🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 21 | ശനി ✍ പ്രൊഫസ്സർ എ.വി. ഇട്ടി മാവേലിക്കര

സഹാനുഭൂതി കൈവിടാതിരിക്കാം
——————————————————–

ഒരാൾ ദിവസവും പാർക്കിംഗ് ഗ്രൗണ്ടിലെത്തും. സാങ്കൽപ്പികമായി കാർ പാർക്കു ചെയ്യും. അതു പൂട്ടി താക്കോലുമെടുത്ത് പുറത്തേക്കു പോകും. വിചിത്രമായ ഈ കാഴ്ച പലപ്പോഴും കണ്ടു നിന്നിരുന്ന ഒരാൾ, കാവൽക്കാരനോടു ചോദിച്ചു: “അയാൾ എന്താണു ചെയ്യുന്നത് ?” “പണ്ടയാൾ ഒരു ഡ്രൈവറായിരുന്നു. മനോനില തെറ്റിയതാണ്. എല്ലാ ദിവസവും വന്ന് ഇങ്ങനെ ചെയ്യും”, കാവൽക്കാരൻ പറഞ്ഞു.
“നിങ്ങൾക്കതയാൾക്കു പറഞ്ഞു കൊടുത്തു കൂടെ?” മറ്റേയാൾ ചോദിച്ചു. കാവൽക്കാരൻ്റെ മറുപടി: “ഞാനെന്തിനു പറഞ്ഞു കൊടുക്കണം? അയാൾ ദിവസവും പാർക്കിംഗ് ഫീസ് തരുന്നുണ്ട് . ആഴ്ചയിലൊരിക്കൽ കാർ കഴുകുന്നതിന് നൂറു രൂപ വേറെയും!”

നിവൃത്തികേടുള്ളവരെ ചൂഷണം ചെയ്തു ലാഭമുണ്ടാക്കി, അതിനു മുകളിൽ സിംഹാസനം പണിത്, ഇരിപ്പുറപ്പിക്കുന്നവരാണ് നന്മയുടെ അവസാന കണികയും ഇല്ലാതാക്കുന്നത്. അനുകൂലമായ എല്ലാ സാഹചര്യങ്ങളുമുണ്ടായിരിക്കെ, അവയിൽ നിന്നു മുതലെടുപ്പു നടത്താത്തവരെയാണ്, വിശുദ്ധർ എന്നു വിളിക്കേണ്ടത്.

ഒരു നാട്ടിൽ, ഒരാൾ വിശന്നുവലഞ്ഞോ, കിടപ്പാടം ഇല്ലാതെയോ, സമനില നഷ്പ്പെട്ടോ ചുറ്റിത്തിരിയുന്നുവെങ്കിൽ, അത് ആ നാട്ടുകാരുടെ മനോഭാവത്തിലേക്കുള്ള ചൂണ്ടുപലകയാണ്. ഒന്നും തിരിച്ചു നൽകാൻ ശേഷിയില്ലാത്ത, ഒരു നന്ദി വാക്കു പോലും പറയാൻ അറിവില്ലാത്ത, ആളുകളാടു നാം കാണിക്കുന്ന സഹാനുഭൂതിയാകും, ഏറ്റവും വിശിഷ്ടമായ സൽക്കർമ്മം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര