🌹 “ഇന്നത്തെ ചിന്താവിഷയം” 🌹 – 2024 | ജൂൺ 26 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

ചങ്ങല സുരക്ഷിതത്വം നൽകില്ല.
—————————————————.

ഒരു ദീർഘയാത്രയ്ക്കൊരുങ്ങിയ ബിസിനസ്സുകാരൻ, പതിനായിരം രൂപയുടെ അടിയന്തര വായ്പയ്ക്കായി, ബാങ്ക് മാനേജർക്ക് അപേക്ഷ നൽകി. തത്തുല്യമായ എന്തെങ്കിലും ഇടു നൽകാൻ മാനേജർ ആവശ്യപ്പെട്ടു. ബിസ്നസ്സുകാരൻ തൻ്റെ വില പിടിപ്പുള്ള കാർ, ബാങ്കിൻ്റെ മുറ്റത്തു പാർക്കു ചെയ്ത്, താക്കോൽ മാനേജരെ ഏല്പിച്ച്, പണവും വാങ്ങിപ്പോയി.

ഒരു മാസം കഴിഞ്ഞ് തിരിച്ചെത്തിയ അയാൾ, പതിനായിരം രൂപയും അതിൻ്റെ പലിശയും കൊടുത്ത് കാർ തിരിച്ചെടുത്തു. അപ്പോൾ ബാങ്കു മാനേജർ തൻ്റെ സംശയം അയാളുമായി പങ്കിട്ടു: “കോടീശ്വരനായ താങ്കൾ എന്തിനാണ് വെറും പതിനായിരം രൂപ കടമെടുത്തത്?” ബിസ്നസ്സുകാരൻ ചിരിച്ചു കൊണ്ടു പറഞ്ഞു: “ഇത്ര ചെറിയൊരു ചിലവിൽ, വേറെ എവിടെയാണ് എനിക്കു് ഇത്ര വിലപിടിപ്പുള്ള കാർ ഒരു മാസം പാർക്കു ചെയ്യുവാൻ കഴിയുക?”

സഹജമായ സാമർഥ്യം, സാഹചര്യങ്ങളെ അതിജീവിക്കുവാൻ സഹായിക്കും. എല്ലാ പ്രശ്നങ്ങൾക്കും എന്തെങ്കിലും ഒരു ഉത്തരമുണ്ട്. വൈഷ്യമ്യങ്ങൾക്കുളളിൽത്തന്നെ, അവയുടെ പരിഹാരങ്ങളും ഉണ്ടാകും. പക്ഷെ, അവ കണ്ടെത്താനും കരുതലോടെ ഉപയോഗിക്കാനുമുള്ള കഴിവുണ്ടായിരിക്കണമെന്നു മാത്രം. പ്രശ്നങ്ങളുടെ വലുപ്പമല്ല, അവയോടുള്ള സമീപനമാണ് പ്രധാനം. സുരക്ഷ, അറകളുടെയും ഗുഹകളുടെയും ദൗത്യമാകരുത്. നമുക്ക് ഒരു സ്ഥലം സുരക്ഷിതമായി തോന്നാത്തത്, നാം ആരേയൊക്കെയോ ഭയപ്പെടുന്നതു കൊണ്ടാണ്. അതേ സ്ഥലം, അപരരിൽ ഭീതിയുണർത്തുന്നുവെങ്കിൽ, അവർ ഭയപ്പെടുന്ന ആൾക്കൂട്ടത്തിൽ, നാമും ഉണ്ടാകാം.

ഒരാൾ വേറൊരാളെ ഭയക്കുമ്പോൾ, മറ്റൊരാളെ കാവൽക്കാരനായി നിയമിക്കും. ലഭിക്കുന്ന ശമ്പളത്തിൻ്റെ തോതനുസരിച്ച്, അയാൾ ഒരു സുരക്ഷാ കവചം സൃഷ്ടിക്കും. യഥാർത്ഥത്തിൽ, ഒരു ചങ്ങലയും സുരക്ഷ നൽകില്ല. ഏറെ നല്ലത് ആത്മവിശ്വാസത്തിലൂടെ സുരക്ഷ നേടുകയാണ്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര