🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 29 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

സമ്പത്തുകൊണ്ടു മാത്രം ലഭിക്കാത്ത സമ്പന്നത
———————————————————————-

ഏറ്റവും ദരിദ്രർ എന്നു മറ്റുള്ളവർ കരുതിയ ഒരു കുടുംബത്തെ സഹായിക്കാനായി, നല്ലവരായ അന്നാട്ടുകാർ ഒരു പിരിവെടുത്തു. എല്ലാവരും അകമഴിഞ്ഞു സഹായിച്ചു.
ഒരു സാധു കുടുംബവും തങ്ങളുടെ കഴിവിൻ്റെ പരമാവധിയായ നൂറു രൂപ നൽകി അതിൽ പങ്കെടുത്തു. പിരിവെടുപ്പിനു നേതൃത്വം നൽകിയവർ, അതു പൂർത്തീകരിച്ചു തിരികെ ആ ഭവനത്തിലെത്തി, അവർ പിരിച്ചെടുത്ത തുക അവർക്കു കൈമാറിയിട്ടു പറഞ്ഞു: “നിങ്ങളാണ് ഈ നാട്ടിലെ ഏറ്റവു ദരിദ്രർ. ഇതു നിങ്ങൾക്കുപയോഗിക്കാം”.

തങ്ങളാണു നാട്ടിലെ ഏറ്റവും ദരിദ്രർ എന്ന് അപ്പോഴാണവർ അറിഞ്ഞത്. അതവരിൽ ഞെട്ടലുളവാക്കി. തങ്ങൾ ദരിദ്രരാണെന്ന് അവർ ഒരിക്കലും കരുതിയിരുന്നില്ല. അവർ തങ്ങൾക്കുള്ളതുകൊണ്ട് സംതൃപ്തരായാണ് കഴിഞ്ഞിരുന്നത്. അതിനാൽ, അവർ ആ പണം ഉപയോഗിച്ചില്ല. അതവർ സൂക്ഷിച്ചു വെച്ചു!

കുറേ നാളുകൾ കഴിഞ്ഞു ചില സാമൂഹ്യ പ്രവർത്തകർ അവരുടെ വീട്ടിലെത്തി, തങ്ങൾ വീടില്ലാത്ത ഒരുവനു നിർമ്മിച്ചു നൽകുന്ന വീടിന് സഹായം അഭ്യർത്ഥിച്ചു. ആ കുടുംബം മുൻപു തങ്ങൾക്കു ദാനമായി കിട്ടിയ പണം മുഴുവൻ ആ നല്ല സംരംഭത്തിനു നൽകി. ചെറിയ ആ ഭവനത്തിൽ നിന്നും ലഭിച്ച ആ വലിയ തുക കണ്ടു് അവർ അത്ഭുതത്തോടെ പറഞ്ഞു: “ഞങ്ങൾ കണ്ടതിൽ വച്ചേറ്റം സമ്പന്നർ നിങ്ങളാണ് !”

സ്വന്തം അളവുകോൽ കൊണ്ട് നാം ആരേയും അളക്കാൻ തുനിയരരുത്. സമ്പത്തും, ദാരിദ്ര്യവും, ആപേക്ഷികമായ അവസ്ഥാന്തരങ്ങൾ മാത്രം. പണവും പ്രതാപമുള്ളവരെന്നു മറ്റുള്ളവർ കരുതുന്ന പലരേക്കാളും, ജീവിതത്തിൽ സന്തോഷവും സംതൃപ്തിയും അനുഭവിക്കുന്നവർ, കുടിലുകളിൽ കഴിയുന്നുണ്ടാകും. പണം കൊടുത്താൽക്കിട്ടാത്ത ഒട്ടേറെ കാര്യങ്ങൾ ജീവിതത്തിലുണ്ട്. അതിൽ ഏറെ വിലയേറിയ ഒന്നാണ് ഉള്ളതിൽ സംതൃപ്തിയും സന്തോഷവും കണ്ടത്തുന്ന മനോഭാവം. ഏറെ സമ്പന്നതയിലായിരിക്കും, അങ്ങനെയുള്ളവർ ജീവിക്കുന്നത്. നമുക്കും അതിനു കഴിഞ്ഞിരുന്നുവെങ്കിൽ… ?

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര