🌹 “ഇന്നത്തെ ചിന്താവിഷയം” 🌹 – 2025 | ജനുവരി 10 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

സമ്പത്തു വേണ്ട വിധം കൈകാര്യം ചെയ്യാൻ ആകണം
—————————————————————————————-

ഒരു ഗ്രാമത്തിൽ സുഹൃത്തുക്കളായ രണ്ടു സന്യാസിമാരുണ്ടായിരുന്നു. ഒരാൾ ത്യാഗിവര്യനായിരുന്നു. ത്യജിക്കുന്നതിലൂടെയാണ് എല്ലാം ലഭിക്കുന്നതെന്നായിരുന്നു അദ്ദേഹം ചിന്തിച്ചിരുന്നത്. എന്നാൽ, രണ്ടാമത്തേയാൾ സമ്പാദ്യ ശീലനായിരുന്നു. സമ്പത്തില്ലെങ്കിൽ ഒന്നുമാകില്ല എന്നതായിരുന്നു അദ്ദേഹത്തിൻ്റെ കാഴ്ചപ്പാട് .

ഒരിക്കൽ ഇരുവരും, ഒരു സന്ധ്യാ സമയം, നദിക്കരയിലെത്തി. ത്യാഗിയായ സന്യാസി പറഞ്ഞു: “വഞ്ചിക്കാരനു പണം കൊടുത്ത് അപ്പുറത്തേക്കു പോകണ്ടാ; ഈ രാത്രി നമുക്കിവിടിരിക്കാം.” എന്നാൽ, സമ്പാദ്യ ശീലക്കാരൻ സന്യാസി പറഞ്ഞു: “ഇവിടിരുന്നാൽ തണുപ്പേറ്റു മരിക്കും. നമുക്കു വഞ്ചിയിൽ അക്കരക്കു പോകാം” അദ്ദേഹം ത്യാഗിയേയും കൂട്ടി, വഞ്ചിക്കൂലി കൊടുത്ത് , അക്കരയെത്തി. അദ്ദേഹം ത്യാഗിയോടു ചോദിച്ചു: “ഇപ്പോൾ മനസ്സിലായോ, സമ്പാദ്യത്തിൻ്റെ വില?” ത്യാഗിവര്യൻ പറഞ്ഞു: “നിങ്ങൾ ത്യാഗം ചെയ്തതു കൊണ്ടാണ്, നാം ഇക്കരയെത്തിയത്. പണം കയ്യിൽ സൂക്ഷിച്ചിരുന്നുവെങ്കിൽ, നാം ഇവിടെ എത്തില്ലായിരുന്നു”.

പ്രയോജനപ്രദമല്ലെങ്കിൽപ്പിന്നെ, എന്തിനാണു അധിക പ്രത്നവും സമ്പാദ്യവും? ആർക്കും ഉപയോഗപ്പെടാത്തത് എത്ര അധികമുണ്ടെങ്കിലും, എന്തു പ്രയോജനം?
ക്രയവിക്രയ സാദ്ധ്യതയില്ലാത്തതെല്ലാം, നിശ്ചലവും നിർഗുണവുമായിരിക്കും; അതു സ്വത്തായാലും, സമ്പാദ്യമായാലും?

സുരക്ഷിത അറകളിൽ പൂട്ടി വെച്ചിരിക്കുന്നതെല്ലാം, അവിടെയിരുന്നു ശ്വാസം മുട്ടി മരിക്കുകയേയുള്ളു. “അരിപ്പൻ്റെ (പിശുക്കൻ്റെ) മുതൽ തുരുമ്പെടുക്കും” എന്നാണല്ലോ ജ്ഞാനമൊഴി. ഇന്നത്തെ നിക്ഷേപത്തിന് നാളെയെങ്കിലും, എന്തെങ്കിലും പ്രയോജനം ഉണ്ടായിരിക്കണം. അദ്ധ്വാനിച്ചുണ്ടാക്കുന്നതെല്ലാം, മറ്റാർക്കോ വേണ്ടി അവശേഷിപ്പിക്കുന്നതിൽ അർത്ഥമില്ല. കുറച്ചെങ്കിലും സ്വജീവിതം ആസ്വദിക്കുന്നതിന് ഉപകരിക്കണം; ആവശ്യത്തിലിരിക്കുന്നവരുമായി പങ്കിടാനും കഴിയണം.

വിതരണം ചെയ്യാനറിയാത്തവർ, സംഭരിച്ചു വച്ചിട്ടെന്തു കാര്യം? നാം ചിലവഴിക്കുന്ന ചില്ലിക്കാശിലൂടെയും, മറ്റു ചിലർക്കു ജീവിതം കരുപ്പിടിപ്പിക്കാനാകുന്നെങ്കിൽ, അതു സന്തോഷത്തിനു വക നൽകും. സ്വന്തം ജീവിതം മാത്രം സുരക്ഷിതമാക്കുന്നതു സ്വാർത്ഥത. എല്ലാവർക്കും ജീവിക്കാനുള്ള സാദ്ധ്യത രൂപപ്പെടുത്തുന്നതു അപരോന്മുഖത. സമ്പത്തു വേണ്ട വിധം കൈകാര്യം ചെയ്യാൻ നമുക്കാകണം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര