🌹 “ഇന്നത്തെ ചിന്താവിഷയം” 🌹🌹 – 2024 | ജൂൺ 02 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

നന്മയെ അനുകരിക്കാൻ ആകട്ടെ
——————————————————

ഒരിക്കൽ ഒരു കെണിയിൽ നിന്നു രക്ഷപെടുന്നതിനിടെ, ഒരു കുറുക്കനു തൻ്റെ കാലുകൾ നഷ്ടപ്പെട്ടു. വനാതിർത്തിയിൽ താമസിച്ചിരുന്ന ഒരു മനുഷ്യൻ, കുറുക്കനെ നിത്യവും നിരീക്ഷിക്കുമായിരുന്നു: അതിന് എവിടെ നിന്നു ഭക്ഷണം ലഭിക്കുന്നുവെന്നറിയാൻ. ഒടുവിൽ, അയാൾക്കതു മനസ്സിലായി: ഓരോ ദിവസവും ഒരു കടുവ, ഒരു ജീവിയെ കൊണ്ടു വരും. പാതി തിന്ന ശേഷം, ബാക്കിയത് കുറക്കുനു കൊടുക്കും.

അയാൾ ചിന്തിച്ചു: ഒരു കുറുക്കൻ പോലും ഇങ്ങനെ സംരക്ഷിക്കപ്പെടുന്നെങ്കിൽ, ഞാനെന്തിനിങ്ങനെ കഷ്ടപ്പെടണം? എന്നേയും ആരെങ്കിലും നോക്കിക്കൊള്ളും. അന്നു മുതൽ അയാൾ ജോലിയൊന്നും ചെയ്യാതെ, വെറുതേ ഇരിക്കനാരംഭിച്ചു. എന്നാൽ, ആരും അയാൾക്കു ഭക്ഷണവുമായി എത്തിയില്ല. ഭക്ഷണം കഴിക്കാതെ അയാൾ എല്ലും തൊലിയുമായി. ബോധം മറയും മുമ്പേ, അയാൾ ഒരശരീരി കേട്ടു: “നീ ആ കുറുക്കനെ അനുകരിക്കാതെ, ആ കടുവയെ അനുകരിക്കണ്ടിയിരുന്നു”.

സൽമാതൃകകളെ വേണം നാം അനുകരിക്കാൻ. സ്വന്തം വയറു നിറക്കാനോ, സ്വന്തം സ്വപ്നങ്ങൾ സാക്ഷാത്ക്കരിക്കാനോ, അയൽക്കാരെ നാം ആശ്രയിക്കരുത്.
നിവൃത്തികേടുകൾ നിത്യവൃത്തിയെ ബാധിക്കുമ്പോൾ, ആരെങ്കിലുമൊക്കെ സഹായത്തിനെത്തി എന്നിരിക്കും. എന്നാൽ, അതൊരു ദു:ശ്ശീലമാണെന്നറിയുമ്പോൾ അവർ പിൻവാങ്ങിയെന്നും വരും. അന്യർ കൊണ്ടുവരുന്ന ആഹാരത്തെ ആശ്രയിക്കുന്നവർക്ക്, സ്വന്തം ഇഷ്ടങ്ങളെയും മുൻഗണനകളെയും ഉപേക്ഷിക്കേണ്ടി വരും.

അവനവൻ്റെ ഇഷ്ടങ്ങളെ തൃപ്തിപ്പെടുത്താനും, ലക്ഷ്യങ്ങളെ സാക്ഷാത്ക്കരിക്കാനും കഴിയുന്നില്ലെങ്കിൽപ്പിന്നെ എങ്ങനെയാണ് അതിനെ സ്വന്തം ജീവിതമെന്നു വിളിക്കാനാകുക? അപരനെ ആശ്രയിക്കുക എന്നതു മാനുഷീകം. എന്നാൽ, അന്യന് ആശ്രയമായിതീരുക എന്നതാണു ദൈവീകം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര✍