📱വാർത്തകൾ ഒറ്റനോട്ടത്തിൽ📱 – 2026 | ജൂൺ 29 | തിങ്കൾ ✍️ കപിൽ ശങ്കർ

🔹കേന്ദ്ര സര്‍ക്കാരിന്റെ പദ്ധതിയായ പിഎം ശ്രീ നടപ്പാക്കിയില്ലെങ്കില്‍ എസ്എസ്‌കെ ഉള്‍പ്പെടെ രണ്ടായിരത്തോളം കോടി രൂപ സംസ്ഥാനത്തിനു നഷ്ടമാകുമെന്നു വിദ്യാഭ്യാസ മന്ത്രി എന്‍ ഷംസുദ്ദീന്‍. പണം നഷ്ടമാകാതിരിക്കാന്‍ കരാര്‍ ഒപ്പിടാന്‍ എല്‍ഡിഎഫ് സര്‍ക്കാര്‍ നിര്‍ബന്ധിതമായതാണെന്നും മന്ത്രി പറഞ്ഞു. പിഎം ശ്രീ ഒപ്പിട്ടാല്‍ 152 ബ്ലോക്കുകളില്‍ 34 സ്‌കൂളുകള്‍ക്ക് ഓരോ കോടി രൂപ കിട്ടും. മൂന്നുവര്‍ഷം ആയിരം കോടിയോളം രൂപ ഇനത്തില്‍ ലഭിക്കും. ഒപ്പിടാത്തതിന്റെ പേരില്‍ മറ്റു കേന്ദ്രഫണ്ടുകളും അന്യായമായി തടഞ്ഞുവച്ചു. ഈ ഫണ്ടുകള്‍ കിട്ടാനാണ് കഴിഞ്ഞ സര്‍ക്കാര്‍ ഒപ്പിടാന്‍ നിര്‍ബന്ധിതമായതെന്ന് മന്ത്രി നിയമസഭയില്‍ പറഞ്ഞു.

🔹എല്‍ഡിഎഫ് സര്‍ക്കാര്‍ നടപ്പാക്കിയ സ്ത്രീ സുരക്ഷാ പദ്ധതി തെരഞ്ഞെടുപ്പിന് ഒരു മാസം മുമ്പ് സ്ത്രീവോട്ടര്‍മാരെ പറ്റിക്കാന്‍ തട്ടിക്കൂട്ടിയതാണെന്ന് മുഖ്യമന്ത്രി വി.ഡി. സതീശന്‍. സ്ത്രീപക്ഷമെന്ന് അവകാശപ്പെട്ട എല്‍ഡിഎഫ് ആശാവര്‍ക്കര്‍മാരോട് എന്തെല്ലാമാണു ചെയ്തതെന്ന് മുഖ്യമന്ത്രി വി.ഡി. സതീശന്‍ നിയമസഭയില്‍. സ്ത്രീപക്ഷമായിരുന്നെങ്കില്‍ ഭരണം തുടങ്ങുമ്പോഴാണ് സ്ത്രീ സുരക്ഷാപദ്ധതി നടപ്പാക്കേണ്ടിയിരുന്നത്, ഇറങ്ങിപ്പോകുമ്പോഴല്ല. ക്ഷേമപെന്‍ഷന്‍ 2500 രൂപയാക്കി വര്‍ധിപ്പിക്കുമെന്നു പ്രകടന പത്രികയില്‍ വാഗ്ദാനം ചെയ്തിരുന്ന എല്‍ഡിഎഫ് സര്‍ക്കാര്‍ പഞ്ചായത്ത് തെരഞ്ഞെടുപ്പിനു തൊട്ടുമുമ്പാണ് 400 രൂപ വര്‍ദ്ധിപ്പിച്ച് രണ്ടായിരം രൂപയാക്കിയത്. അതും കടമെടുത്താണ് കൊടുത്തത്. അതിന്റെ ബാധ്യതയെല്ലാം ഈ സര്‍ക്കാരിന്റെ തലയിലാണ്. മുഖ്യമന്ത്രി പറഞ്ഞു.

🔹സംസ്ഥാനത്ത് കടുത്ത വൈദ്യുതി പ്രതിസന്ധി. ഇന്നലെ രാത്രി ഏഴ് മുതല്‍ എട്ടു വരെ വൈദ്യുതി ലഭ്യതയില്‍ കുറവുണ്ടായതിനാല്‍ കെഎസ്ഇബി വൈദ്യുതി നിയന്ത്രണം ഏര്‍പ്പെടുത്തി. വൈദ്യുതി വാങ്ങാന്‍ കഴിയാത്തതും ഗ്രിഡ് ഫ്രീക്വന്‍സി അസാധാരണമായി താഴ്ന്നതും മൂലമാണു നിയന്ത്രണം വേണ്ടിവന്നത്. മഴ കുറഞ്ഞതുമൂലം ഡാമുകളിലെ ജലനിരപ്പ് 20.8 ശതമാനമായി കുറഞ്ഞതോടെ വൈദ്യുതി ഉല്‍പാദനം വര്‍ധിപ്പിക്കാനായില്ല. ഉയര്‍ന്ന വിലയ്ക്ക് വൈദ്യുതി വാങ്ങാനുള്ള കെഎസ്ഇബിയുടെ അപേക്ഷ വൈദ്യുതി റെഗുലേറ്ററി കമ്മീഷന്‍ ഇന്നു പരിഗണിക്കും.

🔹വീര്യം കുറഞ്ഞ മദ്യത്തിന് നികുതി ഇളവ് നല്‍കിയ ബജറ്റ് നിര്‍ദേശം അടങ്ങുന്ന ധനബില്‍ ബുധനാഴ്ച നിയമസഭയിലെത്തും. നികുതി ഇളവു നിര്‍ദേശം ബല്ലില്‍ ഉള്‍പ്പെടുത്തിയതില്‍ അസാധാരണമായി ഒന്നുമില്ലെന്ന് മന്ത്രി കെ. മുരളീധരന്‍. നടപ്പാക്കേണ്ടതുണ്ടോയെന്ന് യുഡിഎഫ് തീരുമാനിക്കും. വീര്യം കൂടിയതിനു നികുതി കുറച്ചിട്ടില്ലല്ലോയെന്നും അദ്ദേഹം പറഞ്ഞു.

🔹വീര്യം കുറഞ്ഞ മദ്യത്തിന്റ നികുതി കുറച്ച് ധന ബില്ലില്‍ ഉള്‍പ്പെടുത്തിയത് സ്വകാര്യ മദ്യ ലോബിയെ സഹായിക്കാനെന്ന് പ്രതിപക്ഷ നേതാവ് പിണറായി വിജയന്‍. ബില്‍ പാസായാല്‍ വില്പനക്ക് സര്‍ക്കാര്‍ അനുമതി വേണ്ട. ബജറ്റിനൊപ്പം നികുതി ഇളവുകള്‍ നിയമമാക്കുന്ന ഫിനാന്‍സ് ബില്‍ സഭ അംഗീകരിച്ചാല്‍ അത് നിയമമാകും. യുഡിഎഫ് ചര്‍ച്ച ചെയ്തു തീരുമാനിക്കുമെന്ന വാദത്തിന് ഒരു പ്രസക്തിയുമില്ലെന്നും അദ്ദേഹം ചൂണ്ടിക്കാട്ടി.

🔹സിപിഎം സംസ്ഥാന നേതൃത്വത്തിനെതിരെ ഗുരുതര ആരോപണവുമായി എന്‍ഫോഴ്സ്മെന്റ് ഡയറക്ടറേറ്റ്. ഉദ്യോഗസ്ഥര്‍ക്കെതിരെ നടന്ന അക്രമം ഉന്നത നേതാക്കള്‍ ഉള്‍പ്പെട്ട ഗൂഢാലോചനയുടെ ഭാഗമാണെന്നും, നേതാക്കളുടെ പ്രകോപനപരമായ പ്രസംഗങ്ങള്‍ അണികള്‍ക്കുള്ള സിഗ്നലായിരുന്നുവെന്നും ഇഡി കോടതിയില്‍ സമര്‍പ്പിച്ച റിപ്പോര്‍ട്ടില്‍ പറയുന്നു.

🔹എന്‍ഫോഴ്സ്മെന്റ് ഉദ്യോഗസ്ഥരെ ആക്രമിച്ച കേസിലെ പ്രതിക്ക് അനുകൂല നിലപാടെടുത്തിട്ടില്ലെന്ന് പ്രോസിക്യൂട്ടര്‍ സ്ഥാനത്തുനിന്നു സര്‍ക്കാര്‍ മാറ്റിയ ഗീനാകുമാരി. പൊലീസ് നല്‍കിയ റിപ്പോര്‍ട്ട് അനുസരിച്ചാണ് കോടതിയില്‍ വാദിച്ചതെന്നും താന്‍ ഒരു വീഴ്ചയും വരുത്തിയിട്ടില്ലെന്നും ഗീനാകുമാരി ഫേസ്ബുക്കില്‍ കുറിച്ചു.

🔹പ്രതിപക്ഷ നേതാവ് പിണറായി വിജയന്റെ വിമാനയാത്ര മുടങ്ങിയതു പ്രൊട്ടക്കോള്‍ വീഴ്ച മൂലമാണെന്നും അച്ചടക്ക നടപടിയെടുക്കുമെന്നും കേരള ഹൗസ് അഡിഷണല്‍ റെസിഡന്റ് കമ്മീഷണര്‍ അശ്വതി ശ്രീനിവാസ്. പ്രൊട്ടൊകോള്‍ ഓഫീസര്‍ ആര്‍. ശ്രീകുമാറിനെ സസ്പെന്‍ഡു ചെയ്തേക്കും.

🔹വിനോദ സഞ്ചാര കേന്ദ്രമായ ഇടുക്കിയിലെ കൊളുക്കുമലയില്‍ 100 ഏക്കര്‍ ഭൂമി വനം വകുപ്പ് ഏറ്റെടുത്തു. ഹാരിസണ്‍ മലയാളം കമ്പനിയുടെ കൈവശമിരുന്ന സര്‍ക്കാര്‍ ഭൂമിയാണ് ഏറ്റെടുത്തത്.

🔹ഓപ്പറേഷന്‍ തൂഫാന് ഐക്യദാര്‍ഢ്യം പ്രഖ്യാപിച്ച് കെ സുധാകരകന്‍ എംപി കൊച്ചിയില്‍ വിളിച്ച് ചേര്‍ത്ത യോഗത്തില്‍ ക്രിമിനല്‍ കേസ് പ്രതികളും ഗുണ്ടാ നേതാക്കളും. മട്ടാഞ്ചേരി ഹാരിസ്, തോക്ക് കേസ് പ്രതി റിയാസ് അടക്കം യോഗത്തില്‍ പങ്കെടുത്തു. യോഗം തങ്ങളുടെ അറിവോടെ അല്ലെന്ന് എറണാകുളം ഡിസിസി.

🔹വയനാട് ജില്ലയില്‍ സ്വകാര്യ ബസുകള്‍ പണിമുടക്കി. സ്വകാര്യ ബസുകള്‍ നേരിടുന്ന പ്രതിസന്ധി പരിഹരിക്കാന്‍ സര്‍ക്കാര്‍ ഇടപെടണമെന്ന് ആവശ്യപ്പെട്ടാണ് സൂചനാ പണിമുടക്ക്.

🔹തൃശൂര്‍ ജൂബിലി മിഷന്‍ മെഡിക്കല്‍ കോളേജ് ഒന്നാംവര്‍ഷ എംബിബിഎസ് വിദ്യാര്‍ത്ഥിനി ഹോസ്റ്റലിന്റെ നാലാം നിലയില്‍ നിന്ന് ചാടി ആത്മഹത്യ ചെയ്തു. കോട്ടയം സ്വദേശി സ്നേഹ പൗലോസ് (20) ആണ് മരിച്ചത്.

🔹പത്തനംതിട്ട ചിറ്റാറിലെ സന്ദീപിന്റെ മരണത്തില്‍ കസ്റ്റഡിയിലുള്ള മൂന്ന് പ്രതികള്‍ക്കെതിരെ കേസെടുത്ത് പൊലീസ്. പ്രതികള്‍ നായാട്ട് സംഘത്തില്‍പെട്ടവരാണ്. കസ്റ്റഡിയിലുള്ളവര്‍ സഞ്ചരിച്ച വാഹനത്തില്‍ നിന്ന് നാടന്‍ തോക്ക് ഉള്‍പ്പെടെയുള്ള ആയുധങ്ങള്‍ കണ്ടെത്തിയിട്ടുണ്ട്.

🔹മഹാരാഷ്ട്രയില്‍ വിവാഹച്ചടങ്ങില്‍ പങ്കെടുത്ത് കുടുംബത്തോടൊപ്പം നാട്ടിലേക്ക് മടങ്ങുകയായിരുന്ന മലയാളി സ്വര്‍ണ വ്യാപാരിയെ ആക്രമിച്ച് 20 ലക്ഷം രൂപ വിലമതിക്കുന്ന 180 ഗ്രാം സ്വര്‍ണവും മറ്റ് വിലപിടിപ്പുള്ള സാധനങ്ങളും കവര്‍ന്നു. പയ്യന്നൂര്‍ സ്വദേശിയായ വികാസും കുടുംബവുമാണ് ആക്രമണത്തിനും കവര്‍ച്ചയ്ക്കും ഇരയായത്. മംഗലാപുരത്താണ് സിനിമയെ വെല്ലുന്ന കവര്‍ച്ച നടന്നത്.

🔹അമ്മ കുടുംബസംഗമത്തിന് സംഗീത പരിപാടി അവതരിപ്പിച്ചതിന് പതിമ്മൂന്നര ലക്ഷം രൂപയാണു കൈപ്പറ്റിയതെന്ന് സംഗീതജ്ഞന്‍ സ്റ്റീഫന്‍ ദേവസി. രണ്ടാഴ്ചത്തെ മുന്നൊരുക്കവും ടീമിന്റെ താമസ ചെലവും അടക്കമുള്ള മുഴുവന്‍ തുകയുടെ വിവരങ്ങള്‍ അഡ്ഹോക്ക് കമ്മിറ്റിക്ക് നല്‍കിയെന്നും സ്റ്റീഫന്‍ ദേവസി അറിയിച്ചു.

🔹എറണാകുളത്തുനിന്നു സ്ഥലം മാറി നാലു മാസം കഴിഞ്ഞിട്ടും ക്യാമ്പ് ഓഫീസ് വിട്ടു നല്‍കാത്ത എസ് പി ഹേമലതക്ക് മെമ്മോ. കൊല്ലം കമ്മീഷണറായ ഹേമലത ക്യാമ്പ് ഓഫീസ് ഉടനേ വിട്ടുകൊടുക്കണമെന്ന് ആവശ്യപ്പെട്ട് പൊലീസ് ആസ്ഥാന ഐജി ഹര്‍ഷിത അട്ടല്ലൂരിയാണു മെമ്മോ നല്‍കിയത്.

🔹പബ്ലിക് സര്‍വ്വീസ് കമ്മീഷന്റെ പരീക്ഷാ മൂല്യനിര്‍ണയത്തില്‍ വന്‍ ക്രമക്കേടെന്ന് ആരോപണം. അഡീഷണല്‍ സെക്രട്ടറിയുടെ തസ്തികയ്ക്കു തുല്യമായ ചീഫ് ഇന്‍ഡസ്ട്രിയല്‍ ആന്‍ഡ് ഇന്‍ഫ്രാസ്ട്രക്ചര്‍ പരീക്ഷയിലാണ് ക്രമക്കേട് ആരോപണം.

🔹യുണൈറ്റഡ് നഴ്‌സസ് അസോസിയേഷന്റെ നേതൃത്വത്തില്‍ നഴ്‌സുമാര്‍ തൃശൂര്‍ ആര്‍ച്ച്ബിഷപ്സ് ഹൗസിനു മുന്നിലെ റോഡ് ഉപരോധിച്ചു. വൈകീട്ട് ആറിനാരംഭിച്ച സമരം രാത്രി വൈകിയും തുടര്‍ന്നു. കൈക്കുഞ്ഞുങ്ങളുമായാണ് പലരും സമരത്തിനെത്തയത്. വേതനവര്‍ധന ആവശ്യപ്പെട്ട് ജൂബിലി മിഷന്‍, അമല ആശുപത്രികളിലെ സമരം ഒത്തുതീര്‍ക്കാന്‍ തൃശ്ശൂര്‍ അതിരൂപത ആര്‍ച്ച് ബിഷപ്പ് മാര്‍ ആന്‍ഡ്രൂസ് താഴത്തുമായി നടത്തിയ ചര്‍ച്ച പരാജയപ്പെട്ടതോടെയാണ് നഴ്സുമാര്‍ തെരുവിലിറങ്ങിയത്.

🔹കാറ്റില്‍ ഡിവൈഡര്‍ പറന്നുവന്ന് കാറില്‍ വീണ് നിയന്ത്രണം വിട്ട കാറിന്റെ പിന്നില്‍ മറ്റൊരു വാഹനം ഇടിച്ചുണ്ടായ അപകടത്തില്‍ സ്‌കേറ്റിംഗ് ദേശീയ താരം ഉള്‍പ്പെടെ രണ്ടുപേര്‍ക്ക് പരിക്ക്. ദേശീയപാതയില്‍ പാലക്കാട് വടക്കഞ്ചേരി മേല്‍പ്പാലത്തിലാണ് അപകടമുണ്ടായത്. എറണാകുളം മഹാരാജാസ് കോളേജ് മലയാളം വിഭാഗം മേധാവി ഓടിച്ച വാഹനത്തിലാണ് ഡിവൈഡര്‍ പറന്നു വീണത്.

🔹ശബരിമല തന്ത്രി കണ്ഠര് രാജീവര്‍ക്കും താഴമണ്‍ മഠത്തിനുമെതിരെയുള്ള സൈബര്‍ ആക്രമണത്തില്‍ ആഭ്യന്തരമന്ത്രിക്ക് പരാതി നല്‍കി തന്ത്രികുടുംബം. മധുമണിമല എന്നയാള്‍ക്കെതിരേയാണു പരാതി.

🔹അങ്കമാലി – നെടുമ്പാശ്ശേരി ദേശീയപാതയില്‍ വാഹനാപകടത്തില്‍ രണ്ടു യുവാക്കള്‍ മരിച്ചു. പത്തനംതിട്ട സ്വദേശികളായ വെട്ടിപ്പുറം ശ്രീശൈലത്തില്‍ കുമാറിന്റെ മകന്‍ കബില്‍(24), മാക്കന്‍കുന്നുകരയില്‍ ശ്രീ ശൈലം വീട്ടില്‍ ആദിത്യനു (23)മാണ് മരിച്ചത്.

🔹എരുമേലിയില്‍ രണ്ട് വിദ്യാര്‍ത്ഥികള്‍ പാറമടക്കുളത്തില്‍ മുങ്ങി മരിച്ചു. കൊടുത്തോട്ടം സ്വദേശികളായ ആഷിര്‍(16), ആഷ്ലിന്‍ (20)എന്നിവരാണ് മരിച്ചത്. കൂട്ടുകാര്‍ക്കൊപ്പം പറമടക്കുളത്തില്‍ കുളിക്കാന്‍ ഇറങ്ങിയതാണ് വിദ്യാര്‍ത്ഥികള്‍.

🔹എറണാകുളം മരടില്‍ ചോരക്കുഞ്ഞിനെ ഉപേക്ഷിച്ച സ്ത്രീയെ പൊലീസ് കണ്ടെത്തി. ക്യാന്‍സര്‍ രോഗിയാണെന്നും കുഞ്ഞിനെ വളര്‍ത്താന്‍ നിവൃത്തിയില്ലാത്തിനാലാണ് ഉപേക്ഷിച്ചതെന്നുമാണ് യുവതി മൊഴി നല്‍കിയത്.

🔹വയനാട് സ്വദേശി ഹേമചന്ദ്രനെ (54) ഹണി ട്രാപ്പില്‍ കുടുക്കി തമിഴ്‌നാട്ടിലെ ചേരമ്പാടി വനത്തില്‍ കൊന്ന് കുഴിച്ചിട്ട കേസിലെ മുഖ്യപ്രതിയായ യുവതി അറസ്റ്റില്‍. കണ്ണൂര്‍ ഉളിക്കല്‍ സ്വദേശിനിയായ ലീബയാണ് കോഴിക്കോട് വിമാനത്താവളത്തില്‍ പിടിയിലായത്.

🔹അന്തര്‍ദേശീയ ലഹരി മരുന്നു ശൃംഖലയിലെ മുഖ്യ പ്രതികള്‍ പിടിയില്‍. പാലക്കാട് മുണ്ടൂര്‍ പുതനൂര്‍ പള്ളിപ്പറമ്പില്‍ അബു താഹിര്‍ (39), ഒറ്റപ്പാലം സ്വദേശി ഹരികൃഷ്ണന്‍ (25), പാലക്കാട് കടമ്പഴിപ്പുറം സ്വദേശി പ്രെസ്ജിത്ത്(40), ഒറ്റപ്പാലം പനമണ്ണ സ്വദേശി ശ്രീജേഷ്(41), ഒറ്റപ്പാലം ചളവറ സ്വദേശി സഞ്ജയ്(22) എന്നിവരെയാണ് സംസ്ഥാനത്തിന്റെ വിവിധ ഭാഗങ്ങളില്‍നിന്നായി പൊലീസ് പിടികൂടിയത്.

🔹ചെലവു നിയന്ത്രിക്കാന്‍ താന്‍ നല്‍കിയ മാര്‍ഗനിര്‍ദ്ദേശങ്ങള്‍ ജനങ്ങള്‍ ആവേശ പൂര്‍വം ഏറ്റെടുത്തെന്ന് പ്രധാനമന്ത്രി നരേന്ദ്രമോദി. സ്വര്‍ണ്ണം വാങ്ങുന്നത് കുറച്ചു കാലത്തേക്ക് നിര്‍ത്തുക, കാര്‍ പൂളിംഗ്, വര്‍ക്ക് ഫ്രം ഹോം, വിദേശ യാത്രകള്‍ കുറയ്ക്കുക തുടങ്ങിയ നിര്‍ദ്ദേശങ്ങള്‍ക്ക് നല്ല പ്രതികരണം കിട്ടിയെന്ന് പ്രതിമാസ റേഡിയോ പരിപാടിയായ മന്‍ കി ബാത്തിന്റെ 135 -ാമത്തെ എപ്പിസോഡില്‍ പ്രധാനമന്ത്രി അറിയിച്ചു.

🔹മുംബൈയിൽ നഗരത്തിൽ വെള്ളിയാഴ്ച നടന്ന മുഹർറം ഘോഷയാത്രയിൽ എലിവിഷം കലർത്തിയ വേദന സംഹാരി ഗുളികകൾ വിതരണംചെയ്ത ആളെ പൊലീസ് അറസ്റ്റ് ചെയ്തു. പുണെ സ്വദേശിയും ഇറാനിയൻ വംശജനുമായ ഫയാസ് പ്രേംജിയെ (39) ആണ് ശനിയാഴ്ച അറസ്റ്റു ചെയ്തതെന്ന് ഡി.സി.പി ജയന്ത് മീണ അറിയിച്ചു. ഘോഷയാത്രക്കിടെ വയറുവേദനയും ഛർദിയുമുണ്ടായതിനെ തുടർന്ന് ഒരാൾ ചികിത്സ തേടിയിരുന്നു. സിങ്ക് ഫോസ്ഫെയ്ഡ് കലർത്തിയ 14,000 ഗുളികകൾ പ്രതിയുടെ കൈവശമുണ്ടായിരുന്നുവെന്നും 30,000 വേദന സംഹാരി ഗുളികകളും 50 കിലോ സിങ്ക് ഫോസ്ഫെയ്ഡും പ്രതി വാങ്ങി സൂക്ഷിച്ചിരുന്നുവെന്നും അദ്ദേഹം കൂട്ടിച്ചേർത്തു. പ്രതിയെ ചോദ്യം ചെയ്തുവരുകയാണ്.

🔹അയോധ്യ ക്ഷേത്രക്കൊള്ളയുമായി ബന്ധപ്പെട്ട് പ്രതികളുടെ വീടുകളില്‍ പോലീസ് ഒരേസമയം റെയ്ഡ് നടത്തി. കുടുംബാംഗങ്ങളെ ചോദ്യം ചെയ്തു. കഴിഞ്ഞ നാലു വര്‍ഷത്തിനിടെ സമ്പാദിച്ച വസ്തുവകകളുടെ വിവരങ്ങള്‍ അന്വേഷണ സംഘം തേടി. ആഭരണങ്ങള്‍, ബാങ്ക് നിക്ഷേപങ്ങള്‍ എന്നിവയുടെയും വിശദാംശങ്ങള്‍ പരിശോധിക്കുന്നുണ്ട്.

🔹അയോധ്യ ക്ഷേത്ര സംഭാവനക്കൊള്ളക്ക് പിന്നാലെ രാമക്ഷേത്ര ട്രസ്റ്റില്‍ പുതിയ ട്രസ്റ്റ് ജനറല്‍ സെക്രട്ടറിയെ 11 ന് പ്രഖ്യാപിച്ചേക്കും. ഇതുസംബന്ധിച്ച ചര്‍ച്ച തുടങ്ങി. പ്രധാനമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി നൃപേന്ദ്ര മിശ്ര, ട്രസ്റ്റ് ട്രഷറര്‍ സ്വാമി ഗോവിന്ദ ദേവഗിരി, ട്രസ്റ്റി കൃഷ്ണ മോഹന്‍ എന്നിവരുടെ പേരുകളാകും സെക്രട്ടറി സ്ഥാനത്തേക്ക് പരിഗണിക്കുക.

🔹രാജസ്ഥാനില്‍ പതിമ്മൂന്നുകാരിയെ അഞ്ചു ദിവസത്തിനിടെ ബലാത്സംഗംചെയ്തത് മുപ്പതിലേറെ പേര്‍. ശ്രീ ഗംഗാനഗറിലെ കുട്ടിയാണു പീഡനത്തിനിരയായത്. പൊലീസ് എട്ടുപ്രതികളെ അറസ്റ്റു ചെയ്തു.

🔹ഫ്രാന്‍സിന്റെ കിഴക്കന്‍ മേഖലയില്‍ സ്‌കൈ ഡൈവിംഗ് സംഘവുമായി പുറപ്പെട്ട വിമാനം തകര്‍ന്ന് 11 പേര്‍ക്ക് ദാരുണാന്ത്യം. വിമാനത്തിലുണ്ടായിരുന്ന പൈലറ്റും 10 യാത്രക്കാരുമാണ് കൊല്ലപ്പെട്ടത്.

🔹രാജ്യസുരക്ഷയടക്കം മുന്‍നിര്‍ത്തി യു.എസിലെ ട്രംപ് ഭരണകൂടം നിയന്ത്രണം ഏര്‍പ്പെടുത്തിയ മിത്തോസ് 5, ഫേബിള്‍ 5 എന്നീ മോഡലുകളുടെ അതേ മികവുള്ള എഐ മോഡലുകള്‍ പുറത്തിറക്കി ജപ്പാനിലെയും ചൈനയിലെയും രണ്ട് എഐ കമ്പനികള്‍. എഐ കമ്പനിയായ ആന്ത്രോപിക്കിന്റെ രണ്ട് മോഡലുകള്‍ക്കാണ് യു.എസ് സര്‍ക്കാര്‍ നിയന്ത്രണം കൊണ്ടുവന്നത്. ഇതില്‍ മിത്തോസ് 5-ന്റെ നിയന്ത്രണം പിന്നീട് ഭാഗികമായി നീക്കി. ജപ്പാനിലെ പ്രമുഖ എഐ സ്റ്റാര്‍ട്ടപ്പായ സക്കാന എഐ ‘ഫുഗു’ എന്ന പേരിലാണ് പുതിയ എഐ മോഡല്‍ പുറത്തിറക്കിയത്. സൈബര്‍ സുരക്ഷാ ഭീമനായ 360 രണ്ട് ശക്തമായ എഐ സുരക്ഷാ സംവിധാനങ്ങളാണ് ചൈന പുറത്തിറക്കിയിട്ടുള്ളത്. ആന്ത്രോപിക്കിന്റെ മിത്തോസിനോട് നേര്‍ക്കുനേര്‍ ഏറ്റുമുട്ടാന്‍ കഴിയുംവിധം രൂപകല്‍പ്പന ചെയ്ത തുലോങ്‌ഫെങ് ആണ് ഇതിലൊന്ന്. അതിവേഗ സൈബര്‍ പ്രതിരോധവും തത്സമയ പ്രതികരണവും ഓട്ടോമേറ്റ് ചെയ്യാന്‍ കഴിയുംവിധം രൂപകല്‍പ്പനചെയ്ത യെറ്റിയന്‍ഷെന്‍ ആണ് രണ്ടാമത്തേത്.

🔹സൗദി കിഴക്കന്‍ പ്രവിശ്യയിലെ ജുബൈല്‍ ഹൈവേയിലുണ്ടായ വാഹനാപകടത്തില്‍ രണ്ട് മലയാളികള്‍ മരിച്ചു. തലശ്ശേരി മണോലില്‍ വീട്ടില്‍ സജീം ഖാലിദ്, കണ്ണൂര്‍ ചെറുകുന്ന് സ്വദേശി ശ്രീലേഷ് ലക്ഷ്മണ്‍ എന്നിവരാണ് മരിച്ചത്.

🔹മുന്‍ പാകിസ്താന്‍ ക്രിക്കറ്റ് താരം ഷുഐബ് അക്തറിന്റെ സഹോദരന്‍ ഷാഹിദ് അക്തറിന്റെ സംസ്‌കാര ചടങ്ങില്‍ നിരോധിത ഭീകര സംഘടനയായ ലഷ്‌കര്‍-ഇ-തൊയ്ബയുടെ നേതാക്കള്‍ പങ്കെടുത്തതായി റിപ്പോര്‍ട്ട്.

🔹ഗ്രൂപ്പ് ജെ യില്‍നിന്ന് അര്‍ജന്റീനയെ കൂടാതെ ഓസ്ട്രിയയും, അള്‍ജീരിയയും നോക്കൗട്ട് റൗണ്ടിലേക്ക്. കാന്‍സാസ് സിറ്റി സ്റ്റേഡിയത്തില്‍ നടന്ന ഓസ്ട്രിയ- അള്‍ജീരിയ പോരാട്ടത്തില്‍ ഇരുടീമുകളും മൂന്നു ഗോള്‍ വീതമടിച്ച് പിരിഞ്ഞതോടെ മൂന്നാം സ്ഥാനത്തുള്ള മികച്ച എട്ട് ടീമുകളുടെ പട്ടികയില്‍നിന്ന് ഇറാന്‍ പുറത്ത്.

🔹ലോക ചാമ്പ്യന്മാരായ ഇന്ത്യയെ ടി20 പരമ്പരയില്‍ തൂത്തുവാരി അയര്‍ലന്‍ഡ്. രണ്ടാം മത്സരത്തില്‍ ഒരു റണ്ണിന് ജയിച്ചതോടെയാണ് അയര്‍ലന്‍ഡ് ചരിത്ര പരമ്പര സ്വന്തമാക്കിയത്. ടോസ് നഷ്ടപ്പെട്ട് ബാറ്റിംഗിനെത്തിയ അയര്‍ലന്‍ഡ് എട്ട് വിക്കറ്റ് നഷ്ടത്തില്‍ 154 റണ്‍സാണ് നേടിയത്. 53 റണ്‍സെടുത്ത ഹാരി ടെക്റ്ററാണ് ടോപ് സ്‌കോറര്‍. മറുപടി ബാറ്റിംഗില്‍ ഇന്ത്യക്ക് ഒമ്പത് വിക്കറ്റ് നഷ്ടത്തില്‍ 153 റണ്‍സ് എടുക്കാനേ സാധിച്ചുള്ളൂ. മുന്‍നിര ബാറ്റര്‍മാരെല്ലാം നിരാശപ്പെടുത്തിയ മത്സരത്തില്‍ സഞ്ജു സാംസണും അഭിഷേക് ശര്‍മയും ഗോള്‍ഡന്‍ ഡക്കായാണ് മടങ്ങിയത്..

🔹വനിത ടി20 ലോകകപ്പില്‍ ഇന്ത്യ സെമി ഫൈനല്‍ കാണാതെ പുറത്ത്. ഓസ്‌ട്രേലിയക്കെതിരെ നിര്‍ണായക മത്സരത്തില്‍ ആറു വിക്കറ്റിനു പരാജയപ്പെട്ടാണ് ഇന്ത്യ പുറത്തായത്. ലോര്‍ഡ്‌സില്‍ നടന്ന മത്സരത്തില്‍ ടോസ് നേടി ബാറ്റിംഗിനെത്തിയ ഇന്ത്യ നാല് വിക്കറ്റ് നഷ്ടത്തില്‍ 170 റണ്‍സ് നേടി. മറുപടി ബാറ്റിംഗില്‍ ഓസ്‌ട്രേലിയ 19 ഓവറില്‍ നാല് വിക്കറ്റ് നഷ്ടത്തില്‍ ലക്ഷ്യം മറികടന്നു. ഇതോടെ ഗ്രൂപ്പ് എയില്‍ നിന്ന് ഓസീസിനൊപ്പം ദക്ഷിണാഫ്രിക്കയും സെമിയില്‍ കടന്നു.

🔹ഇംഗ്ലീഷ് ക്രിക്കറ്റിലെ ഏറ്റവും മികച്ച താരങ്ങളില്‍ ഒരാളായ ബെന്‍ സ്റ്റോക്‌സ് അന്താരാഷ്ട്ര ക്രിക്കറ്റില്‍ നിന്ന് വിരമിക്കുന്നു. ട്രെന്റ് ബ്രിഡ്ജിലെ ന്യൂസിലാന്‍ഡിനെതിരായ മൂന്നാം ടെസ്റ്റ് മത്സരത്തോടെ സ്റ്റോക്‌സ് തന്റെ അന്താരാഷ്ട്ര കരിയര്‍ അവസാനിപ്പിക്കുയാണെന്ന് അറിയിച്ചു .

🔹മമ്മൂട്ടി കമ്പനിയുടെ ബാനറില്‍ മെഗാസ്റ്റാര്‍ മമ്മൂട്ടി നിര്‍മ്മിക്കുന്ന പത്താം ചിത്രത്തിലേക്ക് നായികയെ തേടുന്നു. ഈ ചിത്രത്തിലേക് നായികയെ തേടികൊണ്ടുള്ള കാസ്റ്റിംഗ് കോളും ഔദ്യോഗികമായി പുറത്തു വിട്ടിട്ടുണ്ട്. തമിഴ് ഭാഷ നല്ല ഒഴുക്കോടെ സംസാരിക്കാന്‍ സാധിക്കുന്ന 30 – 35 വയസ്സ് പ്രായ പരിധിയിലുള്ളവരെയാണ് നായികാ വേഷം ചെയ്യാനായി അണിയറ പ്രവര്‍ത്തകര്‍ തേടുന്നത്. മലയാളവും തമിഴും ഒരേപോലെ ഒഴുക്കോടെ സംസാരിക്കാന്‍ കഴിയുന്നവര്‍ക്കാണ് മുന്‍ഗണന. താല്പര്യമുള്ളവര്‍ തങ്ങളുടെ ഫുള്‍ സൈസ് ഫോട്ടോഗ്രാഫ്, ബയോഡാറ്റ, ഒരു സെല്‍ഫ് ഇന്‍ട്രൊഡക്ഷന്‍ വീഡിയോ (തമിഴില്‍), ഒരു മിനിറ്റ് ദൈര്‍ഘ്യമുള്ള പെര്‍ഫോമന്‍സ് വീഡിയോ എന്നിവ casting@mammoottykampanyproduction10.com എന്ന ഇമെയില്‍ വിലാസത്തിലേക്ക് ജൂലൈ 31 നു മുന്‍പ് അയക്കാന്‍ ആണ് കാസ്റ്റിംഗ് കോളില്‍ ആവശ്യപ്പെട്ടിരിക്കുന്നത്.

🔹കൗതുകമാര്‍ന്ന ടൈറ്റിലോടെ ഒരു പുതിയ സിനിമ കൂടി എത്തുന്നു. ‘കളസ ബന്ധിതം’ ടൈറ്റില്‍ ലോഞ്ച് നടന്നു. പുതുമുഖ സംവിധായകന്‍ നിഷാദ് കെ. സലീം സംവിധാനം ചെയ്യുന്ന ചിത്രം ജൂലൈ 20ന് ഷൂട്ടിംഗ് ആരംഭിക്കും. പ്രമുഖ താരങ്ങളായ വിനീത് തട്ടില്‍, ബിജുക്കുട്ടന്‍, സുധീര്‍ പറവൂര്‍ ,ജയശങ്കര്‍, നന്ദു പൊതുവാള്‍, പൗളി വല്‍സന്‍, കുടശനാട് കനകം, ബേബി, ലത ദാസ്, ആര്‍. ജെ. അഞ്ജലി എന്നിവരെ കൂടാതെ പുതുതലമുറയുടെ ആവേശമായി മാറിയ ബേബി ജീന്‍, അബു സലീം, ഫ്രാങ്കോ ഫ്രാന്‍സിസ്, ഗോവിന്ദ് വി. പൈ, അനു മാര്‍വന്‍, അനു സാഫ്,അമൃത വര്‍ഷിണി എന്നിവരും നിരവധി പുതുമുഖങ്ങളും ചിത്രത്തില്‍ അണിനിരക്കുന്നു. 90 ‘കളിലെ സ്‌കൂള്‍ കാലഘട്ടം അനുസ്മരിപ്പിക്കുന്ന രീതിയിലുള്ള കഥാ സന്ദര്‍ഭങ്ങളും നര്‍മ്മ മുഹൂര്‍ത്തങ്ങളും ഉള്ള ഒരു നൊസ്റ്റാള്‍ജിക് ഹ്യൂമര്‍ ഡ്രാമയായാണ് ചിത്രം ഒരുക്കുന്നത്.

🔹ധ്യാന്‍ ശ്രീനിവാസനെ നായകനാക്കി ‘മെയ്ഡ് ഇന്‍ ക്യാരവാന്‍’ എന്ന ചിത്രത്തിന് ശേഷം ജോമി കുര്യാക്കോസ് സംവിധാനം ചെയ്യുന്ന ‘മിനി ആന്‍ഡ് കൂപ്പര്‍’ എന്ന സിനിമയുടെ ടൈറ്റില്‍ പോസ്റ്റര്‍ പുറത്ത്. മഞ്ജു വാര്യര്‍, സംഗീത് പ്രതാപ്, വിഷ്ണു ഉണ്ണികൃഷ്ണന്‍, ബിബിന്‍ ജോര്‍ജ്, അജയ് വാസുദേവ്, ജിയോ ബേബി, നോബി മര്‍ക്കോസ്, കുട്ടി അഖില്‍ തുടങ്ങിയവരുടെ സോഷ്യല്‍ മീഡിയ പേജിലൂടെ റിലീസ് ചെയ്തു. ‘ശാന്തമീ രാത്രിയില്‍’ എന്ന ചിത്രത്തിനു ശേഷം എ ഡബ്ല്യൂയു എ മൂവിസിന്റെ ബാനറില്‍ റോള്‍ഡ് തോമസ് നിര്‍മ്മിക്കുന്ന ഈ ചിത്രം പൂര്‍ണമായും ഇംഗ്ലണ്ടിലാണ് ചിത്രീകരിക്കുന്നത്. അലിസ്റ്റൈര്‍ ജോര്‍ജ് ജോണ്‍, ശാന്ത നീറ്റോ എന്നിവരാണ് സഹനിര്‍മാതാക്കള്‍. സിനിമയുടെ ചിത്രീകരണം ഓഗസ്റ്റ് അവസാനം ലണ്ടനില്‍ ആരംഭിക്കും.

💦 ഗുരുജിയുടെ വാക്കുകൾ
*****************************

സുഹൃത്തുക്കൾ കുറവാണെന്ന് കണ്ടാൽ ഒരു സ്ത്രീയെ ഒരിക്കലും ദുർബലയെന്ന് കരുതരുത്.
അവൾ ഒറ്റപ്പെട്ടവളല്ല.
അവൾ തിരഞ്ഞെടുക്കുന്ന
വളാണ്.എല്ലാവർക്കും ഇടം കൊടുക്കാൻ അവൾക്ക് താൽപര്യമില്ല. കാരണം, സ്വന്തം സമാധാനത്തിന്റെ വില അവൾക്കറിയാം. ശബ്ദവും നാടകങ്ങളും കപടബന്ധങ്ങളും നിറഞ്ഞ ഒരു കൂട്ടത്തിനേക്കാൾ, സത്യസന്ധരായ കുറച്ച് ആളുകളെ അവൾ വിലമതിക്കുന്നു.
അവൾക്ക് അംഗീകാരം തേടി നടക്കേണ്ട ആവശ്യമില്ല.
അവളുടെ മൂല്യം മറ്റുള്ളവരുടെ അഭിപ്രായങ്ങൾ നിശ്ചയിക്കുന്നതുമല്ല.
ഗോസിപ്പുകൾ അവൾ മറികടന്നു.
വ്യാജ പിന്തുണകളെ അവൾ തിരിച്ചറിഞ്ഞു.
സ്വന്തം വിജയത്തിൽ സന്തോഷിക്കാത്ത കൂട്ടങ്ങളെ അവൾ ജീവിതത്തിൽ നിന്ന് മാറ്റിനിർത്തി.
അവളുടെ സമയം വിലപ്പെട്ടതാണ്.
അവളുടെ ഊർജം അമൂല്യമാണ്.
അവളുടെ മനസ്സമാധാനം ആരെയും സന്തോഷിപ്പിക്കാൻ വേണ്ടി അവൾ ബലിയർപ്പിക്കില്ല.
അവളുടെ വലയത്തിൽ ആളുകൾ കുറവായിരിക്കാം.
പക്ഷേ അവളുടെ ജീവിതത്തിൽ സമാധാനവും ആത്മാഭിമാനവും ആത്മവിശ്വാസവും നിറഞ്ഞിരിക്കുന്നു.
എല്ലാവരോടും ചേർന്നുനിൽക്കാൻ കഴിയുന്നത് ഒരു കഴിവാണെങ്കിൽ,
ആരോടാണ് ചേർന്നുനിൽക്കേണ്ടതെന്ന് അറിയുന്നത് ഒരു ശക്തിയാണ്.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂൺ 29

•ഭാരതത്തിൽ ദേശീയ സ്ഥിതിവിവരക്കണക്ക് ദിനമായി (National Statistics Day) ആചരിക്കുന്നത് ജൂൺ 29 ആണ്.ഇന്ത്യൻ സ്ഥിതിവിവരക്കണക്കിന്റെ പിതാവായി അറിയപ്പെടുന്ന ⁠പ്രൊഫ. പി. സി. മഹലനോബിസിന്റെ (Prasanta Chandra Mahalanobis) ജന്മദിനമാണ് ദേശീയ സ്ഥിതിവിവരക്കണക്ക് ദിനമായി രാജ്യം ആഘോഷിക്കുന്നത്. സാമൂഹിക-സാമ്പത്തിക ആസൂത്രണത്തിലും നയരൂപീകരണത്തിലും സ്ഥിതിവിവരക്കണക്കുകൾ വഹിക്കുന്ന പ്രാധാന്യത്തെക്കുറിച്ച് പൊതുജനങ്ങളിൽ അവബോധം വളർത്താനാണ് ഈ ദിനം വിഭാവനം ചെയ്തിരിക്കുന്നത്.

•അന്താരാഷ്ട്ര ഉഷ്ണമേഖലാ ദിനം (International Day of the Tropics): ഭൂമിയിലെ ഉഷ്ണമേഖലാ പ്രദേശങ്ങൾ നേരിടുന്ന പ്രത്യേക വെല്ലുവിളികളെക്കുറിച്ചും അവിടുത്തെ ജൈവവൈവിധ്യത്തെക്കുറിച്ചും ബോധവൽക്കരണം നടത്തുന്നതിനായി ഐക്യരാഷ്ട്രസഭ ഈ ദിനം ആചരിക്കുന്നു.

•ആദ്യ ഐഫോൺ വിപണിയിൽ: 2007 ജൂൺ 29-നാണ് ആപ്പിൾ കമ്പനി തങ്ങളുടെ ആദ്യത്തെ ⁠iPhone അമേരിക്കൻ വിപണിയിൽ പുറത്തിറക്കി വിപ്ലവം സൃഷ്ടിച്ചത്.

•സെയ്ഷെൽസ് സ്വാതന്ത്ര്യം: 1976 ജൂൺ 29-ന് സെയ്ഷെൽസ് ബ്രിട്ടീഷ് ഭരണത്തിൽ നിന്നും സ്വാതന്ത്ര്യം നേടി.

തയ്യാറാക്കിയത്: കപിൽ ശങ്കർ

16 Likes

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 29 | തിങ്കൾ ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ജൂൺ 29

തയ്യാറാക്കിയത്: കപിൽ ശങ്കർ

ഫ്ലോറിഡയിൽ മുതലകളുടെ ആക്രമണം: ഒരാൾ മരിച്ചു, ഒരു കുട്ടിക്ക് പരിക്ക്

നേഷൻ ഓഫ് ഇസ്‌ലാം’ നേതാവ് ലൂയിസ് ഫറഖാന്റെ ഭാര്യ ഖദീജ ഫറഖാൻ അന്തരിച്ചു

ഒക്ലഹോമയിൽ ജൂലൈ 1 മുതൽ അധ്യാപകരുടെ ശമ്പളം വർദ്ധിക്കും, വിദ്യാർത്ഥികൾക്ക് മൊബൈൽ ഫോൺ വിലക്ക്

LEAVE A REPLY Cancel reply

Most Popular

റേഷൻ കാർഡ് മുൻഗണനാ വിഭാഗത്തിലേക്ക് മാറ്റാം: ജൂലൈ 17 വരെ അപേക്ഷ സമർപ്പിക്കാം

സംസ്ഥാനത്ത് ആറ് പേർക്ക് കൂടി ഷിഗെല്ല രോഗബാധ സ്ഥിരീകരിച്ചു

വ്യവസായി ബോബി ചെമ്മണൂര്‍ നടി ഹണി റോസിനെതിരെ നടത്തിയ പരാമര്‍ശങ്ങളില്‍ പരസ്യമായി ക്ഷമാപണം നടത്തി

Recent Comments

EDITOR PICKS

റേഷൻ കാർഡ് മുൻഗണനാ വിഭാഗത്തിലേക്ക് മാറ്റാം: ജൂലൈ 17 വരെ അപേക്ഷ സമർപ്പിക്കാം

സംസ്ഥാനത്ത് ആറ് പേർക്ക് കൂടി ഷിഗെല്ല രോഗബാധ സ്ഥിരീകരിച്ചു

POPULAR POSTS

ഐസിസി വനിതാ ടി20 ലോകകപ്പ് : ഇന്ത്യ പുറത്ത്.

‘ഓപ്പറേഷൻ അമിസ്താദ്’: വെനസ്വേലയ്ക്ക് ഇന്ത്യയുടെ സഹായഹസ്തം; ദൗത്യ സംഘം കരാക്കസിൽ എത്തി

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ജൂൺ 29 | തിങ്കൾ ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

ജൂൺ 29

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************