🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 23 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

എന്താണ് സ്വന്തമാക്കേണ്ടത് ?
—————————————————

ഒരു സന്യാസിക്കു പ്രായമേറയായി. ഊന്നു വടി ഉപയോഗിച്ചാണ് അദ്ദേഹം നടന്നിരുന്നത് . അദ്ദേഹത്തിൻ്റെ പ്രഭാഷണങ്ങളിലും പ്രവർത്തനങ്ങളിലും ആകൃഷ്ടനായിരുന്ന ഒരു ധനവാൻ, ഒരിക്കൽ അദ്ദേഹത്തെ സന്ദർശിച്ച് ഒരു സ്വർണ്ണ ഊന്നു വടി, അദ്ദേഹത്തിനു സമ്മാനമായി കൊടുത്തു. കുറേ നേരം അതിൽ നോക്കിയ ശേഷം, സന്യാസി അതു ധനവാനു തന്നെ തിരികെ കൊടുത്തിട്ടു പറഞ്ഞു: “ഇതിവിടെ വച്ചാൽ, ആരെങ്കിലും എടുത്തു കൊണ്ടു പോകും. മറ്റുള്ളവർ സ്വന്തമാക്കാനാഗ്രഹിക്കുന്നതൊന്നും, ഞാനിവിടെ സൂക്ഷിക്കാറില്ല!”

തങ്ങൾ സ്വന്തമാക്കുന്നതൊന്നും ആർക്കും പൂർണസംതൃപ്തി നൽകാറില്ല: അതു യാചകനായാലും, കോടീശ്വരനായാലും. ഓരോ സ്വപ്ന സാക്ഷാത്ക്കാരവും, നൈമിഷികമായ സംതൃപ്തി മാത്രമേ നൽകൂ. അതു കഴിയുമ്പോൾ, വീണ്ടും കൂടുതൽ നേട്ടങ്ങൾക്കു വേണ്ടി അവർ ഓടിത്തുടങ്ങും. അസംതൃപ്തമായ മനുഷ്യ മനസ്സ്, സ്വയം തൃപിതപ്പെടുത്താനായി സ്വീകരിക്കുന്ന മാർഗമാണ്, പുതിയതിലേക്കുള്ള യാത്ര. പഴയതിൻ്റെയും ശീലിച്ചതിൻ്റെയും വിരസതയിൽ നിന്നു രക്ഷപെടാനായി, അവർ കാണുന്നതെല്ലാം കൈപ്പിടിയിലൊതുക്കാൻ ശ്രമിച്ചു കൊണ്ടിരിക്കും.

ആഗ്രഹ പൂർത്തീകരണം മാത്രമായിരിക്കരുത് ജീവിത ലക്ഷ്യം. നാം സ്വന്തമാക്കാനാഗ്രഹിക്കുന്നതു പലതും, മറ്റു പലരും ആഗ്രഹിക്കുന്നതാകാം. പുറമേ നിന്നു ലഭിക്കുന്ന സന്തോഷങ്ങളെല്ലാം, ഒരളവിൽ പ്രലോഭനങ്ങളായി മാറും. അവനവൻ്റെ ഉള്ളിലാണ് ആനന്ദം തിരയേണ്ടതും, കണ്ടെത്തേണ്ടതും.

സ്വന്തമാക്കിയതൊന്നും എക്കാലവും ആരുടേയും സ്വന്തമായിരിക്കില്ല. അവകാശികൾ മാറി, മാറി വരും. നിത്യതയിലേക്കു സൂക്ഷിച്ചു വയ്ക്കാൻ പറ്റുന്നവയെ വേണം നാം സ്വന്തമാക്കുവാൻ. എന്തൊക്കെ കൈവശപ്പെടുത്തി എന്നു മാത്രമല്ല, എന്തൊക്കെ മറ്റുള്ളവർക്കായി വിട്ടുകൊടുത്തു എന്നതും കൂടെയാണ് നമ്മുടെ സന്തോഷത്തിൻ്റെ അളവുകോലാകേണ്ടത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര