🌹 “ഇന്നത്തെ ചിന്താവിഷയം” 🌹 – 2024 | ജൂൺ 25 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

വീഴ്ചകൾ ഉയർച്ചകൾക്കു കാരണമാകട്ടെ
—————————————————————-

‘ഓസ്കർ അവാർഡ് ‘ പ്രഖ്യാപിക്കുന്നതിൻ്റെ തൊട്ടു തലേ ദിവസമാണ് സിനിമയിലെ ഏറ്റവും മോശം പ്രകടനത്തിനു നൽകുന്ന ആക്ഷേപ അവാർഡായ, ‘ഗോൾഡൻ റാസ് ബെറി’ അവാർഡ് പ്രഖ്യാപിക്കുന്നത്. 2010 ലെ ഏറ്റവും മോശം നടിക്കുള്ള അവാർഡ്,
‘ഓൾ എബൗട്ടു് സ്റ്റീവ് ‘ എന്ന ചിത്രത്തിലെ അഭിനയത്തിന് ഹോളിവുഡ്‌ താരം സാൻണ്ട്രാ ബുള്ളോക്കിനാണ്‌ ലഭിച്ചത്. അടുത്ത ദിവസം ഓസ്ക്കർ അവാർഡ് പ്രഖ്യാപിച്ചു. അതും സാൻണ്ട്രാ ബുള്ളോക്കിനു തന്നെയാണ്‌, ‘ദി ബ്ലൈൻഡ് സൈഡ്’ എന്ന ചിത്രത്തിലെ മികച്ച അഭിനയത്തിനു ലഭിച്ചത്. ഈ രണ്ടു വാർത്തകളും കേട്ട സാൻഡ്ര പറഞ്ഞു: “ഈ രണ്ട് അവാർഡുകളും വാങ്ങി, ഞാൻ ഷോ കേസിൽ അടുത്തടുത്തു സൂക്ഷിക്കും. ശ്രമിച്ചാൽ ഏറ്റവും മികച്ച താരമാകാനും, അലസത കാട്ടിയാൽ ഏറ്റവും മോശം താരമാകാനും എനിക്കു കഴിയുമെന്ന ഓർമ്മപ്പെടുത്തലാകും അവ നൽകുക”.

മികവ് സാദ്ധ്യമാണ്‌. എല്ലാം തികഞ്ഞവരാകുക അസാദ്ധ്യവും. താരപദവികൾ അലങ്കരിക്കുന്ന എല്ലാവർക്കും ചില വീഴ്ചകളുടെ കഥകളും
പറയാനുണ്ടാകും. നേട്ടങ്ങൾ കൈവരിച്ചവരുടെ നേട്ടങ്ങൾ മാത്രമല്ല, കോട്ടങ്ങളും നമുക്കു പാഠമാകണം. എല്ലാ തിരസ്ക്കാരങ്ങളും അംഗീകരിച്ചതിൻ്റെയും, ആരും കാണാതെ ഒഴുക്കിയ കണ്ണീരിൻ്റെയും, ഓരോ വീഴ്ചകളെയും കൈവിളക്കുകളാക്കിയതിൻ്റെയും പരിണിത ഫലമാണ്‌, പിന്നീടു രചിക്കുന്ന വിജയ ഗാഥകൾ.

വീഴ്ചയുടെ ആഴം, തിരിച്ചുവരവിൻ്റെ വേഗം നിശ്ചയിക്കും. വീഴണം, വീണു ശീലിക്കണം. അവിടെ നിന്ന് ഉണരാനും ഉയരാനും കഴിയുകയും വേണം. വീഴ്ച, ഉയർച്ചക്കുള്ള പ്രചോദന കാരണമാകുമെങ്കിൽ, വീഴ്ച നല്ലതാണ്‌. നമ്മുടെ വീഴ്ചകൾ ഉയർച്ചകൾക്കു കാരണമാകട്ടെ

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര