🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 16 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

അരികത്തുള്ളവരോടും സ്നേഹവും ആദരവും കാണിക്കാനാകണം
——————————————————————————————-

ഒരു തെരുവിലൂടെ തിരക്കിട്ടു നടന്നു നീങ്ങിയ സ്ത്രി, അവർക്കെതിരേ വന്ന യുവതിയുമായി കൂട്ടിയിടിച്ചു. ഉടനെ തന്നെ അവർ ഭവ്യതയോടെ മാപ്പു ചോദിച്ചു. യുവതിയും അവരോടു ക്ഷമ പറഞ്ഞു. രണ്ടു പേരും ഒരു ചെറുപുഞ്ചിരിയോടെ പിരിഞ്ഞു.

വീട്ടിലെത്തിയ ആ സ്ത്രീ, ധൃതിയിൽ പാചകം ചെയ്യുന്നതിനിടെ, അടുക്കളയിലേക്കോടിവന്ന അഞ്ചു വയസ്സുകാരൻ മകൻ, അപ്രതീക്ഷിതമായി
അവരുടെ ദേഹത്തു തട്ടി. അപ്പോൾ, അല്പം ദേഷ്യത്തോടെ, ‘മാറിപ്പോടാ’ എന്നവർ മകനോട് ആക്രോശിച്ചു. മകൻ അവൻ്റെ കയ്യിൽ നിന്നും താഴെ വീണ പൂക്കൾ പെറുക്കിയെടുക്കുന്നത് പിന്നീടാണവർ ശ്രദ്ധിച്ചത്. കലങ്ങിയ കണ്ണുകളുമായി അവൻ പറഞ്ഞു: “ഇന്ന് അമ്മയുടെ ജന്മദിനമല്ലെ? അമ്മയ്ക്ക് വേണ്ടി ഞാൻ പറിച്ചു കൊണ്ടുവന്നതാണീ പൂക്കൾ”.

അപരിചിതരോടു നാം കാണിക്കുന്ന ആദരവും കരുതലും, നമ്മോടടുത്തു നിൽക്കുന്നവരോടു കാണിക്കാൻ പാലപ്പോഴും ശ്രദ്ധിക്കണമെന്നില്ല. അങ്ങനെ ചെയ്തിരുന്നെങ്കിൽ, പല ബന്ധങ്ങളും, കൂടുതൽ ഊഷ്മളമാകുമായിരുന്നു. നമ്മുടെ പെരുമാറ്റം പലപ്പോഴും വസ്ത്രം പോലെയാണ് =. വീടിനുള്ളിൽ ഒന്ന്; പുറത്തിറങ്ങുമ്പോൾ മറ്റൊന്ന്. പുറത്തുള്ളവരോടു സൗമ്യമായി പെരുമാറുന്ന നാം, അടുത്തുള്ളവർക്കു വേണ്ടി പലപ്പോഴും മാറ്റി വയ്ക്കുന്നതു ദേഷ്യവും ശകാരവുമായിരിക്കും.

മറ്റുള്ളവരെ പ്രചോദിപ്പിക്കുകയും പ്രോത്സാഹിപ്പിക്കുകയും ചെയ്യുന്നതു
പോലെതന്നെ പ്രധാനമാണ്, നമ്മെ സ്വന്തമെന്നു കരുതുന്നവർക്ക് അഭയമേകുന്നതും, ആശ്രയമാകുന്നതും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര