🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 19 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

നന്മയുടെ തിരി കെടാതെ സൂക്ഷിക്കാം
—————————————————————–

ഒരു വൃദ്ധൻ കാട്ടിലൂടെ നടക്കുകയായിരുന്നു. അയാൾ, മാളത്തിൽ അകപ്പെട്ടു പോയ ഒരു പൂച്ചയെ കണ്ടു. അതിനോടു ദയ തോന്നിയ വൃദ്ധൻ അതിനെ രക്ഷിക്കാനുറച്ച്, മാളത്തിൽ കയ്യിട്ട് പേടിച്ചരണ്ട പൂച്ചയെ കയ്യെത്തി പിടിക്കാൻ നോക്കുമ്പോൾ, അതിൻ്റെ കോർത്തുമൂർത്ത നഖങ്ങൾ കൊണ്ട് വ്യദ്ധൻ്റെ കൈ മുറിഞ്ഞു. പല തവണ ഇതാവർത്തിച്ചപ്പോൾ, കണ്ടു നിന്ന ഒരു യാത്രീകൻ ഉപദേശിച്ചു: “നിങ്ങൾ പൂച്ചയെ രക്ഷിക്കാനുള്ള ശ്രമം നിർത്തൂ. അല്ലെങ്കിൽ നിങ്ങളുടെ കൈകളിൽ ഇനിയും മുറിവേൽക്കും. കുറച്ചു കഴിയുമ്പോൾ, പൂച്ച തനിയെ രക്ഷപെട്ടു കൊള്ളും”. എന്നാൽ, വൃദ്ധൻ തൻ്റെ ശ്രമം ഉപേക്ഷിച്ചില്ല. കുറച്ചു കഴിഞ്ഞപ്പോൾ, അയാൾ അതിനെ പുറത്തെടുത്തിട്ട് യാത്രീകനോടു പറഞ്ഞു: “മുറിവുണ്ടാക്കുക പൂച്ചയുടെ സ്വഭാവമാണ്; രക്ഷിക്കുക എന്നത്, എൻ്റേതും!”

സ്വയം മറന്നുള്ള സന്നദ്ധ പ്രവർത്തനങ്ങളിലെല്ലാം, നമുക്കു മുറിവേൽക്കാനുള്ള സാദ്ധ്യതയുണ്ട്: മനസ്സിനും ശരീരത്തിനും. ആർക്കു വേണ്ടിയാണ് നമ്മുടെ സമയവും ഊർജ്ജവും ചെലവഴിക്കുന്നത്, അവരിൽ നിന്നാകും, ചിലപ്പോൾ കൂടുതൽ അവജ്ഞയും വേദനയും നേരിടേണ്ടി വരിക.

അണയാതെ പിടിക്കുന്ന തിരിയിൽ നിന്നും കൈ പൊള്ളിയാലും, അതു നമുക്കും മറ്റുള്ളവർക്കും വെളിച്ചമേകുമെന്നതിനാൽ, നാം തിരി അണയാൻ അനുവദിക്കില്ലല്ലോ? ഉടൽ ഉരുകിയാലും, നാം പിടിച്ചു നിർത്തുന്ന ജീവശ്വാസത്തിൻ്റെ പ്രതിഫലനം, എവിടെയെങ്കിലും പ്രത്യക്ഷപ്പെടാതിരിക്കുകയില്ല. നന്മയുടെ തിരി കെടാതെ സൂക്ഷിക്കുവാൻ നമുക്കാകട്ടെ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര