🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 10 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

സഹവർത്തിത്തമാണ്
സൗഹൃദങ്ങളെ നില നിർത്തേണ്ടത്
——————————————————————————————

ഗുരുവും ശിഷ്യരും കൂടി ചന്തയിൽ ഇരിക്കുകയായിരുന്നു. അപ്പോൾ ഒരാൾ ഒരു പശുവിനേയും കൊണ്ട് പോകുന്നതവർ കണ്ടു. ഗുരു ശിഷ്യരോടു ചോദിച്ചു: “അയാൾ പശുവിനേയാണോ, അതോ, പശു അയാളെയാണോ നിയന്ത്രിക്കുന്നത് ?”
ശിഷ്യർ പറഞ്ഞു: “പശുവിനെ ബന്ധിച്ചിരിക്കുന്ന കയർ, അയാളുടെ കയ്യിൽ ആയതു കൊണ്ട് അയാളാണു പശുവിനെ നിയന്ത്രിക്കുന്നത് “.

മറുപടി കേട്ട ഗുരു, പശുവിൻ്റെ അടുക്കൽച്ചെന്ന് അതിനെ ബന്ധിച്ചിരുന്ന കയർ മുറിച്ചുകളഞ്ഞു. നിയന്ത്രണം വിട്ട പശു, അപ്പോൾ ഓടാൻ തുടങ്ങി.പുറകേ അയാളും. ഗുരു ചോദിച്ചു: “ഇപ്പോൾ, ആര് ആരെയാണു നിയന്ത്രിക്കുന്നത് ?”
ശിഷ്യർ പറഞ്ഞു: “പശു അയാളെ!” ഗുരു കൂട്ടിച്ചേർത്തു: “പശു പോകുന്നതാണ് ഇനി അയാളുടെ വഴി”.

എല്ലാ ചരടുകളും പിറകോട്ടു വലിക്കുന്നവയായിരിക്കണമെന്നില്ല. എല്ലാ ബന്ധങ്ങളും നിലനിൽക്കുന്നത് ദൃശ്യമോ, അദൃശ്യമോ ആയ ചില കാരണങ്ങളുടെ പേരിലാണ്.
പൊരുത്തക്കേടുകൾക്കും, പടലപിണക്കങ്ങൾക്കുമപ്പുറം, പരസ്പരം ചേർത്തുനിർത്തുന്ന ഒരു കാരണമെങ്കിലും, കണ്ടെത്താനാകാത്തവർ, അകലങ്ങളിലേക്കു തന്നെയാകും യാത്ര ചെയ്തു കൊണ്ടിരിക്കുക.

കൂട്ടുചേർന്നു നിൽക്കാൻ തക്കതായ പ്രേരണ ഉണ്ടെങ്കിൽ, ആരും ആരേയും നിയന്ത്രിക്കണ്ടി വരികയില്ല. നിർബന്ധിത നിയന്ത്രണങ്ങളല്ല, സ്വമനസ്സാലുളള സഹവർത്തിത്വമാണ് എല്ലാ സൗഹൃദങ്ങളേയും പിടിച്ചുനിർത്തുന്നതും, നിലനിർത്തുന്നതും.

ഒരു വ്യക്തിയെ കുറിച്ച് വ്യക്തമായി അറിഞ്ഞു മനസ്സിലാക്കാതെ, പുകഴ്ത്തിപ്പറയാനോ മോശമായി ചിത്രീകരിക്കാനോ പാടില്ല. ജനങ്ങൾക്കിടയിൽ തന്നെ പുകഴ്ത്തി പറയുന്ന പ്രചാരകരെ പറഞ്ഞു വിടുകയും, അതുവഴി ജനങ്ങളെ പല വിധത്തിലും ചൂഷണം ചെയ്ത് ലാഭം കൊയ്യുന്നവരും കുറവല്ല.

ചില സ്വാർത്ഥ താൽപര്യങ്ങൾക്ക് വേണ്ടി ഏതെങ്കിലും വ്യക്തിയിലേക്ക് അവനിലില്ലാത്ത നന്മയും തിന്മയും ചേർത്ത് പറയുമ്പോൾ അടിസ്ഥാനരഹിതമായ കള്ളപ്രചാരണമാണ് നാം നടത്തുന്നതെന്നോർക്കുക. വിനയവും എളിമയും തന്റെ സ്വത്തായിട്ടുള്ള ഒരു വ്യക്തിയേ എല്ലാവരും ഇഷ്ടപെടുന്നു.

ജീവിതത്തിലവർക്ക് പ്രശ്നങ്ങളും പ്രതിസന്ധികളും നന്നേ അപൂർവ്വമായിരിക്കും.
ഒരാൾക്ക് എന്തെല്ലാം കുറവുകളുണ്ടെങ്കിലും എളിമയുള്ള അയാളുടെ സ്വഭാവം പലപ്പോഴും അതു നികത്തുന്നു.

മത്സരാദിഷ്ടതമായ ലോകത്ത് വിനയപൂർവ്വമായ ലളിത ജീവിതവും ഉയർന്ന ചിന്തയുമാകട്ടെ നമ്മുടെ ജീവിത ദർശനം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര