സെക്യൂരിറ്റി ജീവനക്കാരിയുടെ കാൽ തൊട്ട് തൊഴുത് അനുഗ്രം വാങ്ങി വിദ്യാർത്ഥി.. കെട്ടിപിടിച്ച് പൊട്ടിക്കരഞ്ഞു ആ അമ്മ മനസ്സ്! ഇത് രക്തബന്ധത്തേക്കാൾ വലിയ സ്നേഹബന്ധം.
ഹൈദരാബാദിലെ ഒരു ക്യാമ്പസിലെ ബിരുദദാന ചടങ്ങിന്റെ അവസാന ദിവസം. എല്ലാവരും സർട്ടിഫിക്കറ്റ് വാങ്ങി അധ്യാപകരോടും കൂട്ടുകാരോടും യാത്ര പറയാനും ഫോട്ടോ എടുക്കാനും ഓടിനടക്കുമ്പോൾ ഒരു വിദ്യാർത്ഥി മാത്രം നേരെ പോയത് കോളേജ് ഗേറ്റിന്റെ മൂലയിലിരിക്കുന്ന കസേര ലക്ഷ്യമാക്കിയാണ്. അവിടെ പതിവുപോലെ ഡ്യൂട്ടിയിലാണ് കോളേജ് സെക്യൂരിറ്റിയായ സ്ത്രീ. വെയിലും മഴയും കൊണ്ട് എന്നും ആ ഗേറ്റിൽ കാവൽ നിൽക്കുന്ന സെക്യൂരിറ്റി ജീവനക്കാരി.
മറ്റു കുട്ടികൾക്ക് അവർ വെറുമൊരു സെക്യൂരിറ്റി മാത്രമായിരുന്നു. പക്ഷെ, അമ്മയില്ലാത്ത, വീട്ടിൽ നിന്നും മാറി ഹോസ്റ്റലിൽ നിന്നു പഠിക്കുന്ന അവന് അവർ അങ്ങനെയായിരുന്നില്ല. ഉച്ചയ്ക്ക് ക്യാന്റീനിലേക്ക് പോകുമ്പോൾ “മോനേ.. ഊണ് കഴിച്ചോ?” എന്ന് ചോദിക്കുന്ന, ഇടക്കൊക്കെ നല്ല ഭക്ഷണം ഉണ്ടാക്കി കൊണ്ട് വന്ന് കൊടുക്കുന്ന, പരീക്ഷക്കാലത്ത് വല്ലാതെ ക്ഷീണിച്ചു വരുമ്പോൾ “നന്നായി പഠിക്ക്, എല്ലാം ശരിയാകും” എന്ന് പറഞ്ഞ് ആശ്വസിപ്പിക്കുന്ന ഒരമ്മയായിരുന്നു അവർ.
തന്റെ അടുത്തേക്ക് ഓടിവരുന്ന അവനെ കണ്ട് “പോകുകയാണോ മോനേ?” എന്ന് ചോദിച്ച അവരോട് അവൻ ഒന്നും മിണ്ടിയില്ല. അവൻ അവരുടെ അടുത്ത് ചെന്ന് അവരുടെ കാലിൽ തൊട്ട് തൊഴുത് അനുഗ്രഹം വാങ്ങി. വലിയ ഉദ്യോഗസ്ഥരും വിദ്യാർത്ഥികളും കടന്നു പോകുമ്പോൾ എഴുന്നേറ്റ് നിന്ന് സല്യൂട്ട് മാത്രം ചെയ്ത് ശീലിച്ച അവർക്ക്, ഒരാൾ തന്നോട് ഇത്രയും വലിയ സ്നേഹവും ആദരവും കാണിക്കുന്നത് സഹിക്കാവുന്നതിലും അപ്പുറമായിരുന്നു.
സന്തോഷവും സങ്കടവും ഒരുമിച്ച് വന്ന അവരുടെ കണ്ണുകൾ നിറഞ്ഞു ഒഴുകി. സ്വന്തം മകനെപ്പോലെ സ്നേഹിച്ച അവനെ അവർ വാരിപ്പുണർന്നു പൊട്ടികരഞ്ഞു. “നീ വലിയ നിലയിൽ എത്തും മോനേ” നിറകണ്ണുകളോടെ അവർ അവനെ അനുഗ്രഹിച്ചു. പുസ്തകത്താളുകളിൽ മാർക്ക് കുറവായിരുന്നെങ്കിലും, ജീവിതമെന്ന വലിയ പാഠശാലയിൽ അവനായിരുന്നു ഒന്നാമൻ.
