📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 20 | വ്യാഴം ✍️ കപിൽ ശങ്കർ

🔹വീണ വിജയന്‍ ഇന്റര്‍നെറ്റ് കോളുകള്‍ വിളിച്ച് അനധികൃത പണമിടപാടുകള്‍ നടത്തിയത് കോഴിക്കോട്ടെ ഡിടിപിസി ഡെസ്റ്റിനേഷന്‍ മാനേജര്‍ നന്ദുലാലിന്റെ പേരിലുള്ള സിം കാര്‍ഡ് ഉപയോഗിച്ചാണെന്ന് എന്‍ഫോഴ്സ്മെന്റ്. 20 കോടി രൂപയുടെ ഇടപാടുകളെക്കുറിച്ച് അന്വേഷിക്കുന്നുണ്ട്. വീണയും റിയാസും ആവശ്യപ്പെട്ടിട്ടാണ് സിം എടുത്തതെന്നാണ് നന്ദുലാലിന്റെ മൊഴി. വീണയെ എന്‍ഫോഴ്സ്മെന്റ് വീണ്ടും ചോദ്യം ചെയ്യും.

🔹പ്രതിപക്ഷ നേതാവ് പിണറായി വിജയന്റെ മകള്‍ വീണ വിജയന്‍ ഹവാലാ ഇടപാടുകള്‍ നടത്തിയെന്ന് എന്‍ഫോഴ്സ്മെന്റ് ഡയറക്ടറേറ്റ്. വീണ ദുബായിലേക്ക് 85 ലക്ഷം രൂപ അയച്ചെന്നും ഇതിന്റെ രേഖകള്‍ വീണയുടെ ഡയറിയില്‍നിന്ന് കിട്ടിയെന്നും ഇഡി. വരുമാനത്തേക്കാള്‍ കൂടുതല്‍ തുകയുടെ ഇടപാടുകള്‍ നടത്തി. മറ്റൊരാളുടെ പേരിലുള്ള സിംകാര്‍ഡ് ഉപയോഗിച്ചാണ് ഇന്റര്‍നെറ്റ് കോളുകളും രാജ്യാന്തര ഇടപാടുകളും നടത്തിയതെന്നും കണ്ടെത്തി.

🔹പിണറായി വിജയന്‍ സംസ്ഥാന വൈദ്യുതി മന്ത്രിയായിരുന്ന കാലം മുതലേ അഴിമതിപ്പണം വെളുപ്പിക്കാനാണ് വീണയുടെ കമ്പനികളെ മറയാക്കിയതെന്ന് ബിജെപി നേതാവ് ഷോണ്‍ ജോര്‍ജ്ജ്. പിണറായി വിജയന് ഉളുപ്പുണ്ടെങ്കില്‍ പ്രതിപക്ഷ നേതൃസ്ഥാനം രാജിവെക്കണമെന്നും അദ്ദേഹം ആവശ്യപ്പെട്ടു.

🔹പ്രതിപക്ഷ നേതാവ് പിണറായി വിജയന്റെ മകള്‍ വീണാ വിജയനെതിരായ ഇഡി നടപടിയില്‍ നിയമം നിയമത്തിന്റെ വഴിക്ക് പോകുമെന്ന പ്രതികരണവുമായി ആഭ്യന്തര മന്ത്രി രമേശ് ചെന്നിത്തല. വീണയുടെ ഹവാല ഇടപാട് സംസ്ഥാന ആഭ്യന്തരവകുപ്പിന്റെ മുന്‍പാകെ വന്നിട്ടില്ലെന്നും ചെന്നിത്തല ഡല്‍ഹിയില്‍ മാധ്യമങ്ങളോട് പ്രതികരിച്ചു.

🔹ഓപ്പറേഷന്‍ തൂഫാന്റെ ഭാഗമായി സംസ്ഥാനത്തു 35 കേസുകളിലായി 37 പേര്‍ കൂടി അറസ്റ്റിലായി. ഇതോടെ ഓപ്പറേഷന്‍ തൂഫാന്റെ ഭാഗമായി എടുത്ത കേസുകളുടെ എണ്ണം 9,213 ആയി ഉയര്‍ന്നു. 9941 പേര്‍ അറസ്റ്റിലായി. ഇതുവരെ 8242 ഗ്രാം എം.ഡി.എം.എയും 979 കിലോഗ്രാം കഞ്ചാവും 4727 ഗ്രാം ഹാഷിഷ് ഓയിലും 514 ഗ്രാം ഹെറോയിനും പിടിച്ചെടുത്തിട്ടുണ്ട്.
വ്ളോഗര്‍ ഫാത്തിമ നസ്രിന്‍ പ്രതിയായ കേസില്‍ ഏഴംഗ സംഘംകൂടി പിടിയിലായി.

🔹ശബരിമല സ്വര്‍ണ്ണക്കൊള്ള കേസില്‍ ദേവസ്വം ബോര്‍ഡ് മുന്‍ പ്രസിഡന്റ് പി.എസ് പ്രശാന്തിനെയും എ അജികുമാറിനെയും വീണ്ടും റിമാന്‍ഡ് ചെയ്തു. സെപ്റ്റംബര്‍ ഒന്നുവരെയാണ് കൊല്ലം വിജിലന്‍സ് കോടതി റിമാന്‍ഡ് നീട്ടിയത്. 2019 ലെ സ്വര്‍ണ്ണക്കൊള്ളയുമായി പ്രതികള്‍ക്ക് ബന്ധമുണ്ടെന്നാണ് പ്രോസിക്യൂഷന്റെ വാദം.

🔹നിയമസഭാ തെരഞ്ഞെടുപ്പിനു മുമ്പ് 7.32 കോടി രൂപയുടെ ബ്ലീച്ചിങ് പൗഡര്‍ വാങ്ങിയതിലെ ക്രമക്കേട് വിജിലന്‍സ് അന്വേഷിക്കണമെന്ന് ആവശ്യപ്പെട്ട് ആരോഗ്യമന്ത്രി കെ മുരളീധരന്‍ ആഭ്യന്തര മന്ത്രി രമേശ് ചെന്നിത്തലക്ക് കത്തു നല്‍കി. പ്രിന്‍സിപ്പല്‍ സെക്രട്ടറി നടത്തിയ അന്വേഷണം ആരോപണ വിധേയരെ സംരക്ഷിക്കുന്നതാണെന്നാണ് ആരോഗ്യമന്ത്രിയുടെ വിലയിരുത്തല്‍.

🔹തമിഴ്നാട് മുഖ്യമന്ത്രി സി ജോസഫ് വിജയ്യുമായി കൂടിക്കാഴ്ച നടത്തി കേരള മുഖ്യമന്ത്രി വി ഡി സതീശന്‍. ചെന്നൈ മഹാബലിപുരത്ത് നടക്കുന്ന ദക്ഷിണ മേഖലാ കൗണ്‍സിലിന്റെ 31 -ാം യോഗത്തിനിടെയാണ് മുഖ്യമന്ത്രിമാര്‍ തമ്മില്‍ കൂടിക്കാഴ്ച നടത്തിയത്. വ്യവസായ മന്ത്രി പി കെ കുഞ്ഞാലിക്കുട്ടിയും ഒപ്പമുണ്ടായിരുന്നു. ദക്ഷിണ മേഖലാ കൗണ്‍സിലില്‍ കേന്ദ്ര ആഭ്യന്തര മന്ത്രി അമിത് ഷാ അധ്യക്ഷത വഹിച്ചു.

🔹മുട്ടില്‍ മരംമുറി കേസില്‍ വിചാരണ സ്റ്റേ ചെയ്യണമെന്ന അഗസ്റ്റിന്‍ സഹോദരങ്ങളുടെ ഹര്‍ജി ഹൈക്കോടതി തള്ളി. പ്രതി റോജി അഗസ്റ്റിന്‍ കോടതിയില്‍ ഹാജരായി. ആന്റോ അഗസ്റ്റിനും ജോസ് കുട്ടി അഗസ്റ്റിനും എത്തിയില്ല. മറ്റ് പ്രതികള്‍ എവിടെ എന്ന് കോടതി ചോദിച്ചു. കോടതിയെ കളിയാക്കുകയാണോ എന്നും കോടതി ചോദിച്ചു.

🔹മയക്കുമരുന്നു കേസില്‍ റിട്ടയേഡ് ഐപിഎസ് ഉദ്യോഗസ്ഥന്റെ മകന്‍ തൃശൂരില്‍ അറസ്റ്റിലായി. ക്രൈം ബ്രാഞ്ച് എസ്പിയായിരുന്ന പി.എന്‍. ഉണ്ണിരാജയുടെ മകന്‍ അഭിജിത്ത് (31), കൂട്ടുകാരന്‍ വിയ്യൂര്‍ സ്വദേശി റോജര്‍ വി. ദേവസി (31) എന്നിവരാണ് എക്സൈസ് സംഘത്തിന്റെ പിടിയിലായത്. ഇവരില്‍നിന്ന് അഞ്ചു ഗ്രാം എംഡിഎംഎ പിടിച്ചെടുത്തു.

🔹റിക്രൂട്ടിങ് ഏജന്റുമാരുടെ ചതിക്കുഴിയില്‍ വീണ് റിയാദിലെത്തി ദുരിതത്തിലായ മലയാളികളടക്കമുള്ള 24 നഴ്സുമാര്‍ക്ക് റിയാദിലെ സ്വകാര്യ ആശുപത്രികളില്‍ ജോലി നല്‍കി. വേള്‍ഡ് മലയാളി ഫെഡറേഷന്‍ റിയാദ് കൗണ്‍സില്‍ ഭാരവാഹികള്‍ ഇടപെട്ടാണ് കേരളം, തമിഴ്‌നാട്, കര്‍ണാടക എന്നീ സംസ്ഥാനങ്ങളില്‍നിന്നുള്ള നഴ്‌സുമാര്‍ക്കു ജോലി നല്‍കിയത്.

🔹കോഴിക്കോട് കൊടുവള്ളിയില്‍ മോഷണക്കുറ്റം ആരോപിച്ച് ഏഴാം ക്ലാസുകാരനെ മര്‍ദ്ദിച്ച സംഭവത്തില്‍ കുട്ടിയുടെ പിതൃ സഹോദരന്‍, ഭാര്യ എന്നിവര്‍ക്കെതിരെ കേസെടുത്ത് പൊലീസ്. പരാതി ഇല്ലെന്ന പേരില്‍ കൊടുവള്ളി പൊലീസ് നേരത്തെ സംഭവത്തില്‍ കേസെടുത്തിരുന്നില്ല. ചൈല്‍ഡ് വെല്‍ഫെയര്‍ കമ്മിറ്റി ഇടപെട്ട് റൂറല്‍ എസ്പിക്ക് നിര്‍ദേശം നല്‍കിയതനുസരിച്ചാണ് കൊടുവള്ളി പൊലീസ് കേസെടുത്തത്.

🔹പുലിക്കളിക്കെതിരെ നടന്‍ വികെ ശ്രീരാമന്‍. പുരുഷന്മാര്‍ മാറും വയറും വളര്‍ത്തി രൂപവൈകൃതമുണ്ടാക്കി പെയിന്റടിച്ചു തുള്ളുന്നതു കലാരൂപമല്ലെന്നും ആഭാസമാണെന്നും വികെ ശ്രീരാമന്‍ ഫേസ്ബുക്ക് പോസ്റ്റില്‍ പറഞ്ഞു. കണ്ടാല്‍ ഓക്കാനം വരുന്ന ഇത്തരം കലാ വൈകൃതം ലോകത്ത് ഒരിടത്തുമില്ല. നാട്യശാസ്ത്രത്തില്‍ ഈ കുംഭകുലുക്കിക്കളിയെ ശാര്‍ദൂലവിക്രീഡിതം എന്നാണ് പറയുന്നതെന്നും ശ്രീരാമന്‍ പരിഹസിച്ചു.

🔹പുലിക്കളിയെക്കുറിച്ചുള്ള വി കെ ശ്രീരാമന്റെ പരാമര്‍ശം അപലപനീയമാണെന്ന് ബിജെപി. പ്രസ്താവന പിന്‍വലിച്ച് അദ്ദേഹം തൃശൂര്‍ ജനതയോട് മാപ്പു പറയണമെന്ന് ബിജെപി സിറ്റി ജില്ലാ പ്രസിഡന്റ് ജസ്റ്റിന്‍ ജേക്കബ് ആവശ്യപ്പെട്ടു.

🔹ബിജെപി തൃശൂര്‍ സിറ്റി ജില്ലാ കമ്മിറ്റി ഓഫീസിനരികില്‍ ‘കള്ളപ്പണ സ്വീകരണ വിതരണ മൊത്ത കച്ചവട കേന്ദ്രം’ എന്നെഴുതിയ ബാനര്‍ കെട്ടി കെഎസ്യു പ്രവര്‍ത്തകര്‍. കെഎസ്യു തൃശൂര്‍ ജില്ലാ പ്രസിഡന്റ് ഗോകുല്‍ ഗുരുവായൂരിന്റെ നേതൃത്വത്തിലാണ് ഫ്ളക്സ് കെട്ടിയത്. കെ എസ് യുക്കാര്‍ തീക്കൊള്ളി കൊണ്ട് തല ചൊറിയാന്‍ നില്‍ക്കരുതെന്ന് യുവമോര്‍ച്ച തൃശൂര്‍ സിറ്റി ജില്ലാ കമ്മിറ്റി പ്രതികരിച്ചു.

🔹കേരള സര്‍വകലാശാലയില്‍ വിസിക്കു പൊട്ടു തൊടല്‍ മത്സരം നടത്തി എസ്എഫ്ഐ പ്രതിഷേധം. പാറ്റ പ്രസ്താവനയില്‍ വൈസ് ചാന്‍സലര്‍ മോഹനന്‍ കുന്നുമ്മല്‍ നാണംകെട്ടെന്നും വിദ്യാര്‍ഥികള്‍ മുഖമടച്ചു കൊടുത്തെന്നും ഉദ്ഘാടനം ചെയ്ത എസ്എഫ്ഐ സംസ്ഥാന സെക്രട്ടറി പി.എസ്. സഞ്ജീവ് പറഞ്ഞു.

🔹ടിനി ടോമിനെതിരായ കേസില്‍ നടി അന്‍സിബ ഹസ്സന്‍ എറണാകുളം ജുഡീഷ്യല്‍ മജിസ്ട്രേറ്റ് കോടതിയില്‍ ഹാജരായി രഹസ്യ മൊഴി നല്‍കി. ടിനി ടോം വര്‍ഗീയ അധിക്ഷേപം നടത്തിയെന്ന പരാതിയിലാണ് കേസ്.

🔹സ്ത്രീകളെ സോഷ്യല്‍ മീഡിയയിലൂടെ അധിക്ഷേപിച്ച കേസില്‍ അറസ്റ്റിലായ ഓള്‍ കേരള മെന്‍സ് അസോസിയേഷന്‍ പ്രസിഡന്റ് വട്ടിയൂര്‍ക്കാവ് അജിത് കുമാറിന് കോടതി ജാമ്യം അനുവദിച്ചു. തിരുവനന്തപുരം അഡീഷണല്‍ ചീഫ് ജുഡീഷ്യല്‍ മജിസ്ട്രേറ്റ് കോടതിയാണു ജാമ്യം നല്‍കിയത്.

🔹ഓണവിപണിയില്‍ മുന്നേറ്റവുമായി സപ്ലൈകോ. ഓഗസ്റ്റ് ഒന്നു മുതല്‍ 19 ഉച്ചവരെ സപ്ലൈകോയുടെ വിറ്റുവരവ് 207 കോടി രൂപയായി. സബ്‌സിഡി ഇനത്തില്‍ 72 കോടി രൂപയും നോണ്‍-സബ്‌സിഡി ഇനത്തില്‍ 135 കോടി രൂപയുമാണ് ലഭിച്ചത്. 19 ദിവസത്തിനിടെ സപ്ലൈകോയുടെ വില്പനശാലകളും ഓണം ഫെയറുകളും സന്ദര്‍ശിച്ചത് 26 ലക്ഷത്തോളം ഉപഭോക്താക്കളാണ്.

🔹ഓണത്തിന് ഹോര്‍ട്ടികോര്‍പ്പിന്റെയും വിഎഫ് പി സികെയുടെയും നേതൃത്വത്തില്‍ സംസ്ഥാനത്തുടനീളം 2000 ഓണച്ചന്തകള്‍ ആരംഭിക്കുമെന്ന് കൃഷി വകുപ്പ് മന്ത്രി ടി സിദ്ധിഖ് പറഞ്ഞു. ഓണവിപണിയിലെ വിലക്കയറ്റം നിയന്ത്രിക്കുന്നതിനും വിപണിയില്‍ ഫലപ്രദമായി ഇടപെടുന്നതിനുമായി സംസ്ഥാന സര്‍ക്കാര്‍ 20 കോടി രൂപ നീക്കിവച്ചിട്ടുണ്ട് എന്നും അദ്ദേഹം പറഞ്ഞു.

🔹തലസ്ഥാനത്ത് എട്ട് വയസ്സുകാരിയെ മറയാക്കി എം ഡി എം എ കടത്തിയ കുടുംബം ഉള്‍പ്പെടെയുള്ളവര്‍ എക്സൈസിന്റെയും പോലീസിന്റെയും പിടിയിലായി. രണ്ട് സ്ഥലങ്ങളില്‍ നിന്നായി ആകെ 131 ഗ്രാം എം ഡി എം എ ആണ് പിടിച്ചെടുത്തത്.

🔹കോഴിക്കോട് തൊണ്ടയാടില്‍ കാറിന് സൈഡ് കൊടുത്തില്ലെന്ന് ആരോപിച്ച് സര്‍ക്കാര്‍ ഉദ്യോഗസ്ഥനും ഡ്രൈവര്‍ക്കും മര്‍ദനം. ഭക്ഷ്യ സുരക്ഷാവകുപ്പിലെ ബാലുശേരി സര്‍ക്കിള്‍ ഓഫീസര്‍ പി.ജി. ഉന്‍മേഷിനും ഡ്രൈവര്‍ പ്രമോദിനുമാണ് മര്‍ദനമേറ്റത്. ചേവായൂര്‍ സ്വദേശി സജീവ് രാജാണ് മര്‍ദിച്ചത്.

🔹തിരുവനന്തപുരം പാലോട് കെഎസ്ആര്‍ടിസി ബസും ബൈക്കും കൂട്ടിയിടിച്ച് ബൈക്ക് യാത്രക്കാരനായ പേരയം മീന്‍മുട്ടി ചൂടല്‍ മഞ്ചു സദനത്തില്‍ കിരണ്‍ (24) ആണ് മരിച്ചത്.

🔹ആലപ്പുഴയില്‍ തൈക്കാട്ടുശ്ശേരി പാലത്തില്‍നിന്ന് കായലില്‍ ചാടിയ യുവതിയുടെ മൃതദേഹം കണ്ടെത്തി. പാണാവള്ളി ഗ്രാമപഞ്ചായത്ത് എട്ടാം വാര്‍ഡില്‍ തത്ത്വമസിയില്‍ അമ്പിളി (41) ആണ് മരിച്ചത്.

🔹മുഖസ്തുതി മടുത്തെന്ന് തമിഴ്നാട് മുഖ്യമന്ത്രി വിജയ്. വിജയ്യെ അതിരുവിട്ട് പ്രശംസിക്കുന്ന എംഎല്‍എമാരെ വിലക്കിയിരിക്കുകയാണ് സ്പീക്കറും മന്ത്രിയും. പ്രശംസ അനുവദിക്കരുതെന്ന് വിജയ് എഴുതി നല്‍കിയതായി സ്പീക്കര്‍ ജെസിഡി പ്രഭാകര്‍ അറിയിച്ചു.

🔹വീല്‍ ചെയറില്‍ കഴിഞ്ഞിരുന്ന അമ്മയെ ട്രെയിനിന് മുന്നിലേക്ക് തള്ളിയിട്ട് കൊന്ന് മകന്‍. തമിഴ്നാട് തിരുവള്ളൂര്‍ മനവൂര്‍ സ്റ്റേഷന് സമീപമാണ് സംഭവം. ആവഡി ഹെവി വെഹിക്കിള്‍സ് ഫാക്ടറിയില്‍ കരാര്‍ ജീവനക്കാരന്‍ ആയ പാര്‍ത്ഥസാരഥി (44) ആണ് അമ്മ പദ്മാവതിയെ (71) കൊന്നത്. വീല്‍ചെയറോടെ റെയില്‍വേ ട്രാക്കിലേക്ക് തള്ളിയിടുകയായിരുന്നു.

🔹തെലങ്കാനയില്‍ സ്‌കൂള്‍ പ്രിന്‍സിപ്പാളിനെ കൊലപ്പെടുത്തിയത് വീട്ടില്‍ മോഷണത്തിനു ശ്രമിച്ച വിദ്യാര്‍ത്ഥികളാണെന്നു പൊലീസ്. നല്‍ഗൊണ്ട ജില്ലയിലെ കൊണ്ടമല്ലെപ്പള്ളി നാഗാര്‍ജുന ഗ്രാമ്മര്‍ കണ്‍സെപ്റ്റ് സ്‌കൂള്‍ പ്രിന്‍സിപ്പാള്‍ കല്ലു രൂപ റെഡ്ഡി (50) യാണു കൊല്ലപ്പെട്ടത്. സ്‌കൂളിലെ പത്താം ക്ലാസ് വിദ്യാര്‍ത്ഥികളായ രണ്ടുപേരെയാണു പൊലീസ് അറസ്റ്റ് ചെയ്തത്.

🔹കര്‍ണാടകത്തിലെ യാദ്ഗിരി ജില്ലയില്‍ മക്കളെ കനാലില്‍ തള്ളിയിട്ടു കൊലപ്പെടുത്തിയ പിതാവ് കസ്റ്റഡിയില്‍. ഒന്‍പത് വയസ്സുള്ള പെണ്‍കുട്ടിയും രണ്ടര വയസ്സുള്ള സഹോദരനുമാണ് കൊല്ലപ്പെട്ടത്. കുട്ടികള്‍ക്ക് അമ്മയോടുള്ള അടുപ്പമാണ് ക്രൂരകൃത്യത്തിന് പിന്നിലെന്നാണ് മൊഴി.

🔹കര്‍ണാടകത്തിലെ ബിഡദിയില്‍ വന്‍ വ്യാജമരുന്ന് നിര്‍മാണശാല കണ്ടെത്തി. ഫുഡ് സേഫ്റ്റി വിഭാഗം നടത്തിയ റെയ്ഡിലാണ് അഞ്ച് കോടിയോളം രൂപ വിലവരുന്ന വ്യാജ മരുന്നുകള്‍ പിടികൂടിയത്. അതീവ ഗുരുതരാവസ്ഥയില്‍ ഐസിയുവില്‍ കഴിയുന്ന രോഗികള്‍ക്ക് വരെ ഈ മരുന്നുകള്‍ വിതരണം ചെയ്തിട്ടുണ്ടെന്നാണ് വിവരം.

🔹ഗുജറാത്തിലെ ഭാവ്നഗറില്‍ വ്യാജമദ്യ ദുരന്തം. നാലുപേര്‍ മരിക്കുകയും നിരവധി പേരെ വിവിധ ആശുപത്രികളില്‍ പ്രവേശിപ്പിക്കുകയും ചെയ്തു. മദ്യസല്‍ക്കാരം ഒരുക്കാന്‍ നേതൃത്വം നല്‍കിയ 10 പേരെ കസ്റ്റഡിയിലെടുത്തു.

🔹ഓസ്ട്രേലിയന്‍ മിഷനറി ഗ്രഹാം സ്റ്റെയിന്‍സിനെയും മക്കളെയും ചുട്ടുകൊന്ന കേസിലെ പ്രധാനപ്രതി ദാരാ സിങ്ങിന്റെ ശിക്ഷാ ഇളവില്‍ ഉടന്‍ തീരുമാനമെടുക്കണമെന്ന് സുപ്രീം കോടതി. തീരുമാനം വൈകുന്നതില്‍ ഒഡീഷ സര്‍ക്കാരിനെ വിമര്‍ശിച്ച കോടതി അടുത്തമാസം രണ്ടിനകം തീരുമാനമെടുത്തില്ലെങ്കില്‍ കോടതി തന്നെ വിധി പ്രസ്താവിക്കുമെന്ന് വ്യക്തമാക്കി.

🔹ഡല്‍ഹിയിലെ ടിക്കിരി കലാനില്‍സിഎന്‍ജി സ്റ്റേഷനിലുണ്ടായ സ്ഫോടനത്തില്‍ മൂന്നുജീവനക്കാര്‍ മരിച്ചു.നാലു പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്.

🔹ഛത്തീസ്ഗഢിലെ റായ്പുരില്‍ പ്രായപൂര്‍ത്തിയാവാത്ത മകളെ നിരന്തരമായി ബലാത്സംഗം ചെയ്യുകയും രണ്ടുതവണ ഗര്‍ഭിണിയാക്കുകയും ചെയ്ത സംഭവത്തില്‍ പിതാവടക്കം ആറുപേര്‍ പിടിയില്‍. പ്രസവിച്ച കുഞ്ഞിനെ മറ്റൊരാള്‍ക്ക് കൈമാറിയതായും പോലീസ് പറഞ്ഞു.

🔹ഇറാനുമായുള്ള വ്യാപാര, വാണിജ്യ, സാമ്പത്തിക ഇടപാടുകളും നിര്‍ത്തിവയ്ക്കാന്‍ യുഎഇ പ്രഖ്യാപിച്ചതോടെ ഇറാന്റെ 2700 കോടി ഡോളറിന്റെ വ്യാപാര ഇടപാടുകള്‍ മരവിപ്പിച്ച നിലയിലായി. ഇതേസമയം, യുഎഇയെ ആക്രമിച്ചത് തങ്ങളല്ലെന്ന് ഇറാന്‍.

🔹യുഎസ് – ഇറാന്‍ യുദ്ധം ആറാം മാസത്തിലേക്ക് കടക്കവെ, ഇറാനുമായി വ്യാപാരബന്ധം പുലര്‍ത്തുന്ന രാജ്യങ്ങള്‍ക്കെതിരെ കടുത്ത സാമ്പത്തിക നടപടികള്‍ സ്വീകരിക്കുമെന്ന് യുഎസ് പ്രസിഡന്റ് ട്രംപ്. മുന്‍പെങ്ങുമില്ലാത്ത ഉപരോധവും ഒറ്റപ്പെടുത്തലുമായിരിക്കും ഇറാന്‍ നേരിടേണ്ടി വരികയെന്ന് ട്രംപ്

🔹അമേരിക്കയ്ക്ക് പിന്തുണ നല്‍കുന്ന ഗള്‍ഫ് രാജ്യങ്ങളെ യുദ്ധപങ്കാളികളായി കണക്കാക്കുമെന്ന് ഇറാന്‍ കരസേന മേധാവി. മേഖലയിലെ രാജ്യങ്ങളുടെ അറിവില്ലാതെ ഇത്രയധികം അമേരിക്കന്‍ ടാങ്കര്‍ വിമാനങ്ങള്‍ എങ്ങനെ തമ്പടിക്കുന്നുവെന്നും അദ്ദേഹം ചോദിച്ചു.

🔹പാകിസ്ഥാനില്‍ 13 ലക്ഷം ഫോളോവേഴ്സുള്ള ഇന്‍ഫ്ളുവന്‍സറായ യുവതിയെ വെടിവച്ചുകൊന്നു. ഐഷ ഗിലാമന എന്ന പേരില്‍ അറിയപ്പെടുന്ന ഷംസോ ബീബി എന്ന ഇരുപത്തെട്ടുകാരിയാണു കൊല്ലപ്പെട്ടത്.

🔹ലോക ബാഡ്മിന്റണ്‍ ചാമ്പ്യന്‍ഷിപ്പില്‍ ഇന്ത്യന്‍ താരങ്ങള്‍ പ്രീ ക്വാര്‍ട്ടറിലേക്ക്. വനിതാ സിംഗിള്‍സില്‍ പി.വി സിന്ധു, പുരുഷ സിംഗിള്‍സില്‍ ആയുഷ് ഷെട്ടി, പുരുഷ ഡബിള്‍സില്‍ സാത്വിക് റെഡ്ഡി- ചിരാഗ് ഷെട്ടി എന്നിവര്‍ പ്രീ ക്വാര്‍ട്ടറിലെത്തി. അതേസമയം ലക്ഷ്യാ സെന്‍ പുരുഷന്‍ സിംഗിള്‍സ് രണ്ടാം റൗണ്ടില്‍ പുറത്തായി.

🔹ഹോക്കി ലോകകപ്പില്‍ പാകിസ്താനെ തകര്‍ത്ത് ഇന്ത്യ രണ്ടാം റൗണ്ടില്‍. പൂള്‍ ഡിയിലെ അവസാന മത്സരത്തിനിറങ്ങിയ ഇന്ത്യ 5-3 നാണ് പാകിസ്താനെ തോല്‍പ്പിച്ചത്. ഇതോടെ പൂള്‍ ഡിയില്‍നിന്ന് ഇംഗ്ലണ്ടും ഇന്ത്യയും രണ്ടാം റൗണ്ടിലേക്ക് മുന്നേറി. പാകിസ്താനും വെയ്ല്‍സും പുറത്തായി.

🔹കേരള ക്രിക്കറ്റ് ലീഗിന്റെ മൂന്നാം സീസണിന് ഇന്ന് തുടക്കം. കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തില്‍ ഉച്ചയ്ക്ക് രണ്ടര മുതല്‍ തൃശൂര്‍ ടൈറ്റാന്‍സും കാലിക്കറ്റ് ഗ്ളോബ്സ്റ്റാഴ്സും തമ്മിലുള്ള മത്സരത്തോടെയാണ് ലീഗിന് കൊടിയേറുന്നത്.

🔹രജനികാന്തിനെ നായകനാക്കി നെല്‍സണ്‍ ദിലീപ്കുമാര്‍ സംവിധാനം ചെയ്യുന്ന ജയിലര്‍ 2ന്റെ ആദ്യ ഗാനത്തിന്റെ പ്രൊമോ വീഡിയോ റിലീസ് ചെയ്തു. അല ബൊലേലോ എന്ന ഗാനത്തിന് സംഗീതം ഒരുക്കിയിരിക്കുന്നതും ആലപിച്ചിരിക്കുന്നതും അനിരുദ്ധ് രവിചന്ദര്‍ ആണ്. ഓഗസ്റ്റ് 21ന് ആകും ഗാനത്തിന്റെ ഫുള്‍ വെര്‍ഷന്‍ പ്രേക്ഷകര്‍ക്ക് മുന്നിലെത്തുക. മോഹന്‍ലാല്‍, ശിവരാജ് കുമാര്‍, വിജയ് സേതുപതി, ഹൃതിക് റോഷന്‍, വിനായകന്‍ തുടങ്ങീ വമ്പന്‍ താരനിരയാണ് ചിത്രത്തില്‍ അണിനിരക്കുന്നത്. ചിത്രത്തിന്റെ ഒടിടി അവകാശം സംബന്ധിച്ച റിപ്പോര്‍ട്ടുകളാണ് ഇപ്പോള്‍ പുറത്തുവരുന്നത്. വമ്പന്‍ തുകയ്ക്ക് ആമസോണ്‍ പ്രൈം ആണ് ചിത്രത്തിന്റെ ഒടിടി അവകാശം സ്വന്തമാക്കിയിരിക്കുന്നത് എന്നാണ് റിപ്പോര്‍ട്ടുകള്‍.

🔹കുന്നില്‍ വിജയന്‍ കഥയും തിരക്കഥയും സംവിധാനവും നിര്‍വഹിക്കുന്ന ‘നെയില്‍ കട്ടര്‍’ എന്ന ചിത്രത്തിന്റെ ഫസ്റ്റ് ലുക്ക് പോസ്റ്റര്‍ പുറത്തിറങ്ങി. സിനി ഷൈന്‍ മൂവിസിന്റെ ബാനറില്‍ സിനി വിജയന്‍ നിര്‍മ്മിക്കുന്ന ചിത്രമാണിത്. സാജിത്ത് റഹ്‌മാന്‍, എം കെ ഷെജിന്‍, ഞക്കാട് രാജ , മുരളി മങ്കര, സുധിഷ് നല്ലേപ്പിള്ളി, സത്യന്‍ വല്ലപ്പുഴ, ശശികുമാര്‍ ചിറ്റഴി, നഞ്ജിയമ്മ, കുടശ്ശനാട് കനകം, ജീജ സുരേന്ദ്രന്‍, ശൈലജ, യമുന ശങ്കര്‍, നിതാ രാധ എന്നിവര്‍ പ്രധാന വേഷത്തില്‍ എത്തുന്നു. കുടുംബ ബന്ധങ്ങളുടെ കെട്ടുറപ്പില്‍ കരിനിഴല്‍ വീഴുന്ന ചില നിഗൂഢ സത്യങ്ങള്‍ പ്രതിഫലിക്കുന്ന ചിത്രമാണ് നെയില്‍ കട്ടര്‍. മാതൃപുത്രഭാര്യ വാത്സല്യത്തിന്റെ കളങ്കരഹിതമായ സ്നേഹം ചിത്രത്തില്‍ കാണാം. പാലക്കാടിന്റെ ഹരിതാഭ യാര്‍ന്ന ദൃശ്യഭംഗി ചിത്രത്തില്‍ ഉടനീളമുണ്ട്.

💦 ഗുരുജിയുടെ വാക്കുകൾ
*****************************

മനുഷ്യനെ മറ്റു ജീവജാലങ്ങളിൽ നിന്നും വ്യത്യസ്തനാക്കുന്നത് അറിവ് നേടാനുള്ള അവന്റെ കഴിവ് ആണ്. അറിവ് നേടിയില്ല എങ്കിൽ ഒരു മനുഷ്യന് തന്റെ ജീവിതത്തിൽ സംഭവിച്ചേക്കാവുന്ന പിഴവുകൾ നിരവധി ആണ്.. വിവരം, അറിവ്, തിരിച്ചറിവ്, ജ്ഞാനം ഒക്കെ നമുക്ക് നേടാം.. ഇവ എല്ലാം തമ്മിൽ ബന്ധപ്പെട്ടു കിടക്കുന്നു.. എന്നാൽ വ്യത്യാസവും ഉണ്ട് .. അറിവുകൾ പല തരത്തിൽ നമുക്ക് നേടാം.. വീട്ടിൽ നിന്ന്, വിദ്യാലയങ്ങളിൽ നിന്ന്, സമൂഹത്തിൽ നിന്ന്, അനുഭവങ്ങളിൽ നിന്ന്. അങ്ങനെ നേടുന്ന അറിവ് തിരിച്ചറിവ് ആകുകയും അങ്ങനെ അറിഞ്ഞറിഞ്ഞു അറിവിന്റെ കൊടുമുടികൾ കയറുമ്പോൾ ജ്ഞാനമാകുകയും ചെയ്യും.. അറിയേണ്ടത് അറിയുന്നതാണ് അറിവ്.. മനുഷ്യൻ എന്ന നിലയിൽ ഉള്ള നമ്മുടെ ധർമങ്ങളെ അറിയുക. ശാശ്വതമായ മൂല്യങ്ങളെ അറിയുക.. ആ അറിവ് മുൻനിർത്തി പ്രവർത്തിക്കുക.. ആ അറിവിന്റെ വെളിച്ചത്തിൽ നമ്മുടെ വീടും നാടും ഒക്കെ പ്രകാശിക്കട്ടെ.

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ഓഗസ്റ്റ് 20

•സദ്ഭാവനാ ദിനം (Sadbhavana Diwas)ഇന്ത്യയുടെ മുൻ പ്രധാനമന്ത്രി രാജീവ് ഗാന്ധിയുടെ ജന്മദിനമാണ് (ഓഗസ്റ്റ് 20, 1944) സദ്ഭാവനാ ദിനമായി ആചരിക്കുന്നത്.ഇന്ത്യയിലെ വിവിധ മതസ്ഥർക്കിടയിൽ സൗഹാർദ്ദവും സമാധാനവും ദേശീയ ഒരുമയും വളർത്തുക എന്നതാണ് ഈ ദിനാചരണത്തിന്റെ പ്രധാന ലക്ഷ്യം.

•ദേശീയ പുനരുപയോഗ ഊർജ്ജ ദിനം (Akshay Urja Diwas)ഇന്ത്യയിൽ പുനരുപയോഗ ഊർജ്ജ സ്രോതസ്സുകളുടെ (Renewable Energy) പ്രാധാന്യത്തെക്കുറിച്ച് അവബോധം സൃഷ്ടിക്കാൻ ഈ ദിവസം ഉപയോഗിക്കുന്നു.

•ലോക കൊതുക് ദിനം (World Mosquito Day)അന്തർദേശീയ തലത്തിൽ ഓഗസ്റ്റ് 20 ലോക കൊതുക് ദിനമായി ആചരിക്കുന്നു.
1897 ഓഗസ്റ്റ് 20-നാണ് സർ റൊണാൾഡ് റോസ് എന്ന ബ്രിട്ടീഷ് ശാസ്ത്രജ്ഞൻ ‘അനോഫിലിസ്’ വിഭാഗത്തിൽപ്പെട്ട പെൺകൊതുകുകളാണ് മലേറിയ പരത്തുന്നത് എന്ന് കണ്ടെത്തിയത്. ഈ ശാസ്ത്രീയ കണ്ടെത്തലിന്റെ ഓർമ്മപ്പെടുത്തലായാണ് ഈ ദിവസം ലോക കൊതുക് ദിനമായി മാറ്റിയത്.

•മലബാർ കലാപം: 1921 ഓഗസ്റ്റ് 20-നാണ് കേരള ചരിത്രത്തെ സ്വാധീനിച്ച മലബാർ കലാപം ആരംഭിച്ചത്.

തയ്യാറാക്കിയത്: കപിൽ ശങ്കർ

13 Likes

📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 20 | വ്യാഴം ✍️ കപിൽ ശങ്കർ

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************

ഓഗസ്റ്റ് 20

തയ്യാറാക്കിയത്: കപിൽ ശങ്കർ

കുട്ടികളുടെ സോഷ്യൽ മീഡിയ ഉപയോഗം: സുരക്ഷാ നടപടികള്‍ ശക്തമാക്കാൻ മെറ്റ; കേസുകൾ ഒത്തുതീർപ്പാക്കാൻ ധാരണയായി

നേപ്പാളില്‍ മിന്നല്‍ പ്രളയത്തില്‍ മരണം 157 ആയി: നിരവധി പേരെ കാണാതായി

LEAVE A REPLY Cancel reply

Most Popular

അണിഞ്ഞൊരുങ്ങി ഗജവീരന്മാർ; മൈസൂർ ദസറ ഒരുക്കങ്ങൾക്ക് ഔദ്യോഗിക തുടക്കം.

ട്രെയിനും സ്റ്റേഷനും മലിനമാക്കിയാൽ പണി ഇരട്ടിയാകും; പിഴ വർധിപ്പിച്ച് റെയിൽവേ.

പി എച്ച് കുര്യൻ ഐഎസിന്റെ നിര്യാണത്തിൽ അനുശോചനം രേഖപ്പെടുത്തി.

Recent Comments

EDITOR PICKS

അണിഞ്ഞൊരുങ്ങി ഗജവീരന്മാർ; മൈസൂർ ദസറ ഒരുക്കങ്ങൾക്ക് ഔദ്യോഗിക തുടക്കം.

ട്രെയിനും സ്റ്റേഷനും മലിനമാക്കിയാൽ പണി ഇരട്ടിയാകും; പിഴ വർധിപ്പിച്ച് റെയിൽവേ.

POPULAR POSTS

അണിഞ്ഞൊരുങ്ങി ഗജവീരന്മാർ; മൈസൂർ ദസറ ഒരുക്കങ്ങൾക്ക് ഔദ്യോഗിക തുടക്കം.

ട്രെയിനും സ്റ്റേഷനും മലിനമാക്കിയാൽ പണി ഇരട്ടിയാകും; പിഴ വർധിപ്പിച്ച് റെയിൽവേ.

POPULAR CATEGORY

ABOUT US

FOLLOW US

📱വാർത്തകൾ ഒറ്റനോട്ടത്തിൽ📱 – 2026 | ഓഗസ്റ്റ് 20 | വ്യാഴം ✍️ കപിൽ ശങ്കർ

💦 ഗുരുജിയുടെ വാക്കുകൾ *****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ ********************************************************************

ഓഗസ്റ്റ് 20

തയ്യാറാക്കിയത്: കപിൽ ശങ്കർ

LEAVE A REPLY Cancel reply

Most Popular

Recent Comments

EDITOR PICKS

POPULAR POSTS

POPULAR CATEGORY

ABOUT US

FOLLOW US

💦 ഗുരുജിയുടെ വാക്കുകൾ
*****************************

ചരിത്രത്തിൽ ഇന്നത്തെ ദിവസത്തിന്റെ പ്രാധാന്യങ്ങൾ
********************************************************************