തിരുവനന്തപുരം: സംസ്ഥാനത്തു അറുപതിനായിരം മുൻഗണനാ കാർഡുകൾ കൂടിയാണ് വിതരണം ചെയ്യുന്നത്. 12000 മഞ്ഞ കാർഡും 48000 പിങ്ക്‌ കാർഡുകളുമാണ്‌ വിതരണം ചെയ്യുക. അക്ഷയ കേന്ദ്രം വഴി ഡിസംബർ 10 വരെ അപേക്ഷിക്കാം. പരിശോധകൾ പൂർത്തിയാക്കി കാർഡ് അനുവദിക്കും.
അനർഹരായ കാർഡ് ഉടമകൾ സറണ്ടർ ചെയ്‌ത കാർഡിന് പകരമാണ്‌ വിതരണം. മുൻഗണനാ കാർഡുകാരുടെ എണ്ണം വർധിപ്പിക്കാൻ സംസ്ഥാനം ആവശ്യപ്പെട്ടെങ്കിലും കേന്ദ്രം അനുവദിച്ചിരുന്നില്ല. നൽകുന്നത്‌.
കേരളത്തിൽ ആകെ 94,80,572 കാർഡാണുള്ളത്‌. 5,83,002 മഞ്ഞയും 35,95,489 പിങ്കും കാർഡുമാണ് ഇതിലുള്ളത്‌. ഇവർക്ക്‌ മാത്രമാണ്‌ കേന്ദ്രം ഭക്ഷ്യധാന്യം അനുവദിക്കുന്നത്‌. നീല, വെള്ള, ബ്രൗൺ കാർഡുകാർക്ക്‌ സംസ്ഥാന സർക്കാർ പണമുപയോഗിച്ചാണ്‌ റേഷൻ.
അനർഹരെ കണ്ടെത്താൻ ഭക്ഷ്യവകുപ്പ്‌ നടത്തിയ ‘ഓപ്പറേഷൻ യെല്ലൊ’ പരിശോധനയിൽ 1.75 ലക്ഷം കാർഡുകൾ കണ്ടെത്തിയിരുന്നു. സർക്കാർ ജീവനക്കാർക്കും ആദായനികുതി അടയ്‌ക്കുന്നവർക്കും മുൻഗണനാ കാർഡുകളുള്ളതായി കണ്ടെത്തി. എട്ടുകോടി രൂപയാണ് പിഴയീടാക്കിയത്.
സർക്കാർ, അർധ സർക്കാർ ജീവനക്കാർ, പെൻഷൻകാർ, 25000 രൂപയിൽ കൂടുതൽ മാസ വരുമാനമുള്ളവർ, 1000 ചതുരശ്ര അടിയിൽ കൂടുതൽ വലിപ്പമുള്ള വീടുള്ളവർ, ഒരേക്കറിൽ കൂടുതൽ പുരയിടമുള്ളവർ (പട്ടിക വർഗക്കാർ ഒഴികെ), ആദായ നികുതി അടയ്‌ക്കുന്നവർ, നാലുചക്ര വാഹനമുള്ളവർ എന്നിവർക്ക്‌ മുൻഗണനാ കാർഡിന് അർഹതയില്ല.
മൂന്നുമാസം തുടർച്ചയായി റേഷൻ ഭക്ഷ്യധാന്യം വാങ്ങിയില്ലെങ്കിലും മുൻഗണനാ കാർഡുകാരെ പട്ടികയിൽനിന്ന്‌ ഒഴിവാക്കും. റേഷൻ വാങ്ങാൻ അസൗകര്യമുണ്ടെങ്കിൽ റേഷൻകടയിൽ എഴുതി നൽകാം.
മുൻഗണനാ കാർഡിന് അപേക്ഷിക്കേണ്ടത് എങ്ങനെ?
ഡിസംബർ 10 വൈകിട്ട് 5 മണിവരൊണ് മുൻഗണനാ വിഭാഗത്തിലേക്ക് കാർഡ് മാറ്റാനുള്ള അപേക്ഷ ഓൺലൈനായി സ്വീകരിക്കുക. ബന്ധപ്പെട്ട രേഖകൾ സഹിതം അക്ഷയ കേന്ദ്രങ്ങൾ വഴിയോ സിറ്റിസൺ ലോഗിൻ പോർട്ടൽ ecitizen.civilsupplieskerala.gov.in വഴിയോ അപേക്ഷ സമർപ്പിക്കാൻ കഴിയും.
മുൻഗണനാ കാർഡ് അപേക്ഷിക്കാൻ വേണ്ട രേഖകൾ
2009 ലെ ബിപിഎൽ പട്ടികയിലുൾപ്പെട്ട സാക്ഷ്യപത്രം, 2009 ലെ ബിപിഎൽ പട്ടികയിലുൾപ്പെടാത്ത കുടുംബങ്ങൾ മുൻഗണനാ വിഭാഗത്തിലേക്ക് അർഹരാണെന്ന തദേശസ്ഥാപന സെക്രട്ടറിയുടെ സാക്ഷ്യപത്രം, വീടില്ലാത്തവർ പഞ്ചായത്ത്/ നഗരസഭാ സെക്രട്ടറിയുടെ സാക്ഷ്യപത്രം, സ്ഥലമില്ലാത്തവർ വില്ലേജ് ഓഫീസറുടെ സാക്ഷ്യപത്രം, വരുമാന സർട്ടിഫിക്കറ്റ്, വീടിന്‍റെ വിസ്തീർണം കാണിക്കുന്ന സർട്ടിഫിക്കറ്റ്, നികുതിച്ചീട്ട് പകർപ്പ്, ഗുരുതര രോഗങ്ങളുള്ളവർ ഡോക്ടറുടെ സാക്ഷ്യപത്രം, പരമ്പരാഗത തൊഴിൽചെയ്തു ജീവിക്കുന്നവർ ബന്ധപ്പെട്ട അധികാരികളുടെ സാക്ഷ്യപത്രം എന്നിവ സഹിതമാണ് അപേക്ഷ സമർപ്പിക്കേണ്ടത്.
