🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് | 03 | ശനി ✍ പ്രൊഫസ്സർ എ.വി. ഇട്ടി മാവേലിക്കര

അഹംഭാവത്തിൽ നിന്നു വിമുക്തരാകാം
—————————————————————–

അയാൾ മഹാനായ ഒരു നടനായിരുന്നു. എത്ര വിഷമം പിടിച്ച വേഷവും, തന്മയത്വത്തോടെ അഭിനയിക്കുമായിരുന്നു. ഒറിജിനാലിറ്റിയ്ക്കുവേണ്ടി എപ്പോഴും ഏറെ വാശി പിടിച്ചിരുന്നു. പുതിയ നാടകത്തിൻ്റെ പരിശീലനം നടക്കുകയാണ്. മദ്യപിക്കുന്ന രംഗത്തിൽ അദ്ദേഹത്തിന് യഥാർത്ഥ മദ്യം തന്നെ വേണമെന്നു ശാഠ്യം പിടിച്ചു. സംവിധായകൻ എതിർത്തെങ്കിലും, ഒടുവിൽ അദ്ദേഹത്തിൻ്റെ ശാഠ്യത്തിനു വഴങ്ങി, മദ്യം വരുത്തിക്കൊടുത്തു. യുദ്ധരംഗത്ത് യഥാർത്ഥ വാളുകൾത്തന്നെ വേണം എന്നായിരുന്നു അടുത്ത ശാഠ്യം. അതും നൽകി. അവസാന രംഗം അദ്ദേഹം വിഷം കഴിക്കുന്നതായിരുന്നു. ആവശ്യപ്പെടുന്നതിനു മുൻപേതന്നെ അതയാളുടെ കൈകളിലെത്തി. പിന്നീടൊരിക്കലും ഒറിജിനാലിറ്റിക്കു വേണ്ടി അയാൾ ബലം പിടിച്ചിട്ടില്ല.

അഹംഭാവത്തിന് ഇന്ദ്രീയങ്ങളില്ല. അത് സാമാന്യ ബോധത്തിൻ്റെ പടി ചവിട്ടുകയുമില്ല. അങ്ങനെയുള്ളവർ സ്വയം വിഗ്രഹങ്ങളായി മാറും; ആത്മ ദേവാലയത്തിലെ ഏക പ്രതിഷ്ഠ. സ്വയം പൂജകളായിരിക്കും അവിടത്തെ നിത്യാരാധന. മറ്റാരുടെയും നിർദ്ദേശങ്ങൾ അകത്തു കടക്കാത്ത രീതിയിൽ ശബ്ദ നിരോധിമായിട്ടായിരിക്കും അതിൻ്റെ നിർമ്മാണം.

സ്വന്തം നിർമ്മാണ പ്രക്രീയകളുടെ കോലാഹലങ്ങളുമായി മാത്രം ഒരൾക്ക് എത്ര നാൾ നിലനിൽക്കാനാകും? സ്വയം നിർദ്ദേശങ്ങൾക്കൊണ്ടു മാത്രം ഒരാൾക്ക് എങ്ങനെയാണ് ജീവി തത്തിൻ്റെ നാനാവശങ്ങളും കൂട്ടി വിളക്കാനാകുക?
ആത്മബോധവും കണ്ടെത്തലുമാണ് നിലനിൽപിൻ്റെയും വളർച്ചയുടെയും അടിസ്ഥാനം. പക്ഷെ, അമിതമായ അഹംബോധത്തിൽ നിന്നുമാണ് എല്ലാ സ്വയ നശീകരണ പ്രവണതകളും ആരംഭിക്കുന്നത്. സ്വയസംഹാരമാണ് തങ്ങൾ നടത്തുന്നതെന്ന് നാശം പൂർത്തിയാകുന്നതുവരെ അക്കൂട്ടർ മനസ്സിലാക്കില്ല. നമുക്ക് അതിൽ നിന്ന് ഒഴിഞ്ഞു നിൽക്കാനാകട്ടെ

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര