🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 03 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

മുമ്പോട്ടു യാത്ര ചെയ്യാം കരുത്തോടെ, കരുതലോടെ
—————————————————————————-

ഇബ്സൻ്റെ ‘ബ്രാൻഡ് ‘ എന്ന നാടകത്തിൽ, ഒരു പുരോഹിതൻ, മലമുകളിലെ ദേവാലയത്തിലേക്കു്ക്ക് ഒരു കൂട്ടം ജനങ്ങളുമായി പോകുകയാണ്. യാത്ര നീളുന്നതതുസരിച്ച്, ജനത്തിൻ്റെ അസംതൃപതി വർദ്ധിച്ചു വന്നു. അവര
ദ്ദേഹത്തെഅപഹസിക്കാനും അവഹേളിക്കാനും ആരംഭിച്ചു. ആ സമയത്ത് അരോ വിളിച്ചു പറഞ്ഞു: താഴെ പുഴയിൽ ഊത്ത ഇളകിയിരിക്കുന്നുവെന്ന്. ജനക്കൂട്ടത്തിൻ്റെ യാത്ര അവിടെ അവസാനിച്ചു. അവരെല്ലാം, ഊത്തയുടെ പുറകെ ആറ്റിലേക്കു പാഞ്ഞു. പക്ഷെങ്കിൽ, പുരോഹിതൻ തൻ്റെ യാത്ര തുടർന്നു.

പാതി വഴിയിൽ തങ്ങളുടെ യാത്ര അവസാനിപ്പിച്ച പലരും, വഴിയോരക്കാഴ്ചകളിൽ ഭ്രമിച്ചു പോയവരാണ്. വിശ്രമസ്ഥലങ്ങളോ, വിനോദ കേന്ദ്രങ്ങളോ, വീടുകളാക്കുന്നവർക്ക് പ്രതീക്ഷയർപ്പിക്കുവാൻ ഒരിടമോ, എത്തിച്ചേരാൻ ഒരു ലക്ഷ്യമോ ഉണ്ടാകണമെന്നില്ല !

ഒരു വഴിയും ലക്ഷ്യസ്ഥാനമാകാൻ പാടില്ല. മാർഗം മാത്രമാകണം വഴി. വഴിമനോഹരമായാലും മോശമായാലും, അതുമൂലം ലക്ഷ്യം മുടങ്ങരുത്. മലമുകളിലേക്കുള്ള വഴികൾ ദൈർഘ്യമുള്ളവയാകും; ദുർഘടവും. ചെന്നെത്തേണ്ട തീരങ്ങൾക്കു വേണ്ടി പാതകളും പദങ്ങളും ക്രമീകരിക്കുന്നവർക്കു മാത്രം അവകാശപ്പെട്ടതാണ്, ലക്ഷ്യത്തിലെത്തുമ്പോൾ ലഭിക്കുന്ന കിരീടങ്ങൾ.

സഞ്ചരിച്ചു കഴിഞ്ഞ ദൂരത്തേക്കാൾ പ്രധാനമാണ് പിന്നിടാനുള്ള ദൂരം. ഓരോരുത്തരും തുടങ്ങിവച്ച യാത്രകളെല്ലാം പൂർത്തീകരിക്കപ്പെട്ടിരുന്നുവെങ്കിൽ ഇനിയും കീഴsക്കാൻ ഒന്നും ബാക്കിയുണ്ടാകുമായിരുന്നില്ല. പാതി വഴിയിൽ ഉപേക്ഷിക്കപ്പെട്ട സ്വപ്നങ്ങളുമായാണ് പലരും ജീവിതം അവസാനിപ്പിക്കുന്നത്. നമുക്ക് അതിനിടയാകരുത്.

തനിച്ചുള്ള യാത്രകളും നാം ശീലിക്കണം. പിന്നിലുള്ള ആളുകളുടെ എണ്ണമല്ല, മൂന്നിലുള്ള സ്വപ്നത്തിൻ്റെ തീവ്രതയാണ് നമ്മുടെ കാലുകൾക്കു ബലം പകരേണ്ടത് . മുമ്പോട്ടു തന്നെയാകട്ടെ നമ്മുടെ യാത്ര; കരുത്തോടെ,… കരുതലോടെ…

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര