🌹 “ഇന്നത്തെ ചിന്താവിഷയം” 🌹 – 2024 | ജൂൺ 23 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

പ്രകാശം പരത്തുന്നവർ ആയിരിക്കാം
———————————————————

പ്രശസ്തനായ ഒരു ചിത്രകാരനെ കാണാൻ, അദ്ദേഹത്തിൻ്റെ സുഹൃത്ത് വീട്ടിലെത്തി. വിടു് അടച്ചിട്ടിരിക്കുയായിരുന്നു. എന്നാൽ, വീടു പുറത്തു നിന്നു പൂട്ടാതിരുന്നതിനാൽ, അകത്ത് ആളുണ്ടെന്ന് അയാൾക്കു മനസ്സിലായി. വാതിലിൽ മുട്ടിനോക്കിയെങ്കിലും ഫലമുണ്ടായില്ല. കുറച്ചു നേരം കാത്തു നിന്ന ശേഷം അയാൾ വിളിച്ചു ചോദിച്ചു: “താങ്കൾ എന്തിനാണ് ഇങ്ങനെ ഇരുട്ടിൽ ഇരിക്കുന്നത്? വെളിച്ചത്തിലേക്ക് ഇറങ്ങി വരൂ”. ചിത്രകാരൻ അകത്തു തന്നെയിരുന്നു കൊണ്ടു മറുപടി പറഞ്ഞു:
” ഇപ്പോൾ ഞാൻ വെളിച്ചത്തിലേക്കു വന്നാൽ, എൻ്റെയുള്ളിൽ തെളിയാൻ തുടങ്ങിയ നാളത്തെ അതു ബാധിക്കും”.

വെളിച്ചത്തിൽ നിൽക്കുന്നവർക്കെല്ലാം ‘വെളിച്ചം’ ഉണ്ടാകണമെന്നു നിർബന്ധമില്ല.
ചുറ്റിലുമുള്ള പ്രകാശത്തിൻ്റെ ആനുകുല്യത്താൽ തിളങ്ങുന്നവർ മാത്രമാകാം അവർ. അലങ്കാര ബൾബുകളുടെ വർണ്ണ വൈവിധ്യത്തിൽ നിന്നു ലഭിക്കുന്ന ശോഭയും മനോഹാരികതയും ഒരു താൽക്കാലിക പ്രതിഭാസം മാത്രമായിരിക്കും. ആഘോഷ രാവുകളിൽ മിന്നിത്തിളങ്ങുന്നതെല്ലാം, അനുദിന ജീവിതത്തിൻ്റെ ഭാഗമാകണമെന്നില്ല. ഉള്ളു പൊള്ളയായവയെ പ്രകാശിപ്പിക്കുവാൻ എളുപ്പമാണ്. അകത്തൊരു നാളം തെളിയിച്ചാൽ മാത്രം മതി. സ്വയം തിരി തെളിയിക്കാനുള്ള സാദ്ധ്യതയും, സ്വന്തം വെളിച്ചം നിലനിർത്താനുള്ള ബാദ്ധ്യതയും എല്ലാവർക്കും ഉണ്ട്. പുറത്തുള്ള വെളിച്ചത്തെ മാത്രമാശ്രയിച്ചു ജീവിക്കുന്നവർക്ക്, സാഹചര്യങ്ങളുടെ അടിമകളാകാൻ മാത്രമായിരിക്കും വിധി.

ജീവിതം ആഘോഷം മാത്രമല്ല, അത്മപ്രകാശനം കൂടിയാകണം. എത്ര പ്രകാശം പരത്തുന്ന വിളക്കിനും, നിശ്ചിത ഇടവേളകളിൽ എണ്ണ പകരുകയും തിരി മാറുകയും വേണം. കാലാനുസൃതമായ ഊർജ്ജ സംഭരണം നടത്താത്തവരെല്ലാം, കരിന്തിരി എരിയുകയോ, അണഞ്ഞുപോകുകയോ ചെയ്യും. എക്കാലവും പ്രകാശിക്കണമെങ്കിൽ, ഉള്ളിൽ ആത്മ നവീകരണം നടന്നു കൊണ്ടേയിരിക്കണം. അങ്ങനെയുള്ളവർക്കു മാത്രമേ, പ്രകാശം പരത്തുന്നവരായിരിക്കാൻ ആകൂ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര