🌺 ശുഭദിനം 🌺 – 2024 | ജൂലൈ 04 | വ്യാഴം ✍ അർച്ചന കൃഷ്ണൻ

“എല്ലാറ്റിന്റേയും താക്കോൽ ക്ഷമയാണ്. മുട്ട വിരിയിച്ചാണ് കോഴിയെ കിട്ടുന്നത് പൊട്ടിച്ചല്ല”

ഹെരാ ക്ലീറ്റസ്സ്

മനുഷ്യരെല്ലാം എന്തിനെയെങ്കിലുമൊക്കെ ഭയന്നാണ് ജീവിതം. പരാജയം, ദുഷ്പേര്, അവഹേളനം, ധനനഷ്ടം തുടങ്ങി ഭയപ്പെടാൻ ഓരോ കാരണങ്ങളുണ്ടാകും. ഒരാൾ എന്തിനെയാണോ പേടിക്കുന്നത് അതിനെ പ്രീതിപ്പെടുത്തിയും അതിനോട് സമരസപെട്ടുമായിരിക്കും ശിഷ്ടകാല ജീവിതം. അമിത ബഹുമാനത്തിലൂടെയും, വിനയത്തിലൂടെയും എന്തു വിട്ടുവീഴ്ചകൾക്കും തയ്യാറാകും. ഒന്നിനെയും ഭയക്കാത്തവർക്കാണ് സന്തോഷത്തോടെയും,സ്വാതന്ത്രത്തോടെയും ജീവിക്കാനാകുക. ഭയത്തിൽ നിൽക്കുന്നവരുടെ മനസ്സിൽ ഓരോ കർമ്മത്തിന് മുൻപും ചില ചോദ്യങ്ങളുയരും. ഇത് എന്തെങ്കിലും അപകടം വരുത്തി വയ്ക്കുമോ, ആരുടെയെങ്കിലും അപ്രീതിക്ക് കാരണമാകുമോ, വിജയിച്ചില്ലെങ്കിൽ എന്താകും അവസ്ഥ? സ്വാതന്ത്രത്തോടെ ജീവിക്കുന്നവരുടെ മാനസിക വ്യാപാരങ്ങളിലും ആ സ്വാതന്ത്രമുണ്ടാകും

വളർച്ചയ്ക്ക് കാരണമാകുമോ, കൂടുതൽ പുതുമയാർന്ന അനുഭവം ലഭിക്കുമോ, ജീവിതം സന്തോഷപ്രദമാകുമോ തുടങ്ങിയ ചിന്തകളിലൂടെയാകും അവരുടെ യാത്ര. കർമ്മങ്ങളിൽ ആ ഉണർവ്വും ഊഷ്മളതയും ദൃശ്യമാകും. ഒന്നിനെയും ഭയപ്പെടാത്തവരെ പുറമേയുള്ള ഒന്നിനും സ്വാധീനിക്കാനാവില്ല. എന്തിനെയും മറിക്കടക്കാനുള്ള സ്വന്തം കഴിവിലായിരിക്കും അവരുടെ വിശ്വാസം. മറ്റുള്ളവരെ ബോധ്യപ്പെടുത്താൻ കാര്യങ്ങൾ ചെയ്യുന്നവർക്ക് തന്നിഷ്ടപ്രകാരം ചിരിക്കാനോ, കരയാനോ പോലും കഴിയില്ല. നഷ്ടഭയങ്ങളൊന്നുമില്ലാത്തവർ എന്തിനും മുതിരും, എന്തും കീഴടക്കും. അവരെ നിയന്ത്രിക്കാൻ ആരും ഒരുങ്ങില്ല. തളരാതെ മുന്നോട്ട് പോകുന്നവർക്കാണ് വിജയം നേടാനാനാവുകയുള്ളു..

ഏവർക്കും ഹൃദയം നിറഞ്ഞ ശുഭദിനാശംസകൾ

അർച്ചന കൃഷ്ണൻ