🌹 “ഇന്നത്തെ ചിന്താവിഷയം” 🌹 – 2024 | ജൂൺ 10 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

ചങ്ങലകൾ തകർക്കാൻ ആകട്ടെ
———————————————————

ആനകളെ പരിശീലിപ്പിക്കുന്ന ഒരു കേന്ദ്രത്തിൽ ചെന്ന ആൾ, ഒരു കാര്യം ശ്രദ്ധിച്ചു. ആനകൾക്കു കൂടില്ല. മാത്രവുമല്ല, അവയെ പിൻ കാലിൽ ഒരു ചങ്ങലയി ട്ട് ഓരോ കുറ്റിയിൽ ബന്ധിച്ചിരിക്കുകയുമാണ്. ആനകൾ എന്തുകൊണ്ടാണ് കുറ്റിയും പറിച്ചു രക്ഷപെടാത്തതെന്നു എത്ര ആലോചിച്ചിട്ടും അയാൾക്കു പിടി കിട്ടിയില്ല.

പരിശീലകൻ്റെയടുത്ത് സംശയ നിവാരണത്തിനു ചെന്ന അയാളോട് അദ്ദേഹം പറഞ്ഞു: “വലിയ ആനകളേപോലും ഇങ്ങനെ തളച്ചിടുന്നതു കണ്ടാണ് ജനനം മുതൽ ഇവറ്റകൾ വളരുന്നത് അതിപ്പോൾ അവയുടെ വിശ്വാസവും ശീലവുമായി മാറിയിരിക്കുന്നു.

കണ്ടു പഠിച്ചവ കാണാപ്പാoങ്ങളാകും; അവ ചിന്തയും, വിശ്വാസവും, ശീലവും എല്ലാമാകും. ശീലങ്ങളെ പിരിയാൻ കഴിയാത്തതാണ് പലരുടേയും മോചനമില്ലായ്മക്കു കാരണം. പതിവു നടപടികൾക്കു പുറത്തേക്ക് ചിന്തകളേകും, പ്രവൃത്തികളേയും വ്യാപിപ്പിക്കാത്തവർ, ആയുസ്സു മുഴുവൻ ചങ്ങലകളിൽത്തന്നെ കിടക്കും. “ചൊട്ടയിലെ ശീലം ചുടല വരെ”, എന്നാണല്ലോ പഴഞ്ചൊല്ല്. ഒരാൾ സ്വയം മാറാൻ തീരുമാനിക്കുന്നതു വരെ അതങ്ങനെ തന്നെ തുടരും.

പിന്തുടർന്നു വന്ന പാരമ്പര്യങ്ങളും, ആചാരങ്ങളും, രീതികളുമെല്ലാം വള്ളി പുള്ളി വിടാതെ തുടരുന്നതല്ല അച്ചടക്കം. കാലത്തിനനുസരിച്ചും, കഴിവിനനുനുസരിച്ചും പ്രതികരിക്കാൻ നമുക്കു കഴിയണം. അനാവശ്യമായ ചങ്ങലകൾ പൊട്ടിച്ചെറിയാതെ ഒരു മാറ്റവും ഉണ്ടാകില്ല. വളർച്ച, വളരുന്ന ഇടത്തേക്കൂടി ആശ്രയിച്ചാണ് ഇരിക്കുന്നത്. പ്രതികൂല സാഹചര്യങ്ങളിലെ വളർച്ച, പ്രതിരോധശേഷി വർദ്ധിപ്പിക്കുമെങ്കിലും, പ്രതികരണ ശേഷി നുള്ളിക്കളയുന്ന ഇടങ്ങളിലെ വളർച്ച, പ്രതിമകളെ മാത്രമേ സൃഷ്ടിക്കൂ.

മറ്റുള്ളവരുടെ ആവേശം ഊതിക്കെടുത്തി പണിയെടുപ്പിക്കുന്നവർ, യഥാർത്ഥ പരിശീലകരല്ല. താലന്തുകളെ തിരിച്ചറിഞ്ഞ്, തൻ്റേടത്തോടെ ഉപയോഗിക്കാൻ പഠിപ്പിക്കുന്നവരാണ് യഥാർത്ഥ പരിശീലകർ. സ്വയം വളർച്ച പ്രാപിച്ചവർക്കു മാത്രമേ, മറ്റുളളവരെ വളർത്താനാകൂ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര✍