📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 26 | ഞായർ ✍ കപിൽ ശങ്കർ

🔹ഏപ്രിൽ 26 പ്രധാനമായും ലോക ബൗദ്ധികസ്വത്തവകാശ ദിനമായി (World Intellectual Property Day) ആചരിക്കുന്നു. സർഗ്ഗാത്മകത, കണ്ടുപിടുത്തങ്ങൾ, പകർപ്പവകാശം, വ്യാപാരമുദ്രകൾ എന്നിവയെക്കുറിച്ച് അവബോധം വളർത്താനാണ് ഈ ദിനം WIPO-യുടെ നേതൃത്വത്തിൽ ആഘോഷിക്കുന്നത്.
•അന്താരാഷ്ട്ര ചെർണോബിൽ ദുരന്ത സ്മരണ ദിനമായും (International Chernobyl Disaster Remembrance Day) ഈ ദിവസം ആചരിക്കുന്നു.
•ഏലിയൻ ദിനം (Alien Day): ‘ഏലിയൻസ്’ സിനിമയിലെ LV-426 എന്ന ഗ്രഹത്തെ അടിസ്ഥാനമാക്കി ആഘോഷിക്കുന്നു.
•കേരളത്തിൽ ശബ്ദ മലിനീകരണ ബോധവത്കരണ ദിനമായി (No Horn Day) ആചരിക്കാറുണ്ട്.

🔹പൂരങ്ങളുടെ പൂരമായ തൃശൂർ പൂരത്തിന് ഇന്ന് തുടക്കം. ആദ്യഘടക പൂരമായ കണിമംഗലം ശാസ്താവ് രാവിലെ 7 മണിയോടെ എഴുന്നള്ളും. തുടർന്ന് 7 ദേശക്ഷേത്രങ്ങളും എഴുന്നള്ളും. പകൽ 11 മണിക്ക് ശേഷമാണ് തിരുവമ്പാടിയുടെ മഠത്തിൽ വരവ് നടക്കുക. ഉച്ചയ്ക്ക് രണ്ടുമണിക്ക് ശേഷം ഇലഞ്ഞിത്തറമേളം അരങ്ങേറും. വൈകീട്ട് 5 മണിക്ക് ശേഷം തെക്കോട്ട് ഇറക്കത്തിന് ശേഷം 5 മണിക്ക് കുടമാറ്റവും നടക്കും. ഇത്തവണ 15 മിനിറ്റ് മാത്രമാണ് കുടമാറ്റം നടക്കുക. കുടമാറ്റത്തിൽ 15 ആനകളും അണിനിരക്കും.മുണ്ടത്തിക്കോട് വെടിക്കെട്ട് അപകടം നടന്ന സാഹചര്യത്തിലാണ് ആർഭാടം ഒഴിവാക്കി തൃശൂർ പൂരം നടത്താൻ തീരുമാനിച്ചത്. ദേവസ്വം മന്ത്രിയുടെ നേതൃത്വത്തിൽ നടന്ന യോഗത്തിലായിരുന്നു തീരുമാനം കൈക്കൊണ്ടത്. അപകടം നടന്ന സാഹചര്യത്തിൽ വെടിക്കെട്ട് ഒഴിവാക്കാനും തീരുമാനിച്ചു. ആചാരപരമായ ആഘോഷങ്ങൾ മാത്രം ആയിരിക്കും ഇത്തവണ നടക്കുക.

🔹സംസ്ഥാനത്ത് കടുത്ത വൈദ്യുതി പ്രതിസന്ധി. പ്രതിദിന വൈദ്യുതി ഉപഭോഗം 6,195 മെഗാവാട്ട് കടന്നു. ഡാമുകളില്‍ വെള്ളം ഇല്ലാതായതോടെ ഉദ്പാദനം കുറഞ്ഞ് 1,752 മെഗാവാട്ടായി. പുറത്തുനിന്ന് 10 രൂപ നിരക്കില്‍ വൈദ്യുതി വാങ്ങാന്‍ റെഗുലേറ്ററി കമ്മീഷന്റെ അനുമതി ലഭിച്ചില്ല. കൂടുതല്‍ സമയം അപ്രഖ്യാപിത ലോഡ്‌ഷെഡിംഗിനു സാധ്യത.

🔹പൊതുവിടങ്ങളില്‍ സൂര്യാഘാത പ്രഥമ ശുശ്രൂഷാ സൗകര്യങ്ങള്‍ ഒരുക്കാന്‍ സംസ്ഥാന സര്‍ക്കാര്‍ തീരുമാനിച്ചു. മാര്‍ക്കറ്റുകള്‍, ബസ് സ്റ്റാന്‍ഡ് തുടങ്ങിയ സ്ഥലങ്ങളില്‍ കുടിവെള്ളം സൗജന്യമായി നല്‍കാന്‍ ക്രമീകരണമുണ്ടാക്കും. തദ്ദേശ സ്ഥാപനങ്ങള്‍ ഇക്കാര്യത്തില്‍ നടപടിയെടുക്കണമെന്നാണ് സര്‍ക്കാരിന്റെ നിര്‍ദേശം. ഇതിനു ദുരന്ത പ്രതിരോധന നിധിയില്‍നിന്ന് സാമ്പത്തിക സഹായം നല്‍കും. മുഖ്യമന്ത്രി വിളിച്ച യോഗത്തിലാണു തീരുമാനം.

🔹കനത്ത ചൂടുള്ളതിനാല്‍ ജനങ്ങള്‍ സെല്‍ഫ് ലോക്ക് ഡൗണിലേക്കു മാറണമെന്ന് റവന്യൂമന്ത്രി കെ രാജന്‍. പകല്‍ യാത്ര ഒഴിവാക്കണം. ചൂടില്‍ പ്രാദേശികമായുണ്ടാകുന്ന പ്രശ്നങ്ങള്‍ പരിഹരിക്കാനുള്ള പ്രത്യേക ചുമതല തദ്ദേശ സ്ഥാപനങ്ങള്‍ക്കു നല്‍കിയിട്ടുണ്ടെന്നും മന്ത്രി പറഞ്ഞു.

🔹സംസ്ഥാനത്ത് സൂര്യാഘാതമേറ്റ് രണ്ടു പേര്‍ മരിച്ചു. കൊല്ലത്തും പട്ടാമ്പയിലിലും വയോധികര്‍ മരിച്ചത് സൂര്യാഘാതമേറ്റെന്നാണ് സംശയിക്കുന്നത്. ഇന്നലെ ഏഴു പേര്‍ക്കു സൂര്യാതപമേറ്റു. പുനലൂരില്‍ സാധാരണയേക്കാള്‍ 5 ഡിഗ്രി സെല്‍ഷ്യസ് താപനിലയാണ് രേഖപ്പെടുത്തിയത്.

🔹കിളിമാനൂരില്‍ ഹരിതകര്‍മ സേനാംഗത്തിനു സൂര്യാതപമേറ്റു. പഴയകുന്നുമ്മല്‍ പഞ്ചായത്തിലെ ലതികയ്ക്കാണ് പൊള്ളലേറ്റത്. ടൗണിലെ കടകളില്‍ നിന്ന് പ്ലാസ്റ്റിക് ശേഖരിക്കുന്നതിനിടെ 12 മണിക്കാണ് സംഭവം. കയ്യിലും കഴുത്തിലും കാലിലും പൊള്ളലേറ്റു.

🔹ഈ മാസം 29 നു മഴയുണ്ടാകുമെന്ന് കേന്ദ്ര കാലാവസ്ഥ വകുപ്പ്. പത്തനംതിട്ട, ഇടുക്കി, കാസര്‍കോട്, കണ്ണൂര്‍ എന്നീ നാലു ജില്ലകളില്‍ ബുധനാഴ്ച യെല്ലോ അലര്‍ട്ട്. ഇത്തവണ ശക്തമായ വേനല്‍മഴ പ്രതീക്ഷിക്കാം.

🔹പവര്‍ക്കെട്ടിനെതിരേ പ്രതിഷേധവുമായി ജനങ്ങള്‍ കെഎസ്ഇബി ഓഫീസുകളിലെത്തി. രണ്ടു ദിവസത്തിനകം പ്രതിസന്ധി പരിഹരിക്കുമെന്ന് വൈദ്യുതി മന്ത്രി കെ. കൃഷ്ണന്‍ കുട്ടി.

🔹നിയമസഭാ മന്ദിരവും മ്യൂസിയവും പൊതുജനങ്ങൾക്ക് സന്ദർശിക്കാൻ അവസരം. നിയമസഭാ ദിനാഘോഷങ്ങളുടെ ഭാഗമായി ഏപ്രിൽ 26 മുതൽ മേയ് 03 വരെ ആണ് നിയമസഭാ മന്ദിരവും മ്യൂസിയവും പൊതുജനങ്ങളാക്കായി തുറന്നു കൊടുക്കുന്നത്. പ്രവൃത്തി ദിവസങ്ങളിൽ രാവിലെ 10.30 മുതൽ രാത്രി 8.00 മണിവരെയും, അവധി ദിവസങ്ങളിൽ ഉച്ചയ്ക്ക് 2.00 മുതൽ രാത്രി 8.00 മണിവരെയും സന്ദർശനം അനുവദിക്കും. കേരള നിയമസഭയുടെ ചരിത്രവും പ്രൗഢിയും അടുത്തറിയാൻ ആഗ്രഹിക്കുന്നവർക്ക് ഈ അവസരം പൂർണ്ണമായും പ്രയോജനപ്പെടുത്താവുന്നതാണ്.

🔹തൃശൂര്‍ പൂരത്തിനു മുന്നോടിയായി പാറമേക്കാവ് ദേവസ്വത്തിന്റെ വെടിക്കെട്ട് ശാലയില്‍ നടത്തിയ പരിശോധനയില്‍ നിരോധിത സ്ഫോടക വസ്തുക്കളൊന്നും കണ്ടെത്തിയില്ല. എന്നാല്‍ അനുവദിച്ചതിലും കൂടുതല്‍ വെടിക്കെട്ട് സാമഗ്രികള്‍ സൂക്ഷിച്ചതിനു കേസ് തുടരും.

🔹കാസര്‍കോട് തൃക്കരിപ്പൂരില്‍ ശൈശവ വിവാഹം. 16 വയസ്സുകാരിയെ വിവാഹം കഴിച്ചത് ദക്ഷിണ കൊറിയയില്‍ ജോലി ചെയ്യുന്ന 28 വയസുകാരനായ പ്രവാസി. വരന്‍ ഉള്‍പ്പെടെ നാലു പേര്‍ക്കെതിരെ കോടതി നിര്‍ദേശ പ്രകാരം ചന്തേര പൊലീസ് കേസെടുത്തു. ഈ മാസം 13 നാണ് എടച്ചാക്കൈ അഴിക്കാല്‍ ജുമാമസ്ജിദില്‍ വിവാഹം നടന്നത്.

🔹കോഴിക്കോട് മെഡിക്കല്‍ കോളേജിലെ സൈക്യാട്രി വിഭാഗം അധ്യാപകര്‍ക്കെതിരായ മാനസിക പീഡന പരാതിയില്‍ അന്വേഷണം. ഇതിനായി മൂന്നംഗ അന്വേഷണ സമിതിയെ ഡയറക്ടര്‍ ഓഫ് മെഡിക്കല്‍ എജ്യുക്കേഷന്‍ നിയോഗിച്ചു. ഒരാഴ്ചയ്ക്കുള്ളില്‍ അന്വേഷിച്ച് റിപ്പോര്‍ട്ട് നല്‍കാനാണ് നിര്‍ദേശം. ഡോ.അനിത കുമാരി, ഡോ. സിഎല്‍ സ്മിത എന്നിവര്‍ക്കെതിരേയാണ് അന്വേഷണം.

🔹വൈഎംസിഎ ദേശീയ പ്രസിഡന്റായി സുപ്രീം കോടതി റിട്ടയേഡ് ജഡ്ജി ജസ്റ്റിസ് കുര്യന്‍ ജോസഫ് തെരഞ്ഞെടുക്കപ്പെട്ടു. നിലവിലുള്ള പ്രസിഡന്റ് വിന്‍സെന്റ് ജോര്‍ജിനെയാണു പരാജയപ്പെടുത്തിയത്.

🔹താന്‍ ഒരു സുപ്രഭാതത്തില്‍ പൊട്ടി വീണ ആളല്ലെന്നും ഒരുപാട് കഷ്ടപ്പെട്ടാണ് ഈ നിലയിലെത്തിയതെന്നും രമേശ് ചെന്നിത്തല. കോണ്‍ഗ്രസില്‍ മുഖ്യമന്ത്രി ആരെന്ന തര്‍ക്കം മുറുകുന്നതിനിടെയാണ് രമേശ് ചെന്നിത്തലയുടെ തുറന്നുപറച്ചില്‍. ഇന്ന് സോഷ്യല്‍ മീഡിയയിലൂടെ ആളുകള്‍ക്ക് നേതാവാകാം. പാര്‍ട്ടിക്കുവേണ്ടി കഷ്ടപ്പെട്ടവരുടെ തലമുറയിലാണു താനെന്നും രമേശ് ചെന്നിത്തല പറഞ്ഞു.

🔹സിപിഎമ്മിന് പരാജയഭീതിയാണെന്ന് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍. ബിജെപി പ്രവര്‍ത്തകരെ പോലീസ് ആക്രമിച്ചാല്‍ നോക്കി ഇരിക്കില്ല. ശ്രീലേഖക്കും ആശനാഥിനുമെതിരെ കേസെടുത്ത ഭരണത്തിന്, മെയ് നാലിന് അറുതി ഉണ്ടാകും. ഇതു ജനാധിപത്യ രാജ്യമാണെന്നും റഷ്യയോ ചൈനയോ അല്ലെന്നും രാജീവ് ചന്ദ്രശേഖര്‍ കൂട്ടിച്ചേര്‍ത്തു.

🔹മുക്കം നഗരസഭയിലെ ഇരുവഴിഞ്ഞി പുഴയില്‍ കുളിക്കാനിറങ്ങിയ കുട്ടികള്‍ ഉള്‍പ്പെടെ മൂന്നു പേര്‍ക്ക് നീര്‍ നായയുടെ കടിയേറ്റു. മുക്കം പെരുമ്പടപ്പ് കരിമ്പ് ഉന്നതിയില്‍ താമസിക്കുന്ന ഖദീജ, കഞ്ഞിരമുഴി മുളംതോട്ടത്തില്‍ അനീഷിന്റെ മകന്‍ ആദിദേവ്(15), കാരശ്ശേരി പഞ്ചായത്തിലെ ഏടലമ്പാട്ട് സ്വദേശി ഫിദല്‍ അഹമ്മദ്(9) എന്നിവര്‍ക്കാണ് പരിക്കേറ്റത്.

🔹കോഴിക്കോട് പേരാമ്പ്രയില്‍ നിര്‍മ്മാണത്തിലിരുന്ന കെട്ടിടത്തില്‍നിന്ന് വീണ് തൊഴിലാളി മരിച്ചു. വാല്യക്കോട് പുതുക്കുടി മീത്തല്‍ ഭാസ്‌കരന്‍ (54) ആണ് മരിച്ചത്.

🔹എറണാകുളം പുല്ലേപ്പടി പാലത്തിന് സമീപം വന്‍ തീപ്പിടിത്തം. മാലിന്യ കൂമ്പാരത്തില്‍ നിന്ന് തീപടര്‍ന്നതെന്നാണ് സൂചന.

🔹തിരുവല്ല നഗരപ്രാന്തത്തിലുള്ള കുറ്റപ്പുഴയിൽ എടിഎം കൗണ്ടറിനുള്ളിൽ പാമ്പ് കയറിയ സംഭവം പ്രദേശത്ത് ആശങ്കയുണ്ടാക്കി.ഇന്ത്യൻ ഓവർസീസ് ബാങ്കിന്റെ എടിഎം കൗണ്ടറിലാണ് സംഭവം ഉണ്ടായത്. ശനിയാഴ്ച വൈകിട്ട് ഏഴരയോടെ പണം പിൻവലിക്കാൻ എത്തിയ നാട്ടുകാരനാണ് എടിഎമ്മിനുള്ളിൽ പാമ്പിനെ കണ്ടത്. ആളുകളുടെ അനക്കം ശ്രദ്ധിച്ച പാമ്പ് കൗണ്ടറിനുള്ളിലെ ഒരു മൂലയിൽ ഒളിച്ചിരിക്കുകയായിരുന്നു.
ഭയന്ന ഇയാൾ പുറത്തേക്ക് ഇറങ്ങി ബഹളം വച്ചതോടെ സമീപവാസികളും സ്ഥലത്തെത്തി.സംഭവത്തെ തുടർന്ന് എടിഎം കൗണ്ടർ പുറത്തുനിന്ന് അടച്ചിരിക്കുകയാണ്. വനം വകുപ്പ് ഉദ്യോഗസ്ഥരെ വിവരം അറിയിച്ചു. വനംവകുപ്പ് ഉദ്യോഗസ്ഥരെത്തി വിശദമായ പരിശോധന നടത്തിയിട്ടും പാമ്പിനെ കണ്ടെത്താൻ കഴിയാത്ത സാഹചര്യത്തിൽ പരിശോധന അവസാനിപ്പിച്ചു.സംസ്ഥാനത്ത് പാമ്പുകടി കേസുകൾ ഉയരുകയാണ്. ഇന്നലെ ഒരു ദിവസം മാത്രം റിപ്പോർട്ട് ചെയ്യപ്പെട്ടത് പന്ത്രണ്ടോളം കേസുകൾ. കോട്ടയത്തും കോഴിക്കോടും മൂന്നു വീതമാണ് പാമ്പുകടി റിപ്പോർട്ട് ചെയ്യപ്പെട്ടത്. കൂടാതെ ഒൻപതോളം ആളുകൾക്ക് പാമ്പുകടി ഏറ്റതായി സംശയിക്കപ്പെടുന്നുണ്ട്.

🔹നീറ്റ് യു ജി പരീക്ഷയില്‍ ആള്‍മാറാട്ടം തടയാന്‍ മേയ് രണ്ട്, മൂന്ന് തീയതികളില്‍ മെഡിക്കല്‍ വിദ്യാര്‍ത്ഥികള്‍ക്ക് അവധി നല്‍കരുതെന്ന് ഉന്നത വിദ്യാഭ്യാസ വകുപ്പ്. കൃത്രിമം തടയാനാണാണു ദേശീയ മെഡിക്കല്‍ കമ്മീഷന് ഈ നിര്‍ദ്ദേശം നല്‍കിയത്.

🔹മൂന്നാറിനു സമീപം പൂപ്പാറ ഗ്യാപ്പ് റോഡിൽ ഓടിക്കൊണ്ടിരുന്ന വിനോദസഞ്ചാരികളുടെ വാഹനത്തിന് തീപിടിച്ച് പൂർണമായും കത്തി നശിച്ചു. മൂന്നാർ സന്ദർശിക്കാൻ എത്തിയ മലയാളികളായ വിനോദസഞ്ചാരികൾ സഞ്ചരിച്ച വാഹനത്തിനാണ് അപകടം സംഭവിച്ചത്. വാഹനം സഞ്ചരിക്കുന്നതിനിടെ പുക ഉയരുന്നത് ശ്രദ്ധയിൽപ്പെട്ടതോടെ യാത്രക്കാർ ഉടൻ വാഹനത്തിൽ നിന്ന് ഇറങ്ങി ഓടി രക്ഷപ്പെടുകയായിരുന്നു. ഇതിനാൽ വലിയ അപകടം ഒഴിവായി. എന്നാൽ വാഹനത്തിനുള്ളിൽ ഉണ്ടായിരുന്ന യാത്രക്കാരുടെ സാധനസാമഗ്രികൾ മുഴുവനും തീയിൽ കത്തി നശിച്ചു.തുടർന്ന് തീ ശക്തമായി പടർന്ന് വാഹനം പൂർണമായും കത്തി നശിക്കുകയായിരുന്നു. പ്രദേശവാസികൾ വിവരം അറിയിച്ചതിനെ തുടർന്ന് ബന്ധപ്പെട്ട അധികൃതർ സ്ഥലത്തെത്തി പരിശോധന നടത്തി. സംഭവത്തിൽ ആർക്കും പരുക്കുകളില്ലെന്നാണ് വിവരം. തീപിടിത്തത്തിന് കാരണം എന്താണെന്നത് സംബന്ധിച്ച് അന്വേഷണം പുരോഗമിക്കുകയാണ്.

🔹പശ്ചിമബംഗാളില്‍ തൃണമൂല്‍ കോണ്‍ഗ്രസിന്റെ ഗുണ്ടകളെ തലകീഴായി കെട്ടിത്തൂക്കുമെന്ന അമിത് ഷായുടെ പ്രസ്താവനയ്ക്കെതിരെ നിയമനടപടി സ്വീകരിക്കുമെന്ന് മുഖ്യമന്ത്രി മമത ബാനര്‍ജി. കേന്ദ്ര ആഭ്യന്തര മന്ത്രി പദത്തിലിരിക്കെ അമിത് ഷാ ഇത്തരം പ്രസ്താവനകള്‍ നടത്തരുതെന്നും മമത പറഞ്ഞു.

🔹പശ്ചിമ ബംഗാളില്‍ ആദ്യ ഘട്ട വോട്ടെടുപ്പില്‍ നൂറിലേറെ സീറ്റുകള്‍ ബിജെപിക്കു ലഭിക്കുമെന്ന് കേന്ദ്രമന്ത്രി അമിത് ഷാ. രണ്ടാം ഘട്ട വോട്ടെടുപ്പിുള്ള പ്രചാരണത്തിനു ചൂടുപിടിച്ചു. പ്രധാനമന്ത്രി നരേന്ദ്ര മോദി, അമിത് ഷാ, മമത ബാനര്‍ജി അടക്കമുള്ള പ്രമുഖ നേതാക്കള്‍ രണ്ടാം ഘട്ടത്തിന് മുന്നോടിയായി പ്രചാരണ രംഗത്ത് സജീവമാണ്.

🔹ഗൂഗിള്‍ പേ, ഫോണ്‍ പേ എന്നിവയൊന്നുമില്ലാതെ മൊബൈല്‍ റീചാര്‍ജിനായി പുതിയ സംവിധാനം അവതരിപ്പിച്ച് വാട്‌സ്ആപ്പ്. ആന്‍ഡ്രോയ്ഡ്, ഐഒഎസ് ഉപയോക്താക്കള്‍ക്ക് ഇത് ഉടന്‍ ലഭ്യമാകും. എയര്‍ടെല്‍, ജിയോ, വിഐ പ്രീപെയ്ഡ് കണക്ഷനുകള്‍ ഉപയോഗിക്കുന്ന ഉപയോക്താക്കള്‍ക്ക് ഇഷ്ടപ്പെട്ട റീചാര്‍ജ് പ്ലാനുകള്‍ തെരഞ്ഞെടുത്ത് റീചാര്‍ജ് ചെയ്യാവുന്നതാണ്. റീചാര്‍ജ് ചെയ്യാനായി ആദ്യം വാട്‌സ്ആപ്പിലെ കാമറ ഐക്കണിന്റെ അടുത്തുള്ള രൂപ ഐക്കണില്‍ ക്ലിക്ക് ചെയ്ത് വരുന്ന മെനുവില്‍ നിന്നും പ്രീപെയ്ഡ് റീചാര്‍ജ് തെരഞ്ഞെടുത്ത ശേഷം മൊബൈല്‍ നമ്പര്‍ കൊടുക്കുക. സിം ഏതാണെന്ന് തെരഞ്ഞെടുക്കുക. പിന്നീട് വരുന്ന മെനുവില്‍ നിന്നും റീചാര്‍ജ് പ്ലാന്‍ തെരഞ്ഞെടുക്കുക. ശേഷം പേയ്മെന്റ് രീതി (യുപിഐ/ ഡെബിറ്റ് കാര്‍ഡ്/ ക്രെഡിറ്റ് കാര്‍ഡ്) തെരഞ്ഞെടുക്കുക. അവസാനമായി നിങ്ങളുടെ യുപിഐ പിന്‍ കൊടുത്ത് പേയ്മെന്റ് പൂര്‍ത്തീകരിക്കുക.

🔹ആഗോള വിപണിയില്‍ അസംസ്‌കൃത എണ്ണവില വര്‍ദ്ധിച്ചതോടെ പാകിസ്ഥാനില്‍ ഇന്ധനവില കുത്തനെ ഉയരുന്നു. പെട്രോളിനും ഹൈസ്പീഡ് ഡീസലിനും ലിറ്ററിന് 26.77 രൂപയാണ് വര്‍ധിപ്പിച്ചത്. ഇതോടെ ഒരു ലിറ്റര്‍ പെട്രോളിന്റെ വില 393.35 രൂപയായി.

🔹കുവൈറ്റ് അന്താരാഷ്ട്ര വിമാനത്താവളത്തിലെ ടെര്‍മിനല്‍ അഞ്ചില്‍ നിന്ന് ജസീറ എയര്‍വേയ്‌സ് നേരിട്ടുള്ള വിമാന സര്‍വീസുകള്‍ ഇന്നു പുനരാരംഭിക്കുന്നു. കൊച്ചി, മുംബൈ, ഡല്‍ഹി, റിയാദ്, ജിദ്ദ എന്നിവിടങ്ങളിലേക്കുള്ള സര്‍വീസുകള്‍ ഉള്‍പ്പെടെ പത്തിടങ്ങളിലേക്കാണ് നേരിട്ടുള്ള സര്‍വീസുകള്‍ ആരംഭിക്കുന്നത്.

🔹അമേരിക്കയില്‍ ജോലിക്കായി ഇന്ത്യക്കാര്‍ പ്രയോജനപ്പെടുത്തുന്ന എച്ച് വണ്‍ ബി വിസ മൂന്നു വര്‍ഷത്തേക്കു നിര്‍ത്തിവയ്ക്കാനുള്ള ബില്‍ അമേരിക്കന്‍ കോണ്‍ഗ്രസില്‍ അവതരിപ്പിച്ചു. പ്രതിവര്‍ഷം അനുവദിക്കുന്ന വിസകളുടെ എണ്ണം 65,000 ല്‍നിന്ന് 25,000 ആയി കുറയ്ക്കണമെന്നാണ് ഒരു നിര്‍ദേശം. രണ്ടു ലക്ഷം ഡോളര്‍ വാര്‍ഷിക ശമ്പളമുള്ളവര്‍ക്കേ വിസ നല്‍കാവൂവെന്ന നിബന്ധനയുമുണ്ട്.

🔹അമേരിക്കയുമായി നേരിട്ടുള്ള സമാധാന ചര്‍ച്ചയ്ക്കു തയാറാകാതെ ഇറേനിയന്‍ പ്രതിനിധികള്‍ പാക്കിസ്ഥാനില്‍നിന്നു മടങ്ങി. ഉപരോധം പിന്‍വലിക്കാതെ ചര്‍ച്ചയ്ക്കില്ലെന്നും അജണ്ട തങ്ങള്‍ നിശ്ചയിക്കുമെന്നുമുള്ള നിലപാട് പാക് മധ്യസ്ഥരോടു പങ്കുവച്ചുകൊണ്ടാണ് ഇറാന്‍ സംഘം മടങ്ങിയത്. ഇതേസമയം, ഇറാനുമായുള്ള ചര്‍ച്ചയ്ക്ക് പാകിസ്ഥാനിലേക്കു പോകേണ്ടെന്ന് അമേരിക്കന്‍ സംഘത്തിന് ഡൊണാള്‍ഡ് ട്രംപ് നിര്‍ദേശം നല്‍കി. ഇനി വേണമെങ്കില്‍ ഇറാന്‍ ഇങ്ങോട്ട് വരട്ടെ എന്നാണ് നിലപാടെന്നും ട്രംപ്.

🔹ഹോര്‍മുസ് കടലിടുക്കില്‍ ഇറാന്‍സേന വച്ച ബോംബുകള്‍ നീക്കം ചെയ്യുന്ന ദൗത്യം യുഎസ് നാവികസേന തുടരുകയാണെന്ന് പ്രസിഡന്റ് ഡോണള്‍ഡ് ട്രംപ്. എന്നാല്‍, കടലിനടിയിലെ സ്ഫോടകവസ്തുക്കള്‍ നീക്കം ചെയ്യാന്‍ ആറു മാസം വേണ്ടിവരുമെന്ന് യുഎസ് കോണ്‍ഗ്രസ് സമിതിയെ പെന്റഗണ്‍ അറിയിച്ചു.

🔹ഐപിഎല്ലില്‍ രാജസ്ഥാനെതിരേ സണ്‍റൈസേഴ്സ് ഹൈദരാബാദിന് 5 വിക്കറ്റിന്റെ തകര്‍പ്പന്‍ ജയം. ജയ്പൂരിലെ സവായ് മാന്‍സിംഗ് സ്റ്റേഡിയത്തെ പ്രകമ്പനം കൊള്ളിച്ച് വൈഭവ് സൂര്യവംശി നേടിയ സെഞ്ചുറിക്ക് അഭിഷേക് ശര്‍മയും ഇഷാന്‍ കിഷനും അര്‍ധസെഞ്ചുറികളിലൂടെ മറുപടി നല്‍കി. ആദ്യം ബാറ്റ് ചെയ്ത് 37 പന്തില്‍ 103 റണ്‍സെടുത്ത വൈഭവിന്റെ വെടിക്കെട്ട് സെഞ്ചുറി കരുത്തില്‍ രാജസ്ഥാന്‍ ഉയര്‍ത്തിയ 229 റണ്‍സിന്റെ വിജയലക്ഷ്യം ഹൈദരാബാദ് 5 വിക്കറ്റ് നഷ്ടത്തില്‍ 18.3 ഓവറില്‍ മറികടന്നു. 31 പന്തില്‍ 74 റണ്‍സടിച്ച ഇഷാന്‍ കിഷനാണ് ഹൈദരാബാദിന്റെ ടോപ് സ്‌കോറര്‍. അഭിഷേക് 29 പന്തില്‍ 57 റണ്‍സെടുത്തു.

🔹ഐപിഎല്ലിലെ മറ്റൊരു മല്‍സരത്തില്‍ പഞ്ചാബിന്റെ താണ്ഡവത്തില്‍ തകര്‍ന്ന് ഡല്‍ഹി. ഡല്‍ഹി ഉയര്‍ത്തിയ 265 റണ്‍സ് വിജയലക്ഷ്യം പഞ്ചാബ് 18.5 ഓവറില്‍ നാലുവിക്കറ്റ് നഷ്ടത്തില്‍ മറികടന്നു. ഐപിഎല്ലിലെ മാത്രമല്ല ട്വന്റി 20 യിലെ തന്നെ ഏറ്റവും വലിയ റണ്‍ചേസാണിത്. 67 പന്തില്‍ 152 റണ്‍സ് നേടിയ രാഹുലും 44 പന്തില്‍ 91 റണ്‍സ് നേടിയ നിതീഷ് റാണയുമാണ് ഡല്‍ഹിക്ക് കൂറ്റന്‍ സ്‌കോര്‍ സമ്മാനിച്ചത്. അതേസമയം 36 പന്തില്‍ 71 റണ്‍സ് നേടിയ ശ്രേയസ് അയ്യരുടേയും 26 പന്തില്‍ 76 റണ്‍സ് നേടിയ പ്രഭ്‌സിമ്രാന്‍ സിംഗിന്റേയും കരുത്തിലാണ് പഞ്ചാബ് സ്വപ്‌നതുല്യമായ വിജയം നേടിയത്. ഈ ജയത്തോടെ 7 കളികളില്‍ നിന്ന് തോല്‍വിയറിയാതെ 13 പോയിന്റ് നേടിയ പഞ്ചാബ് ഒന്നാം സ്ഥാനത്താണ്.

🔹മലയാളത്തിലെ യുവതാരങ്ങളില്‍ ശ്രദ്ധേയനായ ഷെയ്ന്‍ നിഗം പോലീസ് യൂണിഫോമില്‍ വീണ്ടും എത്തുന്ന ‘ദൃഢം’ സിനിമയിലെ ക്യാരക്ടര്‍ വീഡിയോ പുറത്ത്. എസ്.ഐ വിജയ് രാധാകൃഷ്ണനായി എത്തുന്ന ഷെയ്നിന്റെ വീഡിയോയാണ് പുറത്തുവിട്ടിരിക്കുന്നത്. മെയ് 8-നാണ് സിനിമയുടെ വേള്‍ഡ് വൈഡ് റിലീസ്. കുഴിനിലം എന്നൊരു നാട്ടിന്‍പുറത്തെ പോലീസ് സ്റ്റേഷനില്‍ എസ്.ഐ വിജയ് രാധാകൃഷ്ണന്‍ എന്ന പുതിയ എസ്.ഐ ചാര്‍ജ്ജെടുക്കുന്നതും അയാള്‍ സ്റ്റേഷനില്‍ തീരെ പ്രതീക്ഷിക്കാത്ത ഒട്ടേറെ സാഹചര്യങ്ങളെ നേരിടേണ്ടി വരുന്നതും തുടര്‍ സംഭവങ്ങളുമാണ് നവാഗതനായ മാര്‍ട്ടിന്‍ ജോസഫ് ഒരുക്കുന്ന സിനിമയുടെ ഇതിവൃത്തം. ചിത്രത്തില്‍ ഷോബി തിലകന്‍, കോട്ടയം രമേഷ്, ദിനേശ് പ്രഭാകര്‍, നന്ദന്‍ ഉണ്ണി, വിനോദ് ബോസ്, കൃഷ്ണപ്രഭ, സാനിയ ഫാത്തിമ, അഭിറാം രാധാകൃഷ്ണന്‍, പ്രശാന്ത് മുരളി തുടങ്ങി വലിയൊരു താരനിര തന്നെ ഒരുമിക്കുന്നുണ്ട്.

🔹ഗോകുല്‍ സുരേഷ്, ലാല്‍, ഗണപതി എന്നിവര്‍ കേന്ദ്രകഥാപാത്രങ്ങളിലെത്തിയ ചിത്രമാണ് ‘അമ്പലമുക്കിലെ വിശേഷങ്ങള്‍’. ജയറാം കൈലാസാണ് ചിത്രത്തിന്റെ സംവിധാനം നിര്‍വഹിച്ചിരിക്കുന്നത്. ചിത്രം ഇപ്പോള്‍ ഒടിടിയിലും എത്തിയിരിക്കുകയാണ്. ആമസോണ്‍ പ്രൈം വീഡിയോയിലാണ് ചിത്രം സ്ട്രീം ചെയ്യുന്നത്. ഗോകുല്‍ സുരേഷ്, ലാല്‍, ഗണപതി, മേജര്‍ രവി, സുധീര്‍ കരമന, മുരളി ചന്ദ്, ഷാജു ശ്രീധര്‍, നോബി മാര്‍ക്കോസ്, ഷഹീന്‍, ധര്‍മ്മജന്‍, മെറീന മൈക്കിള്‍, ബിജുക്കുട്ടന്‍, അനീഷ് ജി. മേനോന്‍, വനിതാ കൃഷ്ണന്‍, സൂര്യ, സുനില്‍ സുഗത, സജിത മഠത്തില്‍ ഉല്ലാസ് പന്തളം തുടങ്ങി വന്‍ താരനിരയാണ് ചിത്രത്തില്‍ അണിനിരക്കുന്നത്. ചിത്രത്തിന്റെ കഥ, തിരക്കഥ : ഉമേഷ് കൃഷ്ണന്‍.

💦 ഗുരുജിയുടെ വാക്കുകൾ

ഓരോ മനുഷ്യനും ജീവിതമെന്ന അരങ്ങിലെ അഭിനേതാവ് ആണ്.. ചിലതിന്റെ തിരക്കഥ വളരെ നീണ്ടു പോയേക്കാം.. ഒരാൾ തന്നെ പല വേഷപകർച്ചയിലൂടെ ഒരുപാട് കഥാപാത്രങ്ങളായി അഭിനയിക്കേണ്ടി വരും.. കാമുകനായോ, സുഹൃത്തായോ, സഹോദരനായോ..അങ്ങിനെ നീണ്ടുപോകും.. വേഷങ്ങൾ..
തകർത്തഭിനയിക്കുന്നവന് ഒരുപാട് വേഷങ്ങൾ യോജിക്കും.. ചില തിരക്കഥകൾ വളരെ പെട്ടെന്ന് അവസാനിക്കുകയും ചെയ്യും..
നമ്മൾ നെയ്തെടുത്ത നമ്മളാൽ നെയ്തെടുത്ത ഈ നൂലിഴകളെ അതിന്റെ ഇഴയടുപ്പങ്ങളെ അകലാതെ ശ്രദ്ധിക്കാൻ കഠിന പ്രയത്നം തന്നെ ആവശ്യമായി വരും.. അതാണ് ജീവിതം.
എന്റെയും…. നിങ്ങളുടെയും…. പലരും…. തോറ്റുപോകുന്നതും ഇവിടെയാണ്.

തയ്യാറാക്കിയത്: കപിൽ ശങ്കർ

30 Likes

📱വാർത്തകൾ ഒറ്റനോട്ടത്തിൽ📱 – 2026 | ഏപ്രിൽ 26 | ഞായർ ✍ കപിൽ ശങ്കർ

💦 ഗുരുജിയുടെ വാക്കുകൾ

തയ്യാറാക്കിയത്: കപിൽ ശങ്കർ

സൗത്ത് കരോലിനയിൽ രണ്ടു കുട്ടികൾ പട്ടിണി കിടന്നു മരിച്ച സംഭവത്തിൽ അമ്മ അറസ്റ്റിൽ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US