📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 06 | തിങ്കൾ ✍️ കപിൽ ശങ്കർ

🔹സിപിഎമ്മിന്റെ നിയന്ത്രണത്തിലുള്ള ഊരാളുങ്കല്‍ സര്‍വീസ് സൊസൈറ്റി അടക്കം 46 ഏജന്‍സികള്‍ക്കു ടെണ്ടറില്ലാതെ കരാറെടുക്കുന്നതിനുള്ള അനുമതി യുഡിഎഫ് സര്‍ക്കാര്‍ പുതുക്കിക്കൊടുത്തു. കഴിഞ്ഞ മേയ് 31 ന് ഊരാളുങ്കലിന്റേതടക്കം കാലാവധി കഴിഞ്ഞിരുന്നു. ഈ മാസം അവസാനംവരെ കാലാവധി നീട്ടി ധനവകുപ്പാണ് ഉത്തരവിറക്കിയത്.

🔹പ്രതിപക്ഷ ഉപനേതാവ് പദവിയെച്ചൊല്ലി എല്‍ഡിഎഫില്‍ വീണ്ടും തര്‍ക്കം. പ്രതിപക്ഷ ഉപനേതാവ് പദവി വേണമെന്ന നിലപാടില്‍ നിന്ന് പിന്നോട്ടില്ലെന്ന് സിപിഐ സംസ്ഥാന അസിസ്റ്റന്റ് സെക്രട്ടറി പി പി സുനീര്‍ വ്യക്തമാക്കി. ഏകപക്ഷീയമായി എടുക്കേണ്ട തീരുമാനമല്ല. പിണറായി പറഞ്ഞത് പാര്‍ട്ടിയുടെ നിലപാടാണോയെന്നു സിപിഎം വ്യക്തമാക്കണം. സുനീര്‍ പറഞ്ഞു.

🔹വിഴിഞ്ഞം തുറമുഖത്തെ എംഎസ്സി കമ്പനിക്കു വില്‍ക്കാനുള്ള കരാര്‍ റദ്ദാക്കണമെന്നു സിപിഎം സംസ്ഥാന സെക്രട്ടറി എം.വി. ഗോവിന്ദന്‍. കരാറിലൂടെ വിഡി സതീശന്‍ ഉള്‍പ്പെടെയുള്ളവര്‍ക്കാണ് ആനുകൂല്യം ലഭിക്കുന്നതെന്നും ഇതൊരു വലിയ ഡീലാണെന്നും ഗോവിന്ദന്‍ പറഞ്ഞു.

🔹നെടുമ്പാശേരി വിമാനത്താവളത്തിന് കെ കരുണാകരന്റെ പേര് നല്‍കണമെന്ന് മുതിര്‍ന്ന കോണ്‍ഗ്രസ് നേതാവ് വി എം സുധീരന്‍. കെ കരുണാകരന്റെ സ്വപ്നമായിരുന്നു നെടുമ്പാശേരി വിമാനത്താവളം. രാജ്യത്തെ എണ്ണപ്പെട്ട വിമാനത്താവളമായി നെടുമ്പാശേരി മാറിയതില്‍ നന്ദി പറയേണ്ടത് കരുണാകരനോടാണെന്നും വി എം സുധീരന്‍ പറഞ്ഞു.

‎🔹പ്രിയദർശിനി സൗജന്യ യാത്ര കാരണമുള്ള സാമ്പത്തിക പ്രതിസന്ധി മറികടക്കാൻ വയനാട്ടിലെ സ്വകാര്യ ബസ് ഉടമകൾ ഇന്ന് മുതൽ വിദ്യാർത്ഥികളുടെ കൺസെഷൻ നിരക്ക് വർധിപ്പിക്കാൻ തീരുമാനിച്ചു. മിനിമം ചാർജ് മൂന്ന് രൂപയാക്കി ഉയർത്താനുള്ള തീരുമാനത്തിൽ നിന്ന് പിന്നോട്ടില്ലെന്ന് ബസ് ഉടമകൾ വ്യക്തമാക്കി.

🔹വയനാട്ടിലെ സ്വകാര്യ ബസ് ഉടമകൾ വിദ്യാർത്ഥികളുടെ കൺസഷൻ ടിക്കറ്റ് ചാർജ് വർധനവ് നടത്തിയതിൽ പ്രതികരിച്ച് മന്ത്രി ടി സിദ്ദിഖ്. വിഷയം പരിശോധിക്കുമെന്ന് അറിയിച്ച മന്ത്രി, ഗതാഗത മന്ത്രിയുമായി ചർച്ച നടത്തുമെന്നും വ്യക്തമാക്കി.

‎🔹സി പി എം സംസ്ഥാന സെക്രട്ടറി എം വി ഗോവിന്ദനെതിരെ കടുത്ത രാഷ്ട്രീയ വിമർശനവുമായി സി പി എം മുൻ നേതാവും അമ്പലപ്പുഴ എം എൽ എയുമായ ജി സുധാകരൻ. എം വി ഗോവിന്ദൻ വകതിരിവ് കാണിക്കണമെന്ന് പറഞ്ഞ സുധാകരൻ, തെറ്റ് പറ്റിയാൽ പാർട്ടിയായാലും വ്യക്തികളായാലും തിരുത്തണമെന്നും അല്ലാത്തവർ ചരിത്രത്തിന്റെ ചവിറ്റുകൊട്ടയിലാകുമെന്നും എം വി ഗോവിന്ദനെ ഓർമ്മിപ്പിച്ചു.

🔹പത്തനംതിട്ടയില്‍ ലൈംഗികമായി പീഡിപ്പിച്ചെന്ന 13 കാരിയുടെ മൊഴി കള്ളമാണെന്നു പൊലീസ്. പ്രണയിച്ച സഹപാഠി ഉള്‍പ്പെടെ ഉപദ്രവിച്ചെന്ന ആരോപണം പ്രണയനൈരാശ്യം മൂലം ഉന്നയിച്ചതാണെന്നു പൊലീസ്. പെണ്‍കുട്ടിയെ മെഡിക്കല്‍ പരിശോധനക്കു വിധേയമാക്കിയപ്പോള്‍ ലൈംഗിക ചൂഷണം നടന്നിട്ടില്ലെന്ന് തെളിഞ്ഞിരുന്നു.

🔹പീഡിപ്പിച്ചെന്ന 13 കാരിയുടെ വ്യാജ പീഡന പരാതിയില്‍ കസ്റ്റഡിയിലെടുത്ത യുവാവിനെ പൊലീസ് ക്രൂരമായി മര്‍ദ്ദിച്ചെന്ന് യുവാവ്. കാലില്‍ ബൂട്ടിട്ട് ചവിട്ടിയരച്ചു. മുടിയില്‍ പിടിച്ചു വലിച്ചു. ചെവിയില്‍ പിടിച്ച് കറക്കി. ബൈപ്പാസ് ശസ്ത്രക്രിയ കഴിഞ്ഞ ആളാണെന്ന് പറഞ്ഞിട്ടും ഉപദ്രവിച്ചു. മൂന്നാം തീയതി വൈകിട്ട് പിടികൂടിയ ശേഷം ശനിയാഴ്ച വൈകിട്ടാണ് വിട്ടയച്ചത്. ഈ സമയം അത്രയും പ്രായപൂര്‍ത്തിയാകാത്ത കുട്ടികളും സ്റ്റേഷനില്‍ ഉണ്ടായിരുന്നു. ആളുമാറി സഹോദരനെയും പിടിച്ചുകൊണ്ടുപോയിയെന്നും പിന്നീട് വിട്ടയച്ചെന്നും യുവാവ്.

🔹നടന്‍ മോഹന്‍ലാല്‍ തന്റെ കൈവശമുള്ള ആനക്കൊമ്പിന്റെ വിവരങ്ങള്‍ വനം വകുപ്പിനു കൈമാറി. വനംവകുപ്പ് പ്രഖ്യാപിച്ച ഒറ്റത്തണ പൊതുമാപ്പ് സംവിധാനം ഉപയോഗിച്ചു തീര്‍പ്പാക്കാനാണ് നടപടി.

🔹ടിനി ടോമിനെതിരായ പരാതിയുമായി ബന്ധപ്പെട്ട വിഷയത്തില്‍ കടവന്ത്ര എസ്എച്ചഒയെ അന്വേഷണത്തില്‍നിന്ന് മാറ്റണമെന്ന് ആവശ്യപ്പെട്ട് മുഖ്യമന്ത്രി വിഡി സതീശന് പരാതി നല്‍കുമെന്ന് അന്‍സിബ. എസ്എച്ച്ഒയുടെ നേതൃത്വത്തില്‍ കാര്യക്ഷമമായി അന്വേഷണം നടക്കില്ലെന്നും ഇന്നലെ മൊഴിയെടുക്കാന്‍ സ്റ്റേഷനില്‍ എത്തിയപ്പോള്‍ മനഃപൂര്‍വം ബുദ്ധിമുട്ടിച്ചെന്നും അന്‍സിബയുടെ അഭിഭാഷകന്‍ പറഞ്ഞു.

🔹ശ്വേതാ മേനോന്‍ ദേശീയ വാദിയാണ്, മോദി ഭക്തയാണ്. പക്ഷേ ബിജെപിക്കാരിയല്ലെന്ന് ബിജെപി സംസ്ഥാന സെക്രട്ടറി സെക്രട്ടറി എസ് സുരേഷ്. അമ്മയുടെ ആഭ്യന്തര പ്രശ്‌നത്തില്‍ ഇടപെടാനില്ലെന്നും അദ്ദേഹം വ്യക്തമാക്കി.

🔹എസ്എന്‍ഡിപി യോഗം നേതാവായിരുന്ന കെ.കെ.മഹേശന്റെ ആത്മഹത്യയില്‍ പ്രത്യേക അന്വേഷണ സംഘം രൂപീകരിക്കണമെന്ന ആവശ്യവുമായി ഭാര്യ ഉഷാ ദേവി ആഭ്യന്തരമന്ത്രി രമേശ് ചെന്നിത്തലയ്ക്കു പരാതി നല്‍കി. യോഗം ജനറല്‍ സെക്രട്ടറി വെളളാപ്പളളി നടേശനും മകന്‍ തുഷാറുമാണ് മഹേശന്റെ മരണത്തിന് കാരണക്കാരെന്നാണ് കുടുംബത്തിന്റെ ആരോപണം.

‎🔹തൃശൂർ അമല ആശുപത്രിയിൽ നഴ്സുമാർക്ക് ശമ്പള വർധനവ് അംഗീകരിച്ച് മാനേജ്‍മെന്റ്. 4000 മുതൽ 6000 വരെയാണ് വർധന. സമരം ചെയ്തവർക്കെതിരെ പ്രതികാര നടപടി ഉണ്ടാകില്ലെന്ന് മാനേജ്മെന്റ് ഉറപ്പ് നൽകിയതായി ഭാരവാഹികൾ വ്യക്തമാക്കി. തീരുമാനത്തിന് പിന്നാലെ നഴ്സുമാർ സമരം അവസാനിപ്പിച്ചു.

🔹മഞ്ചേരി മെഡിക്കല്‍ കോളേജില്‍ ചികിത്സയിലിരിക്കെ മരിച്ചയാള്‍ക്ക് ഷിഗെല്ല സ്ഥിരീകരിച്ചു. പാലക്കാട് നെല്ലൂര്‍പ്പുള്ളി പാറോലില്‍ ഷൈജുവാണ് മരിച്ചത്.

🔹വിഴിഞ്ഞത്തെ ഓഹരി വില്‍പനയില്‍വരെ ദുരൂഹതയുണ്ടെന്ന് മുഹമ്മദ് റിയാസ് എംഎല്‍എ. വിഴിഞ്ഞവുമായി ബന്ധപ്പെട്ട എല്ലാ വകുപ്പുകളും കൈകാര്യം ചെയ്യുന്നത് മുഖ്യമന്ത്രിയായ വി ഡി സതീശനാണ്. ഇതെങ്ങനെ സംഭവിച്ചുവെന്ന് അദ്ദേഹം ചോദിച്ചു.

🔹തലശ്ശേരിയില്‍ വ്യാപാരി വ്യവസായി ഏകോപന സമിതിയുടെ നേതൃത്വത്തിലുള്ള സഹകരണ സംഘത്തില്‍ വന്‍ സാമ്പത്തിക ക്രമക്കേട്. നിക്ഷേപകരില്‍ നിന്നും സ്വീകരിച്ച ലക്ഷങ്ങളുമായി സെക്രട്ടറി മുങ്ങി. സംഭവത്തില്‍ ഭരണ സമിതി സഹകരണ വകുപ്പിലും പൊലീസിലും പരാതി നല്‍കി.

🔹തിരുവനന്തപുരം ആര്യനാട് പൊലീസ് സ്റ്റേഷനില്‍ അതിക്രമം കാണിച്ച് സിഐ സി. ദേവരാജനെ ഇരുമ്പു കസേരകൊണ്ട് തലക്കടിച്ച പ്രതി വാലൂക്കോണം മങ്ങാട്ടുപാറ സ്വദേശി യദുകൃഷ്ണനെ (23) പൊലീസ് കസ്റ്റഡിയിലെടുത്തു. സ്റ്റേഷനില്‍ എത്തി മദ്യക്കുപ്പി അടിച്ചു പൊട്ടിച്ചു ഭീകരാന്തരീക്ഷമുണ്ടാക്കിയ ഇയാളെ പിടിക്കാന്‍ ശ്രമിക്കുന്നതിനിടെ തൊട്ടടുത്ത ആശുപത്രിയിലേക്ക് ഓടിക്കയറി. ഇയാളെ പിടികൂടുന്നതിനിടെയാണ് സിഐയെ ആക്രമിച്ചത്.

🔹പാലാ നഗരസഭയില്‍ ചെയര്‍പേഴ്സണ്‍ ദിയ ബിനു പുളിക്കണ്ടത്തിലിന്റെ സ്വതന്ത്ര കൂട്ടായ്മ ഭരണസമിതിക്കുള്ള പിന്തുണ പിന്‍വലിക്കാന്‍ കോണ്‍ഗ്രസ് പാലാ മണ്ഡലം കമ്മിറ്റി അടിയന്തര യോഗം ചേര്‍ന്ന് പ്രമേയം പാസാക്കി. തീരുമാനം ജില്ലാ നേതൃത്വത്തേയും സംസ്ഥാന നേതൃത്വത്തേയും അറിയിക്കാനും തീരുമാനമായി.

🔹ഡിവൈഎഫ്ഐ സമ്മേളനത്തിന് പാലാ കൊട്ടാരമറ്റം സ്റ്റാന്‍ഡ് വിട്ടുനല്‍കാന്‍ പാലാ നഗരസഭ കൗണ്‍സില്‍ വോട്ടെടുപ്പിലൂടെ തീരുമാനിച്ചതാണെന്ന് ചെയര്‍പേഴ്സണ്‍ ദിയ ബിനു പുളിക്കക്കണ്ടം. യുഡിഎഫ് അംഗങ്ങളുടെ അഭാവത്തിലായിരുന്നു വോട്ടെടുപ്പ്.

🔹കൊച്ചിയിലേയും കോഴിക്കോട്ടേയും ഓഫീസുകളിലെ 900 ജീവനക്കാരെ കൂട്ടത്തോടെ പിരിച്ചുവിട്ട യുഎസ് ആസ്ഥാനമായുള്ള കോറോ ഹെല്‍ത്ത് കമ്പനി പ്രതിനിധികളുമായി 10 ന് തൊഴില്‍മന്ത്രിയുടെ നേതൃത്വത്തില്‍ എറണാകുളത്ത് ചര്‍ച്ച നടത്തും. ചര്‍ച്ചയില്‍ പ്രതീക്ഷയുണ്ടെന്നു മന്ത്രി ബിന്ദു കൃഷ്ണ.

🔹പിഎസ് സിക്കെതിരേ വീണ്ടും ആരോപണം. ഡയറ്റ് ലക്ചറര്‍ തസ്തികയിലേക്കുള്ള റാങ്ക് ലിസ്റ്റിനെതിരേയാണ് പുതിയ ആരോപണം. ഇടത് അധ്യാപക സംഘടനയായ കെഎസ്ടിഎ സംസ്ഥാന കമ്മിറ്റി അംഗങ്ങള്‍ക്കും വേണ്ടപ്പെട്ടവര്‍ക്കും മാത്രമാണു റാങ്ക് ലിസ്റ്റില്‍ ഇടം നല്‍കിയതെന്നാണ് ആരോപണം.

🔹പുരാവസ്തുക്കള്‍ മറയാക്കി കോടികള്‍ തട്ടിയ കേസില്‍ അറസ്റ്റിലായി ജയിലില്‍ കഴിയുന്ന മോന്‍സന്‍ മാവുങ്കലിന്റെ ആഡംബര കാറുകള്‍ ചേര്‍ത്തല പൊലീസ് ആക്രിവിലക്ക് വിറ്റു. ഇതില്‍ മുംബൈയിലെ സിനിമ നടിയുടെ പേരിലുള്ള വാഹനവും ഉള്‍പ്പെടുന്നുണ്ട്.

🔹‘റോയല്‍ ഫര്‍ണിച്ചര്‍’ എന്ന ഇല്ലാത്ത ഫര്‍ണിച്ചര്‍ കടയുടെ പേരില്‍ ആകര്‍ഷകമായ ഓഫറുകള്‍ നല്‍കി വീട്ടമ്മമാരെ കബളിപ്പിച്ച് ലക്ഷങ്ങള്‍ തട്ടിയ മലപ്പുറം കൊണ്ടോട്ടി സ്വദേശി മുസ്തഫയെ പൊലീസ് അറസ്റ്റ് ചെയ്തു.

🔹അടിയന്തരാവസ്ഥക്കാലത്തെ വിവാദമായ രാജന്‍ കേസിലെ ഏക സാക്ഷി കോഴിക്കോട് എന്‍ജിനിയറിങ് കോളേജ് മുന്‍ അധ്യാപകന്‍ കാസര്‍കോട് ചൗക്കി കെ കെ പുറം ചെമ്പകം വീട്ടില്‍ പ്രഫ. കെ കെ അബ്ദുള്‍ ഗഫാര്‍ അന്തരിച്ചു. 89 വയസായിരുന്നു. കൊല്ലം ടി കെ എം കോളേജ്, കോഴിക്കോട് ആര്‍ ഇ സി. കോളേജ് എന്നിവിടങ്ങളില്‍ അധ്യാപകനായും ഭട്കല്‍ എന്‍ജിനീയറിങ് കോളേജ് പ്രിന്‍സിപ്പാലായും പ്രവര്‍ത്തിച്ചു. യമനിലെ ഏഡനില്‍ വിദ്യാഭ്യാസ പുരോഗതിക്കായി പ്രവര്‍ത്തിച്ച ഇന്ത്യന്‍ സംഘത്തില്‍ അംഗമായിരുന്നു.

🔹വരുമാന നഷ്ടം മൂലം ഉച്ചസമയത്തെ ട്രിപ്പ് ഒഴിവാക്കിയതിന് എറണാകുളം മാഞ്ഞാലി-ആലുവ റൂട്ടില്‍ ഓടുന്ന ലിറ്റില്‍ ഫ്ലവര്‍ ബസ്സിന് മോട്ടോര്‍ വാഹന വകുപ്പ് 7500 രൂപ പിഴ ചുമത്തി. പിഴയടക്കാന്‍ ഗൂഗിള്‍ പേ സ്‌കാനര്‍ വഴി ഒരു രൂപ വീതം സംഭാവന ആവശ്യപ്പെട്ട് ബസുടമ ഡേവിഡ് സമൂഹമാധ്യമങ്ങളില്‍ പോസ്റ്റിട്ടു. കെഎസ്ആര്‍ടിസിയില്‍ സ്ത്രീകള്‍ക്കു സൗജന്യയാത്ര ആരംഭിച്ച ദിവസം തന്റെ ബസില്‍ പുരുഷന്മാര്‍ക്ക് സൗജന്യ യാത്ര നല്‍കി പ്രതിഷേധിച്ച ആളാണ് ഈ ലിറ്റില്‍ ഫ്ലവര്‍ ബസ് ഉടമ.

🔹തൃശൂരിലെ പെണ്‍വാണിഭ കേന്ദ്രത്തിലെ കൊലപാതക കേസില്‍ മുഖ്യപ്രതി നൂര്‍ ആലമിനെ ആസാമിലെ ഒളികേന്ദ്രത്തില്‍നിന്നു പോലീസ് പിടികൂടി. ഭൂട്ടാന്‍ അതിര്‍ത്തിയോട് ചേര്‍ന്ന പ്രദേശത്ത് ഒളിവില്‍ കഴിയുകയായിരുന്നു. ഇതരസംസ്ഥാനക്കാരുടെ പെണ്‍ വാണിഭ കേന്ദ്രത്തില്‍ ജൂണ്‍ 21 നായിരുന്നു ഒഡീഷ സ്വദേശിയായ ധന്‍പത് നായിക് കൊല്ലപ്പെട്ടത്. നാല് സ്ത്രീകളും രണ്ടു പുരുഷന്മാരും ഉള്‍പ്പെടെ ആറു പേര്‍ നേരത്തെ അറസ്റ്റിലായിരുന്നു.

🔹വിമാനത്തിനകത്ത് നെഞ്ചുവേദന അനുഭവപ്പെട്ട യാത്രക്കാരന്‍ മരിച്ചു. തൃശൂര്‍ കുഴിക്കാട്ടുശ്ശേരി സ്വദേശി ജോജോയാണ് (53) മരിച്ചത്. മുംബൈയില്‍നിന്നു കൊച്ചിയിലേക്ക് വന്നതായിരുന്നു ജോജോ. വിമാനത്താവളത്തിലെ മെഡിക്കല്‍ സംഘം പ്രാഥമിക ചികിത്സ നല്‍കിയ ശേഷം അങ്കമാലിയിലെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

🔹മൂന്നു കുടുംബങ്ങള്‍ ഒന്നിച്ചുള്ള വിനോദയാത്രയ്ക്കിടെ യാത്രാവാഹനമായ ട്രാവലറിനടിയില്‍ കുടുങ്ങി മൂന്നു വയസ്സുകാരി മരിച്ചു. കാട്ടാക്കട കൊറ്റംമ്പള്ളി സ്വദേശികളായ അനു പ്രസാദ് ,നിസ ദമ്പതികളുടെ മകള്‍ ഋഗ്വേദയാണ് മരിച്ചത്. അമ്പൂരി കുറിച്ചിക്കാട് പാലത്തിന് സമീപം നിര്‍ത്തിയിട്ടിരുന്ന ടെമ്പോ ട്രാവലര്‍ മുന്നോട്ട് നീങ്ങി കുട്ടിയുടെ ദേഹത്തുകൂടി കയറിയിറങ്ങുകയായിരുന്നു.

🔹കോട്ടയം മെഡിക്കല്‍ കോളജ് ആശുപത്രി കെട്ടിടത്തിന് മുകളില്‍ കയറി യുവാവിന്റെ ആത്മഹത്യ ഭീഷണി. അത്യാഹിത വിഭാഗത്തിന് സമീപം പുതുതായി പണി കഴിക്കുന്ന കെട്ടിടത്തിനു മുകളിലാണ് യുവാവ് കയറിയത്. ഒപ്പം ഒരു യുവതിയും ഉണ്ടായിരുന്നു. പോലീസും ഫയര്‍ഫോഴ്‌സും സ്ഥലത്ത് എത്തി യുവാവിനെ പിന്തിരിപ്പിച്ചു.

🔹സുഹൃത്തുക്കളോടൊപ്പം പുഴയില്‍ ഇറങ്ങിയ യുവാവിനെ ഒഴുക്കില്‍പ്പെട്ട് കാണാതായി. കോഴിക്കോട് എകരൂല്‍ സ്വദേശി ഷിജുവിനെയാണ് പൂനൂര്‍ പുഴയില്‍ കാണാതായത്.

🔹മലപ്പുറത്ത് സ്വത്ത് തര്‍ക്കത്തെത്തുടര്‍ന്ന് ജ്യേഷ്ഠന്‍ കൊല്ലപ്പെട്ടു. കൊണ്ടോട്ടി ഒഴുകൂര്‍ നൂര്‍ മന്‍സില്‍ ചിറ്റങ്ങാടന്‍ മുഹമ്മദ് റഫീഖ് ആണ് മരിച്ചത്. അനുജനായ ചിറ്റങ്ങാടന്‍ സാജിദി (49) നെ പൊലീസ് കസ്റ്റഡിയിലെടുത്തു.

🔹വാട്‌സ്ആപ്പ് വഴി ലഭിച്ച ഫയല്‍ തുറന്നയാള്‍ക്ക് മൂന്നര ലക്ഷം രൂപ നഷ്ടമായി. കോഴിക്കോട് ഉള്ളിയേരി സ്വദേശി വിനോദ് ഓണ്‍ലൈന്‍ തട്ടിപ്പിനിരയായതായി കാണിച്ച് പൊലീസില്‍ പരാതി നല്‍കി. സൈബര്‍ പൊലീസ് അന്വേഷണം ആരംഭിച്ചു.

🔹വൈറ്റില ഹബ്ബില്‍ സ്വകാര്യ ബസ് ജീവനക്കാര്‍ തമ്മിലുണ്ടായ തര്‍ക്കം വടിവാള്‍ ആക്രമണത്തില്‍ കലാശിച്ചു. ആക്രമണത്തില്‍ ഒരു ബസ് ഡ്രൈവര്‍ക്കും കണ്ടക്ടര്‍ക്കും പരിക്കേറ്റു. സംഭവത്തില്‍ മരട് പൊലീസ് കേസെടുത്തു.

🔹പത്തനംതിട്ട റാന്നിയില്‍ മിനി സൂപ്പര്‍മാര്‍ക്കറ്റില്‍ കാട്ടുപന്നി ആക്രമണം. കട ഉടമയായ സ്ത്രീക്ക് പരിക്കേറ്റു. മന്ദിരംപടി സ്വദേശിനി ബീനയ്ക്കാണ് പരിക്കേറ്റത്. ഇന്നലെ രാവിലെ എട്ടരയോടെ കടയുടെ ചില്ല് തകര്‍ത്ത് കാട്ടുപന്നി ഓടിക്കയറുകയായിരുന്നു.

🔹അയോധ്യ രാമക്ഷേത്രത്തിലെ സംഭാവനക്കൊള്ളയില്‍ പ്രതികളുടെ മൊബൈല്‍ഫോണുകളുടെ ഫോറന്‍സിക് പരിശോധന പൂര്‍ത്തിയായി. പ്രതികളുടെ സ്വത്ത് ഇടപാടുകളെക്കുറിച്ചും പ്രത്യേകസംഘം അന്വേഷിക്കുന്നുണ്ട്. 15,000 രൂപ മാസശമ്പളത്തിന് നോട്ടെണ്ണാനും മറ്റുമായി നിയമിക്കപ്പെട്ടവര്‍ ദിവസേന എട്ടു ലക്ഷം രൂപവരെ കടത്തിയെന്നാണ് കണ്ടെത്തല്‍.

🔹അയോധ്യ രാമക്ഷേത്രത്തിലെ സംഭാവന തട്ടിപ്പു കേസില്‍ എഐസിസി ജനറല്‍ സെക്രട്ടറി പ്രിയങ്കഗാന്ധിയോടു തെളിവു കൊണ്ടുവരാന്‍ ആവശ്യപ്പെടണമെന്ന വിചിത്ര വാദവുമായി വിശ്വ ഹിന്ദു പരിഷത്ത്. അരവിന്ദ് കെജ്രിവാള്‍ അടക്കമുള്ളവരില്‍ നിന്ന് തെളിവ് തേടണമെന്നാണ് വി എച്ച് പി അധ്യക്ഷന്‍ അലോക് കുമാര്‍ അയോധ്യ ഡിഎസ്പിക്കു കത്തു നല്‍കിയത്.

🔹അയോധ്യ ക്ഷേത്രക്കൊള്ളയില്‍ വിശ്വ ഹിന്ദു പരിഷത്ത് ഉപാധ്യക്ഷന്‍ ചമ്പത് റായിക്ക് കുരുക്ക് കൂടുതല്‍ മുറുക്കി മുന്‍ കേന്ദ്ര ആഭ്യന്തര സെക്രട്ടറിയുടെ പരാതി. അഞ്ചു കോടി വിലമതിക്കുന്ന സ്വര്‍ണ്ണത്തില്‍ പൊതിഞ്ഞ രാമചരിത മാനസം ചമ്പത് റായിയുടെ അറിവോടെ വഴിപാടായി നല്‍കിയെന്നും ഇപ്പോള്‍ ഒരു വിവരവുമില്ലെന്നും മുന്‍ കേന്ദ്ര ആഭ്യന്തര സെക്രട്ടറി എസ് ലക്ഷ്മി നാരായണന്‍ പ്രത്യേക അന്വേഷണ സംഘത്തിന് മൊഴി നല്‍കി.

🔹കേന്ദ്രസര്‍ക്കാരിന്റെ ഇ 20 പെട്രോള്‍ നയത്തിനെതിരെ ഡല്‍ഹിയില്‍ പ്രതിഷേധം. സംരംഭകനും ടിവി താരവുമായയ തെഹ്സീന്‍ പൂനാവാലയുടെ നേതൃത്വത്തില്‍ ‘എഥനോള്‍ തട്ടിപ്പിനെതിരേ ടീം ഭാരത്’ എന്നപേരിലാണ് പ്രതിഷേധം സംഘടിപ്പിച്ചത്.

🔹മുംബൈയില്‍ കനത്ത മഴ തുടരുന്നതിനാല്‍ ഇന്നു വിദ്യാഭ്യാസ സ്ഥാപനങ്ങള്‍ക്ക് അവധി. സര്‍ക്കാര്‍, മുനിസിപ്പല്‍, സ്വകാര്യ സ്‌കൂളുകള്‍ക്കും കോളേജുകള്‍ക്കും അവധി ബാധകമാണ്.

🔹ചതിയന്‍മാരായ വിമതര്‍ ധൈര്യമുണ്ടെങ്കില്‍ ബിജെപിയില്‍ ചേര്‍ന്നു തന്നോട് പൊരുതണമെന്നു തൃണമൂല്‍ കോണ്‍ഗ്രസ് നേതാവ് മമത ബാനര്‍ജി. അല്ലാതെ ബിജെപിയുടെ സ്പോണ്‍സേര്‍ഡ് കളിക്ക് നില്‍ക്കരുതെന്നും മമത.

🔹കന്നിമത്സരത്തിനൊരുങ്ങി തെരഞ്ഞെടുപ്പ് തന്ത്രജ്ഞനും ജന്‍ സുരാജ് പാര്‍ട്ടി സ്ഥാപകനുമായ പ്രശാന്ത് കിഷോര്‍. ബിജെപി ദേശീയ അധ്യക്ഷന്‍ നിതിന്‍ നബീന്‍ രാജിവച്ച ബങ്കിപ്പൂര്‍ സീറ്റിലേക്ക് പ്രശാന്ത് കിഷോറിന്റെ സ്ഥാനാര്‍ത്ഥിത്വം ജന്‍ സുരാജ് പാര്‍ട്ടി പ്രഖ്യാപിച്ചു.

🔹കുട്ടികള്‍ക്കെതിരായ ലൈംഗികാതിക്രമ ദൃശ്യങ്ങള്‍ ഇന്‍സ്റ്റാഗ്രാം വഴി പ്രചരിപ്പിച്ചതിന് മെറ്റയ്ക്ക് കേന്ദ്ര ഐടി മന്ത്രാലയം നോട്ടീസ് നല്‍കി. 7 ദിവസത്തിനകം വിശദീകരണം നല്‍കണമെന്നും ഇത്തരം ദൃശ്യങ്ങള്‍ അടിയന്തരമായി നീക്കം ചെയ്യണമെന്നും കേന്ദ്രം ആവശ്യപ്പെട്ടു.

🔹പൊലീസ് സ്റ്റേഷനില്‍ അപ്രന്റീസായി ജോലി ചെയ്തതിനിടെ 32 തോക്കുകള്‍ അടിച്ച് മാറ്റിയ വിരുതന്‍ കൊലക്കേസ് പ്രതികൂടിയായി പിടിയിലായി. ഫരീദാബാദിലെ പൊലീസ് സ്റ്റേഷനിലെ ആയുധപ്പുരയില്‍ നിന്നാണ് മോനു എന്ന 22കാരന്‍ തോക്കുകള്‍ മോഷ്ടിച്ചത്. ഇയാളെ അറസ്റ്റു ചെയ്തു ചോദ്യംചെയ്തപ്പോഴാണ് കാമുകി സരിതയുമൊത്ത് ബന്ധുവായ ശിവം എന്ന 19 കാരനെ കൊലപ്പെടുത്തിയ വിവരം പുറത്തുവന്നത്.

🔹ഇറാനില്‍ വന്‍ ജനാവലിയുമായി ഖമനെയിയുടെ വിലാപയാത്രക്കിടെ മൂവായിരത്തോളം പേര്‍ വരെ മരിച്ചേക്കാമെന്ന് ജര്‍മ്മന്‍ മാധ്യമമായ ‘ഡി വെല്‍റ്റ്’. വന്‍ ജനക്കൂട്ടം ഉണ്ടാക്കുന്ന അപകടങ്ങള്‍ നേരിടാന്‍ അടിയന്തര മുന്‍കരുതലുകള്‍ എടുത്തെന്നും റിപ്പോര്‍ട്ടില്‍ പറയുന്നു.

🔹റഷ്യയിലെ പ്രധാന ഓയില്‍ ടെര്‍മിനലിന് നേരേ യുക്രൈന്റെ ആക്രമണം. സെന്റ് പീറ്റേഴ്സ്ബര്‍ഗിലെ കൂറ്റന്‍ ഓയില്‍ ടെര്‍മിനലിനു നേരേയാണ് ആക്രമണം നടത്തിയത്. റഷ്യയുടെ നേവല്‍ ബേസിന് നേരേയും ആക്രമണം നടത്തിയതായും യുക്രൈന്‍ പ്രസിഡന്റ് വൊളോദിമിര്‍ സെലന്‍സ്‌കി അവകാശപ്പെട്ടു.

🔹വിദേശവനിതകളെ കൂട്ടബലാത്സംഗം ചെയ്ത കേസില്‍ കൊച്ചുമകന്‍ അറസ്റ്റിലായതിന് പിന്നാലെ പാക്കിസ്ഥാന്‍ ഉപപ്രധാനമന്ത്രി ഇഷാഖ് ദറിന്റെ രാജിക്കായി മുറവിളി. കേസില്‍ പ്രതിയായ കൊച്ചുമകന്‍ റാസ ദറിനെ സംരക്ഷിക്കാനായി ഇഷാഖ് ദര്‍ ശ്രമിക്കുന്നതായി ആരോപിച്ചാണ് മന്ത്രിക്കെതിരേ വിവിധ രാഷ്ട്രീയനേതാക്കള്‍ രംഗത്തെത്തിയത്.

🔹കാനറികള്‍ കണ്ണീരോടെ കളംവിട്ടു. അഞ്ചു ലോക കിരീടങ്ങളുടെ പെരുമയുള്ള ബ്രസീലിനെ ഒന്നിനെതിരേ രണ്ടു ഗോളുകള്‍ക്ക് അട്ടിമറിച്ച് നോര്‍വെ ക്വാര്‍ട്ടറില്‍. കോടിക്കണക്കിനു ബ്രസീല്‍ ആരാധകരുടെ നെഞ്ചകം തകര്‍ത്തുകൊണ്ടാണ് 79ാം മിനിറ്റില്‍ നോര്‍വേയുടെ എര്‍ലിങ് ഹാളണ്ട് ഹെഡറിലൂടെ ബ്രസീല്‍ വല കുലുക്കിയത്. 90 ാം മിനിറ്റില്‍ കിടിലനൊരു ഇടംകാലനടിയില്‍ ഹാളണ്ട് നോര്‍വെയുടെ വിജയഗോള്‍ പൂര്‍ത്തിയാക്കി. 14-ാം മിനിറ്റില്‍ ബ്രൂണോ ഗ്വിമറെഷ് നഷ്ടപ്പെടുത്തിയ പെനാല്‍റ്റിക്ക് ബ്രസീലിന് നല്‍കേണ്ടി വന്ന വില വളരെ വലുതായിരുന്നു. കളിയവസാനിക്കാന്‍ നിമിഷങ്ങള്‍ മാത്രം ബാക്കിനില്‍ക്കേ ലഭിച്ച പെനാല്‍റ്റി വലയിലെത്തിച്ച് നെയ്മറാണ് ബ്രസീലിന് ആശ്വാസ ഗോള്‍ നേടിയത്.

🔹ലോകകപ്പ് ക്വാര്‍ട്ടറില്‍ ജൂലൈ 10 പുലര്‍ച്ചെ 1:30 ന് ഫ്രാന്‍സ്- മൊറോക്കോ പോരാട്ടം. പരാഗ്വയ്യെ ഏകപക്ഷീയമായ ഒരു ഗോളിന് പരാജയപ്പെടുത്തിയാണ് ഫ്രാന്‍സ് ക്വാര്‍ട്ടറിലെത്തിയത്. 2022 റഷ്യന്‍ ലോകകപ്പില്‍ സെമിയില്‍ മൊറോക്കോയെ തോല്‍പ്പിച്ച ആത്മവിശ്വാസത്തിലാണ് ഫ്രാന്‍സ്.

🔹വനിതാ ടി20 ലോകകപ്പില്‍ ഇംഗ്ലണ്ടിനെ ഏഴ് വിക്കറ്റിന് തകര്‍ത്ത് ഓസ്ട്രേലിയക്ക് ഏഴാം കീരീടം. ലണ്ടനിലെ ലോര്‍ഡ്സില്‍ നടന്ന കിരീടപ്പോരില്‍ ആദ്യം ബാറ്റ് ചെയ്ത ഇംഗ്ലണ്ട് 20 ഓവറില്‍ 4 വിക്കറ്റ് നഷ്ടത്തില്‍ 150 റണ്‍സെടുത്തു. മറുപടി ബാറ്റിംഗിനിറങ്ങിയ ഓസീസ് 17.1 ഓവറില്‍ 3 വിക്കറ്റ് നഷ്ടത്തില്‍ ലക്ഷ്യത്തിലെത്തി. രണ്ടാം വിക്കറ്റില്‍ ബെത് മൂണി-ലിച്ചിഫീല്‍ഡ് സഖ്യം 67 പന്തില്‍ സെഞ്ചുറി കൂട്ടുകെട്ടുയര്‍ത്തി ഓസീസിനെ വിജയത്തിന് അടിത്തറയിടുകയായിരുന്നു.

🔹മലയാളത്തിലെ ഓള്‍ ടൈം ബ്ലോക്ക്ബസ്റ്ററുകളില്‍ ഒന്നായ ‘ലോക-ചാപ്റ്റര്‍ വണ്‍:ചന്ദ്ര’ ക്ക് വീണ്ടും അന്താരാഷ്ട്ര അംഗീകാരം. 2026 ല്‍ ജര്‍മനിയില്‍ നടക്കുന്ന 23 മത് സ്റ്റുട്ട്ഗാര്‍ട്ട് ഇന്ത്യന്‍ ഫിലിം ഫെസ്റ്റിവലേക്ക് ആണ് ചിത്രം ഔദ്യോഗികമായി തിരഞ്ഞെടുക്കപ്പെട്ടത്. ഇത് കൂടാതെ സൗത്ത് കൊറിയയില്‍ നടക്കുന്ന ബുക്കിയോണ്‍ ഇന്റര്‍നാഷണല്‍ ഫാന്റാസ്റ്റിക് ഫിലിം ഫെസ്റ്റിവലിലേക്കും ചിത്രം തിരഞ്ഞെടുക്കപ്പെട്ടു. ജൂലൈ 12 വരെ ആണ് ബൈഫാന്‍ അരങ്ങേറുന്നത്. ദുല്‍ഖറിന്റെ വേഫറെര്‍ ഫിലിംസ് നിര്‍മ്മിച്ച ചിത്രത്തില്‍ കല്യാണി പ്രിയദര്‍ശന്‍, നസ്ലന്‍ എന്നിവരാണ് പ്രധാന വേഷങ്ങള്‍ ചെയ്തത്. 300 കോടി ആഗോള കളക്ഷന്‍ നേടുന്ന ആദ്യ മലയാള ചിത്രമായി മാറിയ ‘ലോക’, കേരളത്തില്‍ നിന്ന് 121 കോടി ഗ്രോസ് കളക്ഷന്‍ നേടി ഇന്‍ഡസ്ട്രി ഹിറ്റ് പട്ടവും സ്വന്തമാക്കിയിരുന്നു. നേരത്തെ കേരളാ ഫിലിംസ് ക്രിട്ടിക്സ് അവാര്‍ഡ് 2025 ല്‍ അഞ്ച് പുരസ്‌കാരങ്ങളുമായി ചിത്രം വലിയ നേട്ടം കരസ്ഥമാക്കിയിരുന്നു.

💦 ഗുരുജിയുടെ വാക്കുകൾ
*****************************

എല്ലാം സ്വന്തം അനുഭവങ്ങളിലൂടെ മാത്രം സ്വായത്തമാക്കാൻ കഴിയില്ല. കുറെ നിരീക്ഷണവും ഗവേഷണവും വേണം . അടുത്തുള്ളവയെ അറിയാനും അകലെയുള്ളവയെ കണ്ടെത്താനുമുള്ള താൽപര്യം ആണ്‌ ക്രിയാത്മകതയും കാലികപ്രസക്തിയും തീരുമാനിക്കുന്നത്‌. സ്വന്തം ലോകം വലുതാക്കുന്നതിനൊപ്പം അപരന്റെ ലോകത്തെ ബഹുമാനിക്കാനും പഠിക്കണം.. ഒരേ പ്രായമുള്ളവർക്കെല്ലാം ഒരേ ചിന്തയോ അറിവൊ അല്ല .. ഓരോരുത്തരും അടയാളപ്പെടുത്തുന്ന ശരിതെറ്റുകളിൽ പോലും വ്യതിയാനങ്ങൾ ഉണ്ടാകും . ആരുടെയും അറിവുകളെ നിഷേധിക്കരുത്‌.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂലൈ 6

•ലോക ജന്തുജന്യരോഗ ദിനം (World Zoonoses Day): പ്രശസ്ത ഫ്രഞ്ച് ശാസ്ത്രജ്ഞനായ ലൂയി പാസ്ചർ 1885 ജൂലൈ 6-നാണ് പേവിഷബാധക്കെതിരെയുള്ള (Rabies) ആദ്യത്തെ വാക്സിൻ വിജയകരമായി പരീക്ഷിച്ചത്. ആ ചരിത്രപരമായ വിജയത്തിന്റെ ഓർമ്മപ്പെടുത്തലായാണ് ഈ ദിവസം ജന്തുജന്യരോഗ ദിനമായി ആചരിക്കുന്നത്. എലിപ്പനി, നിപ, പേവിഷബാധ, കുരങ്ങുപനി തുടങ്ങിയവയെല്ലാം ജന്തുജന്യരോഗങ്ങൾക്ക് ഉദാഹരണങ്ങളാണ്.

•അന്താരാഷ്ട്ര ചുംബന ദിനം (International Kissing Day): സ്നേഹത്തിന്റെ വിവിധ ഭാവങ്ങളെയും ബന്ധങ്ങളെയും ആഘോഷിക്കുന്നതിനായി അനൗദ്യോഗികമായി ഈ ദിവസത്തെ അന്താരാഷ്ട്ര ചുംബന ദിനമായും ചിലയിടങ്ങളിൽ ആചരിക്കാറുണ്ട്.

•ഡോ. ശ്യാമപ്രസാദ് മുഖർജി ജന്മദിനം: ഭാരതീയ ജനസംഘത്തിന്റെ സ്ഥാപകനായ ഡോ. ശ്യാമപ്രസാദ് മുഖർജിയുടെ ജന്മദിനവും ജൂലൈ 6-നാണ്.

തയ്യാറാക്കിയത്: കപിൽ ശങ്കർ

29 Likes

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 06 | തിങ്കൾ ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂലൈ 6

തയ്യാറാക്കിയത്: കപിൽ ശങ്കർ

ഫോമയുടെ ഇന്നലെ, ഇന്ന്, നാളെ ചര്‍ച്ചയാകുന്നു; സൗഹൃദ സംഗമം ഒക്ടോബര്‍ 16-ന് ചിക്കാഗോയില്‍

കോതമംഗലം മാർ അത്തനേഷ്യസ് കോളേജ് പൂർവ വിദ്യാർത്ഥി കുടുംബ സംഗമം നവംബർ 13 മുതൽ 15 വരെ ഫിലാഡൽഫിയയിൽ

ക്രിസ്റ്റ പൈക്കിന്റെ വധശിക്ഷ പരാജയപ്പെട്ടു; നില അതീവ ഗുരുതരം

LEAVE A REPLY Cancel reply

Most Popular

ഫോമയുടെ ഇന്നലെ, ഇന്ന്, നാളെ ചര്‍ച്ചയാകുന്നു; സൗഹൃദ സംഗമം ഒക്ടോബര്‍ 16-ന് ചിക്കാഗോയില്‍

കോതമംഗലം മാർ അത്തനേഷ്യസ് കോളേജ് പൂർവ വിദ്യാർത്ഥി കുടുംബ സംഗമം നവംബർ 13 മുതൽ 15 വരെ ഫിലാഡൽഫിയയിൽ

ക്രിസ്റ്റ പൈക്കിന്റെ വധശിക്ഷ പരാജയപ്പെട്ടു; നില അതീവ ഗുരുതരം

അമേരിക്കയിൽ ഭവന വായ്പ പലിശ നിരക്ക് നാല് വർഷത്തിനിടയിലെ ഏറ്റവും വലിയ വർദ്ധനവിലേക്ക്

Recent Comments

EDITOR PICKS

ഫോമയുടെ ഇന്നലെ, ഇന്ന്, നാളെ ചര്‍ച്ചയാകുന്നു; സൗഹൃദ സംഗമം ഒക്ടോബര്‍ 16-ന് ചിക്കാഗോയില്‍

കോതമംഗലം മാർ അത്തനേഷ്യസ് കോളേജ് പൂർവ വിദ്യാർത്ഥി കുടുംബ സംഗമം നവംബർ 13 മുതൽ 15 വരെ ഫിലാഡൽഫിയയിൽ

ക്രിസ്റ്റ പൈക്കിന്റെ വധശിക്ഷ പരാജയപ്പെട്ടു; നില അതീവ ഗുരുതരം

POPULAR POSTS

ഒക്ടോബർ 2 ഗാന്ധിജയന്തി: ജീവിത വിജയത്തിന് വിദ്യാർഥികൾക്കുള്ള ഗാന്ധിസൂക്തങ്ങൾ

ഫ്ലൈദുബായ് വിമാനത്തിനുള്ളിലെ ആക്രമണം; പരിക്കേറ്റ ഇന്ത്യൻ പൈലറ്റിൻ്റെ ആരോഗ്യനില തൃപ്തികരം

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ജൂലൈ 06 | തിങ്കൾ ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

ജൂലൈ 6

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************