കൊച്ചി:ഉത്സവങ്ങള്ക്കുള്ള ആന എഴുന്നള്ളത്ത് അനിവാര്യമായ മതാചാരമല്ലെന്ന് ഹൈക്കോടതി വ്യക്തമാക്കി. അനിവാര്യമായ ആചാരമല്ലെങ്കില് ഉത്സവങ്ങള്ക്ക് ആന എഴുന്നള്ളത്ത് തുടരാനാവില്ല. ഒരുകാര്യം ഏറെ കാലമായി സംഭവിക്കുന്നതുകൊണ്ട് മാത്രം അനിവാര്യമായ മതാചാരമാകില്ലെന്നും കോടതി പറഞ്ഞു.
എഴുന്നള്ളത്തിന് ആനകള് തമ്മിലുള്ള മൂന്ന് മീറ്റര് അകലം കര്ശനമായി പാലിക്കണം. ജനങ്ങളുടെ സുരക്ഷ പരിഗണിച്ചാണ് ആനകള് തമ്മില് മൂന്ന് മീറ്റര് അകലപരിധി ഏർപ്പെടുത്തുന്നത്. ഹൈക്കോടതിയുടെ മാർഗനിർദേശങ്ങള് ലംഘിച്ചാല് കര്ശന നടപടിയുണ്ടാകും. ജില്ലാ കളക്ടര്മാര്ക്ക് നിരീക്ഷണ ചുമതല നല്കുമെന്നും ഹൈക്കോടതി വ്യക്തമാക്കി.
ദേവസ്വങ്ങള് പിടിവാശി ഉപേക്ഷിക്കണമെന്നും ഹൈക്കോടതി ഡിവിഷന് ബെഞ്ച് വ്യക്തമാക്കി. ഹൈക്കോടതിയുടെ ഉത്തരവുകള്ക്കെതിരെ പ്രതിഷേധമുയര്ത്തുന്നത് അംഗീകരിക്കില്ല. ഉത്തരവ് നടപ്പാക്കാന് ആവശ്യമായ നടപടികള് നീതിന്യായ വ്യവസ്ഥ സ്വീകരിക്കുമെന്നും ഹൈക്കോടതി പറഞ്ഞു.
