🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് |11| ഞായർ ✍ പ്രൊഫസ്സർ എ.വി. ഇട്ടി മാവേലിക്കര

ആൾക്കൂട്ടത്തിലും നീതി നിവർത്തിക്കാൻ ആകട്ടെ

രാജാവ് വലിയൊരു പൂജ നടത്താൻ തീരുമാനിച്ചു. പൂജയ്ക്കിടയിലെ അഭിഷേകത്തിനായി ലിറ്റർ കണക്കിനു പാൽ വേണം. പ്രജകൾ ഓരോരുത്തതും ഓരോ ലിറ്റർ പാൽ വീതം കൊണ്ടു വരണമെന്നു രാജാവ് ഉത്തരവിട്ടു. കൊട്ടാര മുറ്റത്ത് അതിനായി ഒരു പടുകൂറ്റൻ പാത്രവും വച്ചു.

ഒരാൾ ചിന്തിച്ചു: “എല്ലാവരും പാൽ കൊണ്ടുവന്നൊഴിക്കും. ആ തിരക്കിനിടയിൽ ഞാൻ മാത്രം വെള്ളമൊഴിച്ചാൽ ആര് അറിയാനാ? വെറുതേയെന്തിന്ഒ രു ലിറ്റർ പാൽ കളയണം?” അയാൾ അതു തന്നെ ചെയ്തു. അവസാനം നോക്കിയപ്പോൾ വലിയ പാത്രത്തിൽ നിറയെ വെള്ളം മാത്രം.

ആ ഒരാൾ വിചാരിച്ചതു പോലെയും പ്രവൃത്തിച്ചതു പോലെയും  എല്ലാവരും വിചാരിക്കുകയും പ്രവൃത്തിക്കുകയും ചെയ്തു.

നമ്മുടെ മനസ്സ് പലപ്പോഴും ഇങ്ങനെയാണ് . ആൾക്കൂട്ടത്തിൽ ചെയ്യുന്നത് ആരറിയാൻ

എന്നാകും  ചിന്ത? ആൾക്കൂട്ട മന:ശാസ്ത്രത്തിൻ്റെ അടിസ്ഥാനം തന്നെ ഇതാണ്. ആൾക്കൂട്ട സംഘർഷങ്ങളിൽ നാശനഷ്ടങ്ങളുണ്ടാകുന്നതും, മിക്കവാറും ഈ ചിന്ത കൊണ്ടു തന്നെയാണ്. കൂട്ടത്തിൽ ചെയ്യുന്നത് ആരുമറിയില്ലെന്ന ചിന്ത. വ്യക്തികൾ ചേരുന്നതാണ് ആൾക്കൂട്ടം അതുകൊണ്ടുതന്നെ, വ്യക്തി മനസ്സ് ആൾക്കൂട്ടത്തിലും പ്രതിഫലിക്കുന്നു.

നാം രഹസ്യമായി ചെയ്യുന്നതു പലതും ആരുമറിയുന്നില്ല എന്നാണു നമ്മുടെ ചിന്ത. എന്നാൽ രാജകൊട്ടാരത്തിലെ പാൽപാത്രം പോലെ, ഒടുവിൽ എല്ലാം ലോകത്തിനു മുമ്പിൽ പച്ചവെള്ളം പോലെ വെളിപ്പെടും.

രഹസ്യമായിട്ടായാലും, പരസ്യമായിട്ടായാലും, നാം ചെയ്യുന്ന പ്രവൃത്തികൾ എല്ലാം നീതിനിഷ്ഠ മായിരിക്കണം. കാഴ്ചയ്ക്കായിട്ടോ, കയ്യടിക്കായിട്ടോ അല്ല, പൊതു ഗുണത്തിനും, നന്മയ്ക്കും ആയിട്ടായിരിക്കണം നമ്മുടെ പ്രവൃത്തികൾ എല്ലാം. എല്ലാവരും അപ്രകാരം ചെയ്യമ്പോൾ, സമൂഹം ശുദ്ധമാകും, ശുഭ്രമാകും; പാൽ പോലെ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര