🌹 “ഇന്നത്തെ ചിന്താവിഷയം” 🌹 – 2024 | ജൂൺ 24 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

ഒരു മരം വെട്ടുകാരൻ ജോലിയന്വേഷിച്ച് ഒരു തടിക്കച്ചവടക്കാരൻ്റെ അടുത്തെത്തി. കൂലി പറഞ്ഞുറപ്പിച്ച്, കച്ചവടക്കാരൻ അയാളെ ഒരു മഴു ഏല്പിച്ചു. ഒന്നാം ദിവസം കൂലി വാങ്ങാനെത്തിയപ്പോൾ കച്ചവടക്കാരൻ ചോദിച്ചു:
” ഇന്നെത്ര മരം വെട്ടി ?” “ഇരുപത് “, അയാൾ മറുപടി പറഞ്ഞു. കൂലിയോടെപ്പം അയാൾക്ക് കച്ചവടക്കാരൻ്റെ അഭിനന്ദനവും ലഭിച്ചു.

രണ്ടാം ദിവസം കൂടുതൽ അദ്ധ്വാനിച്ചെങ്കിലും, പതിനെട്ടു മരങ്ങൾ മുറിക്കാനേ ആയാൾക്കായുള്ളു. തുടർന്നുള്ള ഓരോ ദിവസവും, മരങ്ങളുടെ എണ്ണം കുറഞ്ഞു വന്നു. നിരാശനായ മരം വെട്ടുകാരനോടു കച്ചവടക്കാരൻ ചോദിച്ചു:
“എന്നാണു നിങ്ങൾ അവസാനമായി മഴുവിനു മൂർച്ച കൂട്ടിയത്? “മരം വെട്ടുകാരൻ പറഞ്ഞു: “മരം മുറിക്കുന്ന തിരക്കിൽ മഴുവിനു മൂർച്ച കൂട്ടാൻ ഞാൻ മറന്നു
പോയി “.

കഠിനമായി ജോലി ചെയ്യുന്നതിലല്ല കാര്യം; കാര്യക്ഷമമായി ജോലി ചെയ്യുന്നതിലാണ്. നിരന്തരമായ പ്രയത്നങ്ങളല്ല, നിർമ്മാണ ക്ഷമതയുള്ള പ്രവർത്തനങ്ങളാണു ഫലദായകം. എത്ര കാര്യം ചെയ്തുവെന്നതിനേക്കാൾ, എത്ര കാര്യക്ഷമമായി ചെയ്തു എന്നതാണ് കൃത്യനിർവ്വഹണത്തിൻ്റെ അളവുകോൽ.

ജോലി സ്ഥിരമാണെന്ന അഹങ്കരിക്കുന്നവർക്ക് ജോലിയിലെ പ്രകടനം സ്ഥിരതയുള്ളതാക്കാനും ബാദ്ധ്യതയുണ്ട്. വേതനം മാത്രമല്ല കൂടേണ്ടത്, ജോലിയുടെ ഗുണനിലവാരവും കുടേണ്ടതുണ്ട്. വർഷങ്ങൾക്കു മുമ്പു സമ്പാദിച്ച യോഗ്യതാ പത്രത്തിൻ്റെ പിൻബലത്തിൽ, ആയുഷ്ക്കാലം മുഴുവൻ സ്ഥിരതയാർന്ന പ്രകടനം കാഴ്ചവെക്കാനാകണമെന്നില്ല. എറ്റവും മികച്ച ഉൽപ്പന്നത്തിനു പോലും അഞ്ചു വർഷത്തിൽ കുടുതൽ വാറൻ്റി ലഭിക്കാറില്ല. കത്തിക്കൊണ്ടിരിക്കുന്ന വിളക്കിൽ എണ്ണ
പകരണമെന്നത് സാമാന്യ ബുദ്ധിയാണ് . ആഞ്ഞു വെട്ടുന്നതിനേക്കാൾ, അറിഞ്ഞു വെട്ടുന്നതാണു ഫലപ്രദം. മരമറിഞ്ഞും, മഴുവറിഞ്ഞും വെട്ടാനാകണം നമുക്ക്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര