വനിതാ ട്വൻ്റി20 ലോകകപ്പിൽ ഏഴാം തവണയും ഓസ്ട്രേലിയയുടെ തേരോട്ടം. ലണ്ടനിലെ ലോർഡ്സിൽ നടന്ന കിരീടപ്പോരാട്ടം ഇംഗ്ലണ്ടിനെ ഏഴ് വിക്കറ്റിന് തകർത്താണ് ഓസ്ട്രേലിയ തങ്ങളുടെ ഏഴാം കിരീട നേട്ടം സ്വന്തമാക്കിയത്. ആദ്യം ബാറ്റ് ചെയ്ത ഇംഗ്ലണ്ട് 20 ഓവറിൽ 4 വിക്കറ്റ് നഷ്ടത്തിൽ 150 റൺസ് നേടിയപ്പോൾ ബെത് മൂണിയുടെ അർത്ഥസെഞ്ചുറിയുടെയും പോഫെ ലിച്ചിഫീൽഡിൻ്റെയും 48 റൺസിൻ്റെയും കരുത്തിൽ ഒസീസ് 17.1 ഓവറിൽ 3 വിക്കറ്റ് നഷ്ടത്തിൽ ലക്ഷ്യത്തിലെത്തി. 9 റൺസെടുത്ത ജോർജിയ വോൾ നിരാശപ്പെടുത്തിയെങ്കിലും രണ്ടാം വിക്കറ്റിൽ ബെത് മൂണിലിച്ചിഫീൽഡ് സഖ്യം 67 പന്തിൽ സെഞ്ചുറി കൂട്ടുകെട്ടുയർത്തി ഓസീസിനെ വിജയത്തിന് അടിത്തറയിട്ടു.
ലിച്ചിഫീൽഡ് പുറത്തായ ശേഷം ക്രീസിലെത്തിയ എല്ലിസ് പെരിയെ കൂട്ടുപിടിച്ച് ബെത് മൂണി ഓസീസിനെ വിജയത്തിന് അരികിലെത്തിച്ചു. എന്നാൽ പതിനാറാം ഓവറിലെ അവസാന പന്തിൽ ജയത്തിന് 10 റൺസകലെ ബെത് മൂണി(49 പന്തിൽ 64)പുറത്തായൻ എല്ലിസ് പെരിയും(13) ആഷ്ലി ഗാർഡ്നറും(3) ചേർന്ന് 18-ാം ഓവറിലെ ആദ്യ പന്തിൽ ഒസീസിനെ വിജയത്തിലെത്തിച്ചു. സ്കോർ ഇംഗ്ലണ്ട് 20 ഓവറിൽ 150-4, ഓസ്ട്രേലിയ 17.1 ഓവറിൽ 153-3.
ഓസ്ട്രേലിയയുടെ തുടർച്ചയായ നാലാം ടി20 ലോകകപ്പ് കിരീടനേട്ടമാണിത്. 2023ലും 2020ലും 2018ലും കിരീടം നേടിയ ഒസീസിൻ 2016ൽ വെസ്റ്റ് ഇൻഡീസിനെതിരെ മാത്രമാണ് കിരീടം നഷ്ടമായത്.അതേസമയം, ഇംഗ്ലണ്ട് നാലാം തവണയാണ് ടി20 ലോകകപ്പ് ഫൈനലിൽ കിരീടം കൈവിടുന്നത്. 2012ലും 2014ലും 2018ലും ഇംഗ്ലണ്ട് ഒസീസിന് മുന്നിൽ അടിയറവ് പറഞ്ഞിരുന്നു.
ടോസ് നേടി ആദ്യം ബാറ്റ് ചെയ്ത ഇംഗ്ലണ്ട് തുടക്കത്തിൽ ബാറ്റിംഗ് തകർത്തു നേരിട്ടെങ്കിലും ക്യാപ്റ്റൻ നാറ്റ് സ്കൈവർ ബ്രാൻ്റിൻ്റെ അർധസെഞ്ചുറിയുടെയും ഫ്രെയ കെമ്പിനിൻറെ പോരാട്ടത്തിൻ്റെയും കരുത്തിൽ 20 ഓവറിൽ 4 വിക്കറ്റ് നഷ്ടത്തിൽ 150 റൺസ് എടുത്തു. 53 പന്തിൽ 58 റൺസെടുത്ത് പുറത്താകാതെ നിന്ന നാറ്റ് സ്കൈവറാണ് ഇംഗ്ലണ്ടിൻ്റെ ടോപ് സ്കോറർ. ഫ്രെയ കെമ്പ് 28 പന്തിൽ 44 റൺ സെടുത്തപ്പോൾ ആലീസെ ക്യാപ്സെ 20 പന്തിൽ 23 റൺസെടുത്തു.
