൂന്നു രാജ്യങ്ങളാണ് കായികമാമാങ്കത്തിന് ആതിഥേയത്വം വഹിക്കുന്നത്. ചരിത്രത്തിലാദ്യമായി 48 ടീമുകള്‍ പങ്കെടുക്കുന്ന മേളയില്‍ 104 മല്‍സരങ്ങളുണ്ടാകും. ജൂലൈ 19 നു ഫൈനല്‍.

🔹വയലന്‍സ് നിറഞ്ഞ ആക്ഷന്‍ ചിത്രമായ ‘കിംഗി’ലൂടെ സുഹാന ഖാന്‍ ആദ്യമായി ബിഗ് സ്‌ക്രീനില്‍ എത്തുന്നു. ആദ്യ ചിത്രം ഷാരൂഖ് ഖാനൊപ്പവും. കഴിഞ്ഞ വര്‍ഷം ഷാരൂഖ് ഖാന്റെ ജന്മദിനത്തില്‍ പ്രഖ്യാപിച്ച ‘കിംഗ്’ സിദ്ധാര്‍ത്ഥ് ആനന്ദ് സംവിധാനം ചെയ്യുന്നു. പത്താനുശേഷം സിദ്ധാര്‍ത്ഥ് ആനന്ദും ഷാരൂഖ് ഖാനും ഒരുമിക്കുന്ന കിംഗ് ഡിസംബര്‍ 24ന് ലോക വ്യാപകമായി റിലീസ് ചെയ്യും. 1994ല്‍ പുറത്തിറങ്ങിയ ഫ്രഞ്ച് ക്ളാസിക് ലിയോണ്‍: ദ പ്രൊഫഷണല്‍ എന്ന ചിത്രത്തെ ആസ്പദമാക്കിയാണ് കിംഗ് ഒരുക്കുന്നത്. ഷാരൂഖ് ഖാന് പ്രതിനായകനായി എത്തുന്നത് അഭിഷേക് ബച്ചന്‍ ആണ്. ദീപിക പദുകോണ്‍, റാണി മുഖര്‍ജി,. അനില്‍ കപൂര്‍ തുടങ്ങി വന്‍ താരനിര ചിത്രത്തിലുണ്ട്. ഷാരൂഖ് ഖാന്റെ നിര്‍മ്മാണ കമ്പനിയായ റെഡ് ചില്ലീസ് എന്റര്‍ടെയ്ന്‍മെന്റും മാര്‍ഫ്ളിക്സ് പിക്ചേഴ്സും ചേര്‍ന്നാണ് നിര്‍മ്മാണം. ഷാരൂഖ് ഖാനും സുഹാന ഖാനും ചേരുന്ന കോമ്പിനേഷന്‍ സീനുകള്‍ ചിത്രത്തിന്റെ ഹൈലൈറ്റായിരിക്കും എന്നാണ് സൂചന.

🔹ആഷിക് ഉസ്മാന്‍ പ്രൊഡക്ഷന്‍സിന്റെ ബാനറില്‍ ആഷിക് ഉസ്മാന്‍ നിര്‍മ്മിച്ചിരിക്കുന്ന, സിനിമയ്ക്കുള്ളിലെ സിനിമയുടെ കഥയുമായി എത്തിയ ചിത്രമാണ് ‘മോളിവുഡ് ടൈംസ്’. ഇതുവരെ കാണാത്ത ലുക്കിലും സ്റ്റൈലിലുമാണ് നസ്ലെന്‍ ചിത്രത്തില്‍ എത്തിയിരിക്കുന്നത്. വിനീത് മാധവന്‍ എന്ന കഥാപാത്രത്തിന്റെ സിനിമയെന്ന സ്വപ്നത്തിലേക്കുള്ള യാത്രയാണ് സിനിമ. നസ്ലെന്‍, സംഗീത് പ്രതാപ്, ഷറഫുദ്ദീന്‍ എന്നിവരെ കേന്ദ്ര കഥാപാത്രങ്ങളാക്കി അഭിനവ് സുന്ദര്‍ നായക് സംവിധാനം ചെയ്യുന്ന ചിത്രമാണ് മോളിവുഡ് ടൈംസ്. നസ്ലെന്റെ മികച്ച പ്രകടനം തന്നെയാണ് ചിത്രത്തിന്റെ ആകര്‍ഷണം. ഇതുവരെയായി മോളിവുഡ് ടൈംസ് 15 കോടി നേടിയിട്ടുണ്ട് എന്നാണ് സൗത്ത് ഇന്ത്യന്‍ ബോക്സ് ഓഫീസിന്റെ റിപ്പോര്‍ട്ട്. ജിയോ ഹോട്സ്റ്റാറിലായിരിക്കും ചിത്രം തിയറ്റര്‍ റണ്ണിനു ശേഷം സ്ട്രീം ചെയ്യുക.

💦 ഗുരുജിയുടെ വാക്കുകൾ
*****************************

ജീവിതത്തിലെ ഏറ്റവും വലിയ സത്യങ്ങളിൽ ഒന്നാണിത്. നമ്മൾ പലപ്പോഴും കൈവശമുള്ളപ്പോൾ ശ്രദ്ധിക്കാതെ കളയുന്ന പല കാര്യങ്ങളും, പിന്നീട് നഷ്ടപ്പെട്ടു എന്ന് തിരിച്ചറിയുമ്പോൾ എത്ര പണം നൽകിയാലും തിരികെ ലഭിക്കില്ല. കൈയിലുള്ളപ്പോൾ എല്ലാത്തിനെയും ആദരിക്കാനും സ്നേഹിക്കാനും നമ്മൾ പഠിക്കേണ്ടതുണ്ട്. നഷ്ടബോധത്തോടെ ജീവിക്കുന്നതിനേക്കാൾ നല്ലത്, ഓരോ നിമിഷത്തെയും അതിന്റെ പൂർണ്ണതയിൽ ഉൾക്കൊള്ളുന്നതാണ്.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

•ജൂൺ 11-ലെ ഏറ്റവും പ്രധാനപ്പെട്ട അന്താരാഷ്ട്ര ദിനാചരണം ഐക്യരാഷ്ട്രസഭയുടെ (UN) അന്താരാഷ്ട്ര കളി ദിനം (International Day of Play) ആണ്. കുട്ടികളുടെ മാനസിക-ശാരീരിക വളർച്ചയിൽ കളികൾക്കുള്ള പ്രാധാന്യം ജനങ്ങളെ ഓർമ്മിപ്പിക്കുന്നതിനാണ് ഈ ദിവസം ആചരിക്കുന്നത്.കുട്ടികളുടെ അവകാശങ്ങൾ സംരക്ഷിക്കാനും ഡിജിറ്റൽ സ്ക്രീനുകളിൽ നിന്ന് മാറി കുട്ടികൾക്ക് കളിക്കാനുള്ള അന്തരീക്ഷം ഒരുക്കാനും ഐക്യരാഷ്ട്രസഭ 2024 മുതലാണ് ഈ ദിനം പ്രഖ്യാപിച്ചത്.

•മേക്കിംഗ് ലൈഫ് ബ്യൂട്ടിഫുൾ ഡേ (Making Life Beautiful Day): കാരുണ്യപ്രവർത്തനങ്ങളിലൂടെയും നല്ല പെരുമാറ്റത്തിലൂടെയും ലോകം മനോഹരമാക്കുന്നവരെ അഭിനന്ദിക്കുന്നതിനുള്ള ദിവസം.

•ഗ്രീൻ മിസോറാം ദിനം (Green Mizoram Day): ഇന്ത്യയിലെ മിസോറാം സംസ്ഥാനത്ത് പരിസ്ഥിതി സംരക്ഷണത്തിനായി 1999 മുതൽ ഈ ദിവസം ആചരിക്കുന്നു.

•കെബിജി സിൻഡ്രോം അവബോധ ദിനം (KBG Syndrome Awareness Day): അപൂർവ ജനിതക രോഗമായ കെബിജി സിൻഡ്രോമിനെക്കുറിച്ച് ജനങ്ങളിൽ അവബോധം വളർത്താൻ ഈ ദിവസം മാറ്റിവെച്ചിരിക്കുന്നു.

•1580: ദക്ഷിണ അമേരിക്കൻ നഗരമായ ബ്യൂണസ് അയേർസ് സ്ഥാപിക്കപ്പെട്ടു.

•1866: ഇന്ത്യയിലെ ഏറ്റവും പഴക്കമേറിയ കോടതികളിൽ ഒന്നായ അലഹബാദ് ഹൈക്കോടതി (ആദ്യം ആഗ്രയിൽ) പ്രവർത്തനം ആരംഭിച്ചു.

•1935: എഫ്.എം. (FM) റേഡിയോ പ്രക്ഷേപണത്തിന്റെ ആദ്യ പൊതുപ്രദർശനം അമേരിക്കയിൽ നടന്നു.

•2008: ഇന്ത്യയുടെ സൂപ്പർസോണിക് ക്രൂയിസ് മിസൈലായ ‘ബ്രഹ്മോസ്’ ഇന്ത്യൻ വ്യോമസേനയുടെ ഭാഗമായി.

തയ്യാറാക്കിയത്: കപിൽ ശങ്കർ

27 Likes

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 11 | വ്യാഴം ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

തയ്യാറാക്കിയത്: കപിൽ ശങ്കർ

ഫൊക്കാനയുടെ കേരളാ കൺവെൻഷൻ 2027 ജനുവരി 11 മുതൽ 13 വരെ*

ജിഷ (46) കാനഡയിൽ നിര്യാതയായി

ചിന്നമ്മ ജോൺ ഡാളസ്സിൽ അന്തരിച്ചു

1 COMMENT

LEAVE A REPLY Cancel reply

Most Popular

കേരള ചരിത്രത്തില്‍ ഏറ്റവും വിവാദമായ ചാക്കോ വധക്കേസിലെ പ്രതി സുകുമാരക്കുറുപ്പ് ജീവിച്ചിരിപ്പുണ്ടെന്ന് സംശയം

പ്രശസ്ത സാഹിത്യകാരൻ ടി. കെ. ഡി. മുഴപ്പിലങ്ങാട് അന്തരിച്ചു

ഫൊക്കാനയുടെ കേരളാ കൺവെൻഷൻ 2027 ജനുവരി 11 മുതൽ 13 വരെ*

Recent Comments

EDITOR PICKS

കേരള ചരിത്രത്തില്‍ ഏറ്റവും വിവാദമായ ചാക്കോ വധക്കേസിലെ പ്രതി സുകുമാരക്കുറുപ്പ് ജീവിച്ചിരിപ്പുണ്ടെന്ന് സംശയം

പ്രശസ്ത സാഹിത്യകാരൻ ടി. കെ. ഡി. മുഴപ്പിലങ്ങാട് അന്തരിച്ചു

POPULAR POSTS

അണിഞ്ഞൊരുങ്ങി ഗജവീരന്മാർ; മൈസൂർ ദസറ ഒരുക്കങ്ങൾക്ക് ഔദ്യോഗിക തുടക്കം.

ട്രെയിനും സ്റ്റേഷനും മലിനമാക്കിയാൽ പണി ഇരട്ടിയാകും; പിഴ വർധിപ്പിച്ച് റെയിൽവേ.

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 11 | വ്യാഴം ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

തയ്യാറാക്കിയത്: കപിൽ ശങ്കർ

1 COMMENT

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************