രാജ്യത്തിന്റെ ആയുധശേഖരം വളർത്തുന്നതിന് ആണവായുധങ്ങളുടെ ഉത്പാദനം വർധിപ്പിക്കാനൊരുങ്ങി ഉത്തരകൊറിയ. കൂടുതൽ കരുത്തുള്ള ആണവായുധങ്ങൾ നിർമിക്കാൻ കൊറിയൻ ഭരണാധികാരി കിം ജോംഗ് ഉൻ നിർദ്ദേശം നൽകിയതായി സ്റ്റേറ്റ് മീഡിയ കെസിഎൻഎ റിപ്പോർട്ട് ചെയ്തു. യുഎസ് നേവിയുടെ വിമാനവാഹിനിക്കപ്പൽ ദക്ഷിണ കൊറിയയിൽ എത്താനിരിക്കുന്ന പശ്ചാത്തലത്തിലാണ് ഉത്തര കൊറിയയുടെ തീരുമാനം.
പുതിയ തന്ത്രപരമായ ആണവായുധങ്ങളും ബാലിസ്റ്റിക് മിസൈലുകളിൽ വാർഹെഡുകൾ ഘടിപ്പിക്കുന്നതിനുള്ള സാങ്കേതികവിദ്യയും ഉൾപ്പെടെയുള്ള രാജ്യത്തിന്റെ ആണവായുധ പരിപാടികൾ പരിശോധിക്കുന്നതിനിടെയാണ് കിം ഇക്കാര്യം വ്യക്തമാക്കിയതെന്ന് കെസിഎൻഎ റിപ്പോർട്ട് ചെയ്തു.
ഏത് സമയവും ആണവാക്രമണം നടത്താൻ ഉത്തര കൊറിയ തയ്യാറായിരിക്കണമെന്ന് കിം നിർദ്ദേശം നൽകിയിട്ടുണ്ട്. കൃത്യമായ പദ്ധതി തയ്യാറാക്കി ആണവായുധങ്ങളുടെ ശേഖരം വർധിപ്പിക്കണം. കൂടുതൽ കരുത്തുറ്റ ആയുധങ്ങൾ നിർമിക്കണം.അതിലൂടെ നമ്മെ ശത്രുക്കൾ ഭയക്കുമെന്നും നമ്മുടെ നാടിനെയും നാട്ടുകാരെയും അതിൻ്റെ പരമാധികാരത്തെയും ചോദ്യം ചെയ്യാൻ അവർ ഭയക്കുമെന്നും കിം പറഞ്ഞതായി റിപ്പോർട്ടുകളുണ്ട്.
