🌺🌺🌺പൂവടയും, പഴഞ്ചൊല്ലുകളും, ഓണതല്ലും.🌺🌺🌺സൈമ ശങ്കർ മൈസൂർ.✍

ഓണാശംസകൾ വായനക്കാരെ.. 🙏

തലക്കെട്ട് കണ്ടിട്ട് പൂവട യ്ക്ക് തല്ല് ഉണ്ടാക്കിയോ എന്ന് സംശയം വേണ്ടാ… ട്ടോ!!!
സസ്പെൻസ് നില നിർത്തി മുഴുവൻ വായിച്ചോളൂ…..

പൂവട (Poovada)

ഓണത്തിന്റെ പ്രഭാത വിഭവങ്ങളിൽ പ്രധാനമായിരുന്നു പൂവട. മഹാബലിക്ക് പൂവട നേദിക്കണമായിരുന്നു.

പൂവടയെന്നാൽ നല്ല വെളുത്ത്, പൂ പോലിരിക്കുന്ന അട തന്നെ. സാധാരണ അടയിൽ മധുരത്തിന് ശർക്കരയാണ് ഉപയോഗിക്കുന്നതെങ്കിൽ ഇവിടെ വെളുത്ത നിറത്തിന് വേണ്ടി പഞ്ചസാരയാണ് എടുക്കുന്നത്. പൂവട അധികവും ഓണത്തിന് നേദിക്കാനാണ് ഉണ്ടാക്കുക. ചിലയിടങ്ങളിൽ ഓണക്കാലത്ത് ഇതിന്റെ കൂട്ടിൽ തുമ്പപ്പൂ ചേർക്കുമത്രേ! തീരെ മധുരം ചേർക്കാതെ ഉണ്ടാക്കുന്നവരുമുണ്ട്. പഞ്ചസാരയും ചെറുപഴവും ചേർത്തുണ്ടാക്കിയ പൂവടയിതാ:

ആവശ്യമുള്ള സാധനങ്ങൾ:

(അളവുകളൊന്നും പ്രത്യേകിച്ച് എടുത്തുപറയുന്നില്ല. അവരവരുടെ പാകം പോലെ എടുക്കുക)

പച്ചരി നേർമ്മയായി പൊടിച്ചത്
ആവശ്യത്തിന്

വാഴയിലക്കഷ്ണങ്ങൾ

ഉള്ളിൽ വയ്ക്കാനുള്ള കൂട്ടിന്:
ഞാലിപ്പൂവൻ പഴം
തേങ്ങ ചിരകിയത്
പഞ്ചസാര
സ്വല്പം ഏലയ്ക്കാപ്പൊടി

ഉണ്ടാക്കുന്ന വിധം:

വാഴയിലക്കഷ്ണങ്ങൾ വാട്ടിയെടുക്കുക.

അരിപ്പൊടി ദോശമാവിന്റെ അയവിൽ കലക്കുക.
മാവ് കുറച്ചെടുത്ത് ഇലയുടെ നടുക്കൊഴിക്കുക.
കൈവിരലുകളുടെ അറ്റം കൊണ്ട് മെല്ലെ വട്ടത്തിൽ പരത്തുക(ദോശ പരത്തുന്നതുപോലെ)

ഇനി അടയുടെ കൂട്ട് തയ്യാറാക്കാം. വളരെ എളുപ്പമാണ്. പഴം ചെറുതായി നുറുക്കിയതിൽ തേങ്ങ ചിരകിയതും പാകത്തിന് പഞ്ചസാരയും സ്വല്പം ഏലയ്ക്കാപ്പൊടിയും ചേർത്ത് ഇളക്കി യോജിപ്പിക്കുക. മധുരം മുന്നിട്ടുനിൽക്കണം.
(അടയുടെ മാവ് ഇലയിൽ പരത്തി വച്ചശേഷമേ കൂട്ട് തയ്യാറാക്കാവൂ. നേരത്തേ ഉണ്ടാക്കിവച്ചാൽ പഞ്ചസാര അലിഞ്ഞ് ആകെ കുഴമ്പു പരുവത്തിലായിപ്പോവും)

ഇനി, ഇലയിൽ പരത്തിവച്ചിരിക്കുന്ന മാവിന്റെ പകുതിഭാഗത്ത് ഈ കൂട്ട് നിരത്തുക. മടക്കുക.
ബാക്കി അടകളും ഇതുപോലെ തയ്യാറാക്കിയശേഷം കുക്കറിലോ ഇഡ്ഡലിപാത്രത്തിലോ അടുക്കി വച്ച് വേവിക്കാം.

പൂ പോലുള്ള പൂവട റെഡി…. വായിച്ചു കഴിഞ്ഞ ഉടനെ പോയി പൂവട ഉണ്ടാക്കി ഏവർക്കും കൊടുത്താട്ടെ.

ഗാന രചയിതാവ് ശ്രീ. ശ്രീകുമാരൻ തമ്പി രചിച്ച പോലെ… “നിന്റെ കയ്യിൽ നിന്നും പണ്ട് ഞാൻ നേടിയ പൂവട തൻ രുചി യോർത്തും”…. എത്ര ഹൃദ്യമായി യുവാക്കളിലും, കാമുക ഹൃദയങ്ങളിൽ ഓണത്തിന്റെ മറ്റു കാഴ്ചകൾ ക്കൊപ്പം പൂവട യും ചേർന്നിരിയിക്കുന്നു.

1992-ലെ പൊന്നോണ തരംഗിണി എന്ന ആൽബത്തിൽ ശ്രീ ശ്രീ കുമാരൻ തമ്പിയുടെ വരികൾക്ക് രവീന്ദ്രൻ മാഷ് സംഗീതം നൽകി ഗാന ഗന്ധർവൻ ശ്രീ യേശുദാസ് ആലപിച്ച ഗാനത്തിന്റ വരികൾ കൂടി ആസ്വദിയ്ക്കൂ….ഓരോ വരിയും ഓണത്തിനൊപ്പം ആർദ്രതയോടെ ഓർക്കേണ്ടവതന്നെ.

പൂക്കളം കാണുന്ന പൂമരം പോലെ നീ
പൂമുഖത്തിണ്ണയില്‍ നിന്നു… (2)
വീതിക്കസവുള്ള വീരാളിപ്പട്ടില്‍ നിൻ
പൂമേനി പൊന്നായി മിന്നി.. നിൻറെ
പൂമേനി പൊന്നായി മിന്നി..
(പൂക്കളം കാണുന്ന…)

പൂവണി പൂവണിയോരോന്നും പിന്നെ നിൻ
തൂമുഖഭാവവും കണ്ടും…
നിന്റെ കയ്യില്‍നിന്നും പണ്ടു ഞാൻ നേടിയ
പൂവടതൻ രുചിയോര്‍ത്തും.. (2)
മുറ്റത്തു നിന്നു ഞാൻ തമ്പുരാട്ടീ,
മുഗ്ദ്ധമീക്കാഴ്ച തന്നേയൊരോണം..(2)
കാലത്തിൻ കോലത്താല്‍ വേര്‍പിരിഞ്ഞോര്‍ നമ്മൾ
കാണുകയായിതാ വീണ്ടും…
(പൂക്കളം കാണുന്ന…)

ആമന്ദമാമന്ദമോമനക്കാല്‍ വെച്ചു
താളത്തിലെന്നടുത്തെത്തി
പൂമിഴികൊണ്ടു തലോടിയെന്നുള്ളിൻറെ
പൂമുഖവാതില്‍ തുറന്നു (2)
ഒന്നും മറന്നിട്ടിലെന്നോളം നീയെന്നാ
കണ്ണീര്‍പ്പൊടിപ്പുകൾ ചൊല്ലി (2)
ആദ്യത്തെ ചുംബനം പൂശിയ നാണമൊ-
ന്നാമുഖത്താളിമറഞ്ഞു…
(പൂക്കളം കാണുന്ന…)

അങ്ങനെ പൂവടയും തിന്നു, ഒരു ഗാനവും ആസ്വദിച്ചിരിയ്ക്കുമ്പോൾ കുറച്ചു ഓണചൊല്ലുകൽ കൂടി കേട്ടാലോ…?

ഓണം ചൊല്ലുകൾ

പണ്ടുകാലങ്ങളില്‍ നാട്ടില്‍ പറഞ്ഞ് കേട്ടിരുന്ന കുറച്ച് ഓണമൊഴികള്‍ ഇതാ…

ഓണം വന്നാലും ഉണ്ണി പിറന്നാലും കോരനു കുമ്പിളില്‍ കഞ്ഞി

ചിങ്ങ മാസത്തിലെ തിരുവോണവും ആണ്‍കുട്ടിയുടെ പിറവിയും ആഘോഷിക്കുന്ന കേരളീയരുടെ പതിവാണ് ഈ പഴഞ്ചൊല്ലിനു പിന്നില്‍. കോരന്‍ എന്നാല്‍ ദരിദ്രന്‍ എന്നു വിവക്ഷ. ദരിദ്രന്‍ എന്നും ദരിദ്രന്‍ തന്നെയെന്നാണ് ഈചൊല്ലു കൊണ്ടര്‍ത്ഥമാക്കുന്നത്. ഓണം പോലുള്ള ആഘോങ്ങളോ കുട്ടി പിറക്കുന്നതു പോലുള്ള വിശേഷാവസരങ്ങളോ പണമില്ലത്താവര്‍ക്കു പ്രത്യേകമായൊന്നും നല്‍കുന്നില്ലെന്ന് ഓര്‍മ്മിപ്പിക്കുകയാണിവിടെ. വീട്ടുമുറ്റത്തു കുഴി കുത്തി ഇലയിട്ട് അടിയന്‍മാര്‍ക്കു കഞ്ഞികൊടുത്തിരുന്ന സമ്പ്രദായത്തെയും ഈ ചൊല്ല് ഓര്‍മ്മിപ്പിക്കുന്നു.

ഓണത്തിനിടയ്ക്കു പൂട്ടു കച്ചവടം

പ്രധാനപ്പെട്ട ഒരു കാര്യത്തിനിടയില്‍ അപ്രധാന സംഗതികള്‍ കൊണ്ടു വരരുതെന്നാണ് ഈ ചൊല്ലുകൊണ്ടര്‍ത്ഥമാക്കുന്നത്.ഓണത്തിനു മലയാളികള്‍ നല്‍കുന്ന വന്‍ പ്രധാന്യത്തെയും ഇതു സൂചിപ്പിക്കുന്നു.

കാണം വിറ്റും ഓണം ഉണ്ണണം

ഓണമെന്നു കേട്ടാല്‍ മലയാളിയുടെ മനസ്സിലേയ്ക്കാദ്യം ഓടിയെത്തുന്ന ചൊല്ലാണിത്. ഓണം ആഘോഷിക്കാന്‍ നമ്മെ പ്രേരിപ്പിക്കുന്നതു തന്നെ ഈ ചൊല്ലാവാം. കാണമെ ന്നാല്‍ വസ്തു. അത് വിറ്റിട്ടായാലും ഓണാഘോഷം പൊടിപൊടിക്കണമെന്ന് പഴമക്കാര്‍ ഓര്‍മ്മിപ്പിക്കുകയാണീ ചൊല്ലിലൂടെ.

ഓണമുണ്ട വയറേ ചൂളം പാടിക്കിട

സുഖലോലുപതയുടെയും അലസതയുടെയും പ്രതീകമാണല്ലോ ചൂളമടി. ഓണ നാളുകളില്‍ നാം സുഖലോലുപതയോടെ, അല്ലലറിയാതെ വസിക്കുന്നുവെന്ന് ഈ പഴഞ്ചൊല്ല് ഓര്‍മിപ്പിക്കുന്നു.

ഓണത്തേക്കാള്‍ വലിയ മകമുണ്ടോ

മലയാളിയെ സംബന്ധിച്ചിടത്തോളം ഏറ്റവും പ്രധാനപ്പെട്ട ഉത്സവം ഓണമാണെന്നു സൂചിപ്പിക്കുന്നു ഈ ചൊല്ല്. ചിങ്ങമാസത്തിലെ തിരുവോണവും അതിനു ശേഷം വരുന്ന മകവും മലയാളികള്‍ ആഘോഷിക്കാറുണ്ട്. എങ്കിലും ഒന്നാം സ്ഥാനം ഓണത്തിനു തന്നെ.

ഓണാട്ടന്‍ വിതച്ചാല്‍ ഓണത്തിനു പുത്തരി

കേരളത്തിന്റെ കാര്‍ഷിക സംസ്കാരവും ആഘോഷങ്ങളും തമ്മിലുള്ള ബന്ധം ഇവിടെ വ്യക്തമാണ്. ഓണം നമ്മുടെ വിളവെടുപ്പുത്സവം കൂടിയാണല്ലോ… ഓണാട്ടന്‍ നെല്‍ വിത്തു വിതച്ചു വിളവെടുപ്പിനു പാകമാവുമ്പോള്‍ ഓണക്കാലവുമായെന്നു പഴഞ്ചൊല്ലു വ്യക്തമാക്കുന്നു.

ഓണം കഴിഞ്ഞാല്‍ ഓലപ്പുര ഓട്ടപ്പുര

ഓണാഘോഷത്തിനു കേരളീയര്‍ എന്തും ചെയ്യുമെന്ന് ഈചൊല്ലു വ്യക്തമാക്കുന്നു. കൈയ്യിലുള്ള സമ്പാദ്യമെല്ലാം മുടക്കി ഓണം ഘോഷിച്ചു കഴിഞ്ഞാല്‍ പിന്നെ ദാരിദ്ര്യ മാണ് എന്നും സൂചനയുണ്ട്.

ഓണം പോലെയാണോ തിരുവാതിര

മലയാളിയുടെ മനസ്സില്‍ ഓണത്തിനുള്ള ഒന്നാം സ്ഥാനം ഉറപ്പിക്കുകയാണിവിടെ. ഒട്ടും തന്നെ പ്രാധാന്യം കുറവല്ലാത്ത തിരുവാതിരയേക്കാള്‍ പ്രമുഖമാണ് ഓണം എന്ന് ഇവിടെ പറഞ്ഞു വയ്ക്കുകയാണ് പഴമക്കാര്‍.

ഓണം മുഴക്കോലു പോലെ

തിരുവോണം നക്ഷത്ര സമൂഹത്തിന്റെ ആകൃതി സൂചിപ്പിക്കാനാണ് ഈ ചൊല്ല്. മുഴക്കോലിന്റെ രൂപത്തിലാണ് ഈ നക്ഷത്ര സമൂഹത്തിന്റെ വിന്യാസം- എന്ന് പഴഞ്ചൊല്ലില്‍ നിന്നു മനസ്സിലാക്കാം.

ചില ഓണപ്പദങ്ങൾ കൂടി അറിഞ്ഞിരുന്നോളൂ….

അത്തമത്തൻ – അത്തം നാളിൽ ഒരുക്കുന്ന പൂക്കളത്തിൽ മത്തങ്ങയുടെ പൂവ് പ്രധാനമാണ്.

പിള്ളേരോണം – കർക്കിടകമാസത്തിലെ തിരുവോണദിവസം കൊണ്ടാടി വന്നിരുന്ന ഒരു ആഘോഷമാണ് പിള്ളേരോണം.

അഞ്ചാമോണം – ഉത്രട്ടാതി നാൾ. ഓണത്തിൻറെ അഞ്ചാം ദിവസം

അത്തച്ചമയം – കൊച്ചി, കോഴിക്കോട്ട് രാജാക്കന്മാർ ചിങ്ങമാസത്തിലെ അത്തം നാളിനോടനുബന്ധിച്ച് നടത്തിയിരുന്ന ആഘോഷം

അമ്മായിയോണം – രണ്ടാമോണം. മരുമക്കത്തായ തറവാടുകളിൽ പ്രധാനം

കാക്കപ്പൂരാടം – തിരുവോണത്തിന് ഒരുനാൾ മുമ്പുള്ള പൂരാടത്തെ കരിംപൂരാടമെന്നാണ് വിളിക്കുക. പൂരാടത്തിൽ ഒരുക്കുന്ന ആകർഷകമല്ലാത്ത കാക്കപ്പൂവാണ് ഇതിനു കാരണം

മൂലക്കളം – മൂലം നാളിൽ ഉണ്ടാക്കുന്ന പൂക്കളം മൂല ആകൃതിയിലുള്ളതായിരിക്കണം.

അവിട്ടക്കട്ട – ഓണക്കാലത്തെ ഒരു കറിയാണ് അവിട്ടകട്ട. ഓണക്കാടി, കാടിയോണം, പഴംകൂട്ടാൻ എന്നൊക്കെ പേരുകൾ ഉണ്ട് ഇതിന്. തിരുവോണനാളിലെ സദ്യയിൽ മിച്ചംവന്നവ അവിട്ടംനാൾ രാവിലെ ഭക്ഷണമാകുന്നു. വെള്ളത്തിലിട്ട ചോർ (പഴങ്കഞ്ഞി) കട്ടപിടിച്ചിരിക്കും. ഇതാണ് അവിട്ടക്കട്ട.

അവിട്ടത്തല്ല് – ഓണത്തല്ലിലെ തുടർച്ചയായി അവിട്ടം നാളിൽ നടത്തുന്ന ഒരു വിനോദം.

ആറാമോണം – കാടിയോണം എന്നും പറയും. ഓണത്തിൻറെ ആറാം ദിവസം.

അമ്മായിയോണം- ഓണ ഒരുക്കങ്ങൾക്ക് ചുക്കാൻപിടിച്ച് തറവാട്ടിൽ വിലസിയ അമ്മായിയെ സ്‌നേഹാദരങ്ങളോടെ അവരുടെ വീട്ടിലേക്കു കൊണ്ടുപോകുന്നത് അവിട്ടം നാളിലാണ്. അന്നുച്ചയ്ക്കുള്ള ഓണമാണ്
അമ്മായിയോണം.

ഇരുപത്തെട്ടാമോണം – കന്നിമാസത്തിലെ തിരുവോണനാൾ. 28 ദിവസത്തിനുശേഷമുള്ളത്.

ഉത്രട്ടാതി വള്ളം കളി – ആറന്മുളയിലെ വള്ളം കളി.

ഉത്രാടപ്പാച്ചിൽ – ഓണസ്സദ്യക്കുവേണ്ടിയുള്ള നെട്ടോട്ടവും തിരക്കും.

ഉത്രാടച്ചന്ത – ഓണത്തിനു മുന്നുള്ള ചന്ത.

ഉത്രാടവിളക്ക്-
ഓണത്തലേന്ന് വീടുകളിൽ കൊളുത്തിവക്കേണ്ട വിളക്ക്.

ഉത്രാടക്കാഴ്ച –
ഗുരുവായൂർ അമ്പലത്തിൽ ഓണത്തലേന്ന് ഒരുക്കുന്ന കാഴ്ചക്കുലകൾ.

അത്തപ്പത്ത്- അത്തം മുതലുള്ള പത്താം ദിവസം തിരുവോണനാൾ.

ഉപ്പേരി – ഓണവിഭവങ്ങളിലൊന്ന്. കായ കൊണ്ടുണ്ടാക്കുന്നത്. ഉപ്പും മധുരവും ഉള്ള വ്യത്യസ്തമായവ.

ഓണക്കവിതകൾ – ഓണത്തിനെക്കു റിച്ചുള്ള പ്രത്യേക കവിതകൾ.

ഓണക്കഥകൾ – ഓണത്തെക്കുറിച്ചുള്ള കഥകൾ.

ഓണക്കിളി – ഓണക്കാലത്തു കൂടുതലായി കാണപ്പെടുന്ന ഓറിയോൾ എന്ന പക്ഷി

ഓണത്തുമ്പി – ഓണക്കാലത്ത് പെട്ടെന്ന് പ്രത്യക്ഷപ്പെടുന്നതിനാൽ ഇവയെ ഓണത്തുമ്പി എന്നു വിളിക്കുന്നു.

ഓണക്കോടി – ഓണത്തിനു വീട്ടിലെല്ലാവർക്കും നൽകുന്ന പുതിയ വസ്ത്രം

ഓണത്താർ – ഓണത്തിന്‌ മാത്രമുള്ള തെയ്യമാണ്‌ ഓണത്തെയ്യം.
മഹാവിഷ്ണു സങ്കൽപ്പത്തിലുള്ള ഈ തെയ്യക്കോലത്തെ ഓണത്താർ’ എന്ന് വിളിക്കുന്നു. കോലത്തുനാട്ടിൽ ആണ് ഓണത്താർ കെട്ടുന്നത്.

ഓണക്കൂട്ടം – ഓണക്കാലത്ത് കൂടിച്ചേരുന്ന പഞ്ചായത്ത്.
ഓണാഘോഷങ്ങളെക്കു റിച്ച് ചർച്ചചെയ്യാനാണീ യോഗം കൂടുന്നത്.

ഓണനക്ഷത്രം – തിരുവോണ നക്ഷത്രം

ഓണപ്പാട്ട് – ഓണക്കാലത്ത് പാടുന്ന പാട്ടുകൾ, കാലാ കാലങ്ങളായി പാടിപ്പതിഞ്ഞവ.

ഓണപ്പൂവ് – കേരളത്തിൽ ജൂലൈ ആഗസ്റ്റ് മാസങ്ങളിൽ പൂക്കുന്ന ഒരു ചെടിയാണ് ഇൻപേഷ്യൻസ് ബ്ലാസ്റ്റിഡെ എന്നറിയപ്പെടുന്ന ഓണപ്പൂവ്.

ഇനി ഓണ തല്ല് കൂടി കാണാം

ഓണത്തിന്റെ ഭാഗമായി പാലക്കാട്, തൃശ്ശൂർ ഭാഗങ്ങളിൽ നടന്ന് വരുന്ന ഒരു സൗഹൃദ തല്ല് മത്സരമാണ് ഓണത്തല്ല്. സംഘകാലകൃതികളിൽ ഇതിനെക്കുറിച്ച് ചെറിയ പരാമർശമുണ്ടെന്ന് പറയപ്പെടുന്നുണ്ടെങ്കിലും, നമുക്കറിയാവുന്ന ഓണത്തല്ലിന്റെ തുടക്കം നടക്കുന്നത് പാലക്കാടാണ്.

പാലക്കാട് പല്ലശ്ശന ഗ്രാമമുഖ്യനായിരുന്ന കാരൂർ നമ്പിടിയെ, കുതിരവട്ടത്ത് നായർ ചതിപ്രയോഗത്തിലൂടെ വകവരുത്തിയതിന് പകരം ചോദിക്കാൻ, പല്ലശ്ശനക്കാർ വർഷാവർഷം നടത്തുന്ന വെല്ലുവിളിയാണ് ഓണത്തല്ലിന്റെ ഉത്ഭവത്തിന് കാരണം. സാമൂതിരി ഇടപെട്ട് ഈ തല്ല് പിൽക്കാലത്ത് നിർത്തിയെങ്കിലും, പല്ലശ്ശനക്കാരുടെ പഴയ തല്ലിന്റെ ഓർമ്മ നിലനിർത്താനും, ചതിപ്രയോഗത്തിലൂടെയുള്ള അധികാരം കൈയ്യാളുന്നതിന് എതിരായും തുടക്കമിട്ടതാണ്, ഇന്ന് നമ്മൾ കാണുന്നതരത്തിലുള്ള ഓണത്തല്ലിന് തുടക്കമായത്. മുഖ്യമായും അവിട്ടം നാളിലാണ് ഓണത്തല്ല് നടക്കുന്നത് എന്നതിനാൽ, ഓണത്തല്ല്, ‘അവിട്ടത്തല്ല്’ എന്നും അറിയപ്പെടുന്നുണ്ട്.

പണ്ടത്തെ നാടുവാഴികളുടെയും തറവാടുകളിലെയും തൊടികളിൽ വിനോദമായും, പ്രാദേശിക പട്ടാളങ്ങളിലേക്കുള്ള കായിക പരിശീലനമായും ഓണത്തല്ലിനെ ഉപയോഗിച്ചിരുന്നു. നല്ല കായികക്ഷമത വേണ്ട ഓണത്തല്ലിന് അതുകൊണ്ട് തന്നെ ‘കായംകളി’ എന്ന പേരും നിലവിലുണ്ട്. കളരി അഭ്യാസികളായിരുന്നു പണ്ട് ഓണത്തല്ലിൽ പങ്കെടുത്ത് കൊണ്ടിരുന്നത്.

ഒരു മത്സരത്തിൽ രണ്ട് വിഭാഗങ്ങളാണ് പങ്കെടുക്കുക. പതിനാല് മീറ്റർ വ്യാസമുള്ള ഒരു വട്ടത്തിന്റെയുള്ളിലാണ് മത്സരം നടക്കുക.ഒരു പോരാളി ആ വട്ടത്തിലേക്ക് കടന്ന് കൈ മുഷ്ടി കൊണ്ടാണ് എതിരാളിയെ നേരിടുക. ഒരാൾ എതിരാളിയെ പൂട്ടുകയോ അടിച്ച് വീഴ്ത്തുകയോ ചെയ്‌താൽ വിജയിയായി പ്രഖ്യാപിക്കപ്പെടും. കൃത്യമായ നിയമങ്ങളൊന്നുമില്ലാത്ത ഈ കളിയിൽ പലപ്പോഴും കാണികളാണ് വിജയിയെ പ്രഖ്യാപിക്കുന്നത്. എതിരാളികളിൽ ഏതെങ്കിലും ഒരാൾ ജയിച്ചാൽ മാത്രമേ ഓണത്തല്ല് തീരുകയുള്ളൂ.

ചായിക്കാരൻ എന്നാണ് റഫറിയായ ആളിനെ അറിയപ്പെടുക. കാലക്രമത്തിൽ, ഇന്ന് ഓണക്കാലത്ത് മാത്രമാണ് ഈ കായംകളി അഥവാ ഓണത്തല്ല് നടന്ന് വരുന്നത്. ഇന്ന് ഓണത്തല്ലിന് ‘ഓണപ്പെട’, ‘കയ്യാങ്കളി’ (കൈ കൊണ്ടുള്ളത് എന്ന അർത്ഥത്തിൽ) എന്നൊക്കെ പേരുകളുണ്ട്. അധികം നിയമങ്ങളൊന്നുമില്ലാത്ത ഓണത്തല്ലിൽ ചതി പ്രയോഗങ്ങൾ നടക്കാറില്ല. അതുകൊണ്ട് ഓണത്തല്ലിലേത് പോലെ നമുക്ക് നമ്മുടെ ജീവിതത്തിലും നേരായ വഴിക്ക് വിജയങ്ങൾ നേടാം. ഏവർക്കും ഓണാശംസകൾ.

സൈമ ശങ്കർ
മൈസൂർ.✍

🌺🌺🌺🌺🌺🌺🌺🌺🌺🌺

73 Likes

🌺🌺🌺പൂവടയും, പഴഞ്ചൊല്ലുകളും, ഓണതല്ലും.🌺🌺🌺സൈമ ശങ്കർ മൈസൂർ.✍

പൂവട (Poovada)

ഓണം ചൊല്ലുകൾ

ഇനി ഓണ തല്ല് കൂടി കാണാം

സൈമ ശങ്കർ
മൈസൂർ.✍

2026 ഇടുക്കിപദ്ധതിയുടെ സുവർണവർഷം ! ( മൂന്നാം ഭാഗം) ✍റ്റി. ആർ. ജോണി, മുൻ ചീഫ് എൻജിനിയർ, ഇരിങ്ങാലക്കുട നോർത്ത്

📱വാർത്തകൾ ഒറ്റനോട്ടത്തിൽ📱 – 2026 | ഫെബ്രുവരി 14 | ശനി ✍ കപിൽ ശങ്കർ

സിഖ് വിഘടനവാദി നേതാവിനെ വധിക്കാൻ ഗൂഢാലോചന: നിഖിൽ ഗുപ്ത കുറ്റസമ്മതം നടത്തി

2 COMMENTS

LEAVE A REPLY Cancel reply

Most Popular

2026 ഇടുക്കിപദ്ധതിയുടെ സുവർണവർഷം ! ( മൂന്നാം ഭാഗം) ✍റ്റി. ആർ. ജോണി, മുൻ ചീഫ് എൻജിനിയർ, ഇരിങ്ങാലക്കുട നോർത്ത്

📱വാർത്തകൾ ഒറ്റനോട്ടത്തിൽ📱 – 2026 | ഫെബ്രുവരി 14 | ശനി ✍ കപിൽ ശങ്കർ

സിഖ് വിഘടനവാദി നേതാവിനെ വധിക്കാൻ ഗൂഢാലോചന: നിഖിൽ ഗുപ്ത കുറ്റസമ്മതം നടത്തി

സൗത്ത് കരോലിനയിൽ മീസിൽസ് പടരുന്നു; ആകെ രോഗബാധിതർ 950 ആയി

Recent Comments

EDITOR PICKS

2026 ഇടുക്കിപദ്ധതിയുടെ സുവർണവർഷം ! ( മൂന്നാം ഭാഗം) ✍റ്റി. ആർ. ജോണി, മുൻ ചീഫ് എൻജിനിയർ, ഇരിങ്ങാലക്കുട നോർത്ത്

📱വാർത്തകൾ ഒറ്റനോട്ടത്തിൽ📱 – 2026 | ഫെബ്രുവരി 14 | ശനി ✍ കപിൽ ശങ്കർ

സിഖ് വിഘടനവാദി നേതാവിനെ വധിക്കാൻ ഗൂഢാലോചന: നിഖിൽ ഗുപ്ത കുറ്റസമ്മതം നടത്തി

POPULAR POSTS

തോറ്റപ്പോൾ പ്രതികാരം, നൽകിയ സമ്മാനങ്ങൾ തിരിച്ചുതരണമെന്ന് സ്ഥാനാർഥി; വേറിട്ട പ്രതിഷേധമൊരുക്കി വോട്ടർമാർ.

അമുൽ ഉൾപ്പെടെ പ്രമുഖ ക്ഷീരോത്പാദക കമ്പനികൾ ഗുണനിലവാര പരിശോധനയിൽ പരാജയപ്പെട്ടു; ആശങ്കയിൽ ഉപഭോക്താക്കൾ.

ബെംഗളൂരുവിൽ കാറും ബൈക്കും കൂട്ടിയിടിച്ച് 7 മരണം; മരിച്ചവരിൽ 2 മലയാളികൾ.

POPULAR CATEGORY

ABOUT US

FOLLOW US