ഡിജിറ്റൽ ഐഡന്റിറ്റി രംഗത്ത് വിപ്ലവകരമായ മാറ്റങ്ങളുമായി പുനർരൂപകൽപ്പന ചെയ്ത പുതിയ ആധാർ ആപ്പ് രാജ്യത്തിന് സമർപ്പിച്ചു. നൂറു കോടിയിലധികം വരുന്ന ഉപയോക്താക്കൾക്ക് വിവരങ്ങൾ സുരക്ഷിതമായും ലളിതമായും കൈകാര്യം ചെയ്യാൻ സഹായിക്കുന്ന ‘ജനകേന്ദ്രീകൃത’ സമീപനമാണ് ഈ ആപ്പിൽ സ്വീകരിച്ചിരിക്കുന്നത്. വ്യക്തിഗത വിവരങ്ങൾ ആരുമായി പങ്കിടണം, എത്രത്തോളം പങ്കിടണം എന്ന് തീരുമാനിക്കാനുള്ള പൂർണ്ണ അധികാരം ഉപയോക്താവിന് നൽകിക്കൊണ്ട് ഡിജിറ്റൽ വിശ്വാസ്യത ശക്തിപ്പെടുത്തുകയാണ് ഇതിലൂടെ ലക്ഷ്യമിടുന്നത്.
പുതിയ ആപ്പിൽ സുരക്ഷയ്ക്കും സ്വകാര്യതയ്ക്കും മുൻഗണന നൽകുന്നതിനായി നിരവധി സവിശേഷതകൾ ഉൾപ്പെടുത്തിയിട്ടുണ്ട്. മുഴുവൻ ആധാർ വിവരങ്ങളും വെളിപ്പെടുത്താതെ തന്നെ ക്യുആർ (𝗤𝗥) കോഡ് വഴി തിരിച്ചറിയൽ രേഖകൾ ഡിജിറ്റലായി സമർപ്പിക്കാൻ സാധിക്കും. കൂടാതെ, ആവശ്യമുള്ള വിവരങ്ങൾ മാത്രം കൈമാറാനുള്ള ‘സമ്മത നിയന്ത്രണ’ സംവിധാനവും (𝗖𝗢𝗡𝗦𝗘𝗡𝗧 𝗖𝗢𝗡𝗧𝗥𝗢𝗟) ആപ്പിലുണ്ട്.
ആധാർ ദുരുപയോഗം തടയുന്നതിനായി ബയോമെട്രിക് വിവരങ്ങൾ ലോക്ക് ചെയ്യാനും അൺലോക്ക് ചെയ്യാനുമുള്ള സൗകര്യവും, എൻറോൾമെന്റ് സെന്ററുകളിൽ പോകാതെ തന്നെ വിലാസം അപ്ഡേറ്റ് ചെയ്യാനുള്ള സംവിധാനവും ആപ്പിൽ ലഭ്യമാണ്. അത്യാധുനികമായ ഫേസ് വെരിഫിക്കേഷൻ സാങ്കേതികവിദ്യയും ലളിതമായ ഇന്റർഫേസും എല്ലാ പ്രായക്കാർക്കും ആപ്പ് എളുപ്പത്തിൽ കൈകാര്യം ചെയ്യാൻ സഹായിക്കുന്നു..
